مطالعے دا مضمون نمبر 44
یہوواہ دی اَٹل محبت توں توانوں کیہہ فائدہ ہوندا اے؟
یہوواہ دی شفقت [اَٹل محبت، ترجمہ نوِیں دُنیا] ابدی اے۔—زبور 136:1۔
گیت نمبر 108 (خوشی نال گاؤ): رب دا سچا پیار
مضمون تے اِک نظر *
1. یہوواہ خدا سانوں کیہہ کرن دا حوصلہ دیندا اے؟
یہوواہ دی نظر چ اَٹل محبت اِک اہم خوبی اے۔ (امثال 3:3) اوہ چاہندا اے کہ اوہدے بندے وی ایہہ خوبی ظاہر کرن۔اپنے نبی میکاہ دے ذریعے اوہنے اپنے بندیاں نُوں حوصلہ دِتا کہ اوہدے وانگوں اوہ وی شفقت یعنی اَٹل محبت ظاہر کرن۔ (میکاہ 7:18) پر اَٹل محبت ظاہر کرن توں پہلاں سانوں پتہ ہونا چاہی دا اے کہ ایہہ ہے کیہہ۔
2. اَٹل محبت کیہہ اے؟
2 جیہڑا بندہ کسے نال اَٹل محبت کردا اے اوہ اوہدے نال محبت کرنا کدی نئیں چھڈدا۔ اوہ اوہدا وفادار رہندا اے تے ہر قدم تے اوہدا ساتھ دیندا اے۔ یہوواہ نے اَٹل محبت ظاہر کرن دی سب توں ودھیا مثال قائم کیتی اے۔ ایس مضمون چ اَسی ویکھاں گے کہ یہوواہ انساناں لئی اَٹل محبت کیویں ظاہر کردا اے۔ تے اگلے مضمون چ اَسی گل کراں گے کہ اَسی یہوواہ دی مثال تے عمل کر کے اِک دُوجے لئی اَٹل محبت کیویں ظاہر کر سکنے آں۔
یہوواہ دی اَٹل محبت دی کوئی حد نئیں!
3. یہوواہ خدا نے موسیٰ نبی نُوں اپنے بارے کیہہ دَسیا؟
3 جدوں بنیاِسرائیل مصر توں نکل آئے تے ایہدے کجھ عرصے بعد یہوواہ خدا نے موسیٰ نبی نُوں اپنے ناں تے اپنیاں خوبیاں بارے کجھ خاص گلاں دَسیاں۔ اوہنے کہیا: یہوواہ، یہوواہ، رحمدل تے مہربان خدا، غصے چ دھیما تے شفقت [یعنی اَٹل محبت] تے وفا چ غنی تے ہزاراں تے فضل کرن والا۔ گناہ تے غلطی تے خطا بخشن والا۔ (خروج 34:7،6) ایہناں دل چُھو لین والے لفظاں دے ذریعے یہوواہ خدا نے موسیٰ نبی نُوں اپنی اَٹل محبت بارے اِک بڑی خاص گل دَسی۔ ایہہ کیہڑی گل سی؟
4، 5. (الف) یہوواہ خدا نے اپنے بارے کیہہ دَسیا؟ (ب) اَسی کِنہاں سوالاں تے غور کراں گے؟
4 یہوواہ نے صرف ایہہ نئیں کہیا کہ اوہ اَٹل محبت کردا اے سگوں اوہنے کہیا کہ اوہ ”شفقت چ غنی“ اے یعنی اوہدی اَٹل محبت دی کوئی حد نئیں اے۔ ایہہ گل بائبل دِیاں 6 ہور ایتاں چ وی لکھی اے تے ہر وار ایہہ گل صرف یہوواہ بارے کہی گئی اے انساناں بارے نئیں۔ (گنتی 14:18؛ نحمیاہ 9:17؛ زبور 86:15؛ 103:8؛ یوایل 2:13؛ یُوناہ 4:2) ایہدے توں اَسی سکھنے آں کہ یہوواہ خدا نے اپنی اَٹل محبت تے بوہت زیادہ زور دِتا اے۔ ایہدے توں ظاہر ہوندا اے کہ یہوواہ لئی ایہہ خوبی کِنّی اہم اے۔ * بےشک ایسے وجہ توں بادشاہ داؤد نے ایہہ کہیا:اَے یہوواہ! تیری اَٹل محبت اسمان تک پونچدی اے۔ اَے خدا! تیری اَٹل محبت کِنّی بیشقیمت اے۔ تیرے پَراں دے سائے چ انسان پناہ لیندے نیں۔ (زبور 36:5،7) کیہہ بادشاہ داؤد وانگوں اَسی وی خدا دی اَٹل محبت دی اینی قدر کرنے آں؟
