مطالعے دا مضمون نمبر 46
یہوواہ مشکلاں نُوں برداشت کرن چ ساڈی مدد کردا اے
یہوواہ تیرے تے مہربانی کرن لئی اِنتظار کرے گا تے تیرے تے رحم کرن لئی بلند ہوئے گا۔—یسعیاہ 30:18۔
گیت نمبر 3: تُوں ساڈا سہارا، تُوں ساڈی اُمید
مضمون تے اِک نظر a
1، 2. (الف) ایس مضمون چ اَسی کیہڑے سوالاں تے غور کراں گے؟ (ب) کیہڑی گل توں ظاہر ہوندا اے کہ یہوواہ دی بڑی خواہش اے کہ اوہ ساڈی مدد کرے؟
یہوواہ ساڈی مدد کر سکدا اے تاکہ اَسی اپنی زندگی چ آن والیاں مشکلاں نال نبڑ سکئے تے خوشی نال اوہدی خدمت کر سکئے۔ یہوواہ کیہڑے طریقیاں نال ساڈی مدد کردا اے؟ تے اَسی کیہہ کر سکنے آں تاکہ اَسی یہوواہ وَلّوں مِلن والی مدد توں پورا فائدہ حاصل کر سکئے؟ ایس مضمون چ اَسی ایہناں سوالاں تے غور کراں گے۔ پر اوس توں پہلاں آؤ ایس سوال تے گل کرنے آں کہ کیہہ یہوواہ ساڈی مدد کرن دی خواہش رکھدا اے۔
2 پولُس رسول نے عبرانیوں دے ناں اپنے خط چ اِک ایہو جیہا لفظ استمال کیتا جدے توں سانوں اپنے ایس سوال دا جواب مِل سکدا اے۔ ایس خط چ پولُس نے لکھیا: یہوواہ میرا مددگار اے۔ میں نئیں ڈراں گا، انسان میرا کیہہ وگاڑ سکدا اے؟ (عبرانیوں 13:6) بائبل دی اِک لغت دے مطابق ایس ایت چ لفظ ”مددگار“ اِک ایہو جہے بندے وَل اشارہ کردا اے جیہڑا اوس بندے دی مدد کرن لئی ذرا وی دیر نئیں لاندا جیہڑا مدد لئی پکار دا اے۔ یہوواہ وی بالکل اِنج ای کردا اے۔ اوہ ایہو جہے لوکاں دی مدد کرن چ ذرا وی دیر نئیں لاندا جیہڑے مشکلاں چوں لنگھ رہے نیں۔ ایس گل توں سانوں پکا یقین ہو جاندا اے کہ یہوواہ دی بڑی خواہش اے کہ اوہ ساڈی مدد کرے تے اوہدی مدد نال اَسی مشکلاں نُوں برداشت کر سکاں گے۔
3. یہوواہ کیہڑے تِن طریقیاں نال مشکلاں نُوں برداشت کرن چ ساڈی مدد کردا اے؟
3 یہوواہ کیہڑے تِن طریقیاں نال ساڈی مدد کردا اے تاکہ اَسی مشکلاں نُوں برداشت کر سکئے؟ ایس سوال دا جواب جانن لئی، آؤ یسعیاہ 30 باب دِیاں کجھ ایتاں تے غور کریئے۔ یسعیاہ نے ایس کتاب چ یہوواہ دی پاک روح دی رہنمائی چ جیہڑیاں پیشینگوئیاں لکھیاں اوہناں وچوں کئی اَج خدا دے بندیاں اُتے پوریاں ہوندیاں نیں۔ ایہدے علاوہ یسعیاہ نے یہوواہ بارے دَسدے ہوئیاں اکثر ایہو جہے لفظ استمال کیتے جیہڑے اَسی اسانی نال سمجھ سکنے آں۔ مثال لئی، 30 باب چ اوہنے بڑیاں خوبصورت مثالاں استمال کردے ہوئیاں ایہہ دَسیا کہ یہوواہ اپنے بندیاں دی مدد کیویں کردا اے۔ اوہنے تِن طریقیاں دا ذکر کیتا جنہاں دے ذریعے یہوواہ اپنے بندیاں دی مدد کردا اے۔ (1) اوہ بڑے دھیان نال اپنے بندیاں دِیاں دُعاواں سُن دا اے تے اوہناں دا جواب دیندا اے، (2) اوہ اوہناں دی رہنمائی کردا اے، تے (3) اوہ اوہناں نُوں ہُن وی برکتاں دیندا اے تے مستقبل چ وی برکتاں دَوے گا۔ آؤ، واری واری ایہناں طریقیاں تے غور کریئے۔
