مطالعے دا مضمون نمبر 46
نویں شادیشُدہ جوڑیو، پوری وا لا کے یہوواہ دی خدمت کرو
یہوواہ میری طاقت اے۔ میرے دل نے اوہدے تے بھروسا کیتا اے۔—زبور 28:7۔
گیت نمبر 131 (خوشی نال گاؤ): جو رب نے جوڑیا اے
مضمون تے اِک نظر *
1، 2. (الف) جنہاں دی نوِیں نوِیں شادی ہوئی اے اوہناں نُوں یہوواہ تے بھروسا کیوں رکھنا چاہی دا اے؟ (زبور 37:3، 4) (ب) ایس مضمون چ اَسی کیہڑیاں گلاں تے غور کراں گے؟
شاید تواڈی نوِیں نوِیں شادی ہوئی اے یاں چھیتی شادی ہون والی اے۔ جے ایہہ گل اے تے فیر ضرور تُسی چاہندے او کہ تُسی اپنے جیون ساتھ نال خوشیاں بھری زندگی گزارو۔ بھانویں تُسی اوہنوں بوہت پیار کردے او پر ایہہ وی سچ اے کہ شادیشُدہ زندگی اسان نئیں ہوندی تے میاں بیوی نُوں کئی اہم فیصلے لینے پیندے نیں۔ تُسی جیہڑے فیصلے لیندے او تے جیس طریقے نال مشکلاں دا سامنا کردے او اوہدا اثر ایس گل تے پووے گا کہ اَگے چل کے تُسی دونویں کِنّے خوش رہوو گے۔ جے تُسی یہوواہ تے بھروسا رکھو گے تے تُسی ودھیا فیصلے کر سکو گے، تواڈا بندھن مضبوط ہوئے گا تے تُسی خوش رہوو گے۔ پر جے تُسی خدا دِیاں ہدیتاں تے عمل نئیں کرو گے تے فیر توانوں اپنی زندگی چ مشکلاں دا سامنا کرنا پے سکدا اے تے تواڈی خوشی ختم ہو سکدی اے۔—زبور 37:3، 4 نُوں پڑھو۔
2 ایہہ مضمون نویں شادیشُدہ جوڑیاں لئی اے۔ پر ایہدے چ ایہو جہیاں مشکلاں بارے گل کیتی گئی اے جنہاں دا سامنا سارے شادیشُدہ لوکاں نُوں ہوندا اے۔ ایس مضمون چ دَسیا گیا اے کہ اَسی اوہناں وفادار مرداں تے عورتاں توں کیہہ سکھ سکنے آں جنہاں دا ذکر بائبل چ کیتا گیا اے۔ اَسی ایہو جہیاں گلاں سکھاں گے جنہاں نُوں اَسی فرق فرق معاملیاں دے نال نال شادیشُدہ زندگی تے وی لاگو کر سکنے آں۔ اَسی اپنے زمانے دے کجھ جوڑیاں توں وی سکھاں گے۔
نویں شادیشُدہ جوڑیاں نُوں کیہڑیاں مشکلاں دا سامنا کرنا پے سکدا اے؟
کیہڑے فیصلیاں دی وجہ توں اِک نویں شادیشُدہ جوڑے لئی یہوواہ دی ہور خدمت کرنا مشکل ہو سکدا اے؟ (پیراگراف نمبر 3، 4 نُوں ویکھو۔)
3، 4. نویں شادیشُدہ جوڑیاں نُوں کیہڑیاں مشکلاں دا سامنا کرنا پے سکدا اے؟
3 کجھ لوک شاید نویں شادیشُدہ جوڑیاں نُوں کہن کہ اوہ وی دُوجے جوڑیاں وانگوں زندگی گزارن۔ مثال لئی، شاید ماں پیو، رشتےدار یاں دوست اوہناں تے دبا پان کہ اوہ چھیتی توں چھیتی بچے پیدا کرن یاں اپنا گھر خریدن تے ایہنوں نوِیاں نوِیاں چیزاں نال بھرن۔
