1.‏ پولُس رسول کلیسیا دے خادماں بارے کیہو جیہا محسوس کردا سی؟‏

 خادم کلیسیا چ بڑے اہم کم کردے نیں۔ پولُس رسول ایہناں بھراواں دی بوہت قدر کردا سی۔ مثال لئی، اوہنے فِلپّی دے مسیحیاں نُوں خط لکھدے ویلے بزرگاں دے نال نال خادماں نُوں وی سلام گھلیا۔‏‏—‏فِلپّیوں 1:‏1‏۔‏

2.‏ بھرا لوئس کلیسیا چ خادم دے طور تے کم کرن بارے کیہو جیہا محسوس کردا اے؟‏

² بوہت سارے بپتسمہ‌یافتہ بھراواں نُوں کلیسیا چ خادماں دے طور تے خدمت کر کے بوہت خوشی مِلدی اے فیر بھانویں اوہناں دی عمر جِنّی وی ہوئے۔ مثال لئی، جدوں بھرا ڈیون نُوں کلیسیا چ خادم بنایا گیا تے اوس ویلے اوہ 18 سال دا سی۔ پر جدوں بھرا لوئس خادم بنیا تے اوہدی عمر 50 سال توں زیادہ سی۔ اوہنے اپنی ایس خدمت بارے کہیا:‏ ”‏ایہہ میرے لئی بڑے مان دی گل اے کہ مَیں اِک خادم دے طور تے کلیسیا دے بھین بھراواں دے کم آ سکنا واں۔ بھین بھراواں نے میرے لئی بڑی محبت وکھائی اے پر ہُن میری واری اے کہ مَیں اوہناں لئی محبت وکھاواں۔“‏ یقیناً بوہت سارے خادم بھرا لوئس وانگوں ای محسوس کردے نیں۔‏

3.‏ ایس مضمون چ اَسی کیہڑے سوالاں تے غور کراں گے؟‏

³ جے تُسی اِک بپتسمہ‌یافتہ بھرا او پر حالے تک کلیسیا چ خادم دے طور تے خدمت نئیں کر رہے تے کیہہ تُسی اِنج کرن دا منصوبہ بنا سکدے او؟ کیہڑی چیز تواڈے دل چ خادم بنن دی خواہش پیدا کر سکدی اے؟ تے بائبل چ کیہڑیاں شرطاں بارے دَسیا گیا اے جیہڑیاں اِک خادم بنن لئی ضروری نیں؟ ایس مضمون چ اَسی ایہناں سوالاں دے جواب حاصل کراں گے۔ پر آؤ سب توں پہلاں ایہہ ویکھنے آں کہ خادم کلیسیا چ کیہڑے کم کردے نیں۔‏

 خادم کلیسیا چ کیہڑے کم کردے نیں؟‏

4.‏ خادم کلیسیا چ کیہڑے کم کردے نیں؟ (‏تصویر نُوں وی ویکھو۔)‏

⁴ خادم اِک بپتسمہ‌یافتہ بھرا ہوندا اے جنہوں یہوواہ دی پاک روح دی رہنمائی چ مقرر کیتا جاندا اے تاکہ اوہ کلیسیا دے ضروری کم کرن چ بزرگاں دی مدد کر سکے۔ مثال لئی، کجھ خادم ایس گل دا خیال رکھدے نیں کہ مبشراں کول مُنادی کرن لئی علاقہ تے کتاباں وغیرہ ہون تے کجھ خادم عبادت‌گاہ دی صفائی یاں مرمت کرن چ مدد کردے نیں۔ اوہ عبادت دے دوران حاضرباشاں دے طور تے وی کم کردے نیں نالے ساؤنڈ سسٹم تے ویڈیوز وی چلاندے نیں۔ ایہدے چ کوئی شک نئیں کہ خادم بڑے اہم کم کردے نیں۔ پر سب توں ضروری گل ایہہ وے کہ اوہ یہوواہ نال پیار کردے نیں تے اوہدے معیاراں تے چلدے نیں۔ اوہ اپنے بھین بھراواں نال وی بڑا پیار کردے نیں۔ (‏متی 22:‏37-‏39‏)‏ اِک بپتسمہ‌یافتہ بھرا خادم بنن لئی کیہہ کر سکدا اے؟‏

