1، 2.‏ کلیسیا دے بزرگ کیہڑے کیہڑے کم کردے نیں؟‏

 جے تُسی کئی سالاں توں کلیسیا چ اِک خادم دے طور تے خدمت کر رہے او تے یقیناً تُسی اپنے اندر ایہو جہیاں بوہت ساریاں خوبیاں پیدا کر لئیاں ہون گیاں جیہڑیاں بزرگ بنن لئی ضروری نیں۔ کیہہ تُسی بزرگ دے طور تے خدمت کرنا چاہندے او؟—‏1-‏تیمُتھیُس 3:‏1‏۔‏

² کلیسیا دے بزرگ کیہڑے کیہڑے کم کردے نیں؟ اوہ جوش نال مُنادی دے کم چ حصہ لیندے نیں، بھین بھراواں دی دیکھ بھال کرن تے اوہناں نُوں تلیم دین لئی سخت محنت کردے نیں۔ نالے اپنیاں گلاں تے کماں توں اوہناں دا حوصلہ وی ودھاندے نیں۔ ایسے لئی بائبل چ ایہناں بھراواں نُوں ”‏نعمتاں“‏ کہیا گیا اے۔—‏اِفسیوں 4:‏8‏۔‏

3.‏ اِک بھرا کلیسیا چ بزرگ دے طور تے خدمت کرن لئی کیہہ کر سکدا اے؟ (‏1-‏تیمُتھیُس 3:‏1-‏7؛‏ طِطُس 1:‏5-‏9‏)‏

³ بھراوو، تُسی کلیسیا چ بزرگ دے طور تے خدمت کرن لئی کیہہ کر سکدے او؟ بزرگ بنن لئی کوشش کرنا دُنیا چ نوکری لبھن توں فرق اے۔ جے کوئی دُنیا چ نوکری لبھنا چاہندا اے تے اوہنوں کجھ مہارتاں دی لوڑ ہوندی اے۔ پر بزرگ بنن لئی ایہہ کافی نئیں اے کہ تواڈے اندر صرف مُنادی کرن تے تلیم دین دی مہارت ہوئے سگوں توانوں اوہناں شرطاں تے وی پورا اُترن دی لوڑ اے جیہڑیاں 1-‏تیمُتھیُس 3:‏1-‏7 تے طِطُس 1:‏5-‏9 چ دَسیاں گئیاں نیں۔ ‏(‏ایہناں ایتاں نُوں پڑھو۔)‏ ایس مضمون چ اَسی ویکھاں گے کہ اِک بھرا کلیسیا دے اندر تے دُنیا چ نیک‌نامی حاصل کرن لئی کیہہ کر سکدا اے، اِک چنگا سربراہ کیویں بن سکدا اے تے کلیسیا چ خوشی نال خدمت کیویں کر سکدا اے۔‏

نیک‌نامی حاصل کرو

4.‏ اِلزام توں پاک ہون دا کیہہ مطلب اے؟‏

⁴ اِک بزرگ نُوں ‏”‏اِلزام توں پاک“‏ ہونا چاہی دا اے۔ ایہدا مطلب اے کہ بھراوو، جے تُسی بزرگ بننا چاہندے او تے کلیسیا دے بھین بھراواں چ توانوں نیک‌نام ہونا چاہی دا اے تے تواڈا چال چلن ایناں چنگا ہونا چاہی دا اے کہ کوئی تواڈے تے اُنگلی نہ چُک سکے۔ ایہدے علاوہ توانوں دُنیا دے لوکاں چ وی نیک‌نام ہونا  چاہی دا اے۔ دُنیا دے لوک تواڈے عقیدیاں تے اِعتراض کر سکدے نیں پر اوہناں کول تواڈی ایمانداری تے تواڈے چال چلن تے اُنگلی چُکن دی کوئی وجہ نئیں ہونی چاہی دی۔ (‏دانی‌ایل 6:‏4، 5‏)‏ ایس لئی اپنے آپ کولوں پچھو:‏ ”‏کیہہ مَیں کلیسیا چ تے کلیسیا دے باہر لوکاں دی نظر چ نیک‌نام ہے واں؟“‏