5 اَٹل محبت نُوں ہور چنگی طرحاں سمجھن لئی آؤ ایہناں دو سوالاں تے غور کرئیے: یہوواہ کِنہاں لئی اَٹل محبت ظاہر کردا اے؟ تے جدوں یہوواہ ساڈے لئی اَٹل محبت ظاہر کردا اے تے ایہدے توں سانوں کیہہ فائدہ ہوندا اے؟
یہوواہ کِنہاں لئی اَٹل محبت ظاہر کردا اے؟
6. یہوواہ کِنہاں لئی اَٹل محبت ظاہر کردا اے؟
6 بائبل توں پتہ چلدا اے کہ اِک بندہ کئی چیزاں نال محبت کر سکدا اے جیویں کہ کسے دے ناں نال محبت، نیکی، زندگی یاں دُنیا نال محبت۔ (زبور 69:36؛ عاموس5:15؛ 1-پطرس3:10؛ 1-یوحنا 2:15) پر اَٹل محبت کدی وی چیزاں نال نئیں سگوں صرف انساناں نال کیتی جاندی اے۔ پر یہوواہ ساریاں نال اَٹل محبت نئیں کردا۔ اوہ صرف اوہناں لوکاں نال اَٹل محبت کردا اے جنہاں دا اوہدے نال اِک خاص رشتہ اے۔ ساڈا خدا اپنے دوستاں دا وفادار رہندا اے۔ اوہ اوہناں نُوں اِک ودھیا زندگی دینا چاہندا اے تے اوہناں نال محبت کرنا کدی نئیں چھڈدا۔
یہوواہ خدا نے انساناں نُوں بوہت ساریاں چنگیاں چیزاں دِتیاں نیں۔ اوہناں لوکاں نُوں وی جیہڑے اوہدی عبادت نئیں کردے۔ (پیراگراف نمبر 7 نُوں ویکھو۔) *
7. یہوواہ خدا نے سارے انساناں لئی محبت کیویں ظاہر کیتی اے؟
7 یہوواہ خدا نے سارے انساناں لئی محبت ظاہر کیتی اے۔ یسوع مسیح نے نیکُدیمس نُوں کہیا: خدا نُوں دُنیا نال اینی محبت اے کہ اوہنے اپنا اکلوتا پُتر دے دِتا تاکہ جیہڑا وی اوہدے تے ایمان ظاہر کرے، ہلاک نہ ہوئے سگوں ہمیشاں دی زندگی پائے۔—یوحنا 3:1، 16؛ متی 5:44، 45۔
بادشاہ داؤد تے دانیایل نبی دِیاں گلاں توں پتہ چلدا اے کہ یہوواہ صرف اوہناں لوکاں نال اَٹل محبت کردا اے جیہڑے اوہنوں جان دے نیں، اوہدا خوف من دے نیں، اوہنوں دلوں محبت کردے نیں تے اوہدے حکماں تے چلدے نیں۔ (پیراگراف 8، 9 نُوں ویکھو۔)
8، 9. (الف) یہوواہ خدا اپنے بندیاں نال اَٹل محبت کیوں کردا اے؟ (ب) ہُن اَسی کیہڑی گل تے غور کراں گے؟