5.‏ اِک بھرا خادم بنن لئی کیہہ کر سکدا اے؟‏

⁵ بائبل چ دَسیا گیا اے کہ جے اِک بھرا کلیسیا چ خادم بننا چاہندا اے تے اوہنوں کیہڑیاں شرطاں تے پورا اُترن دی لوڑ اے۔ (‏1-‏تیمُتھیُس 3:‏8-‏10،‏ 12، 13‏)‏ بھراوو، ایس اعزاز نُوں حاصل کرن لئی اوہناں شرطاں تے غور کرو تے فیر اوہناں تے پورا اُترن لئی سخت کوشش کرو۔ پر سب توں پہلاں ایس گل بارے سوچو کہ تُسی خادم بننا کیوں چاہندے او۔‏

تُسی خادم کیوں بننا چاہندے او؟‏

6.‏ توانوں کیس وجہ توں کلیسیا چ خادم بننا چاہی دا اے؟ (‏متی 20:‏28‏؛ تصویر نُوں وی ویکھو۔)‏

⁶ ذرا یسوع دی مثال تے غور کرو۔ اوہ یہوواہ تے انساناں نال بوہت پیار کردا سی۔ ایس محبت دی وجہ توں ای اوہ سخت محنت کردا سی تے دُوجیاں لئی معمولی توں معمولی کم کرن لئی وی تیار ہوندا سی۔ ‏(‏متی 20:‏28 نُوں پڑھو؛‏ یوحنا 13:‏5،‏ 14، 15‏)‏ جے تُسی وی یہوواہ تے دُوجیاں نال محبت دی وجہ توں خادم بننا چاہندے او تے یہوواہ توانوں برکت دَوے گا تے تواڈی مدد کرے گا تاکہ تُسی خادم بنن دے منصوبے نُوں پورا کر سکو۔—‏1-‏کُرنتھیوں 16:‏14؛‏ 1-‏پطرس 5:‏5‏۔‏

7.‏ اِک بھرا نُوں اہمیت حاصل کرن لئی خادم کیوں نئیں بننا چاہی دا؟‏

⁷ دُنیا چ اکثر لوک ایہہ ظاہر کردے نیں کہ اوہ بڑے خاص نیں۔ ایس وجہ توں اوہناں دی بڑی تعریف کیتی جاندی اے۔ پر یہوواہ دے بندے اِنج دے نئیں نیں۔ جیہڑا بھرا یسوع وانگوں دُوجیاں نال محبت کردا اے، اوہ اِختیار دا بُھکھا نئیں ہوندا تے اپنے آپ نُوں دُوجیاں نالوں اہم نئیں سمجھدا۔ پر ذرا سوچو کہ جے کوئی ایہو جیہا بندہ کلیسیا چ خادم بن جائے جیہڑا اپنے آپ نُوں بڑا اہم سمجھدا اے تے شاید اوہ ایہو جہے معمولی کم نہ کرے جیہڑے یہوواہ دِیاں قیمتی بھیڈاں دا خیال رکھن لئی ضروری نیں۔ شاید اوہ سوچے کہ ایہناں کماں نُوں کرنا اوہدی بے‌عزتی اے۔ (‏یوحنا 10:‏12‏)‏ یہوواہ کدی وی  ایہو جہے لوکاں دِیاں کوششاں تے برکت نئیں پاندا جیہڑے غرور دی وجہ توں کوئی کم کرنا چاہندے نیں۔—‏1-‏کُرنتھیوں 10:‏24،‏ 33؛‏ 13:‏4، 5‏۔‏

