پال:‏ ایہہ نومبر 1985 دی گل اے۔ مَیں تے این پہلی وار مشنریاں دے طور تے مغربی افریقہ دے ملک لائبیریا گئے۔ اَسی بوہت خوش ساں۔ جدوں ساڈا جہاز ملک سینیگال چ رُکیا تے این نے کہیا کہ ”‏اَسی بس اِک گھنٹے چ لائبیریا ہوواں گے۔“‏ پر فیر ایہہ اعلان ہویا:‏ ”‏لائبیریا جان والے سارے مسافر ایس جہاز توں اُتر جان کیونکہ کجھ لوک لائبیریا دی حکومت دے خلاف بغاوت کر رہے نیں۔“‏ ایس لئی اَسی اوتھے نئیں جا سکے تے فیر اگلے دس دن اَسی سینیگال چ ای مشنریاں دے نال رہے۔ ایس دوران اَسی خبراں چ سُنیا کہ لائبیریا چ بوہت سارے لوک مارے گئے نیں تے حکومت نے لوکاں نُوں کہیا اے کہ اوہ گھروں باہر نہ نِکلن، نئیں تے اوہناں نُوں گولی مار دِتی جائے گی۔‏

این:‏ سانوں دونواں نُوں ای خطرناک تجربے کرن دا شوق نئیں سی۔ لوک مینوں بچپن توں ای ڈرپوک کہندے سن۔ مینوں تے سڑک پار کرن توں وی ڈر لگدا سی۔ سانوں ڈر تے لگ رہیا سی پر فیر وی اَسی پکا ارادہ کیتا ہویا سی کہ اَسی لائبیریا ضرور جانواں گے۔‏

پال:‏ مَیں تے این، اِنگلینڈ دے مغربی حصے چ پیدا ہوئے۔ ساڈا گھر اِک دُوجے توں 8 کلومیٹر دُور سی۔ اَسی دونواں نے سکول دی پڑھائی ختم ہون دے فوراً بعد پہل‌کار دے طور تے خدمت شروع کر دِتی کیونکہ میرے امی‌ابو تے این دی امی سانوں حوصلہ دیندے سن کہ اَسی پہل‌کار بنئے۔ اوہ بڑے خوش سن کہ اَسی دونواں نے کُل وقتی طور تے خدمت کرن دا فیصلہ کیتا اے۔ جدوں مَیں 19 سال دا ساں تے مینوں بیت‌ایل چ جان دا موقع مِلیا تے جدوں 1982 چ این نال میرا ویاہ ہویا تے اوہ وی میرے نال بیت‌ایل چ خدمت کرن لگ پئی۔‏

این:‏ اَسی بیت‌ایل چ خدمت کر کے خوش ساں پر اَسی شروع توں چاہنے ساں کہ اَسی کسے ایہو جہے علاقے چ خدمت کرئیے جتھے مبشراں دی زیادہ ضرورت اے۔ ساڈی ایہہ خواہش اوہدوں ہور زیادہ ودھ گئی جدوں سانوں بیت‌ایل چ ایہو جہے بھین بھراواں نال خدمت کرن دا موقع مِلیا جیہڑے پہلے مشنری سن۔ اَسی تقریباً تِن سالاں تک ہر رات دُعا چ یہوواہ نُوں اپنی ایس خواہش بارے دَسدے رہے۔ تے فیر جدوں سانوں 1985 چ گلئیڈ دی کلاس نمبر 79 چ جان دی دعوت مِلی تے اَسی بڑے خوش ہوئے۔ جدے بعد سانوں مغربی افریقہ دے ملک لائبیریا چ خدمت کرن لئی کہیا گیا۔‏