4 جے اِک جوڑا سوچ سمجھ کے فیصلے نئیں کرے گا تے اوہ قرضے دے بوجھ تھلے آ سکدا اے۔ فیر میاں بیوی نُوں قرضہ لان لئی کئی کئی گھنٹے کم کرنا پے سکدا اے۔ ایس طرحاں نوکری اوہناں دا اوہ وقت وی کھا سکدی اے جیہڑا اوہناں نُوں مِل کے بائبل پڑھن، خاندانی عبادت کرن یاں مُنادی کرن لئی استمال کرنا چاہی دا اے۔ اوہناں نُوں زیادہ پیسہ کمان یاں اپنی نوکری بچان لئی اوور ٹائم کرنا پے سکدا اے جیس کر کے شاید اوہ عبادتاں تے نہ جا سکن۔ ایہناں ساریاں گلاں دی وجہ توں اوہ یہوواہ دی خدمت دے اوہ موقعے گنوا دین گے جنہاں توں اوہناں نُوں بوہت خوشی مِل سکدی اے۔
5. تُسی بھرا کلاؤس تے بھین مریسہ دی مثال توں کیہہ سکھیا اے؟
5 بوہت ساریاں مثالاں توں پتہ چلدا اے کہ پیسہ یاں چیزاں کٹھیاں کر کے سچی خوشی نئیں مِلدی۔ * ذرا بھرا کلاؤس تے بھین مریسہ دی مثال تے غور کرو۔ جدوں اوہناں دی شادی ہوئی تے اوہ دونویں نوکری کردے سن تاکہ اوہ اِک آرامدہ زندگی گزار سکن، پر اوہ خوش نئیں سن۔ بھرا کلاؤس نے دَسیا: ”ساڈے کول ضرورت توں زیادہ چیزاں سن پر یہوواہ دی ہور خدمت کرن لئی اَسی کوئی منصوبے نئیں بنائے سن۔ سچ دَساں تے ساڈی زندگی پریشانیاں تے اُلجھناں نال بھری ہوئی سی۔“ شاید تُسی وی ویکھیا ہوئے کہ پیسے تے چیزاں توں سچی خوشی نئیں مِلدی۔ جے تواڈے نال اِنج ہویا اے تے بےحوصلہ نہ ہووو۔ دُوجیاں دِیاں چنگیاں مثالاں توں توانوں بوہت فائدہ ہو سکدا اے۔ آؤ سب توں پہلاں ویکھئے کہ شوہر بادشاہ یہوسفط توں کیہہ سکھ سکدے نیں۔
بادشاہ یہوسفط وانگوں یہوواہ تے بھروسا رکھو
6. بادشاہ یہوسفط نے اِک وڈی مشکل دا سامنا کردے ہوئیاں امثال 3:5، 6 چ لکھی گل تے کیویں عمل کیتا؟
6 شوہرو، کیہہ کدی کدی توانوں اپنیاں ذمےداریاں پورا کرنا مشکل لگدا اے؟ جے ہاں تے فیر توانوں بادشاہ یہوسفط دی مثال تے غور کر کے بوہت فائدہ ہو سکدا اے۔ اِک بادشاہ دے طور تے اوہدی ذمےداری سی کہ اوہ پوری قوم دی حفاظت کرے۔ ایس وڈی ذمےداری نُوں پورا کرن لئی اوہنے کیہہ کیتا؟ یہوسفط نے اپنی قوم دی حفاظت کرن لئی کجھ ضروری قدم چُکے۔ اوہنے یہوداہ دے شہراں دِیاں دیواراں نُوں مضبوط کیتا تے 11لکھ 60 ہزار بندیاں دی اِک وڈی فوج تیار کیتی۔ (2-تواریخ 17:12-19) بعد چوں یہوسفط نُوں اِک وڈی مشکل دا سامنا کرنا پیا۔ عمونیاں، موآبیاں تے شعیر دے پہاڑی علاقے دی اِک وڈی فوج اوہدے تے اوہدے گھر والیاں تے اوہدی قوم تے حملہ کرن آئی۔ (2-تواریخ 20:1، 2) ایس مشکل گھڑی چ یہوسفط نے کیہہ کیتا؟ اوہنے یہوواہ کولوں مدد تے طاقت منگی۔ اِنج اوہنے امثال 3:5، 6 چ لکھی گل تے عمل کیتا۔ (ایتاں نُوں پڑھو۔) دُوجی تواریخ 20:5-12 چ یہوسفط دی دُعا لکھی اے جدے توں پتہ چلدا اے کہ اوہ یہوواہ تے پورا بھروسا کردا سی۔ یہوواہ نے اوہدی دُعا دا جواب کیویں دِتا؟