یہوواہ ساڈیاں دُعاواں سُن دا اے
4. (الف) یہوواہ نے یسعیاہ نبی دے زمانے دے یہودیاں بارے کیہہ کہیا تے اوہنے کیہہ ہون دِتا؟ (ب) یہوواہ نے اپنے وفادار بندیاں نُوں کیہڑی اُمید دِتی؟ (یسعیاہ 30:18، 19)
4 یسعیاہ 30 باب دے شروع چ یہوواہ نے یہودیاں نُوں باغی منڈُے کہیا جیہڑے گُناہ تے گُناہ کردے نیں۔ اوہنے ایہہ وی کہیا کہ ایہہ باغی لوک نیں جیہڑے شریعت نُوں سُنن توں اِنکار کردے نیں۔ (یسعیاہ 30:1، 9) ایہناں لوکاں نے یہوواہ دی گل سُنن توں اِنکار کر دِتا سی ایس لئی یسعیاہ نبی نے پیشینگوئی کیتی کہ یہوواہ اوہناں نُوں مصیبتاں چوں لنگھن دَوے گا۔ (یسعیاہ 30:5، 17؛ یرمیاہ 25:8-11) تے بالکل اِنج ای ہویا۔ بابلیاں نے یہودیاں نُوں غلام بنا لیا۔ پر اوہناں وچ کجھ ایہو جہے یہودی وی سن جیہڑے یہوواہ دے وفادار سن تے یسعیاہ نے اوہناں نُوں امید دا پیغام دِتا۔ یسعیاہ نے اوہناں نُوں دَسیا کہ اِک دن یہوواہ اوہناں نُوں یروشلیم واپس لے آئے گا۔ (یسعیاہ 30:18، 19 نُوں پڑھو۔) تے بالکل اِنج ای ہویا۔ پر یہوواہ نے اوہناں نُوں بابلیاں دی غلامی توں فوراً آزاد نئیں کرایا۔ جدوں یسعیاہ نبی نے ایہہ گل لکھی کہ ”یہوواہ تواڈے تے مہربانی کرن لئی اِنتظار کرے گا“ تے ایہدے توں پتہ چلیا کہ وفادار یہودیاں نُوں بابلیاں دی غلامی توں آزاد ہون لئی کجھ عرصے تک اِنتظار کرنا پئے گا۔ اصل چ یہودی 70 سال تک بابل دی غلامی چ رہے تے ایہدے بعد کجھ یہودی یروشلیم واپس آئے۔ (یسعیاہ 10:21؛ یرمیاہ 29:10) جدوں یہودی بابل چ غلام سن تے اوہ دُکھ دے مارے روندے سن۔ پر جدوں اوہ یروشلیم واپس آئے تے اوہناں دا دُکھ خوشی چ بدل گیا۔
5. یسعیاہ 30:19 توں سانوں کیہہ تسلی مِلدی اے؟
5 اَج سانوں یسعیاہ 30:19 چ لکھی ایس گل توں بڑی تسلی مِلدی اے: اوہ تیری فریاد دی آواز سُن کے یقیناً تیرے تے رحم فرمائے گا۔ یسعیاہ نبی نے سانوں یقین دَوایا کہ جدوں اَسی پورے دل نال یہوواہ توں مدد دی درخاست کرنے آں تے اوہ ساڈی گل سُن دا اے تے ساڈیاں اِلتجاواں دا فوراً جواب دیندا اے۔ یسعیاہ نبی نے ایہہ وی کہیا: اوہ سُن دے سار ای تینوں جواب دے گا۔ یسعیاہ نبی دی ایس گل توں سانوں تسلی مِلدی اے کہ ساڈا اسمانی باپ اوہناں لوکاں دی مدد کرن دی بڑی خواہش رکھدا اے جیہڑے اوہدے توں مدد دی اِلتجا کردے نیں۔ ایس گل دی وجہ توں اَسی مشکلاں نُوں برداشت کرن دے قابل ہنے آں۔
6. یسعیاہ نبی دی گل توں ایہہ کیویں ظاہر ہوندا اے کہ یہوواہ اپنے ہر بندے دی دُعا سُن دا اے؟
