1، 2.‏ سانوں کنہاں وَلّوں نااِنصافی دا سامنا کرنا پے سکدا اے؟‏

 یسوع نے اِک بیوہ دی کہانی سنائی جیہڑی وار وار اِک جج کول جا کے اوہنوں کہندی سی کہ اوہ اوہدا اِنصاف کرے۔ یقیناً یسوع دے شاگرد اوس بیوہ دے جذبات نُوں چنگی طرحاں سمجھدے سن کیونکہ اوس زمانے چ عام لوکاں نال اکثر نااِنصافی ہوندی سی۔ (‏لُوقا 18:‏1-‏5‏)‏ اَج اَسی وی اوس بیوہ دے جذبات نُوں چنگی طرحاں سمجھ سکنے آں کیونکہ اَسی ساریاں نے اپنی زندگی چ کدی نہ کدی نااِنصافی دا سامنا کیتا اے۔‏

² اَج دُنیا تعصب، ظلم تے لالچ نال بھری ہوئی اے۔ ایس لئی جدوں ساڈے نال نااِنصافی ہوندی اے یاں ساڈے تے ظلم کیتا جاندا اے تے اَسی حیران نئیں ہوندے۔ (‏واعظ 5:‏8‏)‏ پر اَسی اپنے کسے بھین بھرا کولوں ایہہ توقع نئیں کردے کہ اوہ ساڈے نال بُری طرحاں پیش آئے گا۔ پر فیر وی اِنج ہو سکدا اے۔ ساڈے بھین بھرا دُنیا دے لوکاں وانگوں سچائی دے خلاف تے نئیں نیں۔ اوہ بس عیب‌دار نیں جدی وجہ توں اوہناں کولوں غلطیاں ہو جاندیاں نیں۔ یسوع نے اپنے مخالفاں وَلّوں نااِنصافی نُوں جیویں صبر نال برداشت کیتا، اوہدے توں اَسی بوہت کجھ سکھ سکنے آں۔ جے سانوں دُنیا دے لوکاں نال صبر نال پیش آنا چاہی دا اے جیہڑے ساڈے نال نااِنصافی کردے نیں تے ذرا سوچو کہ اپنے بھین بھراواں نال صبر نال پیش آنا کِنّاں ضروری اے۔ جدوں کلیسیا دے بھین بھرا یاں دُنیا دے لوک ساڈے نال نااِنصافی کردے نیں تے یہوواہ نُوں کیہو جیہا محسوس ہوندا اے؟ کیہہ اوہنوں ایس گل توں فرق پیندا اے کہ ساڈے نال کیہہ کجھ ہو رہیا اے؟‏

3.‏ اَسی ایہہ کیوں کہہ سکنے آں کہ یہوواہ نُوں ایس گل دی فکر ہوندی اے کہ ساڈے نال کیہو جیہا سلوک کیتا جا رہیا اے؟‏

³ یہوواہ نُوں ایس گل دی بڑی فکر اے کہ ساڈے نال کیہو جیہا سلوک کیتا جاندا اے۔ اوہ اِنصاف نال محبت کردا اے۔ (‏زبور 37:‏28‏)‏ یسوع نے دَسیا کہ یہوواہ صحی وقت تے چھیتی اِنصاف کرے گا۔ (‏لُوقا 18:‏7، 8‏)‏ اوہ ساڈیاں ساریاں مصیبتاں تے ہر طرحاں دی نااِنصافی نُوں ختم کر دَوے گا۔—‏زبور 72:‏1، 2‏۔‏

4.‏ یہوواہ ساڈی مدد کیویں کردا اے تاکہ اَسی نااِنصافی نُوں برداشت کر سکئے؟‏

⁴ مستقبل چ زمین تے نیکی دا راج ہوئے گا۔ پر جدوں تک اوہ وقت نئیں آ جاندا، یہوواہ ساڈی  مدد کر رہیا اے تاکہ اَسی نااِنصافی نُوں برداشت کر سکئے۔ (‏2-‏پطرس 3:‏13‏)‏ مثال لئی، اوہ سانوں سکھاندا اے کہ جدوں ساڈے نال نااِنصافی ہوندی اے تے سانوں کیہو جیہا رویہ ظاہر کرنا چاہی دا اے تاکہ اَسی ہور مشکلاں توں بچ سکئے۔ اوہ اپنے پُتر دی مثال دے ذریعے وی سانوں سکھاندا اے کہ اَسی نااِنصافی دا سامنا کیویں کر سکنے آں۔ ایہدے علاوہ اوہنے اپنے کلام چ سانوں ایہو جہے مشورے دِتے نیں جیہڑے نااِنصافی نُوں برداشت کرن چ ساڈی مدد کردے نیں۔‏