7. یہوواہ نے یہوسفط دی دُعا دا جواب کیویں دِتا؟
7 یہوواہ نے یحزیایل ناں دے اِک لاوی دے ذریعے ایہہ پیغام گھلیا: تُسی قطار بنھ کے چپ چاپ کھلوتے رہنا تے یہوواہ دی نجات ویکھنا جیہڑا تواڈے نال اے۔ (2-تواریخ 20:13-17) عام طور تے جنگاں اِنج نئیں لڑیاں جاندیاں۔ پر ایہہ ہدیت کسے انسان وَلّوں نئیں سگوں یہوواہ خدا وَلّوں آئی سی۔ یہوسفط نے یہوواہ تے پورا بھروسا رکھیا تے اوہی کیتا جو یہوواہ نے کہیا سی۔ جدوں اوہ اپنی فوج لے کے جنگ کرن لئی گیا تے اوہنے سب توں اَگے ماہر سپاہیاں نُوں نئیں سگوں گویاں نُوں گھلیا جنہاں کول کوئی ہتھیار نئیں سن۔ فیر یہوواہ نے اوہ وعدہ پورا کیتا جیہڑا اوہنے یہوسفط نال کیتا سی تے دُشمناں نُوں ہرا دِتا۔—2-تواریخ 20:18-23۔
نویں شادی شُدہ جوڑے یہوواہ دی خدمت نُوں سب توں زیادہ اہمیت دین لئی دُعا کر سکدے نیں، پاک کلام تے غور کر سکدے نیں۔ (پیراگراف نمبر 8، 10 نُوں ویکھو۔)
8. شوہر یہوسفط توں کیہہ سکھ سکدے نیں؟
8 شوہرو، تُسی یہوسفط توں بوہت کجھ سکھ سکدے او۔ اپنے گھر والیاں دی دیکھبھال تے حفاظت کرنا تواڈی ذمےداری اے تے تُسی ایہنوں پورا کرن لئی بڑی محنت کردے او۔ جدوں توانوں مشکلاں دا سامنا ہوندا اے تے شاید تُسی سوچو کہ تُسی آپی ایہناں نُوں حل کر لوو گے۔ پر کدی وی اپنی طاقت تے بھروسا نہ کرو۔ ایہدی بجائے نہ صرف کلّے سگوں اپنی بیوی نال مِل کے وی دُعا چ یہوواہ کولوں مدد منگو۔ بائبل تے تنظیم دِیاں کتاباں دے ذریعے یہوواہ توں رہنمائی حاصل کرو تے فیر اوہدے تے عمل کرو۔ ہو سکدا اے کہ کجھ لوکاں نُوں تواڈے فیصلے صحی نہ لگن تے اوہ توانوں کہن کہ تُسی بےوقوفی کر رہے او۔ اوہ شاید کہن کہ بوہتا پیسہ تے چیزاں کٹھیاں کر کے تُسی اپنے گھرانے دی سب توں ودھیا طریقے نال حفاظت کر سکدے او۔ پر یہوسفط دی مثال نُوں یاد رکھو اوہنے یہوواہ تے بھروسا کیتا تے اپنے کماں دے ذریعے ایس بھروسے نُوں ظاہر وی کیتا۔ جیویں یہوواہ نے یہوسفط دا ساتھ نئیں چھڈیا اوہ تواڈا ساتھ وی نئیں چھڈے گا۔ (زبور 37:28؛ عبرانیوں 13:5) شادیشُدہ جوڑے خوشیاں بھر ی زندگی گزارن لئی ہور کیہہ کر سکدے نیں؟
یسعیاہ نبی تے اوہدی بیوی وانگوں یہوواہ دی خدمت نُوں سب توں زیادہ اہمیت دَوو
9. سانوں بائبل توں یسعیاہ تے اوہدی بیوی بارے کیہہ پتہ چلدا اے؟