پال:‏ جیویں ای لائبیریا جان دی اجازت مِلی، اَسی پہلے ای جہاز چ بہہ کے نکل پئے۔ اوتھے حالات حالے وی ٹھیک نئیں سن تے لوکاں نُوں شام دے ویلے گھروں باہر نِکلن دی اجازت نئیں سی۔ اوتھے ایناں خوف سی کہ بازاراں چ لوک کسے گڈی دی اُچی آواز نُوں سُن کے وی بھج جاندے سن۔ اَسی اپنے ڈر تے قابو پان لئی ہر شام زبور دِیاں کجھ ایتاں پڑھنے ساں۔ اوتھوں دے خراب حالات دے باوجود اَسی اوتھے  خدمت کرنا چاہنے ساں۔ این مُنادی کردی سی تے مَیں بیت‌ایل چ بھرا چرک نال مِل کے کم کرنا ساں۔ مَیں اوہدے کولوں بوہت کجھ سکھیا کیونکہ اوہ کئی سالاں توں لائبیریا چ خدمت کر رہیا سی تے بھین بھراواں دِیاں مشکلاں بارے چنگی طرحاں جان دا سی۔‏

این:‏ چھیتی ای سانوں لائبیریا چ خدمت کرن دا مزہ آن لگ پیا کیونکہ اوتھوں دے بھین بھرا بڑا پیار وکھاندے سن تے وفاداری نال یہوواہ دی خدمت کر رہے سن۔ ساڈی اوہناں نال گُوڑھی دوستی ہو گئی سی تے اَسی اوہناں نُوں اپنے خاندان دے جیاں وانگوں سمجھنے ساں۔ اوہ ساڈا بڑا حوصلہ ودھاندے سن۔ اوتھے مُنادی کرن دا بڑا مزہ آندا سی۔ جے اَسی لوکاں دے گھر زیادہ دیر نئیں رُکنے ساں تے اوہ ناراض ہو جاندے سن۔ لوک تے گلی چ کھلو کے وی آپس چ بائبل بارے گل کردے ہوندے سن۔ ایس لئی اَسی اسانی نال اوہناں کول جا کے اوہناں نال گل بات شروع کر دینے ساں۔ اوتھے اینے زیادہ لوک بائبل کورس کرنا چاہندے سن کہ اوہناں ساریاں لئی وقت کڈھنا بڑا مشکل ہوندا سی۔ سانوں اوتھے خدمت کر کے واقعی بڑا مزہ آیا۔‏

پال:‏ ملک چ تقریباً چار سال تک امن رہیا۔ پر فیر 1989 چ خانہ جنگی شروع ہو گئی۔ 2 جولائی 1990 چ حکومت دے خلاف بغاوت کرن والے لوکاں نے بیت‌ایل دے آلے دَوالے دے علاقے تے قبضہ کر لیا۔ تقریباً تِن مہینے تک اَسی بیت‌ایل توں باہر کسے نال وی رابطہ نئیں کر سکے، ایتھوں تک کہ اپنے گھر والیاں تے ہیڈ کوارٹر دے بھراواں نال وی نئیں۔ ہر پاسے دنگے فساد ہو رہے سن، کھان پین دِیاں شیواں دی کمی سی تے عورتاں دی عزت وی محفوظ نئیں سی۔ 14 سالاں تک ملک چ ایہی حالات رہے۔‏

این:‏ کجھ قبیلیاں دے لوک اِک دُوجے دے جانی دُشمن بنے ہوئے سن۔ عجیب جہے حُلیے والے لوک ہتھیار پھڑ کے سڑکاں تے پھردے سن تے ہر گھر چ لُٹ مار کردے سن۔ اوہناں وچوں کجھ تے انساناں نُوں اِنج قتل کردے سن جیویں ”‏جانوراں نُوں حلال کیتا جاندا اے۔“‏ سڑکاں تے لاشاں دے ڈھیر لگے ہوندے سن۔ اوہناں وچوں کجھ تے بیت‌ایل دے نیڑے ای سن۔ ساڈے کجھ بھین بھراواں نُوں وی قتل کر دِتا گیا جنہاں وچوں دو اوتھے مشنری سن۔‏