نااِنصافی دا سامنا کردے ویلے سانوں کیہو جیہا رویہ ظاہر کرنا چاہی دا اے؟‏

5.‏ سانوں ایس گل دا خیال کیوں رکھنا چاہی دا اے کہ نااِنصافی دا سامنا کردے ویلے اَسی کیہو جیہا رویہ ظاہر کرنے آں؟‏

⁵ جدوں ساڈے نال نااِنصافی ہوندی اے تے سانوں بڑا دُکھ ہوندا اے تے تکلیف پونچ دی اے۔ (‏واعظ 7:‏7‏)‏ یہوواہ دے وفادار بندے ایوب تے حبقّوق نے وی اِنج ای محسوس کیتا سی۔ (‏ایوب 6:‏2، 3؛‏ حبقّوق 1:‏1-‏3‏)‏ اِنج محسوس کرنا عام گل اے۔ پر سانوں ایس گل دا خیال رکھنا چاہی دا اے کہ اَسی کیہو جیہا رویہ ظاہر کرنے آں تاکہ اَسی کوئی ایہو جیہا کم نہ کر بیٹھئے جدے تے سانوں بعد چوں پچھتانا پووے۔‏

6.‏ ابی‌سلوم دی مثال توں اَسی کیہہ سکھنے آں؟ (‏تصویر نُوں وی ویکھو۔)‏

⁶ جدوں ساڈے نال نااِنصافی ہوندی اے تے ہو سکدا اے کہ اَسی معاملے نُوں اپنے ہتھ چ لین دی کوشش کرئیے۔ پر اِنج کرن نال معاملہ ہور وگڑ سکدا اے۔ ایس بارے ذرا بادشاہ داؤد دے پُتر ابی‌سلوم دی مثال تے غور کرو۔ جدوں اوہدے سوتیلے بھرا امنون نے اوہدی بھین تمر دی عزت لُٹی تے اوہ طیش چ آ گیا۔ شریعت دے مطابق امنون نُوں سزائے موت ملنی سی۔ (‏احبار 20:‏17‏)‏ سچ اے کہ ابی‌سلوم دا غصہ جائز سی۔ پر اوہنوں ایہہ حق نئیں سی کہ اوہ معاملے نُوں اپنے ہتھ چ لے لیندا تے امنون نُوں قتل کر دیندا۔—‏2-‏سموئیل 13:‏20-‏23،‏ 28، 29‏۔‏

7.‏ جدوں زبور لکھن والے اِک بندے نے نااِنصافی ہوندے ویکھی تے شروع چ اوہنوں کیہو جیہا محسوس ہویا؟‏

⁷ جدوں اَسی ویکھنے آں کہ ساڈے نال نااِنصافی کرن والے لوکاں نُوں کوئی سزا نئیں مِل رہی تے شاید اَسی سوچئے کہ کیہہ صحی کم کرن دا کوئی فائدہ ہے وے۔ غور کرو کہ جدوں زبور لکھن والے اِک بندے نے ویکھیا کہ بھیڑے لوک اچھے لوکاں نال بُرا سلوک کردے نیں پر فیر وی بڑے خوشحال نظر آندے نیں تے اوہنے کہیا:‏ ایہی بھیڑے لوک نیں جنہاں دی زندگی ہمیشاں آرام نال گزردی اے۔ (‏زبور 73:‏12‏)‏ ایہدے علاوہ اوہنے جیہڑی نااِنصافی ویکھی سی، اوہدے توں اوہ ایناں پریشان ہو گیا سی کہ اوہ سوچن لگ پیا سی کہ یہوواہ دی خدمت کرن دا کوئی فائدہ نئیں اے۔ اوہنے کہیا:‏ جدوں مَیں ایہناں گلاں نُوں سمجھن دی کوشش کیتی تے مَیں پریشان ہو گیا۔ (‏زبور 73:‏14،‏ 16‏)‏ اوہنے تے ایہہ وی کہیا:‏ میرے قدم غلط راہ تے پین ای والے سن، میرے پیر پھسلن ای لگے سن۔ (‏زبور 73:‏2‏)‏ بھرا البرٹو a نال وی کجھ ایسے طرحاں ہویا۔‏