8.‏ یسوع نے اپنے رسولاں نُوں کیہڑی گل سمجھائی؟‏

⁸ کجھ موقعیاں تے یسوع دے قریبی دوستاں نے وی غلط نیت نال ذمے‌داریاں حاصل کرن دی کوشش کیتی۔ ایس بارے ذرا اوس واقعے تے غور کرو جدوں یعقوب تے یوحنا یسوع کول آئے۔ اوہناں نے یسوع کولوں ایہہ فرمائش کیتی کہ اوہ اپنی بادشاہی چ اوہناں دونواں نُوں اُچا اوہدا دَوے۔ ایس گل تے یسوع نے اوہناں دونواں دی تعریف نئیں کیتی۔ سگوں اوہنے اپنے سارے رسولاں نُوں کہیا کہ ”‏جیہڑا تواڈے وچوں وڈا بننا چاہندا اے، اوہ تواڈا خادم بنے تے جیہڑا تواڈے وچوں اُچا عہدہ چاہندا اے، اوہ ساریاں دا غلام بنے۔“‏ (‏مرقس 10:‏35-‏37،‏ 43، 44‏)‏ جیہڑے بھرا ایس نیت نال خادم بننا چاہندے نیں کہ اوہ بھین بھراواں دی خدمت کرن، اوہ کلیسیا لئی برکت ثابت ہوندے نیں۔—‏1-‏تھسلُنیکیوں 2:‏8‏۔‏

کیہڑی چیز تواڈے دل چ خادم بنن دی خواہش نُوں ودھا سکدی اے؟‏

9.‏ تُسی اپنے دل چ خادم بنن دی خواہش نُوں کیویں ودھا سکدے او؟‏

⁹ ایہدے چ کوئی شک نئیں کہ تُسی یہوواہ نال بوہت پیار کردے او تے بھین بھراواں دی خدمت کرنا چاہندے او۔ پر ہو سکدا اے کہ تواڈے دل چ ایہو جہے کم کرن دی خواہش نہ ہوئے جیہڑے خادم کردے نیں۔ جے ایہہ گل اے تے تُسی اپنے دل چ خادم بنن دی خواہش نُوں کیویں ودھا سکدے او؟ ایہدے لئی سوچو کہ خادم دے طور تے بھین بھراواں دی خدمت کرن نال توانوں کِنّی خوشی ملے گی۔ یسوع نے کہیا سی:‏ ”‏دُوجیاں کولوں کجھ لین دی بجائے اوہناں نُوں کجھ دے کے زیادہ خوشی مِلدی اے۔“‏ (‏اعمال 20:‏35‏)‏ یسوع آپ وی ایس اصول تے عمل کردا سی۔ اوہنوں دُوجیاں دی خدمت کرن نال بوہت زیادہ خوشی مِلی تے توانوں وی ایہہ خوشی مِل سکدی اے۔‏

10.‏ یسوع نے ایہہ کیویں ثابت کیتا کہ اوہ خوشی نال دُوجیاں دی خدمت کرنا چاہندا سی؟ (‏مرقس 6:‏31-‏34‏)‏

¹⁰ آؤ اِک مثال تے غور کرنے آں جدے توں پتہ چلدا اے کہ یسوع خوشی نال دُوجیاں دی خدمت کردا سی۔ ‏(‏مرقس 6:‏31-‏34 نُوں پڑھو۔)‏ اِک واری یسوع تے اوہدے رسول بوہت تھکے ہوئے سن۔ اوہ کسے ویران جگہ جا رہے سن تاکہ تھوڑی دیر لئی آرام کر سکن۔ پر بوہت سارے لوک یسوع دی تلیم سنن لئی اوہدے توں پہلاں اوتھے پونچ گئے۔ یسوع چاہندا تے اوہ لوکاں نُوں مِلن توں اِنکار کر سکدا سی کیونکہ اوہنوں تے اوہدے ساتھیاں نُوں تے کھانا کھان دا وقت وی نئیں مل رہیا سی۔یسوع چاہندا تے اوہ لوکاں نُوں پاک کلام دِیاں صرف اِک دو سچائیاں سکھا کے ای واپس گھل دیندا اے۔ پر اوہنے اِنج نئیں کیتا۔ اوہ لوکاں نال پیار کردا سی ایس لئی ”‏اوہ اوہناں نُوں بوہت ساریاں گلاں سکھان لگ پیا“‏تے اوہناں نُوں ”‏کافی دیر“‏ تک تلیم دیندا رہیا۔ (‏مرقس 6:‏35‏)‏ اوہنے اِنج ایس لئی نئیں کیتا کہ ایہہ اوہدا فرض سی سگوں ایس لئی کیتا ”‏کیونکہ اوہنوں اوہناں تے بڑا ترس آیا“‏ سی۔ اوہ اوہناں نال پیار کردا سی ایس لئی اوہ چاہندا سی کہ اوہ اوہناں نُوں یہوواہ بارے سکھائے۔ دُوجیاں دی خدمت کرن نال یسوع نُوں بڑی خوشی مِلی۔‏

