مطالعے دا مضمون نمبر 47
کسے وی وجہ توں یہوواہ توں دُور نہ ہووو
اَے یہوواہ میرا بھروسا تیرے تے وے۔—زبور 31:14۔
گیت نمبر 36: اپنے دل دی حفاظت کریئے
مضمون تے اِک نظر a
1. سانوں کیویں پتہ اے کہ یہوواہ ساڈے نیڑے آنا چاہندا اے؟
یہوواہ سانوں دعوت دیندا اے کہ اَسی اوہدے نیڑے جائیے۔ (یعقوب 4:8) اوہ چاہندا اے کہ اَسی اوہنوں اپنا خدا، اپنا باپ تے اپنا دوست سمجھیے۔ اوہ ساڈیاں دُعاواں دا جواب دیندا اے تے اوکھے ویلے چ ساڈی مدد کردا اے۔ اوہ اپنی تنظیم دے ذریعے سانوں تعلیم دیندا اے تے ساڈی حفاظت کردا اے۔ پر یہوواہ دے نیڑے جان لئی سانوں کیہہ کرنا چاہی دا اے؟
2. اَسی یہوواہ دے نیڑے کیویں جا سکنے آں؟
2 اَسی یہوواہ کولوں دُعا کرن، اوہدا کلام پڑھن تے اوہدے تے سوچوچار کرن نال اوہدے نیڑے جا سکنے آں۔ جدوں اَسی اِنج کرنے آں تے ساڈے دل اوہدے لئی محبت تے شکرگزاری نال بھر جاندے نیں۔ ساڈے اندر ایہہ خواہش پیدا ہوندی اے کہ اَسی اوہدا کہنا منیے تے اوہدی وڈیائی کرئیے کیونکہ اوہ ایہدا حقدار وی اے۔ (مکاشفہ 4:11) جنہاں زیادہ اَسی یہوواہ نُوں جانا گے اوناں ای زیادہ اَسی اوہدے اُتے تے اوہدی تنظیم اُتے بھروسا کر سکاں گے جیہڑی اوہنے ساڈی مدد لئی بنائی اے۔
3. شیطان سانوں یہوواہ توں دُور کرن دی کوشش کیویں کردا اے پر کیہڑی چیز ساڈی مدد کرے گی تاکہ اَسی یہوواہ تے اوہدی تنظیم نُوں کدی نہ چھڈئیے؟ (زبور 31:13، 14)
3 شیطان سانوں یہوواہ توں دُور کرن دی کوشش کردا اے، خاص طور تے اوہدوں جدوں اَسی مشکلاں چوں لنگھ رہے ہنے آں۔ اوہ ایہہ کیویں کردا اے؟ اوہ ہولی ہولی یہوواہ تے اوہدی تنظیم اُتے ساڈے بھروسے نُوں ختم کرن دی کوشش کردا اے۔ پر اَسی اوہدیاں چالاں دا مقابلہ کر سکنے آں۔ پر کیویں؟ جے ساڈا ایمان مضبوط ہوئے گا تے اَسی یہوواہ تے پکا بھروسا رکھاں گے تے اَسی اوہنوں تے اوہدی تنظیم نُوں کدی وی نئیں چھڈاں گے۔—زبور 31:13، 14 نُوں پڑھو۔
4. ایس مضمون چ اَسی کیہڑیاں گلاں تے غور کراں گے؟
4 ایس مضمون چ اَسی تن ایہو جہیاں مشکلاں تے گل کراں گے جیہڑیاں کلیسیا دے باہروں آندیاں نیں۔ ایہناں تناں مشکلاں دی وجہ توں یہوواہ تے اوہدی تنظیم تے ساڈا بھروسا کمزور ہو سکدا اے۔ ایہہ مشکلاں سانوں یہوواہ توں دُور کیویں کر سکدیاں نیں؟ تے جدوں شیطان ایہناں دا فائدہ چُک کے ساڈی ہمت نُوں توڑن دی کوشش کردا اے تے اَسی اوہدیاں کوششاں نُوں ناکام کیویں بنا سکنے آں؟