8 جیویں کہ اَسی پہلاں ویکھیا یہوواہ صرف اپنے بندیاں لئی اَٹل محبت ظاہر کردا اے کیونکہ اوہناں نال اوہدا اِک قریبی رشتہ اے۔ ایہہ گل بادشاہ داؤد تے دانیایل نبی دِیاں گلاں توں صاف پتہ چلدی اے۔ مثال لئی بادشاہ داؤد نے کہیا:اوہناں تے اپنی اَٹل محبت ظاہر کر دا رہ جیہڑے تینوں جان دے نیں۔ اوہنے ایہہ وی کہیا: جیہڑے یہوواہ توں ڈردے نیں اوہ اوہناں نال ہمیشاں ہمیشاں تک اَٹل محبت نال پیش آندا اے۔ تے دانیایل نبی نے کہیا: اَے یہوواہ! عظیم تے شاندار کم کرن والے خدا، توں اوہناں نال اپنا عہد قائم رکھدا تے اوہناں نال اَٹل محبت کرنا ایں جیہڑے تینوں پیار کردے نیں تے تیرے فرمانبردار نیں۔ (زبور 36:10؛ 103:17؛ دانیایل 9:4) ایہناں ایتاں توں پتہ چلدا اے کہ یہوواہ اپنے بندیاں نال اَٹل محبت ایس لئی کردا اے کیونکہ اوہ اوہنوں جان دے نیں، اوہدا خوف من دے نیں، اوہنوں دلوں محبت کردے نیں تے اوہدے حکماں تے چلدے نیں۔ یہوواہ صرف اوہناں لوکاں نال اَٹل محبت کردا اے جیہڑے اوہدی عبادت کردے نیں۔
9 جدوں اَسی یہوواہ دی عبادت نئیں کرنے ساں تے سانوں یہوواہ دی اوہ محبت مِلدی سی جیہڑی اوہ سارے انساناں نال کردا اے۔ (زبور 104:14) پر جدوں اَسی اوہدی عبادت کرن لگ پئے تے سانوں اوہدی اَٹل محبت وی مِلی۔ یہوواہ نے اپنے ہر بندے نال ایہہ وعدہ کیتا اے: تیرے لئی میری اَٹل محبت کدی ختم نئیں ہوئے گی۔ (یسعیاہ 54:10) بادشاہ داؤد نے آپ ایس گل دا تجربہ کیتا سی کہ یہوواہ اپنے بندیاں تے خاص مہربانی کردا اے۔ (زبور 4:3) پر ایس مہربانی دے بدلے سانوں یہوواہ لئی کیہہ کرنا چاہی دا اے؟ یہوواہ دے اِک بندے نے لکھیا: دَنا ایہناں گلاں تے دھیان دَوے گا تے اوہ یہوواہ دی اَٹل محبت تے غور کرے گا۔ (زبور107:43) ایس گل نُوں ذہن چ رکھدے ہوئیاں آؤ تِن ایہو جہے طریقیاں تے غور کرئیے جنہاں دے ذریعے یہوواہ اپنے بندیاں لئی اَٹل محبت ظاہر کردا اے تے ویکھئے کہ ایہناں توں اوہدے بندیاں نُوں کیہہ فائدہ ہوندا اے۔
سانوں یہوواہ دی اَٹل محبت توں کیہہ فائدہ ہوندا اے؟
یہوواہ خدا اوہناں لوکاں نُوں ہور وی برکتاں دیندا اے جیہڑے اوہدی عبادت کردے نیں۔ (پیراگراف نمبر 10-16 نُوں ویکھو۔) *
10. سانوں ایہہ جان کے کیہہ فائدہ ہوندا اے کہ خدا دی اَٹل محبت ہمیشاں قائم رہے گی؟ (زبور 31:7)
10 یہوواہ دی اَٹل محبت ہمیشاں قائم رہے گی۔ اوہدی اَٹل محبت بارے ایہہ خاص گل زبور 136 چ 26 واری دَسی گئی اے۔ زبور 136:1 چ دَسیا گیا اے: یہوواہ دا شکر کرو کیونکہ اوہ بھلا اے تے اوہدی اَٹل محبت ابدی اے۔ فیر 2 توں 26 ایتاں چ ایہہ گل وار وار لکھی اے کہ اوہدی شفقت یعنی اَٹل محبت ابدی اے۔ ایس زبور چ ایہہ گل وار وار پڑھ کے سانوں بڑی خوشی ہوندی اے کہ یہوواہ اپنے بندیاں لئی فرق فرق طریقیاں نال اَٹل محبت ظاہر کردا رہندا اے۔ اِصطلاح ”اوہدی شفقت ابدی اے“ توں سانوں یقین ہو جاندا اے کہ اپنے بندیاں لئی یہوواہ دی محبت ہمیشاں قائم رہندی اے۔سانوں ایس گل توں بڑی تسلی مِلدی اے کہ جے کسے وجہ توں اَسی یہوواہ نُوں دُکھی کرنے آں تے اوہ فوراً ساڈے نال محبت کرنا چھڈ نئیں دیندا۔ ایہدی بجائے اوہ ساڈا ہتھ پھڑی رکھدا اے تے ساڈے نال کھلوتا رہندا اے۔ خاص کر کے اوہدوں جدوں اَسی کسے پریشانی دا سامنا کر رہے ہنے آں۔ایہدے توں سانوں کیہہ فائدہ ہوندا اے؟ ایہہ جان کے کہ یہوواہ ساڈے نال کھلوتا اے سانوں بڑی خوشی ہوندی اے تے اپنیاں پریشانیاں نال نبڑن تے زندگی دی راہ تے چلدے رہن دی طاقت مِلدی اے۔—زبور 31:7 نُوں فٹنوٹ چوں پڑھو۔ *
11. زبور 86:5 دے مطابق یہوواہ سانوں کیوں معاف کردا اے؟
11 یہوواہ سانوں اپنی اَٹل محبت دی وجہ توں معاف کردا اے۔ جدوں یہوواہ ایہہ ویکھدا اے کہ اوہدے کسے بندے نے اپنے گناہ توں دلوں توبہ کیتی اے تے اپنے بُرے کماں نُوں چھڈ دِتا اے تے فیر اپنی اَٹل محبت دی وجہ توں اوہ اوہنوں معاف کر دیندا اے۔ بادشاہ داؤد نے زبور103 چ یہوواہ بارے کہیا: اوہنے ساڈے گناہواں دے مطابق ساڈے نال سلوک نئیں کیتا تے ساڈیاں بدکاریاں دے مطابق سانوں سزا نئیں دِتی۔ (زبور 103:8-11) داؤد ایہہ گل چنگی طرحاں جان دا سی کہ جدوں ساڈا ضمیر سانوں تنگ کردا اے تے کِنّی تکلیف ہوندی اے۔ پر اوہنے ایہہ وی ویکھیا کہ یہوواہ ”معاف کرن لئی تیار رہندا اے۔“ یہوواہ سانوں کیوں معاف کردا ے؟ ایہدا جواب زبور 86:5 چ دِتا گیا اے۔ (ایس ایت نُوں پڑھو۔) جی ہاں، جیویں داؤد نے دُعا چ کہیا، جدوں یہوواہ دے بندے اوہدے کولوں معافی منگدے نیں تے اوہ اپنی اَٹل محبت دی وجہ توں اوہناں نُوں معاف کر دیندا اے۔
12، 13. جے اَسی اپنیاں غلطیاں دی وجہ توں بےحوصلہ تے دُکھی ہو گئے آں تے کیہڑی چیز ساڈی مدد کر سکدی اے؟
12 اپنے گناہ تے شرمندہ ہونا بوہت چنگی گل اے تے ایہدا بوہت فائدہ وی ہوندا اے۔ ایہدے توں ساڈے اندر ایہہ خواہش پیدا ہو سکدی اے کہ اَسی توبہ کرئیے تے اپنیاں غلطیاں نُوں سدھارن لئی قدم چُکیے۔ پر یہوواہ دے کجھ بندے اپنیاں غلطیاں دی وجہ توں شرمندگی دے بوجھ تھلے دَب جاندے نیں۔اوہ اپنے آپ نُوں ایناں قصوروار سمجھدے نیں کہ اوہناں نُوں لگدا اے کہ یہوواہ اوہناں نُوں معاف کر ای نئیں سکدا۔ فیر بھانویں اوہ جِنّی مرضی توبہ کر لین۔ جے توانوں وی اِنج ای لگدا اے تے یقین رکھو کہ یہوواہ اپنی اَٹل محبت دی وجہ توں توانوں معاف کرنا چاہندا اے۔
