آپبیتی
”میں یہوواہ دی خدمت کرنا چاہنا ساں“
اَسی گرنبوری دے پینڈ دا دَورہ کیتا جیہڑا سُرینام دے برساتی جنگلاں چ وے۔ اَسی اوتھوں دے لوکاں نُوں خدا حافظ کہیا تے فیر اِک کشتی چ بیہہ کے تاپانوہونی دریا چ سفر کرن لگ پئے۔ ایس تیز دریا چوں لنگھ دے ویلے ساڈی کشتی دی موٹر دا پکھا اِک چٹان نال ٹکرا گیا۔ اِکو دم کشتی دا اگلا حصہ دریا چ ڈُب گیا تے نال ای اَسی وی۔ میرا دل بڑی تیزی نال دھڑک رہیا سی۔ بھانویں کہ حلقے دے نگہبان دے طور تے دَورہ کردے ہوئیاں میں کئی وار کشتی چ سفر کیتا سی پر تیرنا میں کدی وی نئیں سکھیا۔
ایہہ دَسن توں پہلاں کہ اَگے کیہہ ہویا آؤ میں توانوں دَسنا واں کہ میں کُل وقتی طور تے خدمت کرنا کیویں شروع کیتا۔
میں 1942 چ کیریبیئن جزیریاں وچوں اِک جزیرے کیوراساؤ چ پیدا ہویا۔ میرے ابو سُرینام توں سن پر اوہ کم کرن لئی کیوراساؤ جزیرے تے آ گئے سن۔ میرے ابو اوہناں لوکاں وچوں سن جیہڑے کیوراساؤ وچ سب توں پہلے یہوواہ دے گواہ بنے سن۔ ایہہ میرے پیدا ہون توں کجھ سال پہلے دی گل سی۔ اَسی پنج بھین بھرا ساں تے ابو ہر ہفتے ساڈے نال مِل کے بائبل تے گل بات کردے سن۔ ابو لئی ایہہ اسان نئیں سی کیونکہ سانوں بائبل تے گل بات کرنا بالکل چنگا نئیں لگدا سی۔ جدوں میں 14 سال دا ہویا تے ابو اپنی وڈیری ماں دی دیکھبھال کرن لئی سانوں ساریاں نُوں لے کے سُرینام واپس آ گئے۔
چنگے دوستاں دا ساتھ
سُرینام دی کلیسیا چ میں ایہو جہے نوجواناں نال وقت گزارن لگ پیا جیہڑے بڑے جوش نال یہوواہ دی خدمت کر رہے سن۔ اوہ میرے توں کجھ ای سال وڈے سن تے پہلکار سن۔ جدوں اوہ گل کر رہے ہوندے سن کہ مُنادی کردے ویلے اوہناں نُوں کِنّے چنگے تجربے ہوئے تے اوہناں دی خوشی اوہناں دے چہریاں توں نظر آندی سی۔ عبادت دے بعد میں تے میرے دوست بائبل چوں فرق فرق موضوعاں بارے گل کرنے ساں۔ کدی کدار تے اَسی تاریاں بھرے اسمان تھلے بیہہ کے گل کرنے ساں۔ میرے ایہناں دوستاں نے میری ایہہ سمجھن چ بڑی مدد کیتی کہ میں اپنی زندگی چ کیہہ کرنا چاہنا واں۔ میں یہوواہ دی خدمت کرنا چاہنا ساں۔ 16 سال دی عمر چ میں بپتسمہ لے لیا تے 18 سال دی عمر چ میں پہلکار بن گیا۔
میں بڑیاں خاص گلاں سکھیاں
شہر پاراماریبو چ پہلکار دے طور تے خدمت کردے ہوئے