جدوں سانوں پریشانیاں دا سامنا ہوندا اے
5. پریشانیاں چوں لنگھ دے ویلے یہوواہ تے اوہدی تنظیم تے ساڈے بھروسے دا اِمتحان کیویں ہو سکدا اے؟
5 کدی کدار سانوں پریشانیاں دا سامنا کرنا پیندا اے۔ مثال لئی، شاید ساڈے گھر والے ساڈی مخالفت کرن یاں ساڈی نوکری چلی جائے۔ ایس طرحاں دِیاں پریشانیاں چ یہوواہ دی تنظیم تے ساڈا ایمان کیویں ڈول سکدا اے تے اَسی یہوواہ توں دُور کیویں ہو سکنے آں؟ جدوں اَسی بڑے لمے چر توں پریشانیاں چوں لنگھ رہے ہنے آں تے ہو سکدا اے کہ سانوں لگے کہ کجھ وی ٹھیک نئیں ہوئے گا تے شاید اَسی بےحوصلہ ہو جائیے۔ شیطان ایس موقعے توں پورا فائدہ چُک دا اے تے ساڈے دل چ شک پیدا کردا اے کہ یہوواہ سانوں پیار نئیں کردا۔ شیطان چاہندا اے کہ اَسی ایہہ سوچن لگ پیئے کہ ساڈیاں پریشانیاں دی وجہ یہوواہ تے اوہدی تنظیم اے۔ مصر چ بنیاِسرائیل نال وی کجھ اِنج ای ہویا سی۔ شروع شروع اوہناں نُوں یقین سی کہ یہوواہ نے ای موسیٰ تے ہارون نُوں بھیجیا اے تاکہ اوہ اوہناں نُوں مصر دی غلامی چوں کڈھ لین۔ (خروج 4:29-31) پر جدوں فرعون نے اوہناں دی زندگی مشکل بنا دِتی تے اوہ موسیٰ تے ہارون نُوں ایہدا ذمےدار سمجھن لگ پئے۔ اوہناں نے کہیا:تُسی سانوں فرعون تے اوہدے نوکراں دی نظر چ ایناں گٹھیا بنا دِتا اے کہ سانوں مارنا لئی اوہناں دے ہتھ چ تلوار دے دِتی اے۔ (خروج 5:19-21) اوہ اصل چ خدا دے وفادار بندیاں تے اِلزام لان لگ پئے۔ ایہہ بڑے ای افسوس دی گل سی۔ جے تُسی وی بڑے لمے چر توں پریشانیاں دا سامنا کر رہے او تے تُسی یہوواہ تے اوہدی تنظیم تے اپنے بھروسے نُوں کیویں مضبوط کر سکدے او؟
6. اَسی پریشانیاں دا سامنا کرن دے معاملے چ حبقوق نبی توں کیہہ سکھنے آں؟ (حبقوق 3:17-19)
6 دُعا چ یہوواہ دے سامنے اپنا دل کھول دَوو تے مدد لئی اوہدے تے آس لاؤ۔ حبقوق نبی بڑیاں پریشانیاں دا سامنا کر رہیا سی۔ اِک ویلا تے ایہو جیہا آیا کہ اوہنوں ایس گل تے ای شک ہون لگ پیا کہ یہوواہ نُوں اوہدی کوئی فکر اے۔ ایس لئی اوہنے دُعا چ دل کھول کے یہوواہ نُوں اپنی سوچ بارے دَسیا۔ اوہنے کہیا: اَے یہوواہ میں کدوں تک مدد لئی پکاراں گا کیونکہ تُوں تے سُن دا ای نئیں؟ تُوں بدکاری نُوں کیوں برداشت کر رہیا ایں؟ (حبقوق 1:2، 3) یہوواہ نے اپنے ایس بندے دی اِلتجا سنی۔ (حبقوق 2:2، 3) جدوں حبقوق نے ایس گل تے سوچوچار کیتا کہ یہوواہ نے پہلاں اپنے بندیاں نُوں کیویں بچایا سی تے اوہ فیر توں بڑا خوش ہو گیا۔ اوہنوں ایس گل تے پکا یقین ہو گیا کہ یہوواہ نُوں واقعی اوہدی فکر اے تے اوہ اوہنوں ہر پریشانی دا سامنا کرن دی طاقت دَوے گا۔ (حبقوق 3:17-19 نُوں پڑھو۔) اَسی ایہدے توں کیہہ سکھنے آں؟ ایہہ کہ پریشانیاں دا سامنا کردے ویلے سانوں یہوواہ کولوں دُعا کرنی چاہی دی اے تے اوہنوں کُھل کے اپنی سوچ بارے دَسنا چاہی دا اے۔ فیر سانوں مدد لئی اوہدے تے آس لانی چاہی دی اے۔ جدوں اَسی اِنج کراں گے تے سانوں ایس گل دا پکا یقین ہو جائے گا کہ یہوواہ سانوں پریشانیاں نال نبڑن دی طاقت دے گا۔ تے جدوں سانوں اوہدی مدد محسوس ہوئے گی تے ساڈا ایمان پہلے نالوں وی بوہتا پکا ہو جائے گا۔
7. (الف)بھین شرلی دے اِک رشتےدار نے اوہنوں کیہڑی گل دا یقین دَوان دی کوشش کیتی؟ (ب)بھین شرلی نے یہوواہ تے اپنے بھروسے نُوں کیویں قائم رکھیا؟
7 اوہ کم کردے رہوو جنہاں نال تُسی یہوواہ دے نیڑے رہ سکدے او۔ آؤ، ویکھئے کہ بھین شرلی نُوں اِنج کرن دا کیہہ فائدہ ہویا۔ b بھین شرلی پاپوانیو گنی چ رہندی سی تے اوہنوں بوہت ساریاں مشکلاں دا سامنا ہو رہیا سی۔ اوہدے گھر والے بڑے ای غریب سن تے کدی کدی تے اوہناں نُوں پیٹ بھر کے روٹی وی کھان نُوں نئیں مِلدی سی۔ اوہدے اِک رشتےدار نے یہوواہ تے اوہدے ایمان نُوں کمزور کرن دی کوشش کیتی۔ اوہنے بھین شرلی نُوں کہیا: ”تُوں تے کہنی ایں کہ خدا دی پاک روح تواڈی مدد کر رہی اے۔ پر ایہہ کیہہ مدد کر رہی اے؟ تُسی تے حالے وی اینے غریب او تے تُوں مُنادی کرن چ اپنا ٹائم ضائع کر رہی ایں۔“ ایس رشتےدار دی گل سُن کے بھین شرلی دے دل چ شک پیدا ہون لگ پیا۔ اوہنے کہیا: ”میں سوچن لگ پئی کہ کیہہ واقعی خدا نُوں ساڈی کوئی فکر ہے وے؟ جدوں میرے دل چ ایہہ سوال آیا تے میں فوراً یہوواہ کولوں دُعا کیتی تے اوہنوں اوہ سب کجھ دَس دِتا جو میں سوچ رہی ساں۔ میں بائبل تے ساڈی تنظیم دِیاں کتاباں تے رسالیاں نُوں پڑھدی رہی تے میں مُنادی کرنا تے عبادتاں تے جانا وی نئیں چھڈیا۔“ چھیتی بھین شرلی سمجھ گئی کہ یہوواہ اوہدے گھر والیاں دا خیال رکھ رہیا اے۔ اوہدے گھر والے کدی وی بُھکھے نئیں رہے تے اوہ ہمیشاں خوش رہندے نیں۔ بھین شرلی نے کہیا: ”مینوں صاف نظر آ رہیا سی کہ یہوواہ میریاں دُعاواں دا جواب دے رہیا اے۔ (1-تیمُتھیُس 6:6-8) جے تُسی اوہ کم کردے رہوو گے جنہاں نال تُسی یہوواہ دے نیڑے رہ سکو گے تے کوئی وی پریشانی یاں کسے وی طرحاں دا شک توانوں یہوواہ توں دُور نئیں کر سکے گا۔
