مطالعے دا مضمون نمبر 48
وفاداری دے اِمتحان چوں لنگھدے ویلے اپنے ہوش قائم رکھو
ہر طرحاں دے حالاتاں چ اپنے ہوش قائم رکھو۔—2-تیمُتھیُس 4:5۔
گیت نمبر 124: وفادار رہوو
مضمون تے اِک نظر a
1. اپنے ہوش قائم رکھن دا کیہہ مطلب اے؟ (2-تیمُتھیُس 4:5)
جدوں سانوں مشکلاں دا سامنا ہوندا اے تے یہوواہ تے اوہدی تنظیم لئی ساڈی وفاداری دا اِمتحان ہوندا اے۔ پر اَسی مشکلاں دا سامنا کیویں کر سکنے آں؟ اپنے ہوش قائم رکھن، خبردار رہن تے ایمان دی راہ تے چلدے رہن نال۔ (2-تیمُتھیُس 4:5 نُوں پڑھو۔) اپنے ہوش قائم رکھن لئی ضروری اے کہ اَسی پُر سکون رہیے، ٹھنڈے دماغ نال سوچئے تے معاملیاں نُوں یہوواہ دی نظر نال ویکھئے۔ جدوں اَسی اِنج کراں گے تے ساڈی سوچ ساڈے جذبات دے اثر چ نئیں آئے گی۔
2. ایس مضمون چ اَسی کیہڑیاں گلاں تے غور کراں گے؟
2 پچھلے مضمون چ اَسی تِن ایہو جہیاں مشکلاں بارے گل کیتی سی جیہڑیاں کلیسیا دے باہروں آندیاں نیں۔ تے ایس مضمون چ اَسی تِن ایہو جہے مسئلیاں بارے گل کراں گے جیہڑے کلیسیا دے اندر پیدا ہو سکدے نیں تے جنہاں دی وجہ توں یہوواہ لئی ساڈی وفاداری دا اِمتحان ہو سکدا اے۔ ایہہ تِن مسئلے نیں: (1) جدوں سانوں لگدا اے کہ ساڈے کسے ہمایمان نے ساڈے نال بھیڑا سلوک کیتا اے، (2) جدوں ساڈی درستی کیتی جاندی اے، تے (3) جدوں سانوں تنظیم چ ہون والیاں تبدیلیاں نُوں قبول کرنا مشکل لگدا اے۔ ایہناں مسئلیاں دا سامنا کردے ویلے اَسی اپنے ہوش کیویں قائم رکھ سکنے آں تے یہوواہ تے اوہدی تنظیم دے وفادار کیویں رہ سکنے آں۔
جدوں ساڈا کوئی ہمایمان ساڈے نال بھیڑا سلوک کردا اے
3. جدوں ساڈا کوئی ہمایمان ساڈے نال بھیڑا سلوک کردا اے تے سانوں کیہہ محسوس ہوندا اے؟
3 کیہہ توانوں کدی لگیا اے کہ تواڈے کسے ہمایمان نے تواڈے نال کوئی بھیڑا سلوک کیتا اے؟ شاید توانوں لگے کہ کلیسیا چ کسے ذمےدار بھرا نے اِنج کیتا اے۔ یقیناً اوس بھرا دا مقصد توانوں دُکھ پونچانا نئیں سی۔ (رومیوں 3:23؛ یعقوب 3:2) پر فیر وی اوہدیاں گلاں توں توانوں ٹھیس پونچی۔ شاید توانوں ایناں دُکھ ہویا کہ توانوں نیندر نئیں آندی سی تے تُسی سوچن لگ پئے کہ ”جے ایہہ بھر اِنج کر سکدا اے تے فیر ایہہ یہوواہ دی تنظیم کیویں ہو سکدی اے؟“ شیطان تے چاہندا اے کہ تُسی ایہی سوچو۔ (2-کُرنتھیوں 2:11) ایہو جہی سوچ توانوں یہوواہ تے اوہدی تنظیم توں دُور کر سکدی اے۔ جے سانوں لگدا اے کہ کسے بھین یاں بھرا نے ساڈے نال بھیڑا سلوک کیتا اے تے اَسی اپنے ہوش کیویں قائم رکھ سکنے آں تے کیہہ کر سکنے آں تاکہ ساڈے ذہن چ کوئی غلط سوچ نہ آئے؟