اوہ باغی اوہناں قبیلیاں دے لوکاں نُوں ویکھدے ای قتل کر دیندے سن جنہاں توں اوہ نفرت کردے سن۔ ساڈے بھین بھراواں نے اپنی جان نُوں خطرے چ پا کے اوہناں قبیلیاں دے بھین بھراواں نُوں اپنے کول پناہ دِتی۔ مشنریاں تے بیت‌ایل چ کم کرن والے بھین بھراواں نے وی اِنج ای کیتا۔ کجھ بھین بھرا اپنے گھر چھڈ کے بیت‌ایل چ پناہ لین آ گئے سن جنہاں وچوں کجھ اُتے والے کمریاں چ ساڈے نال سوندے سن تے کجھ تھلے والے کمریاں چ۔ ساڈے کمرے چ جیس خاندان نے پناہ لئی سی، اوہدے چ 7 لوک سن۔‏

پال:‏ باغی ہر روز بیت‌ایل چ وڑھن دی کوشش کردے سن تاکہ ویکھ سکن کہ اَسی کسے نُوں پناہ تے نئیں دِتی۔ ہر وار جدوں باغی بیت‌ایل دے اندر آن دی کوشش کردے سن تے دو بھین بھرا باہر دروازے تے اوہناں نال گل کردے سن تے  دو کھڑکی چوں ویکھ رہے ہوندے سن۔ جے دروازے تے جان والے بھرا اپنے ہتھ اَگے رکھدے سن تے ایہدا مطلب سی کہ خطرے دی کوئی گل نئیں۔ پر جے اوہ اپنے ہتھ پچھے کمر تے رکھدے سن تے ایہدا مطلب سی کہ باغی بڑے غصے چ نیں۔ ایس لئی کھڑکی توں ویکھن والے بھین بھرا فوراً دُوجے بھین بھراواں نُوں لُکا دیندے سن۔‏

این:‏ اِک دن بھراواں دے روکن دے باوجود کجھ باغی زبردستی اندر وڑھ آئے۔ مَیں تے اِک بھین باتھ‌روم چ لُک گئیاں۔ باتھ‌روم چ اِک الماری سی جدے چ لکن لئی اِک خانہ سی۔ مَیں اوس بھین نوں اوہدے چ لُکا دِتا۔ باغی مینوں لبھن لئی اُتے آ گئے تے اوہناں دے ہتھاں چ بندوقاں سن۔ اوہ غصے نال بوہا کھڑکان لگ پئے۔ پال نے اوہناں نُوں روکن دی کوشش کیتی تے کہیا:‏ ”‏میری بیوی باتھ‌روم چ وے۔“‏ اوس بھین نُوں لُکا کے جدوں مَیں چیزاں واپس الماری چ رکھ رہی ساں تے تھوڑا شور ہو رہیا سی تے دیر وی لگ رہی سی۔ ایسے لئی باغیاں نُوں میرے تے شک ہون لگ پیا۔ مَیں ڈر دے مارے کمبن لگ پئی۔ ایس لئی مَیں دل چ دُعا کیتی۔ فیر مَیں دروازہ کھولیا تے بڑے سکون نال اوہناں نُوں سلام کہیا۔ اوہناں چوں اِک نے مینوں دھکا دے کے پَراں کیتا تے سِدھا الماری کول گیا تے چیزاں ایدھر اودھر کر کے ویکھن لگ پیا۔ اوہ بڑا حیران سی کہ اوہنوں کجھ نئیں لبھیا۔ اوہنے تے اوہدے ساتھیاں نے دُوجے کمریاں تے چھت دی وی تلاشی لئی پر اوہناں نُوں اوتھے وی کجھ نئیں لبھیا۔‏

پال:‏ کئی مہینیاں تک ساڈے کول کھان پین لئی بوہت تھوڑیاں شیواں سن۔ پر سانوں باقاعدگی نال روحانی کھانا مِلدا رہیا۔ اکثر ساڈے کول ناشتہ کرن لئی کجھ وی نئیں ہوندا سی پر بیت‌ایل چ صبح دی عبادت ساڈے لئی ”‏ناشتے“‏ وانگوں سی۔ ایہدے توں سانوں بڑی ہمت مِلدی سی۔‏