پہلکار دے طور تے خدمت کردے ویلے میں ایہو جہیاں بڑیاں خاص گلاں سکھیاں جنہاں دی وجہ توں میں کُل وقتی خدمت نُوں میں اپنی زندگی دا مقصد بنا لیا۔ مثال لئی، پہلی گل تے میں ایہہ سکھی کہ دُوجیاں دی تربیت کرنا بوہت ضروری اے۔ جدوں میں پہلکار دے طور تے خدمت شروع کیتی سی تے اِک مشنری نے مینوں بوہت کجھ سکھایا جدا ناں وِلم وان سیجیل سی۔ اوہنے مینوں سکھایا کہ میں کلیسیا چ اپنیاں ذمےداریاں کیویں پوریاں کر سکنا واں۔ اوس ویلے تے مینوں اندازہ وی نئیں سی کہ مینوں اوس تربیت دی
کِنّی زیادہ ضرورت سی۔ اگلے سال میں خاص پہلکار بن گیا۔ ایہدے بعد میں سُرینام دے دُور دُور دے علاقیاں دے چھوٹے چھوٹے گروپاں دی پیشوائی کرن لگ پیا۔ ایہہ علاقے برساتی جنگلاں وچ سن۔ میں دَس نئیں سکدا کہ میں وِلم ورگے بھراواں دا کِنّاں شکرگزار آں جنہاں نے مینوں ایہو جہی تربیت دِتے جیہڑی اَگے چل کے میرے بڑے کم آئی۔ اوہدوں توں ای میں دُوجیاں نُوں تربیت دیندے ویلے ایہناں بھراواں دی مثال تے عمل کرن لگ پیا۔دُوجی گل میں ایہہ سکھی کہ سادہ زندگی گزارن دے نال نال، پہلے توں ہر چیز دا حساب کتاب لانا وی بڑا فائدےمند ہوندا اے۔ ہر مہینے دے شروع چ میں تے میرے نال خاص پہلکار دے طور تے خدمت کرن والا بھرا سوچنے ساں کہ سانوں آن والے ہفتیاں چ کھان پین دِیاں کیہڑیاں چیزاں تے ہور کیہڑا ضروری سامان چاہی دا ہوئے گا۔ ایس توں بعد ساڈے وچوں کوئی اِک لماں سفر کر کے شہر جاندا تے اوتھوں سامان خرید کے لے آندا سی۔ سانوں مہینے دا جیہڑا خرچہ مِلدا سی اَسی اوہنوں بڑے دھیان نال استمال کرنے ساں تے پورے مہینے لئی ضروری چیزاں لے آنے ساں۔ جے ساڈے کول کوئی چیز ختم ہو جاندی سی تے کوئی نہ کوئی ساڈی مدد کر دیندا سی۔ جوانی چ سادہ زندگی گزارن تے چیزاں دا پہلے توں حساب کتاب رکھن نال میں ایس قابل ہویا کہ ساری زندگی اپنا دھیان یہوواہ دی خدمت تے رکھاں۔
تیجی گل میں ایہہ سکھی کہ جدوں اَسی لوکاں نُوں اوہناں دی زبان چ بائبل دا پیغام سُنانے آں تے ایہدے توں اوہناں نُوں بوہت فائدہ ہوندا اے۔ میں بچپن توں ای اوہ زباناں سکھیاں جیہڑیاں سُرینام چ بولیاں جاندیاں نیں۔ جیویں کہ ڈچ، انگریزی، پاپیامنٹو، تے سرانانٹونگو (جنہوں سرانان وی کہیا جاندا اے۔) پر برساتی جنگلاں چ میں ایہہ ویکھیا کہ جدوں لوکاں نُوں اوہناں دی اپنی زبان چ خوشخبری دا پیغام سُنایا گیا تے اوہناں نے ایہنوں خوشی نال قبول کیتا۔ بھانویں کہ مینوں اوہناں دِیاں کجھ زباناں بولنا مشکل لگدا سی جیویں کہ سراماکان زبان، پر فیر وی میں ہمت نئیں ہاری۔ میں بوہت سارے لوکاں نُوں بائبل چوں سچائی سکھا سکیا کیونکہ میں اوہناں نال اوہناں دی زبان چ گل کرنا ساں۔
