کیہہ تُسی ذاتی مطالعے توں زیادہ فائدہ حاصل کرنا چاہندے او؟ ایہدے لئی ضروری اے کہ تُسی اِک پُرسکون ماحول چ مطالعیا کرو۔ آؤ ایہدے لئی کجھ مشوریاں تے غور کرئیے:‏

• مناسب جگہ چُنو‏۔ ایہو جہی جگہ چُنو جیہڑی صاف ستھری ہوئے تے جتھے صحی روشنی آندی ہوئے۔ شاید تُسی کسے کُرسی تے میز نُوں استمال کر سکدے او یاں فیر باہر کسے پُرسکون جگہ نُوں چُن سکدے او۔‏

• ایہو جہی جگہ لبھو جتھے ہور لوک نہ ہون۔‏ یسوع ”‏سویرے سویرے“‏ تے ”‏سنسان جگہ“‏ تے دُعا کردا سی۔ (‏مرقس 1:‏35‏)‏ جے تواڈے لئی ایہو جہی جگہ لبھنا مشکل اے جتھے کوئی وی نہ ہوئے تے فیر تُسی اپنے گھر والیاں نُوں اپنا مطالعیا کرن دا وقت دَس سکدے او تے اوہناں کولوں درخاست کر سکدے او کہ اوہ اوس ویلے تواڈے نال تعاون کرن۔‏

• اپنا دھیان بھٹکن نہ دَوو۔‏ جے تُسی مطالعیا کرن لئی اپنے فون یاں ٹیبلٹ نُوں استمال کردے او تے اوہدی آواز بند کر دَوو یاں ایہو جہی سیٹنگ کرو جدے چ توانوں فون تے میسج نہ آن۔ جے مطالعیا کردے ویلے اچانک توانوں یاد آندا اے کہ تُسی کوئی کم کرنا اے تے اوہنوں نوٹ کر لوو تاکہ تُسی اوہنوں بعد چوں کر سکو۔ جے تواڈے لئی پورا دھیان دینا مشکل ہو رہیا اے تے تھوڑی دیر لئی مطالعیا روک کے اِک دو چکر لاؤ۔‏