11.‏ یسوع نے کیہڑے کیہڑے طریقیاں نال لوکاں دی خدمت کیتی؟ (‏تصویر نُوں وی ویکھو۔)‏

¹¹ جدوں یسوع زمین تے سی تے اوہنے صرف لوکاں نُوں تلیم ای نئیں دِتی سگوں ہور طریقیاں نال وی اوہناں دی مدد کیتی جیویں کہ اوہنے لوکاں دے کھانے دا اِنتظام کرن لئی اِک معجزہ کیتا تے اپنے شاگرداں نُوں کہیا کہ اوہ ایس کھانے نُوں لوکاں چ وَنڈن۔ (‏مرقس 6:‏41‏)‏ اِنج اوہنے اپنے شاگرداں نُوں دُوجیاں دی خدمت کرنا سکھایا۔ اوہنے ایہہ وی ظاہر کیتا کہ دُوجیاں لئی ایس طرحاں دے کم کرنا کِنّاں اہم اے۔ ایسے طرحاں دے کم اَج خادم وی کردے نیں ایس لئی اوہناں دا کم وی بوہت اہم اے۔ شاگرداں نے اوس کھانے نُوں لوکاں چ وَنڈیا تے اوہناں ساریاں نے رَج کے کھادا۔ ذرا سوچو کہ ایہہ کم کر کے شاگرداں نُوں کِنّی خوشی مِلی ہوئے گی۔ (‏مرقس 6:‏42‏)‏ یسوع نے صرف ایس موقعے تے ای دُوجیاں دی بھلائی بارے نئیں سوچیا سگوں اوہنے زمین تے اپنی پوری زندگی دے دوران لوکاں دی خدمت کیتی۔ (‏متی 4:‏23؛‏ 8:‏16‏)‏ یسوع نُوں لوکاں نُوں تلیم دے کے تے خاکساری نال اوہناں دِیاں ضرورتاں پوریاں کر کے بڑی خوشی تے سکون مِلدا سی۔ جے تُسی وی ایس لئی خادم بنن دی کوشش کرو گے تاکہ تُسی دُوجیاں دی خدمت کر سکو تے توانوں وی بڑی خوشی ملے گی۔‏

12.‏ سانوں ایہہ کیوں نئیں سوچنا چاہی دا کہ اَسی کلیسیا دے کسے کم نئیں آ سکدے؟‏

 ¹² جے توانوں لگدا اے کہ تُسی کلیسیا چ کوئی خاص کم کرن دے لائق نئیں او تے مایوس نہ ہووو۔ یقیناً تواڈے اندر ایہو جہیاں خوبیاں ضرور ہون گیاں جنہاں دی وجہ توں تُسی کلیسیا دے بڑے کم آ سکدے او۔ ذرا 1-‏کُرنتھیوں 12:‏12-‏30 چ لکھی پولُس دی گل تے غور کرو۔ ایہناں ایتاں توں پتہ چلدا اے کہ یہوواہ دے ہر بندے دا کلیسیا چ اِک اہم کردار اے۔ ایہناں ایتاں تے غور کرن توں بعد یہوواہ کولوں دُعا کرو تاکہ اوہ ایہہ سمجھن چ تواڈی مدد کرے کہ تُسی کلیسیا چ کیہہ کجھ کر سکدے او۔ بھراوو، جے تُسی حالے کلیسیا چ ایس لئی خادم نئیں بن پا رہے کیونکہ تُسی خادم بنن دِیاں شرطاں تے پورا نئیں اُتر رہے تے ہمت نہ ہارو سگوں اپنے وَلّوں اوہ سب کجھ کرن دی کوشش کرو جدی وجہ توں تُسی یہوواہ تے اپنے بھین بھراواں دے کم آ سکدے او۔ ایس گل دا پکا یقین رکھو کہ بزرگ ایس گل تے ضرور دھیان دین گے کہ تُسی کلیسیا چ کیہہ کجھ کر سکدے او تے اوہ ایہدے مطابق توانوں ذمے‌داریاں وی دین گے۔—‏رومیوں 12:‏4-‏8‏۔‏