بےشک ایس دوران کجھ ایہو جہیاں گلاں وی ہوئیاں جنہاں دی وجہ توں مینوں بڑی شرمندگی ہوئی۔ مثال لئی، اِک وار میں سراماکان بولن والی اِک عورت کولوں اوہدا حال چال پچھیا کیونکہ میں سُنیا سی کہ اوہدے پیٹ چ کافی دِناں توں درد ہو رہی اے۔ پر میں جو اوہنوں پچھیا اوہدا کجھ ہور ای مطلب سی۔ اصل چ میں اوہنوں پچھ بیٹھا کہ کیہہ اوہ ماں بنن والی اے۔ ظاہری گل اے کہ ایہہ سوال سُن کے اوس عورت نُوں بڑی شرمندگی ہوئی۔ ایہو جہیاں غلطیاں دے باوجود میں لوکاں نال اوہناں دی زبان چ گل کرن دی کوشش کرنا ساں۔
ہور ذمےداریاں
1970 چ مینوں حلقے دا نگہبان بنا دِتا گیا۔ اوس سال میں دُور دُور دے علاقیاں دے گروپاں نُوں سکرین تے ہیڈکوارٹر دِیاں تصویراں وکھائیاں۔ ایہناں بھین بھراواں تک پونچن لئی میں تے کجھ ہور بھراواں نے اِک وڈی کشتی دے ذریعے اِک دریا پار کیتا۔ اَسی اپنی کشتی چ اِک جنریٹر، گیس دا ٹینک، لالٹیناں تے تصویراں وکھان دا سامان وی رکھیا۔ جدوں اَسی اپنی منزل تے پونچے تے اَسی ایہہ سارا سامان چُک کے اوس جگہ تے لے گئے جِتھے اَسی تصویراں وکھانیاں سن۔ ایہو جہے دَوریاں بارے جیہڑی گل مینوں یاد اے اوہ ایہہ وے کہ ایہناں علاقیاں چ رہن والے لوک ایہو جہے اِنتظاماں نُوں بڑا پسند کردے سن۔ مینوں لوکاں نُوں یہوواہ تے اوہدی تنظیم بارے سکھانا بوہت ای چنگا لگدا سی۔ لوکاں نُوں یہوواہ دے نیڑے آندیاں ویکھ کے مینوں اینی خوشی ہوندی سی کہ میں اپنیاں ساریاں قربانیاں بُھل ای جانا ساں۔
تہری ڈوری دا بندھن
ستمبر 1971 چ ساڈی شادی دی تصویر
سچ اے کہ کلّے رہ کے یہوواہ دی خدمت کرنا بوہتا اسان سی۔ پر میں زندگی چ ایہو جیہا ساتھی چاہنا ساں جیہڑا یہوواہ دی خدمت کرن چ ساری زندگی میرا ساتھ دَوے۔ ایس لئی میں یہوواہ کولوں دُعا کرن لگ پیا کہ اوہ اِک ایہو جیہا ساتھی لبھن چ میری مدد کرے جیہڑا خوشی نال میرے نال مِل کے ایہناں برساتی جنگلاں چ کُل وقتی طور تے خدمت کر سکے کیونکہ ایتھے خدمت کرنا اسان نئیں سی۔ تقریباً اِک سال بعد میں اِک خاص پہلکار نُوں ملیا جدا ناں ایتھل سی۔ اَسی دونویں شادی دے ارادے نال اِک دُوجے نُوں جانن لگ پئے۔ ایتھل ہر طرحاں یہوواہ دی خدمت کرن لئی تیار سی فیر بھانویں ایہدے لئی اوہنوں بڑیاں مشکلاں دا سامنا ای کیوں نہ کرنا پووے۔ اوہنوں بچپن توں پولُس دی مثال بڑی چنگی لگدی سی تے اوہدے وانگوں یہوواہ دی خدمت چ کجھ وی کرن لئی تیار سی۔ اَسی ستمبر 1971 چ شادی کر لئی تے مِل کے کلیسیاواں دا دَورہ کرن لگ پئے۔