9 یسعیاہ تے اوہدی بیوی لئی یہوواہ دی خدمت سب توں زیادہ اہم سی۔ یسعیاہ اِک نبی سی تے لگدا اے کہ اوہدی بیوی وی نبوّت کردی سی کیونکہ بائبل چ اوہنوں نبِیّہ کہیا گیا اے۔ (یسعیاہ 8:1-4) اوہناں دونواں مِل کے اپنا دھیان یہوواہ دی خدمت تے رکھیا۔ اوہناں نے شادیشُدہ جوڑیاں لئی بڑی ودھیا مثال قائم کیتی۔
10. بائبل دِیاں پیشینگوئیاں تے غور کرن نال میاں بیوی دے دل چ یہوواہ دی ہور زیادہ خدمت کرن دی خواہش کیویں پیدا ہوندی اے؟
10 اَج وی شادیشُدہ جوڑے ودھ چڑھ کے یہوواہ دی خدمت کر سکدے نیں۔ اوہ یہوواہ تے اپنا بھروسا مضبوط کرن لئی مِل کے بائبل دِیاں پیشینگوئیاں تے غور کر سکدے نیں تے ویکھ سکدے نیں کہ ایہہ ہمیشاں کیویں پوریاں ہوندیاں نیں۔ (طِطُس 1:2) نالے اوہ غور کر سکدے نیں کہ اوہ کیویں بائبل دِیاں ایہناں پیشینگوئیاں دے پورا ہون چ حصہ پا سکدے نیں۔ مثال لئی، یسوع نے پیشینگوئی کیتی سی کہ خاتمہ آن توں پہلاں بادشاہی دی خوشخبری دی مُنادی ساری دُنیا چ کیتی جائے گی۔ (متی 24:14) سو شادیشُدہ جوڑے ایس پیشینگوئی دے پورا ہون چ حصہ لے سکدے نیں۔ میاں بیوی نُوں ایس گل تے جِنّاں زیادہ یقین ہوئے گا کہ بائبل دِیاں پیشینگوئیاں پوریاں ہو رہیاں نیں، اوناں ای زیادہ یہوواہ دی ہور خدمت کرن لئی اوہناں دا شوق ودھے گا۔
پرسکلہ تے اکوِلہ وانگوں خدا دی بادشاہی نُوں اپنی زندگی چ پہلا درجہ دَوو
11. پرسکلہ تے اکوِلہ نے کیہہ کیتا تے اوہ ایہہ کرن دے قابل کیویں ہوئے؟
11 جوان جوڑے پرسکلہ تے اکوِلہ توں بوہت کجھ سکھ سکدے نیں۔ اوہ یہودی سن تے شہر روم چ رہندے سن۔ یسوع مسیح بارے خوشخبری سنن توں بعد اوہ مسیحی بن گئے۔ اوہ بوہت خوش سن پر فیر اچانک اوہناں دی زندگی بدل گئی۔ شہنشاہ کلودیس نے سارے یہودیاں نُوں شہر روم چھڈن دا حکم دِتا۔ ایس لئی اکوِلہ تے پرسکلہ نُوں اپنا گھر بار چھڈ کے اِک نویں علاقے چ جا کے رہنا پیا تے اوتھے اپنا چھوٹا جیہا کاروبار نویں سِرے توں شروع کرنا پیا۔ کیہہ ایہناں مشکلاں دی وجہ توں اوہناں نے ودھ چڑھ کے یہوواہ دی خدمت کرنا چھڈ دِتا؟ بالکل نئیں۔ اوہ کُرنتھس دی کلیسیا چ جوش نال خدمت کرن لگ پئے تے پولُس رسول نال مِل کے اوتھوں دے بھین بھراواں دا حوصلہ ودھان لگ پئے۔ بعد چ اوہ ایہو جہے علاقیاں چ گئے جِتھے مبشراں دی زیادہ ضرورت سی۔ (اعمال 18:18-21؛ رومیوں 16:3-5) کٹھے یہوواہ دی خدمت کر کے اوہناں نُوں کِنّی خوشی مِلی ہوئے گی۔
12. اِک میاں بیوی نُوں خدا دی خدمت لئی منصوبے کیوں بنانے چاہی دے نیں؟