5.‏ تُسی ایہہ کیویں ثابت کر سکدے او کہ تُسی ”‏بھلائی نُوں پیار“‏ کرن والے او؟‏

⁵ جے تُسی ‏”‏بھلائی نُوں پیار“‏ کرن والے او تے تُسی دُوجیاں چ خوبیاں لبھو گے تے اوہناں دے چنگے کماں لئی اوہناں دی تعریف کرو گے۔ ایہدے نال نال تُسی خوشی نال دُوجیاں دی بھلائی لئی کم کرو گے، ایتھوں تک کہ تُسی اوہ کم کرن لئی وی تیار رہوو گے جدی تواڈے کولوں توقع نئیں کیتی جاندی۔ (‏1-‏تھسلُنیکیوں 2:‏8؛‏ طِطُس 1:‏8‏)‏ بزرگاں دے اندر ایس خوبی دا ہونا ایناں ضروری کیوں اے؟ ایس خوبی دی وجہ توں ای اوہ خوشی نال اپنا وقت بھین بھراواں دی مدد کرن تے اپنیاں ذمے‌داریاں نُوں پورا کرن تے لا سکن گے۔ سچ اے کہ اِنج کرن لئی بوہت محنت کرنی پیندی اے۔ (‏1-‏پطرس 5:‏1-‏3‏)‏ پر ایہناں کماں نُوں کرن نال اوہناں نُوں جیہڑی خوشی ملے گی، اوہ کسے وی قربانی نالوں ودھ کے ہوئے گی۔—‏اعمال 20:‏35‏۔‏

6.‏ مہمان‌نواز ہون دا کیہہ مطلب اے؟ (‏عبرانیوں 13:‏2،‏ 16‏؛ تصویر نُوں وی ویکھو۔)‏

⁶ توانوں ‏”‏مہمان‌نواز“‏ وی ہونا چاہی دا اے۔ ایہدے لئی ضروری اے کہ تُسی صرف اپنے قریبی دوستاں لئی ای نئیں سگوں دُوجے بھین بھراواں لئی وی کجھ اچھا کرو۔ (‏1-‏پطرس 4:‏9‏)‏ اِک کتاب جدے چ بائبل چ استمال ہون والے لفظاں دا مطلب دَسیا گیا اے، اوہدے چ اِک مہمان‌نواز بندے بارے ایہہ کہیا گیا اے:‏ ”‏اوہدے گھر دے تے دل دے دروازے اجنبیاں لئی ہمیشاں کُھلے رہندے نیں۔“‏ اپنے آپ کولوں پچھو:‏ ”‏کیہہ مَیں اِک ایہو جہے بندے دے طور تے مشہور آں جیہڑا کلیسیا چ آن والے مہماناں نُوں پیار نال مِلدا اے تے اوہناں دی مہمان‌نوازی کردا اے؟“‏ ‏(‏عبرانیوں 13:‏2،‏ 16 نُوں پڑھو۔)‏ اِک مہمان‌نواز بندہ کلیسیا چ آن والے ہر طرحاں دے مہماناں لئی پیار وکھاندا اے جیویں کہ اوہناں بھراواں لئی جیہڑے کلیسیا چ تقریر دین لئی آندے نیں، حلقے دے نگہباناں لئی تے ایتھوں تک کہ غریب بھین بھراواں لئی وی۔—‏پیدائش 18:‏2-‏8؛‏ اَمثال 3:‏27؛‏ لُوقا 14:‏13، 14؛‏ اعمال 16:‏15؛‏ رومیوں 12:‏13‏۔‏