4. (الف) جدوں یوسف نال بھیڑا سلوک ہویا تے اوہنے اپنے ہوش کیویں قائم رکھے؟ (پیدایش 50:19-21) (ب) اَسی یوسف دی مثال توں کیہہ سکھنے آں؟
4 یہوواہ نال ناراض نہ ہووو۔ جدوں یوسف نوجوان سی تے اوہدے وڈے بھراواں نے اوہدے نال بوہت بھیڑا سلوک کیتا۔ اوہ یوسف توں نفرت کردے سن تے اوہناں وچوں کجھ تے اوہنوں جانو مارنا چاہندے سن۔ (پیدایش 37:4، 18-22) یوسف دے بھراواں نے اوہنوں ماریا تے نئیں پر اوہنوں اِک غلام دے طور تے ویچ دِتا جدی وجہ توں یوسف نُوں تقریباً 13 سال تک مشکلاں دا سامنا کرنا پیا۔ یوسف سوچ سکدا سی کہ ”یہوواہ مینوں پیار کردا وی اے کہ نئیں،“ یاں فیر شاید اوہ ایہہ سوچ سکدا سی کہ ”یہوواہ نے ایس بھیڑے وقت چ میرا ساتھ چھڈ دِتا اے۔“ پر اوہ یہوواہ نال ناراض نئیں ہویا سگوں اوہ پُرسکون رہیا تے اوہنے اپنے ہوش قائم رکھے۔ تے جدوں اوہنوں اپنے بھراواں کولوں بدلہ لین دا موقع ملیا تے اوہنے اِنج نئیں کیتا۔ اوہنے اوہناں لئی پیار وکھایا تے اوہناں نُوں معاف کر دِتا۔ (پیدایش 45:4، 5) یوسف نے اِنج ایس لئی کیتا کیونکہ اوہنے ٹھنڈے دماغ نال سوچیا۔ اوہنے اپنے مسئلیاں بارے سوچدے رہن دے بجائے ایس گل تے دھیان دِتا کہ یہوواہ اوہدے توں کیہہ چاہندا اے۔ (پیدایش 50:19-21 نُوں پڑھو۔) اَسی ایہدے توں کیہہ سکھنے آں؟ ایہہ کہ جدوں ساڈے نال بھیڑا سلوک ہوندا اے تے سانوں یہوواہ نال ناراض نئیں ہونا چاہی دا تے نہ ای ایہہ سوچنا چاہی دا اے کہ اوہنے ساڈا ساتھ چھڈ دِتا اے۔ ایہدی بجائے سانوں ایس گل تے دھیان دینا چاہی دا اے کہ اوہ مشکل وقت چ ساڈا ساتھ کیویں دے رہیا اے۔ ایہدے علاوہ جدوں عیبدار ہون دی وجہ توں اوہ ساڈے نال بھیڑا سلوک کر دے نیں تے سانوں اوہناں نُوں معاف کر دینا چاہی دا اے۔—1-پطرس 4:8۔
5. جدوں بھرا مارکو نُوں لگیا کہ اوہدے نال بھیڑا سلوک ہویا اے تے اوہنے اپنے ہوش کیویں قائم رکھے؟
5 ذرا جنوبی امریکہ چ رہن والے اِک بھرا دی مثال تے غور کرو جدا ناں مارکو اے۔ b اوہ اِک کلیسیا چ بزرگ اے۔ اوہنے اوس وقت بارے دَسیا جدوں اوہنوں لگیا کہ اوہدی کلیسیا دے کجھ بزرگاں نے اوہدے نال بھیڑا سلوک کیتا اے۔ اوہنے کہیا: ”میں زندگی چ پہلاں کدی ایہو جہی پریشانی چوں نئیں لنگھیا ساں۔ مینوں رات نُوں نیندر نئیں آندی سی تے میں ایس گل تے رونا ساں کہ میں کجھ کر وی نئیں سکنا ساں۔“ پر بھرا مارکو نے اپنے ہوش قائم رکھے تے اپنے جذباتاں نُوں قابو چ رکھن دی کوشش کیتی۔ اوہ باقاعدگی نال دُعا کردا رہیا تے یہوواہ اَگے اِلتجا کیتی کہ اوہ اوہنوں اپنی پاک روح تے ایس مشکل نال نبڑن دی طاقت دَوے۔ اوہنے تنظیم دِیاں کتاباں تے رسالیاں چوں ایہو جہیاں گلاں لبھیاں جیہڑیاں اوہدے کم آ سکدیاں سن۔ اَسی ایہدے توں کیہہ سکھنے آں؟ ایہہ کہ جدوں کوئی بھین یاں بھرا ساڈے نال بھیڑا سلوک کردا اے تے سانوں پُرسکون رہنا چاہی دا اے تے اپنے دل چ غلط سوچ نئیں آن دینی چاہی دی۔ سانوں پتہ نئیں ہوندا کہ اوس بھین یاں بھرا نے ساڈے نال بھیڑا سلوک کیوں کیتا اے یاں فیر اوہ ساڈے نال اینی بُری طرحاں کیوں بولیا اے۔ ایس لئی دُعا چ یہوواہ نال گل کرو تے اوہنوں کہوو کہ اوہ تواڈی مدد کرے تاکہ تُسی معاملے نُوں اوس بھین یاں بھرا دی نظر نال ویکھ سکو۔ اِنج کرن نال تُسی اوس بھین یاں بھرا دی نیت تے شک نئیں کرو گے تے اوہدی غلطی نُوں معاف کر دَوو گے۔ (امثال 19:11) یاد رکھو کہ یہوواہ چنگی طرحاں جان دا اے کہ تواڈے نال کیہہ ہو رہیا اے تے اوہ ایس مشکل نال نبڑن لئی توانوں طاقت ضرور دَوے گا۔—2-تواریخ 16:9؛ واعظ 5:8۔
جدوں ساڈی درستی کیتی جاندی اے
6. جدوں یہوواہ ساڈی درستی کردا اے تے ایہہ کیوں ضروری اے کہ اَسی ایہنوں اوہدی محبت دا ثبوت سمجھئے؟ (عبرانیوں 12:5، 6، 11)
6 جدوں یہوواہ ساڈی درستی کردا اے تے شاید سانوں بوہت دُکھ ہووے۔ پر جے اَسی اپنا دھیان صرف ایسے گل تے رکھاں گے کہ درستی دی وجہ توں سانوں کِنّاں دُکھ ہویا اے تے اَسی ایہہ سوچن لگ پوواں گے کہ ساڈے نال زیادتی ہوئی اے تے بڑی سختی نال ساڈی درستی کیتی گئی اے۔ ایہدی وجہ توں اَسی ایہہ گل بُھل جانواں گے کہ یہوواہ ساڈے نال پیار کردا اے ایس لئی اوہ ساڈی درستی کردا اے۔ (عبرانیوں 12:5، 6، 11 نُوں پڑھو۔) تے جے اَسی اپنے جذباتاں اَگے جھک جانواں گے تے فیر شیطان نُوں ایہناں نال کھیڈن دا موقع مِل جائے گا۔ اوہ چاہندا اے کہ اَسی درستی نُوں ردّ کر دَئیے، ایتھوں تک کہ ہولی ہولی یہوواہ تے اوہدی کلیسیا توں دُور ہو جائیے۔ جے ساڈی درستی ہوئی اے تے اَسی اپنے ہوش کیویں قائم رکھ سکنے آں؟
جدوں پطرس دی درستی کیتی گئی تے اوہ اپنے اندر بہتری لیایا جدی وجہ توں یہوواہ اوہنوں اپنے کم لئی استمال کردا رہیا۔ (پیراگراف نمبر 7 نُوں ویکھو۔)
7. (الف) تصویر دے مطابق جدوں پطرس درستی دے بعد اپنے آپ چ بہتری لیایا تے یہوواہ نے کیہہ کیتا۔ (ب) تُسی پطرس توں کیہہ سکھیا اے؟