12 پرسکلہ تے اکوِلہ وانگوں اَج وی شادیشُدہ جوڑے خدا دی بادشاہی نُوں اپنی زندگی چ پہلا درجہ دے سکدے نیں۔ اِک منڈے تے اِک کُڑی نُوں اپنی شادی توں پہلاں اپنے منصوبیاں بارے گل کرنی چاہی دی اے۔ جدوں میاں بیوی خدا دی خدمت لئی منصوبے بناندے نیں تے مِل کے ایہناں نُوں پورا کرن دی کوشش کردے نیں تے فیر اوہ صاف صاف ویکھ سکدے نیں کہ یہوواہ اوہناں دی مدد کیویں کر رہیا اے۔ (واعظ 4:9، 12) ذرا بھرا رسل تے بھین الزبتھ دی مثال تے غور کرو۔ بھرا رسل نے کہیا: ”شادی توں پہلاں اَسی کُھل کے گل کیتی کہ اَسی یہوواہ دی خدمت چ کیہہ کجھ کراں گے۔“ بھین الزبتھ نے کہیا: ”ایہدی وجہ ایہہ سی کہ بعد چوں جدوں سانوں کسے معاملے بارے فیصلہ کرنا ہوئے تے سانوں یہوواہ دی خدمت لئی اپنے منصوبے نہ بدلنے پین۔“ بھرا رسل تے بھین الزبتھ نُوں اِک ایہو جہے علاقے چ جان دا موقع ملیا جِتھے مبشراں دی زیادہ ضرورت سی۔
نویں شادی شُدہ جوڑے یہوواہ دی خدمت نُوں سب توں زیادہ اہمیت دین لئی منصوبے بنا سکدے نیں۔ (پیراگراف نمبر 13 نُوں ویکھو۔)
13. جے اَسی یہوواہ تے بھروسا رکھنے آں تے زبور 28:7 دے مطابق ایہدا کیہہ نتیجہ نکلے گا؟
13 بھرا رسل تے بھین الزبتھ وانگوں کئی جوڑیاں نے فیصلہ کیتا اے کہ اوہ اپنی زندگی نُوں سادہ رکھن گے تاکہ اوہ مُنادی تے تلیم دین دے کم چ زیادہ توں زیادہ وقت لا سکن۔ جدوں میاں بیوی یہوواہ دی خدمت لئی منصوبے بناندے نیں تے مِل کے ایہناں نُوں پورا کردے نیں تے ایہدے چنگے نتیجے نکلدے نیں۔ اِنج یہوواہ تے اوہناں دا بھروسا ودھدا اے، اوہناں نُوں سچی خوشی مِلدی اے تے اوہ ویکھ پاندے نیں کہ یہوواہ اوہناں دا خیال کیویں رکھ رہیا اے۔—زبور 28:7 نُوں پڑھو۔
پطرس رسول تے اوہدی بیوی وانگوں یہوواہ تے اوہدے وعدیاں تے بھروسا رکھو
14. پطرس رسول تے اوہدی بیوی نے ایہہ کیویں ظاہر کیتا کہ اوہ اوس وعدے تے بھروسا کردے نیں جیہڑا یہوواہ نے متی 6:25، 31-34 چ کیتا اے؟
14 پطرس رسول تے اوہدی بیوی نے وی شادی شُدہ جوڑیاں لئی ودھیا مثال قائم کیتی۔ یسوع مسیح نُوں مِلن توں تقریباً چھ مہینے بعد پطرس نُوں اِک اہم فیصلہ لینا سی۔ اپنے گھر والیاں دی ضرورتاں نُوں پورا کرن لئی اوہ اِک مچھیرے دے طور تے کم کردا سی۔ جدوں یسوع نے پطرس نُوں کہیا کہ اوہ اوہدے نال مِل کے کُل وقتی طور تے مُنادی کرے تے ایہدے بارے فیصلہ لین توں پہلاں پطرس نُوں اپنی بیوی بارے وی سوچنا سی۔ (لُوقا 5:1-11) اوہنے یسوع نال مِل کے مُنادی کرن دا فیصلہ کیتا۔ ایہہ بالکل صحی فیصلہ سی۔ اَسی کہہ سکنے آں کہ پطرس دی بیوی نے اوہدے ایس فیصلے چ اوہدا ساتھ ضرور دِتا۔ بائبل توں پتہ چلدا اے کہ یسوع مسیح دے اسمان تے جان توں بعد جدوں پطرس فرق فرق علاقیاں چ جا کے خدمت کردا سی تے کدی کدی اوہدی بیوی وی اوہدے نال جاندی سی۔ (1-کُرنتھیوں 9:5) بےشک پطرس دی بیوی نے مسیحی بیویاں لئی چنگی مثال قائم کیتی۔ ایسے لئی پطرس کُھل کے یہوواہ وَلّوں مسیحی شوہراں تے بیویاں نُوں نصیحت کر سکیا۔ (1-پطرس 3:1-7) پطرس تے اوہدی بیوی نُوں یہوواہ دے ایس وعدے تے پورا بھروسا سی کہ جے اوہ یہوواہ دی بادشاہی نُوں پہلاں درجہ دین گے تے اوہ اوہناں دِیاں ضرورتاں نُوں پورا کرے گا۔—متی 6:25، 31-34 نُوں پڑھو۔
15. تُسی بھرا تیاگو تے بھین ایسٹر توں کیہہ سکھیا اے؟
15 جے تواڈی شادی نُوں کجھ سال ہو گئے نیں تے تُسی ودھ چڑھ کے یہوواہ دی خدمت کرن دی خواہش نُوں کیویں پیدا کر سکدے او؟ اِک طریقہ ایہہ وے کہ تُسی دُوجے شادیشُدہ جوڑیاں دی مثال تے غور کرو۔ مثال لئی، تُسی سلسلہ وار مضموناں”اُنہوں نے اپنے آپ کو خوشی سے پیش کیا“ نُوں پڑھ سکدے او۔ ایہناں مضموناں دے ذریعے ملک برازیل دے اِک میاں بیوی تیاگو تے ایسٹر دے دل چ ایہہ خواہش پیدا ہوئی کہ اوہ ایہو جہے علاقے چ جا کے خدمت کرن جِتھے مبشراں دی زیادہ ضرورت اے۔ بھرا تیاگو نے کہیا: ”بھین بھراواں دے تجربے پڑھ کے اَسی ویکھ سکنے آں کہ یہوواہ اَج کیویں اپنے بندیاں دی مدد کر رہیا اے۔ ایس لئی ساڈے دل چ وی ایہہ خواہش پیدا ہوئی کہ اَسی وی یہوواہ دی رہنمائی مطابق چلیے تے اوہدی مدد نُوں محسوس کرئیے۔“ بعد چ اوہ ملک پیراگوئے چلے گئے جِتھے اوہ پرتگالی زبان بولن والے لوکاں چ مُنادی کر رہے نیں۔ بھین ایسٹر کہندی اے: ”سانوں اِفسیوں 3:20 چ لکھی گل بوہت پسند اے۔ یہوواہ دی خدمت کردے ہوئیاں اَسی کئی وار ایس ایت چ لکھی گل نُوں پورا ہوندیاں ویکھیا اے۔“ اِفسیوں دے ناں خط چ پولس نے کہیا کہ اَسی یہوواہ کولوں جو وی منگاں گے اوہ سانوں اوہدے توں ودھ کے دَوے گا۔ ایہہ گل واقعی سچ اے۔
نویں شادی شُدہ جوڑے یہوواہ دی خدمت نُوں سب توں زیادہ اہمیت دین لئی پُختہ مسیحی جوڑیاں کولوں مشورہ لے سکدے نیں۔ (پیراگراف نمبر 16 نُوں ویکھو۔)
16. جوان جوڑے منصوبے بناندے ویلے کِنہاں کولوں مشورہ لے سکدے نیں؟
16 جوان جوڑے اوہناں شادی شُدہ جوڑیاں کولوں بوہت کجھ سکھ سکدے نیں جنہاں نے یہوواہ تے بھروسا رکھیا۔ کجھ جوڑے کل وقتی طور تے یہوواہ دی خدمت کر رہے نیں۔ جے تُسی یہوواہ دی ہور خدمت کرنا چاہندے او تے کیوں نہ اوہناں کولوں مشورہ لوو۔ اِنج کر کے تُسی یہوواہ تے بھروسا ظاہر کر رہ ہووو گے۔ (امثال 22:17، 19) کلیسیا دے بزرگ وی جوان جوڑیاں دی مدد کر سکدے نیں تاکہ اوہ یہوواہ دی خدمت لئی منصوبے بنا سکن تے ایہناں نُوں پورا کر سکن۔