ایتھل نُوں بچپن توں ای بوہتے آرام والی زندگی گزارن دی عادت نئیں سی۔ ایس لئی اوہنوں برساتی جنگلاں وچ خدمت کرن لئی اپنے آپ نُوں ڈھالنا بوہتا مشکل نئیں لگا۔ مثال لئی، جدوں اَسی جنگلی علاقیاں چ بنیاں کلیسیاواں دا دَورہ کرنے ساں تے اَسی اپنے نال بس تھوڑیاں چیزاں لے کے جانے ساں۔ اَسی اپنے کپڑے دریا چ دھونے ساں تے اوہدے چ ای نہانے ساں۔ اَسی اوہ ساریاں شیواں کھان دی عادت وی پا لئی سی جیہڑیاں لوک سانوں دیندے سن جیویں کہ وڈیاں چھپکلیاں، پیرانہا مچھی یاں ایہو جہی کوئی وی چیز جدا شکار کر کے اوہ جنگل چوں لیاندے سن یاں دریا چوں پھڑکے لیاندے سن۔ جدوں کوئی پلیٹ نئیں ہوندی سن تے اَسی کیلے دے پتیاں تے کھانا کھانے ساں تے جدوں چمچ نئیں ہوندے سن تے اَسی اپنے ہتھاں نال کھانا کھانے ساں۔ میں تے ایتھل نے ویکھیا کہ ایس طرحاں مِل کے یہوواہ لئی قربانیاں دین نال ساڈی تہری ڈوری ہور وی مضبوط ہو گئی اے۔ (واعظ 4:12) ایہو جہے تجربیاں دا واقعی کوئی مول نئیں ہوندا۔
اِک دن جدوں اَسی اِک دُور دے علاقے چ اِک گروپ دے بھین بھراواں نُوں مِل کے واپس آ رہے ساں تے ساڈے نال اوہ واقعہ پیش آیا جدا ذکر میں مضمون دے شروع چ کیتا سی۔ جدوں اَسی اوس جگہ تے پونچے جِتھے پانی بوہت تیز وَگ رہیا سی تے ساڈی کشتی تھوڑی دیر لئی پانی دے اندر
چلی گئی۔ پر فیر چھیتی ای باہر آ گئی۔ شکر اے کہ اَسی ساریاں نے لائف جیکٹ پائے ہوئے سن تے کوئی وی کشتی چوں دُور نئیں گیا۔ پر ساڈی کشتی پانی نال بھر گئی سی۔ ایس لئی اَسی کھانے تے بھانڈیاں چوں کھانا دریا چ سُٹیا تے اوہناں بھانڈیاں نال کشتی چوں پانی کڈھن لگ پئے۔ساڈے کول کھان دی کوئی وی شے نئیں بچی سی ایس لئی اَسی سفر کر دے کردے دریا چوں مچھیاں پھڑن دی کوشش کیتی۔ پر ساڈے ہتھ اِک وی مچھی نہ آئی۔ ایس لئی اَسی خدا کولوں دُعا کیتی کہ اوہ سانوں اَج دی ضرورت دے مطابق روٹی دَوے۔ دُعا دے فوراً بعد اِک بھرا نے دریا چ مچھی پھڑن دا کنڈا سُٹیا تے اوہنے اِک بوہت وڈی مچھی پھڑ لئی جیہڑی ساڈے پنجاں دے کھان لئی کافی سی۔
شوہر، باپ تے حلقے دے نگہبان دے طور تے ذمےداریاں
پنج سال حلقے دے نگہبان دے طور تے کم کرن دے بعد مینوں تے ایتھل نُوں اِک ایہو جہی خبر مِلی جدی سانوں ذرا وی توقع نئیں سی۔ اَسی ماں پیو بنن والے ساں۔ ایہہ خبر سُن کے میں بڑا خوش ہویا بھانویں کہ مینوں نئیں سی پتہ کہ اَگے چل کے کیہہ ہوئے گا۔ میں تے ایتھل ہر حال چ یہوواہ دی خدمت کرنا چاہنے ساں۔ 1976 چ ساڈا بیٹا ایتھنیایل پیدا ہویا تے ایہدے ڈھائی سال بعد ساڈا دُوجا بیٹا جوآنی پیدا ہویا۔