8.‏ جدوں اِک بھرا نال نااِنصافی ہوئی تے اوہنے کیہو جیہا رویہ ظاہر کیتا؟‏

 ⁸ بھرا البرٹو تے جھوٹھا اِلزام لگیا کہ اوہنے کلیسیا دے پیسیاں چوں چوری کیتی اے۔ ایس وجہ توں اوہدے کولوں اوہدیاں ذمے‌داریاں لے لئیاں گئیاں تے جنہوں جنہوں ایس معاملے بارے پتہ چلیا، اوہدی نظر چ بھرا دی عزت وی ختم ہو گئی۔ بھرا نے دَسیا:‏ ”‏مَیں بوہت چڑچڑا ہو گیا۔ مینوں بڑا غصہ آندا سی تے مایوسی وی ہوندی سی۔“‏ اپنے ایہناں جذباتاں دی وجہ توں اوہ یہوواہ توں وی دُور ہونا شروع ہو گیا، ایتھوں تک کہ اوہنے عبادتاں تے وی آنا چھڈ دِتا۔ پنج سالاں تک اوہ کلیسیا توں دُور رہیا۔ ایس تجربے توں پتہ چلدا اے کہ جے اَسی نااِنصافی بارے سوچدے رہواں گے تے ایہدا بڑا بھیڑا نتیجہ نکل سکدا اے۔‏

نااِنصافی دا سامنا کردے ویلے یسوع دی مثال تے عمل کرو

9.‏ یسوع نے کیہڑیاں کیہڑیاں نااِنصافیاں برداشت کیتیاں؟ (‏تصویر نُوں وی ویکھو۔)‏

⁹ یسوع نے نااِنصافی نُوں برداشت کرن دے معاملے چ بڑی ودھیا مثال قائم کیتی۔ غور کرو کہ اوہدے گھر والیاں تے دُوجے لوکاں نے اوہدے نال کیہو جیہا سلوک کیتا۔ اوہدے غیرایمان رشتے داراں نے اوہدے بارے کہیا کہ اوہ پاگل ہو گیا اے۔ مذہبی رہنماواں نے اوہدے تے اِلزام لایا کہ اوہ باغی فرشتیاں دی مدد نال معجزے کردا اے تے رومی فوجیاں نے اوہدا مذاق اُڈایا، اوہنوں ماریا کُٹیا، ایتھوں تک کہ اوہنوں قتل کر دِتا۔ (‏مرقس 3:‏21، 22؛‏  14:‏55؛‏ 15:‏16-‏20،‏ 35-‏37‏)‏ یسوع نے ایہہ ساریاں نااِنصافیاں برداشت کیتیاں تے بدلے چ کجھ بُرا نئیں کیتا۔ اَسی یسوع دی مثال توں کیہہ سکھ سکنے آں؟‏

10.‏ یسوع نے نااِنصافیاں دا سامنا کردے ویلے کیہو جیہا رویہ ظاہر کیتا؟ (‏1-‏پطرس 2:‏21-‏23‏)‏

¹⁰ 1-‏پطرس 2:‏21-‏23 نُوں پڑھو۔‏ b نااِنصافی نُوں برداشت کردے ویلے اَسی یسوع ورگا رویہ ظاہر کر سکنے آں۔ اوہنوں پتہ سی کہ اوہنوں کدوں چپ رہنا چاہی دا اے تے کدوں بولنا چاہی دا اے۔ (‏متی 26:‏62-‏64‏)‏ مثال لئی، اوہنے اپنے تے لگے ہر اِلزام دی صفائی نئیں دِتی۔ (‏متی 11:‏19‏)‏ تے جدوں اوہ بولیا وی تے اوہنے اوہناں لوکاں دی بے‌عزتی نئیں کیتی تے نہ ای اوہناں نُوں ڈریا دھمکایا جیہڑے اوہدے تے ظلم کر رہے سن۔ اوہنے اپنے اُتے قابو رکھیا تے اپنے آپ نُوں اوہدے حوالے کر دِتا جیہڑا سچا اِنصاف کردا اے۔ یسوع جان دا سی کہ یہوواہ اوہدے تے ہون والیاں نااِنصافیاں نُوں ویکھ رہیا اے تے اوہنوں پورا بھروسا سی کہ اوہ صحی وقت آن تے اِنصاف کرے گا۔‏

