کیہہ کدی کدار توانوں باقاعدگی نال بائبل دا ذاتی مطالعیا کرنا مشکل لگدا اے تے کیہہ توانوں اِنج کرن چ مزہ وی نئیں آندا؟ ساڈے ساریاں نال کدی کدار اِنج ہوندا اے۔ پر ذرا کجھ ایہو جہے کماں بارے سوچو جیہڑے اَسی ہر روز کرنے آں جیویں کہ نہانا دھونا۔ ایہہ سچ اے کہ نہان لئی سانوں وقت کڈھنا پیندا اے تے کوشش وی کرنی پیندی اے۔ پر ایہدے بعد اَسی کِنّاں تازہ‌دم محسوس کرنے آں۔ ایسے طرحاں جدوں اَسی ذاتی مطالعیا کرنے آں تے اَسی ”‏خدا دے کلام دے پانی نال“‏ تازہ‌دم ہو جانے آں۔ (‏اِفسیوں 5:‏26‏)‏ باقاعدگی نال ذاتی مطالعیا کرن لئی ایہناں مشوریاں تے غور کرو:‏

• شیڈول بناؤ۔‏ بائبل دا ذاتی مطالعیا کرنا اوہناں کماں چوں اِک اے جیہڑے مسیحیاں لئی ”‏زیادہ اہم“‏ ہونے چاہی دے نیں۔ (‏فِلپّیوں 1:‏10‏)‏ ایس لئی باقاعدگی نال ذاتی مطالعیا کرن لئی اِک شیڈول بناؤ تے ایہنوں اپنے گھر چ کسے ایہو جہی جگہ تے لا دَوو جتھوں ایہہ توانوں نظر آندا رہوے جیویں کے فریج تے۔ ایہدے علاوہ تُسی اپنے فون تے الارم وی لا سکدے او جدے توں توانوں ایہہ یاد رہوے کہ تُسی ذاتی مطالعیا کرنا اے۔‏

• سوچو کہ کِنّی دیر لئی مطالعیا کرنا تواڈے لئی ٹھیک رہوے گا۔‏ توانوں کیہہ اسان لگدا اے؟ زیادہ دیر لئی بائبل دا مطالعیا کرنا یاں فیر تھوڑی دیر لئی پر ہفتے چ زیادہ وار بائبل دا مطالعیا کرنا؟ تُسی اپنے بارے بہتر جان دے او۔ ایس لئی آپ فیصلہ کرو کہ تُسی کِنّی دیر لئی ذاتی مطالعیا کرو گے۔ تے جدوں مطالعیا کرن دا وقت آندا اے پر تواڈا دل نئیں کر رہیا ہوندا تے تُسی کوشش کر سکدے او کہ صرف 10 منٹ لئی مطالعیا کر لوو۔ ایہدے توں وی توانوں بوہت فائدہ ہوئے گا کیونکہ تھوڑا کرنا کجھ نہ کرن توں بہتر اے۔ اِک واری جدوں تُسی مطالعیا شروع کر لوو گے تے تواڈا دل کرے گا کہ تُسی ہور زیادہ کرو۔—‏فِلپّیوں 2:‏13‏۔‏

• پہلے توں موضوع چُنو۔‏ فرض کرو کہ تُسی مطالعیا کرن بیٹھے او۔ جے تُسی اوس ویلے سوچو گے کہ تُسی کیہڑے موضوع تے ذاتی مطالعیا کرنا اے تے تُسی ”‏اپنے وقت نُوں سمجھداری نال استمال“‏ نئیں کر رہے ہووو گے۔ (‏اِفسیوں 5:‏16‏)‏ ایس لئی تُسی اوہناں موضوعاں دی اِک لسٹ بنا سکدے او جنہاں بارے تُسی مطالعیا کرنا چاہندے او۔ جدوں کدی تواڈے ذہن چ کوئی ایہو جیہا سوال آندا اے جدے بارے تُسی ہور جاننا چاہندے او تے اوسے ویلے اوہنوں اپنی لسٹ چ لکھ لوو۔ ہر واری ذاتی مطالعے دے آخر چ تُسی اپنی لسٹ چ ہور وی موضوع لکھ سکدے او۔‏

• ضرورت پین تے اپنا شیڈول بدل لوو۔‏ تُسی اپنے شیڈول نُوں بدل وی سکدے او جیویں کہ تُسی مطالعیا کرن دے وقت نُوں گھٹ ودھ کر سکدے او یاں تُسی جیہڑے موضوع سوچے نیں، تُسی اوہناں توں فرق موضوعاں دا وی مطالعیا کر سکدے او۔ اہم ایہہ نئیں اے کہ تُسی کدوں، کِنّی دیر لئی تے کیہڑے موضوع دا مطالعیا کردے او سگوں اہم ایہہ وے کہ تُسی باقاعدگی نال ذاتی مطالعیا کرو۔‏

جے اَسی باقاعدگی نال ذاتی مطالعیا کراں گے تے سانوں بڑا فائدہ ہوئے گا۔ اَسی یہوواہ دے ہور نیڑے ہو جانواں گے، چنگے فیصلے کرنا سکھاں گے تے تازہ‌دم محسوس کراں گے۔—‏یشوع 1:‏8‏۔‏