7 جدوں درستی ہوندی اے تے اپنے اندر بہتری لیاؤ۔ یسوع نے کئی وار اپنے باقی رسولاں دے سامنے پطرس دی درستی کیتی۔ (مرقس 8:33؛ لُوقا 22:31-34) ایہدی وجہ توں یقیناً پطرس نُوں شرمندگی دا سامنا ہویا ہوئے گا۔ پر فیر وی اوہ یسوع دا وفادار رہیا۔ جدوں اوہدی درستی کیتی گئی تے اوہ اپنے آپ چ بہتری لیایا تے اوہنے اپنیاں غلطیاں توں سکھیا۔ ایہدی وجہ توں یہوواہ، پطرس توں خوش ہویا تے اوہنے اوہنوں کلیسیا چ وڈیاں ذمےداریاں دِتیاں۔ (یوحنا 21:15-17؛ اعمال 10:24-33؛ 1-پطرس 1:1) اَسی پطرس توں کیہہ سکھنے آں؟ ایہہ کہ ایس گل تے دھیان دین دی بجائے کہ درستی دی وجہ توں سانوں کِنّی شرمندگی ہوئی اے، سانوں اپنے آپ چ بہتری لیانی چاہی دی اے۔ اِنج سانوں تے دُوجیاں نُوں فائدہ ہوئے گا تے اَسی یہوواہ تے اپنے بھین بھراواں دے ہور کم آ سکاں گے۔
8، 9. (الف) جدوں بھرا برنارڈو دی درستی کیتی گئی تے شروع شروع چ اوہنوں کیہہ محسوس ہویا؟ (ب) بھرا برنارڈو نے اپنی سوچ نُوں صحی کیویں کیتا؟
8 ذرا موزمبیق چ رہن والے اِک بھرا دی مثال تے غور کرو جدا ناں برنارڈو اے۔ اوہ اِک کلیسیا چ بزرگ سی پر فیر اوہدے کولوں ایہہ شرف لے لیا گیا۔ شروع شروع چ بھرا برنارڈو نُوں کیہہ محسوس ہویا؟ اوہنے کہیا: ”میں بڑے غصے چ ساں کیونکہ مینوں ایہہ گل بالکل چنگی نئیں لگی کہ میری درستی کیتی گئی اے۔“ بھرا برنارڈو ایس گلوں پریشان سی کہ کلیسیا دے بھین بھرا اوہدے بارے کیہہ سوچن گے۔ اوہنے کہیا: ”مینوں اپنے آپ نُوں بدلن تے یہوواہ تے اوہدی تنظیم تے اپنے بھروسے نُوں مضبوط کرن چ کئی مہینے لگ گئے۔“ بھرا برنارڈو نے کیہہ کیتا تاکہ اوہ معاملے نُوں یہوواہ دی نظر نال ویکھ سکے؟
9 اوہنے اپنی سوچ نُوں درست کیتا۔ اوہنے کہیا: ”جدوں میں بزرگ ساں تے میں اکثر عبرانیوں 12:7 استمال کر کے دُوجیاں نُوں سمجھانا ساں کہ جدوں یہوواہ اوہناں دی درستی کرے تے اوہناں نُوں اوہدے بارے صحی سوچ رکھنی چاہی دی اے۔ میں اپنے آپ نُوں پچھیا: ایس ایت تے کِنہوں کِنہوں عمل کرن دی ضرورت اے؟ یہوواہ دے سارے بندیاں نُوں جنہاں چ میں وی شامل آں۔“ فیر بھرا برنارڈو نے یہوواہ تے اوہدی تنظیم تے اپنے بھروسے نُوں مضبوط کرن لئی ہور وی بوہت کجھ کیتا۔ اوہ ہور زیادہ بائبل پڑھن تے ایہدے چ لکھیاں گلاں تے ہور زیادہ سوچوچار کرن لگ پیا۔ بھانویں کہ اوہ حالے وی ایہہ سوچ رہیا سی کہ کلیسیا دے بھین بھرا اوہدے بارے کیہہ سوچن گے، پر فیر وی اوہنے نہ تے اوہناں نال مُنادی کرنا چھڈیا تے نہ ای عبادتاں چ جواب دینا چھڈیا۔ تھوڑے چر بعد بھرا برنارڈو فیر بزرگ بن گیا۔ جے بھرا برنارڈو وانگوں تواڈی وی درستی ہوئی اے تے ایس گل تے دھیان نہ دَوو کہ توانوں کِنّی شرمندگی ہوئی اے سگوں اپنے آپ چ بہتری لیاؤ۔ (امثال 8:33؛ 22:4) جے تُسی اِنج کرو گے تے تُسی یقین رکھ پاؤ گے کہ یہوواہ توانوں ایس گل دا اجر دَوے گا کہ تُسی اوہدے تے اوہدی تنظیم دے وفادار رہے او۔