7.‏ اِک بزرگ ایہہ کیویں ظاہر کردا اے کہ اوہ پیسے نال پیار نئیں کردا؟‏

⁷ اِک بزرگ نُوں پیسے نال پیار نئیں کرنا چاہی دا۔‏ ایہدا مطلب اے کہ تواڈا دھیان زیادہ توں زیادہ پیسہ کمان تے دُنیا دِیاں چیزاں حاصل کرن تے نئیں ہونا چاہی دا۔ بھانویں تُسی امیر او یاں غریب، توانوں اپنی زندگی چ خدا دی بادشاہی نُوں سب توں زیادہ اہمیت دینی چاہی دی اے۔ (‏متی 6:‏33‏)‏ توانوں اپنا وقت، چیزاں تے طاقت یہوواہ دی عبادت کرن، اپنے گھر والیاں دا خیال رکھن تے کلیسیا دے بھین بھراواں دی خدمت کرن لئی استمال کرنا چاہی دی اے۔ (‏متی 6:‏24؛‏ 1-‏یوحنا 2:‏15-‏17‏)‏ ایس لئی اپنے آپ کولوں پچھو:‏ ”‏میرے لئی پیسہ کِنّاں اہم اے؟ کیہہ مَیں اوہناں چیزاں تے راضی رہنا واں جیہڑیاں  ضروری نیں؟ یاں کیہہ میرا دھیان زیادہ توں زیادہ پیسہ کمان تے چیزاں کٹھیاں کرن تے لگا رہندا اے؟“‏—‏1-‏تیمُتھیُس 6:‏6،‏ 17-‏19‏۔‏

8.‏ تُسی کیہڑے طریقیاں نال ظاہر کر سکدے او کہ تُسی چنگیاں عادتاں دے مالک او تے اپنے آپ تے قابو رکھن والے او؟‏

⁸ جے تُسی چنگیاں عادتاں دے مالک او تے ‏”‏اپنے آپ تے قابو رکھن“‏ والے او تے تُسی زندگی دے ہر معاملے چ سمجھداری نال کم لوو گے۔ ایہدے چ ایہہ شامل اے کہ تُسی حدوں ودھ نئیں کھاوو پیوو گے، حیادار کپڑے پاؤ گے، والاں دے مناسب سٹائل بناؤ گے تے تفریح بارے چنگے فیصلے کرو گے۔ تُسی دنیا دے طور طریقیاں دے غلام نئیں ہووو گے۔ (‏لُوقا 21:‏34؛‏ یعقوب 4:‏4‏)‏ تُسی اوس ویلے وی پُرسکون رہوو گے جدوں دُوجے توانوں غصہ دَواندے نیں۔ کلیسیا دے بزرگ نُوں ‏”‏شرابی“‏ نئیں ہونا چاہی دا تے نہ ای ایس گل لئی مشہور ہونا چاہی دا اے کہ اوہ جدوں وی پیندا اے، حدوں ودھ پی لیندا اے۔ اپنے آپ کولوں پچھو:‏ ”‏کیہہ میری زندگی توں نظر آندا اے کہ مَیں چنگیاں عادتاں دا مالک آں نالے اپنے آپ تے قابو رکھن والا واں؟“‏

9.‏ ”‏سمجھدار“‏ بنن تے سلیقے تے ترتیب نال کم کرن چ کیہہ شامل اے؟‏

⁹ جے تُسی گہرائی نال ایس گل بارے سوچ وچار کرو گے کہ بائبل دے اصول کسے معاملے تے کیویں لاگو ہوندے نیں تے تُسی ‏”‏سمجھدار“‏ بنو گے۔ تُسی فوراً کسے نتیجے تے نئیں پونچ جاوو گے سگوں کوئی وی فیصلہ کرن توں پہلاں تُسی ایس گل دا خیال رکھو گے کہ تواڈے کول ساری معلومات ہوئے۔ (‏اَمثال 18:‏13‏)‏ اِنج تُسی ایہو جہے فیصلے کر سکو گے جیہڑے یہوواہ دی سوچ دے مطابق ہون گے۔ ایہدے علاوہ توانوں سلیقے تے ترتیب نال کم کرن والا ہونا چاہی دا اے۔ ایہدے چ ایہہ وی شامل اے کہ تُسی وقت دی پابندی کرو نالے تُسی اِک ایہو جہے بندے دے طور تے مشہور ہووو جیہڑا بھروسے دے لائق اے تے ہدیتاں نُوں من دا اے۔ جدوں تُسی اوہناں ساریاں شرطاں تے پورا اُترو گے جنہاں بارے اَسی گل کیتی اے تے تُسی اِک چنگا ناں کماؤ گے۔ آؤ ہُن غور کرنے آں کہ تُسی اوہناں شرطاں تے کیویں پورا اُتر سکدے او جیہڑیاں اِک چنگا سربراہ بنن لئی ضروری نیں۔‏