جدوں پیشوائی کرن والے بھراواں نال نااِنصافی ہوندی اے
8. یہوواہ دی تنظیم چ پیشوائی کرن والے بھراواں نال کیہہ ہو سکدا اے؟
8 ساڈے دُشمن خبراں تے سوشل میڈیا دے ذریعے ساڈے اوہناں بھراواں بارے جھوٹھیاں گلاں تے غلط معلومات پھیلاندے نیں جیہڑے یہوواہ دی تنظیم چ ساڈی پیشوائی کردے نیں۔ (زبور 31:13) ساڈے کجھ بھراواں نُوں تے گرفتار کیتا گیا تے مُجرم ٹھہرایا گیا۔ پہلی صدی دے مسیحیاں نُوں وی ایہو جہے حالاتاں دا سامنا کرنا پیا سی۔ اوہناں دے دُشمناں نے پولُس تے جھوٹھے اِلزام لائے تے اوہنوں گرفتار کر لیا۔ پر مسیحیاں نے کیہہ کیتا؟
9. جدوں پولُس نُوں قید چ پایا گیا تے کجھ مسیحیاں نے کیہہ کیتا؟
9 جدوں پولُس نُوں روم چ قید کیتا گیا تے پہلی صدی دے کجھ مسیحیاں نے اوہدا ساتھ دینا چھڈ دِتا۔ (2-تیمُتھیُس 1:8، 15) پر کیوں؟ کیہہ ایس لئی کہ اوہناں نُوں ایس گل توں شرم محسوس ہو رہی سی کہ لوک پولُس نُوں اِک مُجرم سمجھ رہے نیں۔ (2-تیمُتھیُس 2:8، 9) یاں فیر کیہہ اوہ ایس گل توں ڈر رہے سن کہ اوہناں نُوں وی اذیت دِتی جائے گی؟ وجہ بھانویں جیہڑی وی سی، ذرا سوچو کہ پولُس نُوں اوہناں دے ایس رویے توں کِنّاں دُکھ ہویا ہوئے گا۔ پولُس نُوں بڑیاں مشکلاں سہنیاں پئیاں، ایتھوں تک کہ اوہنے ایہناں مسیحیاں دی خاطر اپنی جان وی خطرے چ پا دِتی سی۔ (اعمال 20:18-21؛ 2-کُرنتھیوں 1:8) اَسی کدی وی اوہناں مسیحیاں وانگوں نئیں بننا چاہندے جنہاں نے مشکل ویلے چ پولُس دا ساتھ چھڈ دِتا سی۔ تے فیر جدوں پیشوائی کرن والے بھراواں نُوں اذیت دِتی جاندی اے تے سانوں کیہڑی گل نُوں یاد رکھنا چاہی دا اے؟
10. جدوں یہوواہ دی تنظیم چ پیشوائی کرن والے بھراواں نُوں اذیت دِتی جاندی اے تے سانوں کیہڑی گل یاد رکھنی چاہی دی اے تے کیوں؟
10 یاد رکھو کہ ساڈے تے اذیت کیوں آندی اے تے کدے وَلّوں آندی اے۔ 2-تیمُتھیُس 3:12 چ لکھیا اے: اوہناں ساریاں نُوں اذیت دِتی جائے گی جیہڑے مسیح یسوع دے شاگرداں دے طور تے خدا دی بندگی کرنا چاہندے نیں۔ ایس لئی سانوں اوس ویلے حیران نئیں ہونا چاہی دا جدوں شیطان خاص طور تے ساڈے اوہناں بھراواں نُوں اپنا نشانہ بناندا اے جیہڑے تنظیم چ ساڈی پیشوائی کر رہے نیں۔ اوہ چاہندا اے کہ اوہدے ایہو جہے حملیاں دی وجہ توں ایہہ بھرا یہوواہ توں دُور ہو جان تے اَسی ایہناں حملیاں دی وجہ توں ڈر جائیے۔—1-پطرس 5:8۔