جدوں سانوں تنظیم چ ہون والیاں تبدیلیاں نُوں قبول کرنا مشکل لگدا اے
10. یہوواہ دی عبادت دے حوالے نال ہون والیاں تبدیلیاں دی وجہ توں کجھ اِسرائیلیاں دی وفاداری دا اِمتحان کیویں ہویا؟
10 جدوں یہوواہ دی تنظیم وچ کوئی تبدیلی ہوندی اے تے ساڈے ایمان دا اِمتحان ہو سکدا اے۔ ایس صورتحال چ جے اَسی خبردار نئیں رہواں گے تے اَسی یہوواہ توں دُور ہو سکنے آں۔ مثال لئی غور کرو کہ جدوں یہوواہ نے موسیٰ نُوں شریعت دے کے اپنی عبادت دے حوالے نال کجھ تبدیلیاں کیتیاں تے ایہدا کجھ اِسرائیلیاں تے کیہہ اثر ہویا۔ شریعت مِلن توں پہلاں گھر دے سربراہ اوہ کم کردے سن جیہڑے بعد چ کاہناں نُوں دِتے گئے۔ اوہ یہوواہ لئی قربان گاہواں بناندے سن تے اپنے گھرانے وَلّوں اوہدے حضور قربانیاں چڑھاندے سن۔ (پیدایش 8:20، 21؛ 12:7؛ 26:25؛ 35:1، 6، 7؛ ایوب 1:5) پر جدوں یہوواہ نے بنیاِسرائیل نُوں شریعت دِتی تے گھر دے سربراہواں کول ایہہ شرف نہ رہیا۔ یہوواہ نے ہارون دے گھرانے چوں کاہناں نُوں چُنیا تاکہ اوہ اوہدے حضور قربانیاں چڑھان۔ ایس تبدیلی دے بعد جے کسے گھرانے دا سربراہ جیہڑا ہارون دی اولاد چوں نئیں ہوندا سی، اوہ کم کردا جیہڑے صرف کاہناں نُوں دِتے گئے سن تے اوہنوں موت دی سزا دِتی جاندی سی۔ c (احبار 17:3-6، 8، 9) کیہہ ایسے وجہ توں قورح، داتن، ابیرام تے 250 سردار، موسیٰ تے ہارون دے اِختیار دے خلاف ہو گئے سن؟ (گنتی 16:1-3) ایہہ گل یقین نال نئیں کہی جا سکدی۔ وجہ بھانویں جو وی سی، قورح تے اوہدے ساتھیاں نے یہوواہ لئی وفاداری نئیں وکھائی سی۔ جے تنظیم چ ہون والی کسے تبدیلی دی وجہ توں تواڈی وفاداری دا اِمتحان ہوندا اے تے تُسی کیہہ کر سکدے او؟
جدوں قہاتیاں دی ذمےداری بدل دِتی گئی تے اوہناں نے خوشی نال گیت گان والیاں، درباناں تے کوٹھڑیاں دے نگراناں دے طور تے کم کیتا۔ (پیراگراف نمبر 11 نُوں ویکھو۔)
11. اَسی کجھ قہاتیاں کولوں کیہہ سکھ سکنے آں؟
11 تنظیم چ ہون والیاں تبدیلیاں دی پوری حمایت کرو۔ جدوں بنیاِسرائیل ویرانے چ سن تے قہاتیاں نُوں بوہت اہم ذمےداریاں دِتیاں گئیاں سن۔ جدوں وی بنیاِسرائیل نے رہن لئی کسے اِک جگہ توں دُوجی جگہ جانا ہوندا سی تے کجھ قہاتی عہد دے صندوق نُوں لے کے اوہناں دے اَگے اَگے ٹُردے سن۔ (گنتی 3:29، 31؛ 10:33؛ یشوع 3:2-4) ایہہ بڑا ای وڈا شرف سی۔ پر جدوں بنیاِسرائیل کنعان چ وَس گئے تے قہاتیاں دی ذمےداری بدل گئی۔ ہُن عہد دے صندوق نُوں اِک جگہ توں دُوجی جگہ کھڑن دی ضرورت نئیں رہی سی۔ ایس لئی سلیمان دے دَور چ کجھ قہاتیاں نُوں یہوواہ دی حمد چ گیت گان، کجھ نُوں درباناں دے طور تے کم کرن تے کجھ نُوں اوہناں کوٹھڑیاں دی دیکھبھال کرن دی ذمےداری دِتی گئی جنہاں چ لاویاں لئی سامان رکھیا جاندا سی۔ (1-تواریخ 6:31-33؛ 26:1، 24) بائبل چ ایہہ کِتے وی نئیں لکھیا کہ ایہناں کماں دی وجہ توں قہاتیاں نے شکایت کیتی یاں ایس گل تے زور دِتا کہ اوہناں نُوں کوئی خاص رُتبہ دِتا جائے کیونکہ اوہ پہلے وی بڑا خاص کم کر رہے سن۔ اَسی قہاتیاں توں کیہہ سکھنے آں؟ ایہہ کہ اَسی پورے دل نال یہوواہ دی تنظیم چ ہون والیاں تبدیلیاں دی حمایت کرئیے، اوہناں تبدیلیاں دی وی جنہاں دا اثر ساڈی ذمےداری تے ہوندا اے۔ توانوں جیہڑی وی ذمےداری دِتی جاندی اے، اوہنوں خوشی نال پورا کرو۔ یاد رکھو کہ تواڈی ذمےداری توانوں یہوواہ دی نظر چ خاص نئیں بناندی سگوں تواڈی وفاداری توانوں اوہدیاں نظراں چ خاص بناندی اے۔—1-سموئیل 15:22۔
12. جدوں بھین زُوبی نُوں اِک فرق طریقے نال یہوواہ دی خدمت کرن لئی کہیا گیا تے اوہنوں کیہہ محسوس ہویا؟
12 ذرا بھین زُوبی دی مثال تے غور کرو: جیہڑی مشرقی وسطیٰ توں اے۔ اوہ 23 سال توں زیادہ عرصے توں بیت ایل چ خدمت کر رہی سی تے اوہنوں اوتھے کم کرنا بوہت چنگا لگدا سی۔ پر فیر اوہنوں خاص پہل کار بنا دِتا گیا۔ اوہنے کہیا: ”میں بڑی حیران ہوئی۔ مینوں اِنج لگیا جیویں میں کسے کم دی نئیں رہی۔ میں وار وار بس ایہی سوچنی ساں کہ آخر میرے کولوں کیہڑی غلطی ہوئی اے۔“ افسوس دی گل اے کہ اوہدی کلیسیا دے کجھ بھین بھراواں نے اوہنوں حوصلہ دین دی بجائے اوہدا دُکھ ہور ودھا دِتا۔ اوہناں نے اوہنوں کہیا: ”جے تُوں بیت ایل چ چنگی طرحاں کم کر دی تے تنظیم تینوں کدی وی کِتے ہور جان لئی نہ کہندی۔“ کجھ عرصے تک تے بھین زُوبی اینی بےحوصلہ رہی کہ اوہ ہر رات روندی رہندی سی۔ پر فیر اوہنے کہیا: ”میں اپنے دل چ کدی ایہہ شک نئیں آن دِتا کہ یہوواہ تے اوہدی تنظیم مینوں پیار نئیں کردی۔“ ایس مشکل ویلے چ بھین زُوبی نے اپنے ہوش کیویں قائم رکھے؟
13. بھین زُوبی نے غلط سوچ دا مقابلہ کیویں کیتا؟
13 بھین زُوبی نے اپنی غلط سوچ دا مقابلہ کیتا۔ پر کیویں؟ اوہنے ساڈی تنظیم وَلّوں چھاپے گئے ایہو جہے مضمون پڑھے جنہاں چ اوہناں حالاتاں بارے دَسیا گیا اے جدے چوں اوہ آپ لنگھ رہی سی۔ مثال لئی، اوہنے یکم فروری 2001 دے مینارِنگہبانی چ مضمون ”آپ حوصلہ شکنی کا مقابلہ کر سکتے ہیں“ پڑھیا جدے توں اوہنوں بڑا فائدہ ہویا۔ ایس مضمون چ مرقس دی مثال دِتی گئی سی جیہڑا بائبل دِیاں کتاباں لکھن والیاں وچوں اِک سی۔ شاید مرقس وی اوس ویلے بڑا بےحوصلہ ہویا ہوئے گا جدوں اوہدی ذمےداری بدل دِتی گئی سی۔ بھین زُوبی نے کہیا: ”مرقس دی مثال نے میرے واسطے اِک دوائی دا کم کیتا تاکہ میں مایوسی نال نبڑ سکاں۔“ بھین زُوبی نے اپنے دوستاں نال وی اپنا رشتہ مضبوط رکھیا تے ایہہ نئیں سوچیا کہ اوہدے نال اِنج کیوں ہویا۔ اوہ سمجھ گئی کہ یہوواہ دی تنظیم جیہڑے وی فیصلے کردی اے اوہ پاک روح دی رہنمائی چ کر دی اے تے ایس تنظیم دی پیشوائی کرن والے بھراواں نُوں اوہدی بڑی فکر اے۔ اوہ ایہہ وی سمجھ گئی کہ یہوواہ دی تنظیم چ ایہہ گل سب توں زیادہ اہمیت رکھ دی اے کہ یہوواہ دا کم چنگی طرحاں ہوندا رہوے۔
14. بھرا وِلاڈو نُوں یہوواہ دی تنظیم چ ہون والی کیہڑی تبدیلی نُوں قبول کرنا مشکل لگ رہیا سی پر بعد چ اوہنے ایہنوں کیویں قبول کر لیا؟
14 ذرا بھرا وِلاڈو دی مثال تے غور کرو جیہڑا سیلووینیا چ رہندا اے۔ اوہدی عمر 73 سال اے تے اوہ کلیسیا چ اِک بزرگ اے۔جدوں بھرا وِلاڈو دی کلیسیا تے اِک ہور کلیسیا نُوں ملا کے اِک کلیسیا بنا دِتا گیا تے اوس عبادتگاہ نُوں بند کر دِتا گیا جنہوں بھرا وِلاڈو دی کلیسیا استمال کر رہی سی۔ ایس تبدیلی نُوں قبول کرنا بھرا وِلاڈو نُوں بڑا مشکل لگ رہیا سی۔ اوہنے کہیا: ”مینوں سمجھ نئیں آ رہیا سی کہ آخر ساڈی اینی پیاری عبادتگاہ نُوں بند کیوں کر دِتا گیا۔ مینوں بڑا دُکھ ہویا کیونکہ اَسی تھوڑا چر پہلاں ای ایہدی مرمت کرائی سی۔ میں فرنیچر بنان دا کم کر نا واں تے میں اپنی کلیسیا لئی وی کجھ فرنیچر بنایا سی۔ ایہدے علاوہ دو کلیسیاواں دے اِک ہو جان دی وجہ توں سانوں ہور وی بڑیاں تبدیلیاں کرنیاں پئیاں جیہڑیاں کہ میرے ورگے وڈی عمر والے مبشراں لئی اسان نئیں سن۔“ کیہڑی چیز نے بھرا وِلاڈو دی مدد کیتی تاکہ اوہ تنظیم دی ہدیت تے عمل کر سکے؟ اوہنے کہیا: ”جدوں اَسی اپنے آپ نُوں اوہناں تبدیلیاں مطابق ڈھالنے آں جیہڑیاں یہوواہ دی تنظیم کردی اے تے سانوں ہمیشاں برکتاں مِلدیاں نیں۔ ایہہ تبدیلیاں سانوں مستقبل چ ہون والیاں وڈیاں وڈیاں تبدیلیاں نُوں قبول کرن لئی تیار کردیاں نیں۔“ جے تواڈی کلیسیا تے اِک ہور کلیسیا نُوں ملا کے اِک بنا دِتا گیا اے یاں یہوواہ دی خدمت چ تواڈی ذمےداری نُوں بدل دِتا گیا اے تے کیہہ توانوں ایہناں تبدیلیاں نُوں قبول کرنا مشکل لگ رہیا اے؟ جے ہاں، تے یقین منو کہ یہوواہ تواڈے جذبات نُوں چنگی طرحاں سمجھ دا اے۔ پر جدوں تُسی ایہناں تبدیلیاں دی حمایت کردے او تے یہوواہ تے اوہدی تنظیم نال جُڑے رہندے او تے یہوواہ توانوں ضرور برکت دے گا۔—زبور 18:25۔