13.‏ خادم بنن دِیاں شرطاں بارے سانوں کیہڑی گل یاد رکھنی چاہی دی اے؟‏

¹³ ذرا ایس بارے وی سوچو:‏ بائبل دے مطابق خادماں نُوں جیہڑیاں شرطاں تے پورا اُترنا چاہی دا اے، اصل چ اوہناں تے سارے مسیحیاں نُوں پورا اُترنا چاہی دا اے۔ سارے مسیحیاں نُوں یہوواہ دے نیڑے جانا چاہی دا اے، دُوجیاں دی مدد کرنی چاہی دی اے تے ایس طرحاں زندگی گزارنی چاہی دی اے جدے توں یہوواہ خوش ہوئے۔ ایہدا مطلب اے کہ تُسی خادم بنن دِیاں بوہت ساریاں شرطاں تے پہلاں توں ای پورا اُتر رہے او۔ پر توانوں ایس منصوبے نُوں پورا کرن لئی خاص طور تے کیہہ کرن دی لوڑ اے؟‏

تُسی خادم بنن لئی کیہہ کر سکدے او؟‏

14.‏ سنجیدہ ہون دا کیہہ مطلب اے؟ (‏1-‏تیمُتھیُس 3:‏8-‏10،‏ 12‏)‏

¹⁴ آؤ کجھ ایہو جہیاں شرطاں تے غور کرئیے جنہاں دا ذکر 1-‏تیمُتھیُس 3:‏8-‏10،‏ 12 چ ہویا اے۔‏‏(‏ایہناں ایتاں نُوں پڑھو۔)‏ اِک خادم نُوں سنجیدہ ہونا چاہی دا اے۔ جیہڑے لفظ دا ترجمہ ”‏سنجیدہ“‏ ہویا اے، اوہدا ترجمہ”‏عزت دے لائق“‏وی کیتا جا سکدا اے۔ سنجیدہ ہون دا مطلب ایہہ نئیں اے کہ تُسی ہس نئیں سکدے تے کسے نال مذاق نئیں کر سکدے۔ (‏واعظ 3:‏1،‏ 4‏)‏ سگوں ایہدا مطلب ایہہ وے کہ توانوں جیہڑا کم دِتا جاندا اے، تُسی اوہنوں پوری ذمے‌داری نال کرو۔ جدوں تُسی اِنج کرو گے تے بھین بھرا تواڈے تے بھروسا کرن گے تے تواڈی عزت کرن گے۔‏

15.‏ ایس گل دا کیہہ مطلب اے کہ اِک خادم نُوں دوغلیاں گلاں نئیں کرنیاں چاہی دِیاں تے اپنا فائدہ حاصل کرن دا لالچ نئیں رکھنا چاہی دا؟‏

¹⁵ خادماں نُوں دوغلیاں گلاں نئیں کرنیاں چاہی دِیاں۔‏ ایہدا مطلب اے کہ تُسی سچ بولو، بھروسے‌مند ہووو، اپنی گل تے قائم رہوو تے دُوجیاں نُوں دھوکھا نہ دَوو۔ (‏اَمثال 3:‏32‏)‏ ایہدے علاوہ خادماں نُوں اپنا فائدہ حاصل کرن دا لالچ نئیں رکھنا چاہی دا۔ایہدا مطلب اے کہ توانوں لین‌دین دے معاملے تے پیسیاں نُوں استمال کرن دے معاملے چ ایمان‌دار ہونا  چاہی دا اے۔ ایہدے چ ایہہ وی شامل اے کہ تُسی پیسیاں دا لالچ کر کے کلیسیا دے بھین بھراواں دا فائدہ نہ چکو۔‏