11.‏ بولن دے معاملے چ اَسی سمجھداری نال کم کیویں لے سکنے آں؟ (‏تصویراں نُوں وی ویکھو۔)‏

¹¹ جدوں ساڈے نال نااِنصافی ہوندی اے تے یسوع وانگوں سانوں وی سمجھداری نال بولنا چاہی دا اے۔ کجھ گلاں شاید اینیاں وڈیاں نہ ہون ایس لئی اَسی اوہناں نُوں درگزر کر سکنے آں۔ یاں شاید اَسی چپ رہن دا فیصلہ کر سکنے آں تاکہ معاملہ ہور نہ وِگڑے۔ (‏واعظ 3:‏7؛‏ یعقوب 1:‏19، 20‏)‏ پر کجھ ہور موقعیاں تے سانوں بولن دی لوڑ ہو سکدی اے جیویں کہ اوس ویلے جدوں اَسی ویکھنے آں کہ کسے نال نااِنصافی ہو رہی اے یاں سانوں اپنے عقیدیاں بارے دَسن دی لوڑ اے۔ (‏اعمال 6:‏1، 2‏)‏ پر اِنج کردے ویلے ایہہ بوہت ضروری اے کہ اَسی نرم‌مزاجی تے عزت نال گل کرئیے۔—‏1-‏پطرس 3:‏15‏۔‏ c

12.‏ اَسی اپنے آپ نُوں اوہدے حوالے کیویں کر سکنے آں جیہڑا سچا اِنصاف کردا اے؟‏

 ¹² اَسی اِک ہور طریقے نال وی یسوع دی مثال تے عمل کر سکنے آں یعنی اَسی اپنے آپ نُوں اوہدے حوالے کر سکنے آں جیہڑا سچا اِنصاف کردا اے۔ جدوں دُوجے ساڈے نال نااِنصافی کردے نیں یاں ساڈے نال بھیڑا سلوک کردے نیں تے اَسی پورا بھروسا رکھ سکنے آں کہ یہوواہ سب کجھ جان دا اے۔ ایس بھروسے دی وجہ توں اَسی نااِنصافی نُوں برداشت کر سکاں گے کیونکہ سانوں پتہ ہوئے گا کہ یہوواہ سب کجھ ٹھیک کر دَوے گا۔ جدوں اَسی معاملے نُوں یہوواہ تے چھڈ دَواں گے تے اَسی اپنے دل چ غصے تے ناراضگی نُوں پلن توں روک رہے ہونواں گے۔ اپنے دل چ غصہ تے ناراضگی رکھن دی وجہ توں اَسی حدوں ودھ جذباتی ہو سکنے آں، ساڈی خوشی ختم ہو سکدی اے، ایتھوں تک کہ یہوواہ نال ساڈی دوستی وی ٹُٹ سکدی اے۔—‏زبور 37:‏8‏۔‏

13.‏ جے سانوں نااِنصافی نُوں برداشت کرنا مشکل لگدا اے تے اَسی کیہڑی گل یاد رکھ سکنے آں؟‏