اِک چنگے سربراہ بنو

10.‏ اِک آدمی اپنے گھر والیاں دی چنگی طرحاں پیشوائی کیویں کر سکدا اے؟‏

¹⁰ بھراوو، جے تُسی شادی‌شُدہ او تے کلیسیا چ بزرگ بننا چاہندے او تے ایہہ بوہت ضروری اے کہ تواڈے بیوی بچے دُوجیاں لئی چنگی مثال ہون۔ ایس لئی توانوں اپنے گھر والیاں دی چنگی طرحاں پیشوائی کرنی چاہی دی اے۔ ایہدے چ ایہہ شامل اے کہ تُسی اپنے گھر والیاں نال پیار نال پیش آؤ تے اِک سربراہ دے طور تے اپنیاں ذمے‌داریاں نُوں چنگی طرحاں پورا کرو۔ باقاعدگی نال اپنے گھر والیاں نال مِل کے خاندانی عبادت کرو، اوہناں نُوں عبادتاں تے لے کے جاؤ تے ایس گل دا خیال رکھو کہ اوہ باقاعدگی نال مُنادی چ حصہ لین۔ ایہہ ایناں اہم کیوں اے؟ پولُس رسول نے کہیا:‏ جے اِک آدمی اپنے گھر والیاں دی پیشوائی نئیں کر سکدا تے اوہ خدا دی کلیسیا دی دیکھ بھال کیویں کرے گا؟—‏1-‏تیمُتھیُس 3:‏5‏۔‏

11، 12.‏ جے اِک بھرا بزرگ بننا چاہندا اے تے ایہہ کیوں ضروری اے کہ اوہدے بچیاں دا چال‌چلن چنگا ہوئے؟ (‏تصویر نُوں وی ویکھو۔)‏

¹¹ جے تواڈے بچے حالے چھوٹے نیں یعنی اوہناں دی عمر 18 سال توں گھٹ اے تے اوہناں نُوں تابع‌دار تے تمیزدار ہونا چاہی دا اے۔ توانوں پیار نال اوہناں دی تربیت کرنی چاہی دی اے تے اوہناں نُوں سکھانا چاہی دا اے۔ ظاہری جہی گل اے کہ تُسی چاہوو گے کہ دُوجے بچیاں وانگوں اوہ وی ہسن کھیڈن تے شرارتاں کرن۔ پر اوہناں دی چنگی تربیت کرنا وی بوہت ضروری اے تاکہ اوہ فرمانبردار تے تمیزدار بنن تے دُوجیاں دی عزت کرن۔ ایہدے علاوہ توانوں اپنے بچیاں دی مدد کرنی چاہی دی اے تاکہ اوہ یہوواہ نال دوستی کرن، بائبل دے اصولاں مطابق زندگی گزارن تے بپتسمہ لین۔‏

¹² بائبل چ بزرگاں دے بچیاں بارے ایہہ وی دَسیا گیا اے کہ اوہ ‏”‏ایمان رکھن والے ہون تے اوہناں اُتے عیاشی یاں بغاوت کرن دا اِلزام نہ ہووے۔“‏ جے کسے بزرگ یاں خادم دا بچہ بپتسمہ لے چُکیا اے یاں بپتسمہ لین لئی قدم ودھا رہیا اے پر اوہ کوئی وڈا گُناہ کردا اے تے کلیسیا دے بزرگاں نُوں ایہہ فیصلہ کرنا پیندا اے کہ کیہہ اوہ بھرا بزرگ یاں خادم رہ سکدا اے۔ جے اوس بھرا نے اپنے بچے دی چنگی تربیت نئیں کیتی سی تے اوہ بزرگ دے طور تے خدمت نئیں کر سکدا۔—‏اُردو زبان چ 1 دسمبر 1996 دے ‏”‏مینارِنگہبانی“‏ دے صفحہ نمبر 28 تے پیراگراف نمبر 6، 7 نُوں ویکھو‏۔‏