6 یسعیاہ دی گل توں اَسی دُعا بارے کہہ سکھنے آں؟ ایہہ کہ یہوواہ اپنے ہر بندے دی دُعا سن دا اے۔ اَسی ایہہ کیوں کہہ سکنے آں؟ یسعیاہ 30 باب دے شروع چ لفظ ”تُسی“ اِک توں زیادہ لوکاں وَل اشارہ کردے نیں کیونکہ یہوواہ لوکاں دے اِک گروہ نال گل کر رہیا سی۔ پر 19 ایت چ لفظ ”تُوں، تیری، تینوں“ ایس گل وَل اشارہ کردے نیں کہ یہوواہ ہر بندے نال ذاتی طور تے گل کر رہیا سی۔ یسعیاہ نے کہیا: تُوں فیر نئیں روئیں گا۔ اوہ تیری فریاد دی آواز سُن کے یقیناً تیرے تے رحم فرمائے گا۔ اوہ سُن دے سار ای تینوں جواب دَوے گا۔ ساڈا اسمانی باپ یہوواہ سانوں پیار کردا اے۔ اوہ کدی وی اپنے بےحوصلہ پُتراں تے دِھیاں نُوں ایہہ نئیں کہوے گا:”تیرے چ اپنے فلاں بھین یاں بھرا ورگی ہمت ہونی چاہی دی اے۔“ ایہدی بجائے اوہ ساڈے وچوں ہر اِک دا خیال رکھدا اے تے اوہدیاں دُعاواں سُن دا اے۔—زبور 116:1؛ یسعیاہ 57:15۔
جدوں یسعیاہ نبی نے کہیا کہ یہوواہ نُوں آرام نہ کرن دَوو تے ایہدا کیہہ مطلب سی؟ (پیراگراف نمبر 7 نُوں ویکھو۔)
7. یسعیاہ نبی تے یسوع مسیح نے ایہہ کیویں واضح کیتا کہ دُعا کردے رہنا بوہت ضروری اے؟
7 جدوں اَسی کسے ایہو جہے معاملے بارے یہوواہ کولوں دُعا کرنے آں جدی وجہ توں اَسی پریشان آں تے سب توں پہلاں یہوواہ سانوں ہمت دیندا اے تاکہ اَسی اوس مشکل نُوں برداشت کر سکئے۔ پر جے ساڈی مشکل فوراً ختم نئیں ہوندی تے سانوں وار وار یہوواہ کولوں ہمت منگنی چاہی دی اے۔ یہوواہ چاہندا اے کہ اَسی اوہدے کولوں مدد منگئے۔ ایہہ گل یسعیاہ نبی دے ایہناں لفظاں توں صاف پتہ چلدی اے: یہوواہ نُوں آرام نہ کرن دَوو۔ (یسعیاہ 62:7) ایہدا کیہہ مطلب اے؟ ایہدا مطلب اے کہ سانوں یہوواہ کولوں اِنج دُعا کردے رہنا چاہی دا اے جیویں اَسی اوہنوں آرام نئیں کرن دے رہے۔ یسعیاہ دے ایہناں لفظاں توں سانوں لُوقا 11:8-10 تے 13 چ دَسی گئی یسوع دی اوہ مثال یاد آندی اے جیہڑی اوہنے دُعا بارے دِتی سی۔ اوتھے یسوع سانوں کہہ رہیا سی کہ اَسی دُعا چ وار وار اِلتجا کرئیے تے پاک روح منگدے رہیے۔ اَسی یہوواہ کولوں ایہہ درخاست وی کر سکنے آں کہ اوہ چنگے فیصلے کرن چ ساڈی رہنمائی کرے۔
یہوواہ ساڈی رہنمائی کردا اے
8. یسعیاہ 30:20، 21 چ لکھی گل پرانے زمانے چ کیویں پوری ہوئی؟
8 یسعیاہ 30:20، 21 نُوں پڑھو۔ جدوں بابلی فوج نے ڈیڈھ سال تک یروشلیم نُوں گھیر کے رکھیا تے یہودیاں نُوں بڑیاں مشکلاں چوں لنگھنا پیا۔ ایہہ مشکلاں اوہناں دی زندگی دا بالکل اونویں ای حصہ بن گئیاں سن جیویں کہ کھانا تے پینا۔ پر 20 تے 21 ایت چ یہوواہ نے یہودیاں نال وعدہ کیتا کہ جے اوہ توبہ کرن گے تے اپنے آپ نُوں بدلن گے تے اوہ اوہناں نُوں بابلیاں دی غلامی توں آزاد کرائے گا۔ یسعیاہ نبی نے یہوواہ نُوں اوہناں دا عظیم مُعلم یعنی عظیم اُستاد کہیا۔ نالے اوہنے اوہناں نال وعدہ کیتا کہ یہوواہ اوہناں نُوں سکھائے گا کہ اوہ یہوواہ دی عبادت اوہدی مرضی مطابق کیویں کر سکدے نیں۔ ایہہ گل اوس ویلے پوری ہوئی جدوں یہودی بابل دی غلامی توں آزاد ہو گئے۔ اِنج ایہہ ثابت ہو گیا کہ یہوواہ اوہناں دا مُعلم اے تے اوہدی رہنمائی چ یہودی فیر توں صحی طریقے نال اوہدی عبادت شروع کر پائے۔ اَسی بڑے خوش آں کہ یہوواہ ساڈا وی مُعلم اے۔