¹³ ظاہری جہی گل اے کہ اَسی کدی وی پوری طرحاں یسوع دی مثال تے نئیں چل سکدے۔ کدی کدار اَسی کوئی ایہو جہی گل کہہ جانے آں یاں کوئی ایہو جیہا کم کر دینے آں جدے تے بعد چوں سانوں پچھتاوا ہوندا اے۔ (‏یعقوب 3:‏2‏)‏ تے کجھ نااِنصافیاں دی وجہ توں ساڈے دل یاں ساڈے جسم تے ایہو جہے زخم لگدے نیں جیہڑے ساری زندگی نئیں بھردے۔ جے ایہہ گل تواڈے بارے وی سچ اے تے ایس گل دا یقین رکھو کہ یہوواہ تواڈی تکلیف نُوں جان دا اے تے یسوع جنہے آپ نااِنصافی برداشت کیتی، اوہ وی تواڈے جذباتاں نُوں سمجھدا اے۔ (‏عبرانیوں 4:‏15، 16‏)‏ یہوواہ نہ صرف یسوع دی مثال توں سانوں سکھاندا اے سگوں اپنے کلام دے ذریعے ایہو جہے مشورے وی دیندا اے جیہڑے نااِنصافی نُوں برداشت کرن چ ساڈی مدد کردے نیں۔ آؤ ایس بارے رومیوں دے ناں خط چوں دو مشوریاں تے غور کرنے آں۔‏

خدا دا غضب ظاہر ہون دَوو

14.‏ ایس گل دا کیہہ مطلب اے کہ اَسی خدا دا غضب ظاہر ہون دَئیے؟ (‏رومیوں 12:‏19‏)‏

¹⁴ رومیوں 12:‏19 نُوں پڑھو۔‏ پولُس رسول نے مسیحیاں نُوں ایہہ نصیحت کیتی:‏ خدا دا غضب ظاہر ہون دَوو۔ اَسی ایس نصیحت تے کیویں عمل کر سکنے آں؟ اَسی یہوواہ تے فیصلہ چھڈ سکنے آں کہ اوہ اپنے وقت تے اپنے طریقے نال اِنصاف کرے۔ جدوں بھرا جان نال نااِنصافی ہوئی تے ایس بارے اوہنے دَسیا:‏ ”‏میرے لئی اپنے غصے تے قابو رکھنا بالکل وی اسان نئیں سی تے مینوں اِنج کرن لئی سخت کوشش کرنی پئی۔ پر رومیوں 12:‏19 توں مینوں مدد مِلی کہ مَیں صبر نال یہوواہ تے بھروسا رکھاں۔“‏

15.‏ کسے معاملے نُوں حل کرن لئی سانوں صبر نال یہوواہ تے بھروسا کیوں رکھنا چاہی دا اے؟‏

¹⁵ جدوں اَسی یہوواہ تے بھروسا کرنے آں کہ اوہ معاملے نُوں حل کرے گا تے سانوں بڑا فائدہ ہوندا اے۔ ساڈے سِر توں ایہہ بوجھ لتھ جاندا اے کہ اَسی آپ معاملے نُوں حل کرنا اے تے اَسی مایوسی توں وی بچ جانے آں۔ اِک لحاظ نال یہوواہ سانوں کہندا اے کہ ”‏میرے تے معاملہ چھڈ دَوو۔ مَیں وعدہ کرنا واں کہ مَیں اِنصاف کراں گا۔“‏ جدوں اَسی یہوواہ دے ایس وعدے تے بھروسا کرنے آں تے فیر اَسی فکرمند نئیں رہندے کیونکہ سانوں پورا یقین ہوندا اے کہ یہوواہ آپ بہترین طریقے نال معاملے نُوں حل کرے گا۔ بھرا جان جدا پہلے وی ذکر ہویا اے، اوہنوں ایس گل تے بھروسا رکھن نال بڑی مدد مِلی۔ اوہنے کہیا:‏ ”‏جے مَیں صبر نال یہوواہ تے بھروسا رکھاں گا تے اوہ معاملے نُوں میرے توں کِتے چنگے طریقے نال حل کرے گا۔“‏

بھلائی نال بُرائی تے جت حاصل کرو

16، 17.‏ دُعا کرن نال سانوں ایہہ مدد کیویں ملے گی کہ اَسی بھلائی نال بُرائی تے جت حاصل کرئیے؟ (‏رومیوں 12:‏21‏)‏