کلیسیا دی چنگی طرحاں دیکھ‌بھال کرو

13.‏ تُسی ایہہ کیویں ظاہر کر سکدے او کہ تُسی ضدی نئیں سگوں سمجھدار انسان او؟‏

¹³ جیہڑے بھرا اپنے اندر خوبیاں پیدا کردے نیں تے ایہناں نُوں ظاہر  کردے نیں، اوہ کلیسیا لئی اِک برکت ہوندے نیں۔ ایہناں وچوں اِک خوبی اے ‏”‏سمجھداری۔“‏ اِک سمجھدار بندہ ایہو جہے کم کردا اے جنہاں توں صلح قائم رہوے۔ جے تُسی چاہندے او کہ لوک توانوں اِک سمجھدار بندے دے طور تے جانن تے دُوجیاں دی گل دھیان نال سنو تے اوہناں دے جذبات نُوں سمجھن دی کوشش کرو۔ فرض کرو کہ بزرگاں دا اجلاس ہو رہیا اے۔ اوتھے اِک فیصلہ ہوندا اے تے زیادہ‌تر بزرگ اوس فیصلے دی حمایت کردے نیں۔ جے بائبل دا کوئی اصول یاں حکم نئیں ٹُٹ رہیا تے کیہہ تُسی وی اوس فیصلے دی حمایت کرو گے؟ ایہدے علاوہ اِک بزرگ نُوں ‏”‏ضدی .‏ .‏ .‏ نئیں ہونا چاہی دا۔“‏ ایہدا مطلب ایہہ وے کہ تُسی دُوجیاں نُوں اوس طریقے نال کم کرن تے مجبور نہ کرو جیویں تُسی چاہندے او۔ توانوں ایہہ وی سمجھن دی لوڑ اے کہ دُوجیاں دی رائے تے مشورے نُوں سُننا کِنّاں اہم ہوندا اے۔ (‏پیدائش 13:‏8، 9؛‏ اَمثال 15:‏22‏)‏ اِک بزرگ نُوں ‏”‏لڑائی جھگڑا“‏ نئیں کرنا چاہی دا تے ‏”‏گرم مزاج“‏ نئیں ہونا چاہی دا۔‏ ایہدا مطلب اے کہ اوہنوں دُوجیاں دی بے‌عزتی یاں اوہناں نال بحث نئیں کرنی چاہی دی۔ ایہدی بجائے اوہنوں دُوجیاں نال نرمی تے پیار نال پیش آنا چاہی دا اے۔ توانوں صلح‌پسند ہونا چاہی دا اے۔ توانوں اوس ویلے وی صلح قائم کرن چ پہل کرنی چاہی دی اے جدوں ماحول گرم ہو رہیا ہوئے۔ (‏یعقوب 3:‏17، 18‏)‏ جدوں تُسی دُوجیاں نال نرمی نال گل کرو گے تے اوہناں دا غصہ ٹھنڈا ہو جائے گا، ایتھوں تک کہ تواڈے مخالفاں دا وی۔—‏قُضاۃ 8:‏1-‏3؛‏ اَمثال 20:‏3؛‏ 25:‏15؛‏ متی 5:‏23، 24‏۔‏

14.‏ (‏الف)‏ایس گل دا کیہہ مطلب اے کہ اِک بزرگ نُوں ایہو جیہا بندہ نئیں ہونا چاہی دا جیہڑا نواں نواں شاگرد بنیا ہوئے؟ (‏ب)‏”‏وفادار“‏ ہون دا کیہہ مطلب اے؟‏