16.‏ (‏الف)‏بوہت زیادہ مے نہ پین چ کیہہ شامل اے؟ (‏ب)‏ضمیر صاف ہون دا کیہہ مطلب اے؟‏

¹⁶ خادماں نُوں بوہت زیادہ مے نئیں پینی چاہی دی۔‏ ایہدا مطلب اے کہ اوہناں نُوں حدوں ودھ شراب نئیں پینی چاہی دی یاں بوہت زیادہ شراب پین والے دے طور تے مشہور نئیں ہونا چاہی دا۔ ایہدے علاوہ خادماں لئی ضروری اے کہ اوہناں دا ضمیر صاف ہووے یعنی کہ جے تُسی خادم بننا چاہندے او تے توانوں یہوواہ دے معیاراں مطابق زندگی گزارنی چاہی دی اے۔ سچ اے کہ تُسی عیب‌دار او پر جے تواڈی یہوواہ نال دوستی ہوئے گی تے تُسی بڑے مطمئن رہوو گے۔‏

17.‏ جدوں اِک بھرا نُوں پَرکھیا جاندا اے تے اوہ اپنے آپ نُوں بھروسے دے لائق کیویں ثابت کر سکدا اے؟ (‏1-‏تیمُتھیُس 3:‏10‏؛ تصویر نُوں وی ویکھو۔)‏

¹⁷ کلیسیا دے خادماں نُوں پہلے پَرکھیا جانا چاہی دا اے۔‏ ایہدا مطلب ایہہ وے کہ تُسی پہلے توں ای ثابت کر چُکے او کہ تُسی بھروسے دے لائق او تے کسے ذمے‌داری نُوں چنگی طرحاں نبھا سکدے او۔ ایس لئی جدوں کلیسیا دے بزرگ توانوں کوئی ذمے‌داری دیندے نیں تے اوہناں ہدیتاں تے صحی طرحاں عمل کرو جیہڑیاں اوہ بزرگ تے یہوواہ دی تنظیم توانوں دیندی اے۔ توانوں ایہہ صحی طرحاں پتہ ہونا چاہی دا اے کہ توانوں کیہڑا کم کرن لئی کہیا گیا اے تے ایہہ کم کدوں تک ہو جانا چاہی دا اے۔ جدوں تُسی اپنی ہر ذمے‌داری لگن نال پوری کرو گے تے کلیسیا دے بھین بھرا وی ایہہ ویکھ سکن گے کہ تُسی ذمے‌داریاں چُکن دے لائق بن رہے او۔ بزرگو، بپتسمہ یافتہ بھراواں نُوں تربیت دین تے خاص دھیان دَوو۔ ‏(‏1-‏تیمُتھیُس 3:‏10 نُوں پڑھو۔)‏ کیہہ تواڈی کلیسیا چ 10 توں 14 سال یاں ایہدے نالوں وی گھٹ عمر دے بپتسمہ یافتہ بھرا ہے نیں؟ کیہہ اوہ باقاعدگی نال بائبل دا مطالعیا تے عبادتاں دی تیاری کردے نیں؟ کیہہ اوہ عبادتاں چ جواب دیندے نیں تے مُنادی چ حصہ لیندے نیں؟ جے اوہ بھرا ایہہ سارے کم کردے نیں تے اوہناں نُوں اوہناں دی عمر تے حالات مطابق کوئی ذمے‌داری دَوو۔ اِنج اوہناں بھراواں نُوں پَرکھیا جا سکے گا تے جدوں تک اوہ 17 توں 19 سال دے ہون گے، اوہ کلیسیا چ خادم بن سکن گے۔‏