¹⁶ رومیوں 12:‏21 نُوں پڑھو۔‏ پولُس رسول نے مسیحیاں نُوں ایہہ نصیحت وی کیتی:‏ ”‏بھلائی نال بُرائی تے جت حاصل کرو۔“‏ یسوع نے پہاڑ تے جیہڑی تقریر دِتی سی، اوہدے چ اوہنے کہیا:‏ ”‏اپنے دُشمناں نال پیار کردے رہوو تے جیہڑے توانوں ستاندے نیں، اوہناں لئی دُعا کردے رہوو۔“‏ (‏متی 5:‏44‏)‏ اوہنے آپ وی اِنج ای کیتا۔ جدوں رومی فوجیاں نے یسوع نُوں سُولی تے چڑھایا تے اوہنوں بڑی تکلیف سہنی پئی۔ اوس ویلے یسوع تے جِنّاں ظلم کیتا گیا تے اوہدے نال جِنّی نااِنصافی کیتی گئی، اَسی اوہدا اندازہ وی نئیں لا سکدے۔‏

 ¹⁷ یسوع نے نااِنصافی تے جت حاصل کیتی۔ پر کیویں؟ اوہنے سپاہیاں نُوں بُرا بھلا کہن دی بجائے اوہناں لئی دُعا کیتی۔ دُعا چ اوہنے کہیا:‏ اَے باپ، ایہناں نُوں معاف کر دے کیونکہ ایہناں نُوں نئیں پتہ کہ کیہہ کر رہے نیں۔ (‏لُوقا 23:‏34‏)‏ جدوں اَسی اوہناں لوکاں لئی دُعا کرنے آں جیہڑے ساڈے نال بھیڑا سلوک کردے نیں تے ساڈے دل چ اوہناں لئی غصہ تے ناراضگی گھٹ ہو سکدی اے، ایتھوں تک کہ ساڈی اوہناں بارے سوچ وی بدل سکدی اے۔‏

18.‏ دُعا کرن دی وجہ توں بھرا البرٹو تے بھرا جان نُوں نااِنصافی نُوں برداشت کرن چ مدد کیویں مِلی؟‏

¹⁸ بھرا البرٹو تے بھرا جان جنہاں دا ایس مضمون چ پہلے وی ذکر ہویا سی، اوہناں نُوں دُعا کرن نال نااِنصافی نُوں برداشت کرن چ مدد مِلی۔ بھرا البرٹو کہندا اے:‏ ”‏جیہڑے بھراواں نے میرے نال نااِنصافی کیتی سی، مَیں اوہناں لئی دُعا کیتی۔ مَیں کئی وار یہوواہ کولوں ایہہ اِلتجا وی کیتی کہ اوہ میری مدد کرے تاکہ مَیں اپنے نال ہوئی نااِنصافی نُوں بُھل سکاں۔“‏ خوشی دی گل اے کہ ہُن بھرا البرٹو فیر توں وفاداری نال یہوواہ دی خدمت کر رہیا اے۔ بھرا جان نے کہیا:‏ ”‏مَیں کئی وار اوس بھرا لئی دُعا کیتی جیہڑا میرے نال بُری طرحاں پیش آیا سی۔ مَیں یہوواہ کولوں ایہہ درخاست وی کیتی کہ اوہ اوہنوں معاف کرن چ میری مدد کرے۔ ایس وجہ توں مَیں اپنے دل چوں اوس بھرا لئی ناراضگی نُوں کڈھ سکیا تے اوہدے بارے اپنی سوچ نُوں وی بدل سکیا۔ ایہدے علاوہ دُعا کرن دی وجہ توں میرے دل نُوں سکون مِلیا۔“‏

19.‏ ایس دُنیا دے خاتمے تک سانوں کیہہ کردے رہنا چاہی دا اے؟ (‏1-‏پطرس 3:‏8، 9‏)‏

¹⁹ ایس دُنیا دے خاتمے تک ہو سکدا اے کہ سانوں ہور وی نااِنصافیاں دا سامنا کرنا پووے۔ بھانویں اَگے چل کے سانوں جیہڑی وی نااِنصافی دا سامنا ہوئے، آؤ اَسی مدد لئی یہوواہ کولوں دُعا کردے رہیے۔ نالے اَسی ایہہ عزم وی کرئیے کہ اَسی نااِنصافی دا سامنا کردے ویلے یسوع ورگا رویہ ظاہر کراں گے تے بائبل دے اصولاں تے عمل کردے رہواں گے۔ اَسی یقین رکھ سکنے آں کہ جے اَسی اِنج کراں گے تے یہوواہ ضرور سانوں برکتاں دَوے گا۔‏‏—‏1-‏پطرس 3:‏8، 9 نُوں پڑھو۔‏