سانوں ایہہ وی پتہ سی کہ جے اَسی کھان پین دِیاں شیواں لین لئی بیت‌ایل چوں باہر گئے تے اوہناں بھین بھراواں دی جان خطرے چ پے جائے گی جنہاں نُوں اَسی لُکا‌یا ہویا اے۔ یہوواہ نے جیس ویلے تے جیس طریقے نال ساڈیاں ضرورتاں نُوں پورا کیتا تے سانوں سنبھالیا، اوہ کسے معجزے توں گھٹ نئیں سی۔‏

حالات وِگڑدے جا رہے سن پر ایہدے نال نال سچائی دی روشنی وی ودھدی جا رہی سی۔ بھین بھراواں نُوں اپنی جان بچان لئی کئی وار بھجنا پیا۔ پر اوہناں نے اپنے ایمان نُوں مضبوط رکھیا تے حدوں ودھ نئیں گھبرائے۔ کجھ بھین بھراواں نے کہیا کہ ایہہ ویلا سانوں ”‏وڈی مصیبت لئی تیار کر رہیا اے۔“‏ بزرگاں تے جوان بھراواں نے بھین بھراواں دی مدد کرن لئی اوہ سب کجھ کیتا، جو اوہ کر سکدے سن۔ بھین بھرا اوہدوں وی اِک مُٹھ رہندے سن جدوں اوہ اِک علاقے توں دُوجے علاقے چ بھج دے سن۔ اوہ اوہناں علاقیاں چ مُنادی کرن لگ پیندے سن۔ اوہ جنگلاں چ وی جھاڑیاں نال عبادت‌گاہ بنا کے اوتھے عبادت کرن لگ پیندے سن۔ اوہناں نُوں مُنادی کرن تے مِل کے عبادت کرن نال بڑا حوصلہ مِلیا۔ جدوں اَسی ایہناں بھین بھراواں نُوں کھان پین تے ضرورت دِیاں شیواں دے رہے ساں تے اوہناں نے کپڑیاں دی بجائے مُنادی کرن لئی بیگ منگے۔ اوہناں دی ایہہ گل ساڈے دل نُوں لگی۔ لوکاں نے بڑے بھیڑے حالات ویکھے سن ایس لئی اوہ پاک کلام چوں خوش‌خبری سُنن لئی تیار سن۔ اوہ ایس گل توں حیران سن کہ اینے بھیڑے وقت چ وی یہوواہ دے گواہ خوش نظر آندے نیں تے چنگیاں گلاں بارے سوچدے نیں۔ اِک لحاظ نال گواہ  نھیرے چ دِیویاں وانگوں چمک رہے سن۔ (‏متی 5:‏14-‏16‏)‏ ساڈے بھین بھراواں دا جوش تے جذبہ ویکھ کے کجھ باغی وی یہوواہ دے گواہ بن گئے۔‏

پال:‏ کدی کدی تے سانوں لائبیریا توں جانا وی پیا، تِن وار تے کجھ وقت لئی پر دو وار پورے سال لئی۔ اِک مشنری بھین نے جیہڑی گل کہی، اَسی وی اوہی محسوس کر رہے ساں۔ اوہنے کہیا:‏ ”‏گلئیڈ سکول چ سانوں سکھایا جاندا اے کہ خدمت کرن لئی اَسی بھانویں جتھے وی جائیے، اوتھوں دے بھین بھراواں نُوں اپنے دل چ وسا لئیے۔ اَسی بالکل اِنج ای کیتا۔ ایس لئی جدوں سانوں بھین بھراواں نُوں ایہو جہے حالاتاں چ چھڈ کے جانا پیا تے سانوں اِنج لگیا جیویں ساڈے دل دے ٹکڑے ہو گئے نیں۔“‏ پر اَسی خوش ساں کہ اَسی لائبیریا دے آلے دَوالے دے مُلکاں چ رہ کے وی اوتھوں دے بھین بھراواں دی مدد کر سکنے ساں۔‏