17. بھرا کلاؤس تے بھین مریسہ نال کیہہ ہویا تے اَسی اوہناں دی مثال توں کیہہ سکھ سکنے آں؟
17 کدی کدی اَسی یہوواہ دی خدمت چ جو کجھ کرنا چاہنے آں اوہ نئیں کر پاندے کیونکہ شاید یہوواہ دی کجھ ہور مرضی ہوندی اے۔ ذرا فیر توں بھرا کلاؤس تے بھین مریسہ دی مثال تے غور کرو۔ شادی دے تِن سال بعد اوہ اپنا گھر چھڈ کے فنلینڈ چلے گئے تاکہ اوہ برانچ دی تعمیر دے کم چ مدد کر سکن۔ فیر اوہناں نُوں پتہ چلیا کہ اوہ اوتھے صرف 6 مہینے رہ سکدے نیں۔ ایہہ سُن کے اوہ مایوس ہو گئے پر فیر کجھ عرصے بعد اوہناں نُوں عربی زبان سکھن دا موقع ملیا۔ ہُن اوہ اِک ہور ملک چ عربی زبان بولن والے لوکاں چ مُنادی کر رہے نیں۔ اوس وقت بارے بھین مریسہ کہندی اے: ”جیہڑا کم تُسی پہلاں کدی نہ کیتا ہووے اوہنوں کرنا اسان نئیں ہوندا۔ اوہنوں کرن لئی توانوں یہوواہ تے پورا بھروسا کرنا پیندا اے۔ میں ویکھیا اے کہ یہوواہ نے ایہو جہے طریقیاں نال میری مدد کیتی اے جنہاں بارے میں سوچیا وی نئیں سی۔ ایہدی وجہ توں یہوواہ تے میرا بھروسا ہور مضبوط ہویا اے۔“ ایس تجربے توں پتہ چلدا اے کہ جے تُسی یہوواہ تے بھروسا رکھو گے تے اوہ توانوں اجر ضرور دَوے گا۔
18. اِک جوڑا کیہہ کر سکدا اے تاکہ یہوواہ تے اوہدا بھروسا مضبوط رہوے؟
18 شادی دا بندھن یہوواہ وَلّوں اِک نعمت اے۔ (متی 19:5، 6) اوہ چاہندا اے کہ شادیشُدہ لوکاں نُوں ایس بندھن توں خوشی ملے۔ (امثال 5:18) جوان جوڑیو، سوچو کہ تُسی اپنی زندگی کیویں گزار رہے او۔ کیہہ تُسی یہوواہ وَلّوں مِلن والیاں ساریاں نعمتاں لئی قدر ظاہر کر رہے او؟ کیوں نہ اپنے حالاتاں بارے یہوواہ کولوں دُعا کرو تے پاک کلام چوں اوہناں اصولاں تے غور کرو جنہاں نُوں تُسی اپنی زندگی تے لاگو کر سکدے او تے فیر یہوواہ دی رہنمائی مطابق چلو۔ تُسی پورا یقین رکھ سکدے او کہ جے تُسی یہوواہ دی خدمت نُوں سب توں زیادہ اہمیت دَوو گے تے تواڈی زندگی خوشیاں نال بھر جائے گی تے توانوں اجر ضرور ملے گا۔
گیت نمبر 21 (خوشی نال گاؤ): بادشاہی نُوں پہلی تھاں دَوو
^ پیراگراف 5 اَسی یہوواہ دی خدمت چ کِنّی طاقت تے وقت لا سکاں گے ایہدا تعلق ساڈے فیصلیاں نال اے۔ خاص طور تے نویں شادیشُدہ جوڑیاں نُوں ایہو جہے فیصلے کرنے پیندے نیں جنہاں دا اثر اوہناں دی پوری زندگی تے ہو سکدا اے۔ ایس مضمون چ دَسیا جائے گا کہ ایہہ جوڑے ایہو جہے فیصلے کیویں کر سکدے نیں جنہاں دی وجہ توں اوہناں نُوں اپنی زندگی چ خوشی تے دلی سکون ملے گا۔
^ پیراگراف 5 ایس مضمون چ کجھ ناں بدل دِتے گئے نیں۔