¹⁴ جیہڑے بھرا نُوں کلیسیا چ بزرگ مقرر کیتا جاندا اے، اوہ اِک ایہو جیہا بندہ نئیں ہوندا جیہڑا نواں نواں شاگرد بنیا ہوئے۔‏ سچ اے کہ بزرگ بنن لئی ایہہ ضروری نئیں کہ اِک بھرا کئی سالاں توں بپتسمہ‌یافتہ گواہ ہووے۔ پر ایہہ وی سچ اے کہ اِک بھرا نُوں پُختہ مسیحی بنن چ وقت لگدا اے۔ بزرگ بنن لئی ضروری اے کہ اوہ بھرا ظاہر کرے کہ اوہ یسوع وانگوں خاکسار اے تے خوشی نال اوس وقت دا اِنتظار کر سکدا اے جدوں تک اوہنوں یہوواہ وَلّوں کوئی ذمے‌داری نئیں مِلدی۔ (‏متی 20:‏23؛‏ فِلپّیوں 2:‏5-‏8‏)‏ تُسی ایہہ وی ثابت کر سکدے او کہ تُسی یہوواہ دے ‏”‏وفادار“‏ او۔ اِنج کرن لئی اوہدے معیاراں تے چلدے رہوو تے اوہدی تنظیم وَلّوں مِلن والیاں ہدیتاں تے عمل کردے رہوو۔—‏1-‏تیمُتھیُس 4:‏15‏۔‏

15.‏ کیہہ ایہہ ضروری اے کہ اِک بزرگ بڑیاں ای شاندار تقریراں دیندا ہوئے؟ وضاحت کرو۔‏

¹⁵ بائبل چ صاف صاف دَسیا گیا اے کہ اِک نگہبان نُوں تلیم دین دے  لائق ہونا چاہی دا اے۔ کیہہ ایہدا ایہہ مطلب اے کہ اوہدیاں تقریراں بڑیاں ای زبردست ہون؟ ایہہ ضروری نئیں۔ کئی بزرگ بڑے چنگے تے تجربہ‌کار ہوندے نیں پر شاید اوہناں دِیاں تقریراں اینیاں زبردست نہ ہون۔ پر جدوں اوہ مُنادی چ جاندے نیں تے لوکاں نُوں بڑے چنگے طریقے نال تلیم دیندے نیں تے بڑے ودھیا طریقے نال بائبل چوں بھین بھراواں دا حوصلہ ودھاندے نیں۔ (‏1-‏تیمُتھیُس 3:‏2؛‏ 1-‏کُرنتھیوں 12:‏28، 29 تے اِفسیوں 4:‏11 تے غور کرو۔)‏ سچ اے کہ ایہہ ضروری نئیں کہ اِک بزرگ بڑیاں شاندار تقریراں دیندا ہوئے۔ پر فیر وی اوہنوں اِک چنگا اُستاد بنن لئی محنت کردے رہنا چاہی دا اے۔ تُسی اِنج کیویں کر سکدے او؟‏

16.‏ تُسی اِک چنگے اُستاد بنن لئی کیہہ کر سکدے او؟ (‏تصویر نُوں وی ویکھو۔)‏

¹⁶ اِک بزرگ نُوں ‏”‏خدا دے کلام دے عین مطابق تلیم دینی چاہی دی اے۔“‏ ایہہ اِک چنگا اُستاد بنن لئی ضروری اے۔ جدوں کدی تُسی کسے نُوں کلّے چ کوئی مشورہ دیندے او یاں اوہنوں نصیحت کردے او تے اوہ وی بائبل دے مطابق ہونی چاہی دی اے۔ ایہدے لئی ضروری اے کہ تُسی بائبل دا تے ساڈی تنظیم دِیاں کتاباں تے رسالیاں دا چنگی طرحاں مطالعیا کرو۔ (‏اَمثال 15:‏28؛‏ 16:‏23؛‏ طِطُس 1:‏9‏)‏ مطالعیا کردے ویلے ایس گل تے دھیان دَوو کہ ساڈیاں کتاباں تے رسالیاں چ ایتاں دی کیہہ وضاحت کیتی گئی اے تاکہ تُسی ایہناں نُوں صحی طرحاں استمال کر سکو۔ ایہدے علاوہ جدوں تُسی تلیم دیندے او تے سُنن والیاں دے دل تک پونچن دی کوشش کرو۔ اپنی تلیم دین دی مہارت نُوں نکھارن لئی تُسی کسے تجربہ‌کار بزرگ کولوں مشورہ لے سکدے او تے اوہدے مشوریاں تے عمل کر سکدے او۔ (‏1-‏تیمُتھیُس 5:‏17‏)‏ بزرگاں نُوں بھین بھراواں نُوں ‏”‏حوصلہ دین دے قابل“‏ ہونا چاہی دا اے۔ پر کدی کدار اوہناں نُوں بھین بھراواں نُوں نصیحت کرنی پے سکدی اے، ایتھوں تک کہ اوہناں دی ‏”‏درستی“‏ وی کرنی پے سکدی اے۔ بھانویں بزرگ اپنے بھین بھراواں دا حوصلہ ودھان یاں اوہناں دی درستی کرن، اوہناں نُوں ہمیشاں نرمی نال کم لینا چاہی دا اے۔ جے تُسی پیار تے نرمی نال پیش آؤ گے تے خدا دے کلام چوں تلیم دَوو گے تے تُسی اِک چنگے اُستاد بن سکو گے کیونکہ تُسی عظیم اُستاد یسوع دی مثال تے عمل کر رہے ہووو گے۔—‏متی 11:‏28-‏30؛‏ 2-‏تیمُتھیُس 2:‏24‏۔‏