18.‏ اِلزام توں پاک ہون دا کیہہ مطلب اے؟‏

¹⁸ خادماں نُوں اِلزام توں پاک ہونا چاہی دا اے۔‏ ایہدا مطلب اے کہ تواڈے تے کوئی وی وڈی غلطی یاں گُناہ کرن دا اِلزام نئیں ہونا چاہی دا۔ سچ اے کہ مسیحیاں تے جھوٹھے اِلزام وی لائے جاندے نیں۔ یسوع تے وی جھوٹھے اِلزام لائے گئے سن تے اوہنے دَسیا سی کہ اوہدے پیروکاراں نال وی اِنج ای ہوئے گا۔ (‏یوحنا 15:‏20‏)‏ پر جے تُسی یسوع وانگوں اپنا چال‌چلن پاک رکھو گے تے تُسی کلیسیا چ نیک نامی حاصل کرو گے۔—‏متی 11:‏19‏۔‏

19.‏ بائبل چ لکھی ایس گل دا کیہہ مطلب اے کہ شادی‌شُدہ بھراواں نُوں اِک بیوی دا شوہر ہونا چاہی دا اے؟‏

¹⁹ خادماں نُوں اِک بیوی دا شوہر ہونا چاہی دا اے۔‏ بھراوو، جے  تُسی شادی‌شُدہ او تے توانوں شادی بارے یہوواہ دے معیار تے چلنا چاہی دا اے تے اوہ معیار ایہہ وے کہ شادی دا بندھن اِک آدمی تے اِک عورت دے درمیان ہوئے۔ (‏متی 19:‏3-‏9‏)‏ اِک مسیحی آدمی نُوں کدی وی زناکاری نئیں کرنی چاہی دی۔ (‏عبرانیوں 13:‏4‏)‏ پر صرف ایہی کافی نئیں اے سگوں اوہنوں اپنی بیوی دا وفادار وی ہونا چاہی دا اے۔ ایس لئی اوہنوں کدی وی کسے ہور عورت نال دل‌لگی نئیں کرنی چاہی دی۔—‏ایوب 31:‏1‏۔‏

20.‏ اِک بھرا اپنے خاندان دی چنگی طرحاں پیشوائی کیویں کر سکدا اے؟‏

²⁰ اِک خادم نُوں اپنے بچیاں تے گھر والیاں دی چنگی طرحاں پیشوائی کرنی چاہی دی اے۔‏ جے تُسی گھر دے سربراہ او تے توانوں خاندان چ اپنیاں ذمے‌داریاں نُوں چنگی طرحاں نبھانا چاہی دا اے۔ باقاعدگی نال خاندانی عبادت کرو۔ کوشش کرو کہ تُسی اپنے بیوی بچیاں نال اکثر مُنادی کرو۔ اپنے بچیاں دی مدد کرو کہ اوہ یہوواہ نال گُوڑھی دوستی کرن۔ (‏اِفسیوں 6:‏4‏)‏ جیہڑا بندہ اپنے خاندان دا چنگی طرحاں خیال رکھدا اے، اوہ ثابت کردا اے کہ اوہ کلیسیا دا وی چنگی طرحاں خیال رکھ سکدا اے۔—‏1-‏تیمُتھیُس 3:‏5‏۔‏

21.‏ جے حالے تک تُسی کلیسیا چ خادم نئیں او تے تُسی کیہہ کر سکدے او؟‏

²¹ بھراوو، جے تُسی حالے تک کلیسیا چ خادم نئیں او تے ایس مضمون نُوں دھیان نال پڑھو تے ایس معاملے بارے یہوواہ کولوں دُعا کرو۔ اوہناں شرطاں بارے پڑھو جیہڑیاں خادم بنن لئی ضروری نیں تے فیر اوہناں تے پورا اُترن لئی سخت کوشش کرو۔ ایس بارے وی سوچو کہ تُسی یہوواہ تے اپنے بھین بھراواں نال کِنّاں پیار کردے او۔ اپنے دل چ اوہناں دی خدمت کرن دی خواہش نُوں ودھاؤ۔ (‏1-‏پطرس 4:‏8،‏ 10‏)‏ جدوں تُسی خادم بنو گے تے توانوں اپنے بھین بھراواں دی خدمت کر کے بڑی خوشی ملے گی۔ ساڈی دُعا اے کہ یہوواہ تواڈیاں اوہناں کوششاں تے برکت پاوے جیہڑیاں تُسی خادم بنن لئی کردے او۔—‏فِلپّیوں 2:‏13‏۔‏