مشرقی سُرینام چ گوڈو ہولو دے نیڑے تاپانوہونی دریا چ مبشراں دے بپتسمے دی تصویر—1983
سُرینام چ بھراواں دی بڑی لوڑ سی ایس لئی برانچ نے فیصلہ کیتا کہ میں اپنے بچیاں نُوں پالن دے نال نال حلقے دے نگہبان دے طور تے خدمت وی کردا رہواں۔ جدوں ساڈے بیٹے چھوٹے سن تے مینوں دَورہ کرن لئی ایہو جہے حلقے دِتے جاندے سن جنہاں چ بس تھوڑیاں ای کلیسیاواں سن۔ ایس طرحاں میں مہینے چ تقریباً ڈیڈھ دو ہفتے حلقے دے نگہبان دے طور تے خدمت کرنا ساں تے باقی مہینہ اپنی کلیسیا چ پہلکار دے طور تے خدمت کرنا ساں۔ جدوں میں نیڑے دِیاں کلیسیاواں دا دورہ کرنا ساں تے ایتھل تے بچے میرے نال ای جاندے سن۔ پر جدوں میں برساتی جنگلاں چ بنیاں کلیسیاواں دا دورہ کرنا ساں یاں کسے کنونشن لئی جانا ساں تے فیر میں کلّا ای جانا ساں۔
دُور دُور کلیسیاواں دا دَورہ کردے ویلے میں اکثر کشتی چ سفر کرنا ساں
اپنیاں ساریاں ذمےداریاں نُوں چنگی طرحاں پورا کرن لئی میں پہلے توں ای سوچ سمجھ کے منصوبے بنانا ساں۔ میری پوری کوشش ہوندی سی کہ میرا گھرانا ہر ہفتے خاندانی عبادت کرے۔ جدوں میں برساتی جنگلاں چ بنیاں کلیسیاواں دا دَورہ کرن لئی جانا ساں تے ایتھل بچیاں نال خاندانی عبادت کردی سی۔ ساڈے لئی جِنّاں وی ہو سکدا سی اَسی خاندان دے طور تے مِل کے کم کرنے ساں۔ میں تے ایتھل نے بچیاں دی تفریح دا وی بڑا خیال رکھیا۔ اَسی باقاعدگی نال اپنے بچیاں نال کھیڈنے ساں تے اوہناں نُوں گھر دے نیڑے ای چنگیاں تھانواں تے سیر لئی وی کھڑنے ساں۔ میں اکثر رات دیر تک اپنیاں تقریراں تے حصیاں دی تیاری کرنا ساں تے ایتھل امثال 31 باب چ دَسی گئی بیوی وانگوں سویرے سویرے اُٹھ پیندی سی تاکہ بچیاں دے سکول جان توں پہلاں اَسی روزانہ دی ایت تے گل بات کر سکئے تے کٹھے ناشتہ کر سکئے۔ (امثال 31:15) میں یہوواہ دا بڑا شکرگزار آں کہ مینوں اِک ایہو جہی بیوی دا ساتھ ملیا جیہڑی ہمیشاں اوہناں ذمےداریاں نُوں پورا کرن چ میری مدد کردی اے جیہڑی یہوواہ نے مینوں دِتیاں نیں۔
میں تے ایتھل نے اپنے وَلّوں پوری کوشش کیتی اے کہ ساڈے بچے یہوواہ نُوں پیار کرن تے پورے دل نال اوہدی خدمت کرن۔ اَسی چاہنے ساں کہ ساڈے بیٹے کُلوقتی طور تے یہوواہ دی خدمت کرن دا فیصلہ کرن پر ایس وجہ توں نئیں کہ اَسی ایہہ چاہنے ساں سگوں ایس لئی کہ اوہ آپ اِنج کرنا چاہندے نیں۔ اَسی اوہناں نُوں ہمیشاں دَسنے ساں کہ کُلوقتی طور تے خدمت کرن دی وجہ توں سانوں کِنّیاں خوشیاں ملیاں نیں۔ اَسی اوہناں نُوں ایہہ وی دَسنے ساں کہ سانوں ایس کم چ بڑیاں مشکلاں چوں وی لنگھنا پیا اے۔ پر اَسی ہمیشاں ایس گل تے زور دینے ساں کہ یہوواہ نے کیویں اوہناں مشکلاں چوں نِکلن چ ساڈی مدد کیتی اے تے خاندان دے طور تے سانوں کِنّی برکت دِتی اے۔ اَسی ایس گل دا وی خیال رکھیا کہ ساڈے بیٹے ایہو جہے ہمایماناں نال دوستی کرن جیہڑے یہوواہ نُوں سب توں زیادہ اہمیت دیندے نیں۔
یہوواہ نے ہمیشاں میری مدد کیتی تاکہ میں اپنے گھرانے دِیاں ضرورتاں پوریاں کر سکاں۔ میں وی اپنے وَلّوں پوری وا لا کے محنت کیتی۔ جدوں میں ویاہ توں پہلاں برساتی جنگلاں وچ خاص پہلکار دے طور تے خدمت کر رہیا ساں تے میں سکھیا سی کہ میں پہلاں توں سوچاں کہ میں پیسہ کیویں خرچ کراں گا۔ بھانویں کہ اَسی پیسے نُوں بڑی سمجھداری نال استمال کرنے ساں پر فیر وی کدی کدار ساڈے کول ضرورت دی ہر چیز نئیں ہوندی سی۔ مشکل وقت چ میں صاف صاف ویکھیا کہ یہوواہ نے ساڈی مدد کیتی۔ مثال لئی، 1986 توں لے کے 1992 تک سُرینام چ خانہجنگی چل رہی سی۔ ایس دوران ضرورت دِیاں چھوٹیاں چھوٹیاں چیزاں خریدنا وی بڑا مشکل ہو گیا سی۔ پر یہوواہ نے اوہدوں وی ساڈیاں ضرورتاں نُوں پورا کیتا۔—متی 6:32۔
میری زندگی دا سب توں بہترین فیصلہ
سجے توں کھبے: میں تے میری بیوی ایتھل
ساڈا وڈا بیٹا ایتھنیایل تے اوہدی بیوی نیٹلی
ساڈا چھوٹا بیٹا جُوآنی تے اوہدی بیوی کرسٹل
یہوواہ نے ساری زندگی ساڈا خیال رکھیا اے تے سانوں سچی خوشی تے اِطمینان دِتا اے۔ ساڈے بچے ساڈے لئی بوہت وڈی برکت نیں تے اوہناں نُوں بچپن توں یہوواہ بارے سکھانا ساڈے لئی بڑے مان دی گل رہی اے۔ اَسی بڑے خوش آں کے ساڈے بچیاں نے وی کُلوقتی طور تے یہوواہ دی خدمت کرن دا فیصلہ کیتا اے۔ ایتھنیایل تے جُوآنی دونواں نے تنظیم وَلّوں ہون والے سکولاں چوں تربیت حاصل کیتی اے تے ہُن اوہ اپنی اپنی بیوی نال سُرینام برانچ چ خدمت کر رہے نیں۔
ایتھل تے میں ہُن وڈیرے ہو گئے آں۔ پر اَسی حالے وی خاص پہلکاراں دے طور تے یہوواہ دی خدمت کر رہے آں۔ اَسی ایس خدمت چ اینے مگن رہنے آں کہ مینوں حالے وی وقت نئیں مِلدا کہ میں تیرنا سکھ لواں۔ پر کوئی گل نئیں۔ میں جدوں وی اپنی زندگی تے غور کرنا واں تے مینوں محسوس ہوندا اے کہ جوانی چ کُلوقتی طور تے یہوواہ دی خدمت کرن دا فیصلہ کرنا میری زندگی دا سب توں بہترین فیصلہ سی جدے تے مینوں کدی وی پچھتانا نئیں پیا۔