بزرگ بنن لئی محنت کردے رہوو

17.‏ (‏الف)‏کیہڑی گل خادماں دی مدد کرے گی کہ اوہ بزرگ بنن لئی کوشش کردے رہن؟ (‏ب)‏جدوں کلیسیا دے بزرگ کسے بھرا نُوں بزرگ بنان بارے سوچ رہے ہوندے نیں تے اوہناں نُوں کیہڑیاں گلاں نُوں ذہن چ رکھنا چاہی دا اے؟ (‏ایس بکس نُوں وی ویکھو:‏ ‏”‏ بھراواں نُوں پرکھدے ویلے اوہناں کولوں حدوں ودھ توقع نہ کرو۔‏‏“‏‏)‏

¹⁷ بزرگ بنن دِیاں شرطاں تے غور کرن توں بعد شاید کجھ خادماں نُوں لگے کہ اوہ تے کدی وی بزرگ نئیں بن سکدے کیونکہ اوہ ایہناں ساریاں  شرطاں تے پورا نئیں اُتر سکدے۔ پر یاد رکھو کہ نہ تے یہوواہ تے نہ ای اوہدی تنظیم تواڈے کولوں ایہہ توقع کردی اے کہ تُسی ایہناں شرطاں تے بالکل صحی طرحاں پورے اُترو۔ (‏1-‏پطرس 2:‏21‏)‏ پر یہوواہ دی پاک روح دی مدد نال تُسی ایہناں تے کافی حد تک پورا اُتر سکدے او۔ (‏فِلپّیوں 2:‏13‏)‏ کیہہ ایہناں شرطاں وچوں کوئی ایہو جہی گل ہے وے جدے چ توانوں خاص طور تے بہتری لیان دی لوڑ اے؟ جے ہاں تے یہوواہ کولوں ایس بارے دُعا کرو، تحقیق کرو تے کسے بزرگ کولوں پچھو کہ تُسی اپنے اندر بہتری لیان لئی کیہہ کر سکدے او۔‏

18.‏ خادماں نُوں کیہہ کرن دی کوشش کرنی چاہی دی اے؟‏

¹⁸ آؤ اَسی سارے تے اوہ بھرا جیہڑے پہلاں توں ای بزرگ دے طور تے خدمت کر رہے نیں، اپنے اندر اوہناں خوبیاں نُوں پیدا کردے رہیے جنہاں دا ایس مضمون چ ذکر ہویا اے۔ (‏فِلپّیوں 3:‏16‏)‏ کیہہ تُسی کلیسیا چ خادم او؟ فیر کیوں نہ تُسی بزرگ بنن لئی کوشش کرو۔ یہوواہ کولوں درخاست کرو کہ اوہ تواڈی تربیت کرے تاکہ تُسی اوہدے تے کلیسیا دے ہور زیادہ کم آ سکو۔ (‏یسعیاہ 64:‏8‏)‏ ساڈی دُعا اے کہ یہوواہ تواڈیاں اوہناں کوششاں تے برکت پاوے جیہڑیاں تُسی بزرگ بنن لئی کردے او۔‏