13 ایہدے توں سانوں کیہہ فائدہ ہوندا اے؟ اپنیاں خامیاں دے باوجود اَسی صاف ضمیر نال یہوواہ دی خدمت کر سکنے آں کیونکہ اوہدے پُتر یسوع دا خون سانوں سارے گناہواں توں پاک کر دیندا اے۔ (1-یوحنا 1:7) جدوں تُسی اپنیاں خامیاں دی وجہ توں بےحوصلہ ہو جاؤ تے یاد رکھو کہ یہوواہ اوہناں لوکاں نُوں خوشی خوشی معاف کردا اے جیہڑے دلوں توبہ کردے نیں۔ داؤد نے دَسیا کہ اَٹل محبت دی وجہ توں یہوواہ سانوں کیس حد تک معاف کردا اے۔ اوہنے کہیا: جِنّاں اسمان تے زمین چ فاصلہ اے اونی ای زیادہ اوہدی اَٹل محبت اوہناں نال اے جیہڑے اوہدے توں ڈردے نیں۔ جِنّاں مشرق مغرب توں دُور اے اوناں ای اوہنے ساڈیاں خطاواں ساڈے توں دُور کر دِتیاں نیں۔ (زبور 103:11، 12) بےشک یہوواہ دل کھول کے معاف کردا اے۔—یسعیاہ 55:7۔
14. داؤد نے ایہہ کیویں سمجھایا کہ یہوواہ دی اَٹل محبت ساڈی حفاظت کردی اے؟
14 یہوواہ دی اَٹل محبت اوہدے نال ساڈی دوستی دی حفاظت کردی اے۔ داؤد نے دُعا چ یہوواہ نُوں کہیا: تُوں میرے لکن دی تھاں ایں۔ تُوں مینوں دُکھ توں بچا کے رکھیں گا۔ تُوں مینوں رہائی دے نغمیاں نال گھیر لوَیں گا۔ یہوواہ دی اَٹل محبت اوہنوں گھیرے رکھے گی جدا بھروسا اوہدے تے وے۔ (زبور 32:7، 10) پرانے زمانے چ اِک شہر دے آلے دوالے دیواراں ہوندیاں سن جیہڑیاں اوس شہر دے لوکاں نُوں دُشمناں توں محفوظ رکھدیاں سن۔ یہوواہ دی اَٹل محبت وی اِک دیوار وانگوں اے جیہڑی سانوں اوہناں چیزاں توں محفوظ رکھدی اے جنہاں دی وجہ توں اوہدے نال ساڈی دوستی ٹُٹ سکدی اے۔ ایہدے علاوہ یہوواہ اپنی اَٹل محبت دی وجہ توں ساڈے قریب آندا اے۔—یرمیاہ 31:3۔
15. یہوواہ دی اَٹل محبت نُوں اِک پناہگاہ کیوں کہیا گیا اے؟
15 داؤد نے اِک ہور مثال دے کے دَسیا کہ یہوواہ دی اَٹل محبت دی وجہ توں اوہدے بندیاں دی حفاظت کیویں ہوندی اے۔ اوہنے کہیا: خدا میرا شفیق خدا، میرا اُچا بُرج اے۔ داؤد نے یہوواہ بارے ایہہ وی کہیا: اوہ میرے نال اَٹل محبت کرن والا تے میرا قلعہ اے۔میرا اُچا بُرج تے مینوں چھڈان والا۔ اوہ میری ڈھال تے میری پناہگاہ اے۔ (زبور 59:17؛ 144:2) داؤد نے یہوواہ دی اَٹل محبت نُوں اِک پناہگاہ تے قلعہ کیوں کہیا؟ بھانویں اَسی دُنیا دے کسے وی کونے چ رہندے ہوئیے جدوں تک اَسی یہوواہ دے وفادار رہواں گے، اوہ ہر اوس چیز توں ساڈی حفاظت کرے گا جدی وجہ توں اوہدے نال ساڈی دوستی ٹُٹ سکدی اے۔ ایہی گل زبور 91 چ وی لکھی اے۔ ایس زبور نُوں لکھن والے نے دَسیا: میں یہوواہ بارے کہواں گا کہ اوہ ای میری پناہ تے میرا گڑھ اے۔ (زبور 91:1-3، 9، 14) موسیٰ نے وی یہوواہ نُوں پناہگاہ کہیا۔ (زبور 90:1) ایہدے علاوہ اپنی موت توں کجھ دیر پہلاں موسیٰ نے اِک دل چُھو لین والی گل کہی۔ اوہنے کہیا: پرانے وقتاں توں خدا تیری پناہگاہ اے اوہدیاں بانہواں ہمیشاں تینوں سہارا دین گیاں۔ (اِستثنا 33:27) سانوں ایس گل توں یہوواہ بارے کیہہ پتہ لگدا اے کہ ”اوہدیاں بانہواں ہمیشاں تینوں سہارا دین گیاں؟“
16. ایہہ جان کے کہ یہوواہ ہمیشاں ساڈا ساتھ دَوے گا، کیہڑیاں دو گلاں تے ساڈا ایمان مضبوط ہو جاندا اے؟ (زبور 136:23)
16 جدوں اَسی ایس گل تے بھروسا رکھنے آں کہ یہوواہ ساڈی حفاظت کرے گا تے اَسی محفوظ محسوس کرنے آں۔ پر کدی کدی ہو سکدا اے کہ اَسی بوہت بےحوصلہ محسوس کرئیے تے اندروں ٹُٹ جائیے۔ ایہناں حالاتاں چ یہوواہ ساڈی مدد کیویں کردا اے؟ (زبور 136:23 نُوں پڑھو۔) یہوواہ بڑے پیار نال اپنیاں بانہواں چ سانوں چُکدا اے تے کھلون چ ساڈی مدد کردا اے۔ (زبور 28:9؛ 94:18) ایہدے توں سانوں کیہہ فائدہ ہوندا اے؟ ایہہ جان کے کہ یہوواہ ہمیشاں ساڈا ساتھ دَوے گا، ایہناں دو گلاں تے ساڈا ایمان مضبوط ہو جاندا اے: پہلی گل، یہوواہ ساڈی پناہگاہ اے فیر بھانویں اَسی کِتے وی رہندے ہوئیے۔ دُوجی گل، ساڈے اسمانی باپ نُوں ساڈی بڑی فکر اے۔
بھروسا رکھو کہ یہوواہ تواڈے نال اَٹل محبت کردا رہوے گا
17. خدا دی اَٹل محبت دی وجہ توں اَسی کیہڑی گل تے بھروسا رکھ سکنے آں؟ (زبور 33:18-22)
17 اَسی غور کیتا اے کہ جدوں اَسی کسے مشکل دا سامنا کرنے آں تے اَسی ایس گل تے پکا یقین رکھ سکنے آں کہ یہوواہ ساڈی مدد کرے گا تاکہ اَسی اوہدے وفادار رہ سکیے۔ (2-کُرنتھیوں 4:7-9) یرمیاہ نبی نے کہیا: ایہہ یہوواہ دی اَٹل محبت اے کہ اَسی ہلاک نئیں ہوئے کیونکہ اوہدی رحمت ختم نئیں ہوندی۔ (نوحہ 3:22) اَسی پورا بھروسا رکھ سکنے آں کہ یہوواہ ساڈے نال اَٹل محبت کردا رہوے گا کیونکہ اوہدے کلام چ لکھیا اے: یہوواہ دی نگاہ اوہدے توں ڈرن والیاں تے اے جیہڑ ے اوہدی اَٹل محبت پان دی امید رکھدے نیں۔—زبور 33:18-22 نُوں پڑھو۔
18، 19. (الف) سانوں کیہڑی گل یاد رکھنی چاہی دی اے؟ (ب) اگلے مضمون چ اَسی کیہڑی گل تے غور کراں گے؟