بھانویں کہ پولُس قید چ سی پر اُنیسفرس نے بڑی دلیری نال اوہدا ساتھ دِتا۔ اَج وی ساڈے بھین بھرا اپنے اوہناں ہمایماناں دا ساتھ دیندے نیں جیہڑے قید چ نیں۔ ایہی گل ایس تصویر چ وکھائی گئی اے۔ (پیراگراف نمبر 11، 12 نُوں ویکھو۔)
11. اَسی اُنیسفرس دی مثال توں کیہہ سکھنے آں؟ (2-تیمُتھیُس 1:16-18)
11 پیشوائی کرن والے بھراواں دا ساتھ دیندے رہوو تے اوہناں دے وفادار رہوو۔ (2-تیمُتھیُس 1:16-18 نُوں پڑھو۔) بھانویں کہ پہلی صدی چ کجھ مسیحیاں نے اوس ویلے پولُس دا ساتھ چھڈ دِتا سی جدوں اوہنوں قید کیتا گیا سی پر اُنیسفرس نے اِنج نئیں کیتا سی۔ پولُس نے اوہدے بارے کہیا: اُنیسفرس نُوں ایس گلوں شرم محسوس نئیں ہوئی کہ مینوں بیڑیاں چ بنھیا گیا اے۔ اُنیسفرس نے تے پولُس نُوں لبھیا تے جدوں اوہ اوہنوں مل گیا تے اوہنے پولُس دی ہر اوہ مدد کیتی جدی پولُس نُوں لوڑ سی۔ اِنج کرن نال اُنیسفرس نے اپنی جان خطرے چ پا دِتی۔ اَسی ایہدے توں کیہہ سکھنے آں؟ ایہہ کہ سانوں انساناں توں نئیں ڈرنا چاہی دا تے اپنے اوہناں بھراواں دا ساتھ نئیں چھڈنا چاہی دا جنہاں نُوں اذیت دِتی جا رہی اے۔ ایہدی بجائے سانوں اوہناں دی ڈھال بننا چاہی دا اے تے ہر طرحاں نال اوہناں دی مدد کرنی چاہی دی اے۔ (امثال 17:17) اوہناں نُوں ساڈے پیار تے مدد دی لوڑ اے۔
12. اَسی روس چ رہن والے اپنے بھین بھراواں دی مثال توں کیہہ سکھنے آں؟
12 ذرا غور کرو کہ روس چ رہن والے ساڈے بھین بھراواں نے اپنے اوہناں ہمایماناں دی مدد کیویں کیتی جیہڑے جیل چ نیں۔ جدوں جیل چ کجھ بھین بھراواں تے مُقدمہ چلایا گیا تے ساڈے بوہت سارے بھین بھرا اوہناں دا ساتھ دین لئی عدالت چ گئے۔ اَسی ایہدے توں کیہہ سکھنے آں؟ ایہہ کہ جدوں ساڈی پیشوائی کرن والے بھراواں نُوں بدنام کیتا جاندا اے، اوہناں نُوں گرفتار کیتا جاندا اے یاں اوہناں نُوں اذیت دِتی جاندی اے تے سانوں ڈر کے پچھے نئیں ہٹنا چاہی دا۔ ایہدی بجائے سانوں اوہناں لئی دُعا کرنی چاہی دی اے، اوہناں دے گھر والیاں دا خیال رکھنا چاہی دا اے تے ایہو جہے طریقیاں نال اوہناں دی مدد کرنی چاہی دی اے جنہاں توں ثابت ہوئے کہ اَسی اوہناں دا ساتھ دے رہے آں۔—اعمال 12:5؛ 2-کُرنتھیوں 1:10، 11۔
جدوں لوک سانوں بُرا بھلا کہندے نیں
13. لوک جیہڑے طعنے دیندے نیں اوہناں دی وجہ توں یہوواہ تے اوہدی تنظیم تے ساڈا بھروسا کیوں کمزور پے سکدا اے؟