این:‏ مئی 1996 چ مَیں، پال تے دو ہور بھین بھرا بیت‌ایل دی گڈی لے کے نکل پئے۔ ساڈے کول برانچ دے کجھ اہم کاغذ سن۔ اَسی شہر دے دُوجے پاسے اِک محفوظ جگہ تے جانا چاہنے ساں جیہڑی 16 کلو میٹر دُور سی۔ ساڈے اوتھوں نِکلن توں بعد ای اوس علاقے تے حملہ ہو گیا۔ باغیاں نے ہوائی فائرنگ کیتی، ساڈی گڈی نُوں روکیا، ساڈے چوں تِن نُوں گڈی توں باہر کڈھیا تے پال سمیت گڈی نُوں لے گئے۔ اَسی ہکے بکے رہ گئے۔ فیر اچانک اَسی پال نُوں ساڈے وَل آندیاں ویکھیا۔ اوہدے متھے توں خون نکل رہیا سی۔ سانوں لگیا کہ پال نُوں گولی لگی اے پر فیر اَسی سوچیا کہ جے پال نُوں گولی لگی ہوندی تے اوہ ساڈے وَل ٹر کے کیویں آندے۔ اِک باغی نے اوہناں نوں مار کے گڈی چوں کڈھ دِتا سی۔ پر شکر اے کہ اوہدی سٹ اینی گہری نئیں سی۔‏

کول ای فوجیاں دا اِک ٹرک سی جدے چ بوہت سارے لوک بیٹھے سن تے بوہت گھبرائے ہوئے سن۔ ایہہ ٹرک اوتھوں بس نِکلن ای والا سی۔ اَسی وی اوہدے نال لمک گئے۔ ڈرائیور نے اینی تیز گڈی چلائی کہ اَسی ڈِگن توں مساں مساں بچے۔ اَسی اوہنوں کہیا کہ اوہ گڈی روکے۔ پر اوہ ایناں ڈریا ہویا سی کہ اوہنے گڈی نئیں روکی۔ جدوں اَسی منزل تے پونچے تے اَسی بڑے تھکے ہوئے ساں تے ڈر نال کمب رہے ساں۔‏

پال:‏ ساڈے کپڑے گندے تے پاٹے ہوئے سن۔ اَسی اِک دُوجے نُوں ویکھ کے حیران ساں کہ اَسی زندہ کیویں بچ گئے۔ اَسی اِک کُھلے میدان چ سُتے تے ساڈے نیڑے اِک ہیلی کاپٹر سی جدے تے گولیاں دے نشان سن۔ پر اوہدے چ بہہ کے ای اَسی سیرالیون پونچے۔ اَسی بڑے خوش ساں کہ اَسی زندہ بچ گئے آں۔ پر سانوں لائبیریا چ اپنے بھین بھراواں دی بڑی فکر ہو رہی سی۔‏

این:‏ اَسی صحی سلامت سیرالیون دے شہر فری ٹاؤن پونچے جتھے ساڈا بیت‌ایل سی۔ اوتھوں دے بھین بھراواں نے ساڈا بوہت خیال رکھیا۔ پر فیر اوہ سارے واقعے میرے ذہن چ آنا شروع ہو گئے جیہڑے لائبیریا چ ہوئے سن۔ ہر روز مینوں لگدا سی کہ ہُنے ای کجھ ہو جائے گا۔ رات نُوں مَیں اکثر گھبرا کے اُٹھ جانی ساں تے مینوں ٹھنڈے پسینے آندے سن تے مَیں کمب رہی ہنی ساں۔ مینوں اِنج لگدا سی کہ میرا ساہ بند ہو رہیا اے۔ پال مینوں گلے نال لا کے دُعا کردا سی۔ اَسی اوہدوں تک گیت گاندے رہنے ساں جدوں تک مینوں سکون نئیں مِل جاندا سی۔ مینوں لگ رہیا سی کہ مَیں پاگل ہو رہی آں تے مَیں مشنری دے طور تے اپنی خدمت جاری نئیں رکھ سکاں گی۔‏