ہر گل چ اپنے ہوش قائم رکھو
15. جدوں سانوں کلیسیا دے اندر مسئلیاں دا سامنا کرنا پیندا اے تے اَسی اپنے ہوش کیویں قائم رکھ سکنے آں؟
15 جیویں جیویں ایس دُنیا دا خاتمہ نیڑے آ رہیا اے سانوں ایس گل دی توقع رکھنی چاہی دی اے کہ سانوں کلیسیا دے اندر مسئلیاں دا سامنا کرنا پئے گا۔ تے ایہناں مسئلیاں دی وجہ توں یہوواہ لئی ساڈی وفاداری دا اِمتحان ہو سکدا اے۔ ایس لئی سانوں اپنے ہوش قائم رکھن دی پوری کوشش کرنی چاہی دی اے۔ جے تواڈا کوئی ہم ایمان تواڈے نال بھیڑا سلوک کردا اے تے اپنے دل چ غصہ نہ پالو۔ تے جے تواڈی درستی کیتی جاندی اے تے ایس گل تے دھیان نہ دَوو کہ ایہدی وجہ توں توانوں کِنّی شرمندگی چکنی پئی اے سگوں اپنے آپ چ بہتری لیاؤ۔ تے جدوں یہوواہ دی تنظیم چ کوئی ایہو جہی تبدیلی ہوندی اے جدا تواڈی زندگی تے گُوڑھا اثر ہوندا اے تے اوس تبدیلی دی حمایت کرن دی پوری کوشش کرو۔
16. تُسی یہوواہ تے اوہدی تنظیم تے اپنے بھروسے نُوں مضبوط کیویں کر سکدے او؟
16 تُسی اوس ویلے وی یہوواہ تے اوہدی تنظیم تے اپنے بھروسے نُوں مضبوط رکھ سکدے او جدوں تواڈی وفاداری دا اِمتحان ہوندا اے۔ پر اِنج کرن لئی توانوں اپنے ہوش قائم رکھنے پین گے ایہدا مطلب اے توانوں پُر سکون رہنا پووے گا، ٹھنڈے دماغ نال سوچنا پئے گا تے معاملیاں نُوں یہوواہ دی نظر نال ویکھنا پئے گا۔ بائبل چ ایہو جہے لوکاں دی مثالاں بارے پڑھن تے ایہناں تے سوچ وچار کرن دا عزم کرو جنہاں نے کامیابی نال اوہناں مشکلاں دا سامنا کیتا جنہاں دا توانوں وی سامنا ہو رہیا اے۔ یہوواہ کولوں مدد لئی دُعا کرو تے کدی وی کلیسیا توں دُور نہ جاؤ۔ جے تُسی اِنج کرو گے تے فیر بھانویں جو وی ہو جائے، شیطان توانوں یہوواہ تے اوہدی تنظیم توں وَکھ کدی نئیں کر سکے گا۔—یعقوب 4:7۔
گیت نمبر 126: خبردار رہوو، دلیر بنو
a کدی کدار یہوواہ تے اوہدی تنظیم دا وفادار رہنا خاص طور تے اوہدوں مشکل ہو جاندا اے جدوں سانوں کلیسیا چ مسئلیاں دا سامنا ہوندا اے۔ ایس مضمون چ اَسی تِن ایہو جہے مسئلیاں تے گل کراں گے تے ویکھاں گے کہ اَسی یہوواہ تے اوہدی تنظیم دے وفادار رہن لئی کیہہ کر سکنے آں۔
b ایس مضمون چ کجھ ناں بدل دِتے گئے نیں۔
c شریعت چ ایہہ حکم دِتا گیا سی کہ جیہڑے گھر دے سربراہ جانور دا گوشت کھان لئی اوہنوں ذِبح کرنا چاہندے نیں، اوہ اوس جگہ جان جیہڑی یہوواہ نے چُنی اے۔ پر جے اوہناں دا گھر اوس جگہ توں دُور ہوندا سی تے اوہ آپ ای جانور نُوں ذِبح کر سکدے سن۔—اِستثنا 12:21۔