13 اَسی مُنادی کرنے آں تے اوہ کم کرنے آں جیہڑے یہوواہ دی نظر چ صحی نیں۔ ایس وجہ توں شاید ساڈے غیر ایمان رشتےدار، ساڈے نال کم کرن والے لوک یاں ساڈے سکول دے بچے سانوں طعنے دین۔ (1-پطرس 4:4) شاید اوہ کہن: ”تُسی اچھے انسان او پر تواڈا مذہب بوہت ای سخت اے تے تواڈی سوچ بوہت ای پرانی اے۔“ تے جیویں اَسی اوہناں لوکاں نال پیش آنے آں جنہاں نُوں کلیسیا چوں کڈھ دِتا جاندا اے، اوہدی وجہ توں کجھ لوک شاید سانوں ایہہ طعنہ دین: ”تُسی تے کہندے او کہ مسیحیاں نُوں اِک دُوجے نال محبت کرنی چاہی دی اے! تُسی کیہو جہے مسیحی او؟“ ایس طرحاں دِیاں گلاں دی وجہ توں ساڈے دل چ شک پیدا ہو سکدا اے۔ شاید اَسی ایہہ سوچن لگ پئیے: ”یہوواہ ساڈے توں بوہت زیادہ توقع رکھدا اے۔ اوہدی تنظیم بوہت ای سخت اے۔“ جے توانوں وی ایہو جہی صورتحال دا سامنا ہو رہیا اے تے تُسی یہوواہ تے اوہدی تنظیم دے نیڑے کیویں رہ سکدے او؟
ایوب دے جھوٹھے دوستاں نے اوہنوں طعنے دِتے تے اوہدے نال جھوٹھ بولیا۔ پر ایوب نے عزم کیتا ہویا سی کہ اوہ ہر حال چ یہوواہ دا وفادار رہوے گا۔ (پیراگراف نمبر 14 نُوں ویکھو۔)
14. جدوں لوک سانوں اوہ کم کرن دی وجہ توں طعنے دیندے نیں جیہڑے یہوواہ دی نظر چ صحی نیں تے سانوں کیہہ کرنا چاہی دا اے؟ (زبور 119:50-52)
14 اوہ کم کرن دا ارادہ کرو جیہڑے یہوواہ دی نظر چ صحی نیں۔ ایوب اوس ویلے وی چنگے کم کردا رہیا جدوں اوہنوں ایہدی وجہ توں طعنے دِتے گئے۔ ایوب دے اِک دوست نے اوہنوں ایہہ گل سمجھان دی کوشش کیتی کہ بھانویں اوہ جنہے وی چنگے کم کر لوَے خدا نُوں ایہدے توں کوئی فرق نئیں پیندا۔ (ایوب 4:17، 18؛ 22:3) پر ایوب نے ایس جھوٹھ تے یقین نئیں کیتا۔ اوہنوں پتہ سی کہ یہوواہ ای ایہہ فیصلہ کر سکدا اے کہ کیہہ صحی اے تے کیہہ غلط۔ اوہنے یہوواہ دی مرضی تے چلن دا پکا ارادہ کیتا ہویا سی۔ اوہنے کسے نُوں وی ایس گل دی اجازت نئیں دِتی کہ اوہ اوہنوں یہوواہ توں دُور کردے۔ (ایوب 27:5، 6) اَسی ایہدے توں کیہہ سکھنے آں؟ ایہہ کہ کدی وی دُوجیاں دِیاں گلاں دی وجہ توں یہوواہ دے اصولاں تے شک نہ کرئیے۔ ذرا سوچو کہ کیہہ تُسی وار وار ایہہ نئیں ویکھیا کہ یہوواہ دے اصول کِنّے صحی نیں تے اوہناں تے چلن دی وجہ توں توانوں ہمیشاں فائدہ ای ہوندا اے؟ ایس لئی اوس تنظیم دا ساتھ دیندے رہوو جیہڑی اوہدی مرضی تے چل رہی اے۔ جے تُسی اِنج کرو گے تے فیر بھانویں لوک توانوں جِنّے وی طعنے کیوں نہ دین،اوہ کدی وی توانوں یہوواہ توں دُور نئیں کر سکن گے۔—زبور 119:50-52 نُوں پڑھو۔