پر ایہدے بعد جو ہویا، اوہ مَیں کدی نئیں بُھل سکدی۔ اوسے ہفتے سانوں ساڈی تنظیم وَلّوں دو رسالے ملے۔ اِک 8 جون 1996 دا ‏”‏اویک“‏ رسالہ سی جدے چ ایہہ مضمون سی:‏ ”‏خوف دا مقابلہ کیویں کرئیے؟“‏ اوہنوں پڑھن توں بعد مَیں سمجھ گئی کہ اصل چ میرے نال ہو کیہہ رہیا اے۔ تے دُوجا رسالہ 1 جون 1996 دا ‏”‏مینارِنگہبانی“‏ سی جدے چ ایہہ مضمون سی:‏ ”‏وہ اپنی طاقت کہاں سے حاصل کرتی ہیں؟‏‏“‏ اوس مضمون چ اِک زخمی تتلی دی تصویر سی تے اوہدے چ دَسیا گیا سی کہ جیویں اِک تتلی اپنے ٹُٹے پَراں دے باوجود اُڈن تے زندہ رہن دی کوشش کردی اے اوسے طرحاں ساڈی زندگی چ ہون والے بھیڑے واقعے سانوں کمزور کر دیندے نیں پر فیر وی یہوواہ دی طاقت نال اَسی دُوجیاں دی مدد کر سکنے آں۔ ایہناں مضموناں دی مدد نال یہوواہ نے بالکل صحی وقت تے میری مدد کیتی۔ (‏متی 24:‏45‏)‏ ایہو جہے دُوجے مضموناں تے وی غور کرن نال مینوں بوہت فائدہ ہویا۔ وقت دے نال نال میری حالت بہتر ہوندی گئی۔‏

پال:‏ جدوں وی سانوں لائبیریا جان دا دُبارہ موقع مِلدا سی، اَسی بوہت خوش ہُنے ساں۔ 2004 دے آخر تک سانوں اوتھے خدمت کردیاں تقریباً 20 سال ہو گئے سن۔ جنگ ختم ہو گئی سی تے اوتھوں دی برانچ چ تعمیر دے کم کرن دے منصوبے بنائے جا رہے سن۔ پر فیر سانوں اچانک ای کسے دُوجی جگہ خدمت کرن لئی کہیا گیا۔‏

ایہہ ساڈے ایمان دا اِک بوہت وڈا اِمتحان سی۔ اَسی لائبیریا چ اپنے بھین بھراواں نُوں بوہت پیار کرنے ساں۔ اَسی سوچ رہے ساں کہ اَسی اوہناں توں بغیر کیویں  رہواں گے۔ پر فیر اَسی سوچیا کہ اَسی گلئیڈ سکول چ وی تے اپنے خانداناں نُوں چھڈ کے گئے ساں تے سانوں یہوواہ وَلّوں کِنّیاں برکتاں مِلیاں سن۔ ایس لئی اَسی اپنی نوِیں ذمے‌داری نُوں قبول کیتا تے گھانا چلے گئے جیہڑا لائبیریا دے نیڑے ای سی۔‏

این:‏ لائبیریا توں جاندے ویلے اَسی بڑا روئے۔ فرینک ناں دے اِک وڈیرے تے سمجھدار بھرا نے سانوں کہیا:‏ ”‏تُسی سانوں بُھل جانا۔“‏ ایہہ سُن کے اَسی بڑے حیران ہوئے۔ فیر اوہنے سانوں سمجھایا:‏ ”‏سانوں پتہ اے کہ تُسی سانوں نئیں بُھلو گے پر اپنا سارا دھیان اپنی نوِیں ذمے‌داری تے رکھو کیونکہ ایہہ یہوواہ نے توانوں دِتی اے۔ ایس لئی ہُن تُسی اوتھوں دے بھین بھراواں دی مدد کرنا۔“‏ ایس گل توں سانوں نوِیں جگہ تے جا کے خدمت کرن دی ہمت مِلی جتھے سانوں گھٹ ای بھین بھرا جان دے سن۔‏