18 سانوں کیہڑی گل یاد رکھنی چاہی دی اے؟ جدوں اَسی یہوواہ دی عبادت نئیں کرنے ساں تے سانوں یہوواہ دی اوہ محبت مِلدی سی جیہڑی اوہ سارے انساناں نال کردا اے۔ پر جدوں اَسی اوہدی عبادت کرن لگ پئے تے سانوں اوہدی اَٹل محبت وی مِلی۔ ایس محبت دی وجہ توں یہوواہ سانوں اپنیاں بانہواں چ لے کے ساڈی حفاظت کردا اے۔ اوہ سانوں ہمیشاں اپنے قریب رکھے گا تے اپنے اوہناں وعدیاں نُوں پورا کرے گا جیہڑے اوہنے ساڈے نال کیتے نیں۔ اوہ چاہندا اے کہ اوہدے نال ساڈی دوستی ہمیشاں تک قائم رہوے۔ (زبور 46:1، 2، 7) ایس لئی ساڈے تے بھانویں جیہڑی مرضی مشکل آ جائے یہوواہ سانوں طاقت دَوے گا تاکہ اَسی اوہدے وفادار رہیے۔
19 اَسی ویکھیا اے کہ یہوواہ اپنے بندیاں لئی اَٹل محبت کیویں ظاہر کردا اے۔ بدلے چ اوہ چاہندا اے کہ اَسی وی اِک دُوجے لئی اَٹل محبت ظاہر کرئیے۔ اَسی ایہہ کیویں کر سکنے آں؟ اگلے مضمون چ اَسی ایس گل تے غور کراں گے۔
گیت نمبر 124 (خوشی نال گاؤ): فادار رہوو
^ پیراگراف 5 اَٹل محبت کیہہ اے؟ یہوواہ ایہہ محبت کِنہاں لئی ظاہر کردا اے؟ تے اوہناں لوکاں نُوں ایس محبت توں کیہہ فائدہ ہوندا اے جنہاں لئی یہوواہ ایہہ محبت ظاہر کردا اے؟ ایہناں سوالاں دے جواب ایس مضمون چ دِتے جان گے تے اگلے مضمون چ وی اَٹل محبت تے گل کیتی جائے گی۔ اُردو زبان چ بائبل دے ترجمیاں چ جنہاں عبرانی تے یونانی لفظاں دا ترجمہ ”رحم“، ”رحمت“، ”کرم“ تے ”شفقت“ کیتا گیا اے، اوہ اکثر اَٹل محبت وَل اشارہ کردے نیں۔
^ پیراگراف 4 بائبل دِیاں ہور ایتاں چ وی ایہہ گل دَسی گئی اے کہ خدا دی اَٹل محبت دی کوئی حد نئیں۔—زبور 69:13؛ 106:7؛ نوحہ 3:32 نُوں وی ویکھو۔
^ پیراگراف 10 زبور 31:7 (ترجمہ نویں دُنیا):”میں تیری اَٹل محبت دی وجہ توں خوشی نال جھوماں گا کیونکہ توں میرا دُکھ ویکھیا اے۔ تُوں میرے دل دِیاں پریشانیاں جاننا ایں۔“
^ پیراگراف 55 تصویر دی وضاحت: یہوواہ اپنے بندیاں دے نال نال سارے انساناں لئی محبت ظاہر کردا اے۔ چھوٹی تصویراں توں پتہ چلدا اے کہ یہوواہ کِنہاں طریقیاں نال انساناں لئی محبت ظاہر کردا اے۔ یہوواہ دی محبت دا سب توں وڈا ثبوت فدیے دے بندوبست توں مِلدا اے جدے توں ہر کوئی فائدہ حاصل کر سکدا اے۔
^ پیراگراف 63 تصویر دی وضاحت: جیہڑے لوک یہوواہ دی عبادت کرن دا فیصلہ کردے نیں تے فدیے تے ایمان لیاندے نیں، اوہ یہوواہ دی نظر چ بڑے خاص نیں۔ اوہ اوہناں نال اَٹل محبت کردا اے۔ خدا دی اَٹل محبت دِیاں کجھ مثالاں چھوٹیاں تصویراں چ وکھائیاں گئیاں نیں۔