15. بھین بریزٹ نُوں بُرا بھلا کیوں کہیا گیا؟
15 ذرا اِنڈیا چ رہن والی اِک بھین دے تجربے تے غور کرو جدا ناں بریزٹ اے۔ اوہدے گھر والے اوہنوں یہوواہ تے ایمان رکھن دی وجہ توں طعنے دیندے سن۔ بھین بریزٹ دا شوہر یہوواہ دا گواہ نئیں سی۔ جدوں 1997 چ بھین بریزٹ نے بپتسمہ لیا تے ایہدے تھوڑی دیر بعد ای اوہدے شوہر دی نوکری چلی گئی۔ ایس لئی اوہدے شوہر نے فیصلہ کیتا کہ اوہ اوہنوں تے اپنیاں دِھیاں نُوں لے کے اپنے ماں پیو دے گھر رہن لئی چلا جائے گا جیہڑے کسے ہور شہر چ رہندے سن۔ بھین بریزٹ نُوں بوہت ساریاں مشکلاں دا سامنا کرنا پیا۔ شوہر دی نوکری چھٹ جان دی وجہ توں اوہنوں گھر والیاں دا پیٹ بھرن لئی کم وی کرنا پیا۔ اِک ہور وڈی مشکل اے سی کہ اوہدے گھر دے نیڑے کوئی وی کلیسیا نئیں سی۔ سب توں نیڑے والی کلیسیا وی 350 کلومیڑ دُور سی۔ بھین بریزٹ دے سُسرال والے اوہدی بڑی مخالفت کرن لگ پئے۔ مخالفت اینی ودھ گئی کہ بھین بریزٹ، اوہدے شوہر تے دِھیاں نُوں اوہ گھر چھڈنا پیا۔ فیر اچانک اوہدا شوہر فوت ہو گیا۔ ایہدے بعد اوہدی اِک دِھی وی صرف 12 سال دی عمر چ کینسر دی وجہ توں مر گئی۔ بھین بریزٹ پہلے ای بڑیاں مشکلاں چوں لنگھ رہی سی تے اُتوں اوہدے رشتےدار وی اوہنوں ایہناں مشکلاں دا ذمےدار سمجھدے سن۔ اوہدے رشتےداراں نے کہیا کہ جے توں یہوواہ دی گواہ نہ ہوندی تے تیرے تے ایہہ مشکلاں نہ آندیاں۔ ایہدے باوجود بھین بریزٹ نے یہوواہ تے اپنا بھروسا مضبوط رکھیا تے اوہدی تنظیم نال جڑی رہی۔
16. بھین بریزٹ نُوں یہوواہ تے اوہدی تنظیم دے نیڑے رہن دی وجہ توں کیہڑیاں برکتاں ملیاں؟
16 بھین بریزٹ دی کلیسیا بڑی دُور سی ایس لئی حلقے دے نگہبان نے اوہنوں کہیا کہ اوہ اپنے علاقے چ مُنادی کرے تے اپنے گھر چ عبادتاں کرائے۔ شروع شروع بھین بریزٹ نُوں لگیا کہ ایہہ بڑا مشکل کم اے۔ پر اوہنے بھرا دِیاں ہدیتاں تے عمل کیتا۔ اوہ دُوجیاں نُوں خوشخبری سنان لگ پئی، اپنے گھر چ عبادتاں کران لگ پئی تے اپنیاں دِھیاں نال مل کے خاندانی عبادت کرن لگ پئی۔ ایہدا کیہہ نتیجہ نکلیا؟ بھین بریزٹ بوہت سارے لوکاں نُوں بائبل کورس کران دے قابل ہوئی جنہاں وچوں کئیاں نے بپتسمہ وی لے لیا۔ فیر 2005 چ اوہ پہلکار بن گئی۔ یہوواہ تے بھروسا رکھن تے اوہدی تنظیم دا وفادار رہن دی وجہ توں اوہنوں بڑیاں برکتاں ملیاں۔ اوہدیاں دِھیاں وفاداری نال یہوواہ دی خدمت کر رہیاں نیں تے ہُن اوہناں دے علاقے چ دو کلیسیاواں نیں۔ بھین بریزٹ نُوں ایس گل دا پورا یقین اے کہ یہوواہ نے اوہنوں مشکلاں تے گھر والیاں دے طعنے برداشت کرن دی طاقت دِتی۔