پال:‏ چھیتی ای گھانا دے بھین بھراواں نال ساڈی چنگی دوستی ہو گئی۔ اوتھے بوہت سارے یہوواہ دے گواہ سن۔ اَسی اپنے نویں دوستاں دے مضبوط ایمان تے یہوواہ لئی اوہناں دی وفاداری توں بوہت کجھ سکھیا۔ جدوں سانوں گھانا چ خدمت کردیاں 13 سال ہو گئے تے سانوں مشرقی افریقہ دے ملک کینیا دی برانچ چ خدمت کرن لئی کہیا گیا۔ بھانویں کہ سانوں لائبیریا تے گھانا چ رہن والے اپنے دوستاں دی بڑی یاد آندی سی پر کینیا دے بھین بھراواں نال وی ساڈی پکی دوستی ہو گئی۔ اَسی ہُن وی اِک وڈے علاقے چ خدمت کر رہے آں جتھے مبشراں دی زیادہ لوڑ اے۔‏

این:‏ مَیں اپنی زندگی چ بڑے خطرناک حالات ویکھے نیں۔ ایہو جہے حالاتاں دا ساڈی صحت تے بوہت بھیڑا اثر ہوندا اے۔ اَسی ایہہ توقع نئیں کر سکدے کہ یہوواہ کوئی معجزہ کر کے سانوں بچائے گا۔ اَج وی جدوں مَیں گولیاں دی آواز سننی آں تے میری حالت خراب ہو جاندی اے تے ہتھ سُن ہو جاندے نیں۔ پر مَیں سکھیا اے کہ مینوں یہوواہ دی مدد تے بھروسا کرنا چاہی دا اے جیہڑی اوہ بھین بھراواں دے ذریعے تے دُوجے طریقیاں نال کردا اے۔ جدوں اَسی اوہ کم کرنے آں جیہڑے یہوواہ دے نیڑے رہن لئی ضروری نیں تے اوہ اپنی خدمت نُوں جاری رکھن چ ساڈی مدد کردا اے۔‏

پال:‏ کجھ لوک پچھدے نیں:‏ ”‏توانوں اپنی خدمت چ مزہ آ رہیا اے؟“‏ ملک تے خوب‌صورت ہوندے نیں پر اوہناں دے حالات کدی وی وِگڑ سکدے نیں۔ ایس لئی کسے ملک دی خوبصورتی نئیں سگوں اوتھوں دے بھین بھراواں دی محبت ساڈے لئی قیمتی ہوندی اے۔ بھانویں کہ ساڈیاں ثقافتاں اِک دُوجے توں فرق ہوندیاں نیں پر یہوواہ لئی ساڈی محبت اِکو جہی ہوندی اے۔ جدوں سانوں فرق فرق مُلکاں چ گھلیا گیا تے سانوں لگیا کہ اَسی اوتھوں دے بھین بھراواں دا حوصلہ ودھاواں گے پر اصل چ تے اوہناں نے ساڈا حوصلہ ودھایا۔‏

جدوں وی اَسی کسے نوِیں جگہ خدمت کرن گئے، اَسی اپنے بھین بھراواں دی محبت ویکھی جیہڑی اِک معجزہ اے۔ جدوں تک اَسی یہوواہ دے خاندان دا حصہ رہواں گے، سانوں ہر جگہ تے اپنا خاندان ملے گا۔ سانوں پورا یقین اے کہ جے اَسی یہوواہ تے بھروسا کردے رہواں گے تے اوہ سانوں طاقت دَوے گا۔—‏فِلپّیوں 4:‏13‏۔‏