یہوواہ تے اوہدی تنظیم دے وفادار رہوو
17. سانوں کیہہ عزم کرنا چاہی دا اے؟
17 شیطان چاہندا اے کہ اَسی ایس گل دا یقین کر لئیے کہ یہوواہ مشکل وقت چ ساڈا ساتھ چھڈ دیندا اے تے جے اَسی اوہدی تنظیم نال جُڑے رہواں گے تے ساڈے تے مشکلاں ای آندیاں رہن گیاں۔ شیطان چاہندا اے کہ اَسی اوس ویلے ڈر کے پچھے ہٹ جائیے جدوں یہوواہ دی تنظیم چ پیشوائی کرن والے بھراواں نُوں بدنام کیتا جاندا اے، اوہناں نُوں اذیت دِتی جاندی اے یاں اوہناں نُوں گرفتار کیتا جاندا اے۔ تے جدوں لوک سانوں بُرا بھلا کہندے نیں یاں طعنے دیندے نیں تے شیطان چاہندا اے کہ اَسی ایس وجہ توں یہوواہ دے اصولاں تے اوہدی تنظیم تے بھروسا کرنا چھڈ دَئیے۔ پر اَسی شیطان دِیاں چالاں توں بےخبر نئیں آں تے اَسی اوہدے دھوکھے چ نئیں آندے۔ (2-کُرنتھیوں 2:11) ایس لئی آؤ، ایہہ عزم کرئیے کہ اَسی شیطان دے جھوٹھ تے یقین نئیں کراں گے سگوں یہوواہ تے اوہدی تنظیم دے وفادار رہواں گے۔ یاد رکھو کہ یہوواہ ساڈا ساتھ کدی نئیں چھڈے گا۔ (زبور 28:7) ایس لئی کسے وی چیز نُوں ایہہ اجازت نہ دَوو کہ اوہ توانوں یہوواہ توں وَکھ کرے۔—رومیوں 8:35-39۔
18. اگلے مضمون چ اَسی کیس بارے گل کراں گے؟
18 ایس مضمون چ اَسی ایہو جہیاں مشکلاں بارے گل کیتی اے جیہڑیاں کلیسیا دے باہروں ساڈے تے آندیاں نیں۔ پر یہوواہ تے اوہدی تنظیم تے ساڈے بھروسے دا اِمتحان اصل چ اوہدوں ہوندا اے جدوں سانوں کلیسیا دے اندر مسئلیاں دا سامنا کرنا پیندا اے۔ اَسی ایہناں مسئلیاں نال کیویں نبڑ سکنے آں؟ اگلے مضمون چ اَسی ایسے بارے گل کراں گے۔
گیت نمبر 34: وفا دی راہ تے چلو
a ایس آخری زمانے چ یہوواہ دا وفادار رہن لئی سانوں اوہدے تے اوہدی تنظیم تے بھروسا کرنا پئے گا۔ پر اِنج کرنا اسان نئیں کیونکہ سانوں بڑیاں مشکلاں دا سامنا کرنا پیندا اے جنہاں دا فائدہ چُک کے شیطان ساڈے ایس بھروسے نُوں توڑن دی کوشش کردا اے۔ ایس مضمون چ اَسی تن ایہو جہیاں مشکلاں تے گل کراں گے جنہاں دا شیطان فائدہ چُک دا اے نالے اَسی ویکھاں گے کہ ایہناں دا مقابلہ کر کے اَسی اوہدیاں کوششاں نُوں ناکام کیویں بنا سکنے آں۔
b ایس مضمون چ کجھ ناں بدل دِتے گئے نیں۔