9. اِک طریقہ کیہہ اے جدے ذریعے یہوواہ ساڈی رہنمائی کردا اے؟
9 ایہناں ایتاں چ لکھے یسعیاہ دے لفظاں توں پتہ چلدا اے کہ اَسی طالبِعلماں وانگوں آں تے دو طریقیاں نال یہوواہ کولوں تلیم حاصل کرنے آں۔ پہلے یسعیاہ نبی نے کہیا:تیریاں اَکھاں اوہنوں ویکھن گیاں۔ ایہہ اِنج ای اے جیویں اِک اُستاد اپنے طالبِعلماں دے سامنے کھلوتا اے۔ ایہہ ساڈے لئی کِنّے شرف دی گل اے کہ اَج اَسی اپنے عظیم مُعلم یعنی یہوواہ توں تلیم حاصل کرنے آں۔ پر یہوواہ سانوں کیویں تلیم دیندا اے؟ اوہ اِنج اپنی تنظیم دے ذریعے کردا اے۔ اَسی یہوواہ دی تنظیم دے بڑے شکرگزار آں کہ اوہ سانوں واضح ہدیتاں دیندی اے۔ نالے عبادتاں، کنونشناں،کتاباں، ویڈیوز تے براڈکاسٹنگ توں جیہڑی تلیم مِلدی اے اوہ مشکلاں نُوں برداشت کرن چ ساڈی مدد کردی اے۔
10. اَسی کیس لحاظ نال اپنے پچھے یہوواہ دی آواز سننے آں؟
10 یہوواہ اِک ہور طریقے نال وی ساڈی رہنمائی کردا اے۔ یسعیاہ نبی نے کہیا: تیرے کن تیرے پچھے ایہہ آواز سنن گے۔ یسعیاہ اصل چ یہوواہ نُوں اِک ایہو جہے استاد وانگوں بیان کر رہیا سی جیہڑا اپنے شاگرداں دے پچھے ٹُردا اے تے اوہناں نُوں دَسدا اے کہ اَگے اوہناں نے کیس راہ تے جانا اے۔ اَج وی یہوواہ ساڈے پچھے کھلو کے سانوں ہدیتاں دیندا اے۔ پر کیویں؟یہوواہ نے اپنیاں گلاں ہزاراں سال پہلاں اپنے کلام چ لکھوا دِتیاں سن۔ اَج جدوں اَسی یہوواہ دِیاں گلاں پڑھنے آں تے اَسی اپنے پچھے اوہدی آواز سُن رہے ہنے آں۔—یسعیاہ 51:4۔
11. سانوں مشکلاں نُوں برداشت کرن لئی کیہہ کرنا چاہی دا اے تے کیوں؟
11 اَسی یہوواہ خدا تے اوہدی تنظیم وَلّوں مِلن والیاں ہدیتاں توں پورا فائدہ حاصل کرن لئی کیہہ کر سکنے آں؟ غور کرو کہ یسعیاہ نبی نے دو گلاں دا ذکر کیتا۔ پہلی ایہہ کہ راہ ایہی اے، تے دُوجی ایہہ کہ ایہدے تے ٹُر۔ (یسعیاہ 30:21) صرف ایہہ پتہ ہونا ای کافی نئیں اے کہ صحی راہ کیہڑی اے سگوں سانوں اوہدے تے ٹُرنا وی چاہی دا اے۔ یہوواہ دے کلام تے اوہدی تنظیم وَلّوں مِلن والیاں وضاحتاں دے ذریعے اَسی سمجھ جانے آں کہ یہوواہ ساڈے توں کیہہ چاہندا اے۔ نالے اَسی ایہہ وی سمجھ جانے آں کہ اَسی سکھیاں ہوئیاں گلاں تے عمل کیوں کر سکنے آں۔ مشکلاں نُوں برداشت کرن تے خوشی نال یہوواہ دی خدمت کرن لئی ضروری اے کہ اَسی ایہہ دونویں کم کرئیے۔ جے اَسی یہوواہ کولوں تلیم حاصل کرنے آں تے اوہناں گلاں تے عمل کرنے آں جیہڑیاں اَسی سکھیاں نیں تے اَسی ایس گل دا یقین رکھ سکنے آں کہ یہوواہ سانوں برکتاں دَوے گا۔
یہوواہ سانوں برکتاں دیندا اے
12. یسعیاہ 30:23-26 دے مطابق یہوواہ نے اپنے بندیاں نُوں کیویں برکت دِتی؟
12 یسعیاہ 30:23-26 نُوں پڑھو۔ ایہہ پیشینگوئی اوہناں یہودیاں تے کیویں پوری ہوئی جیہڑے بابل توں آزاد ہو کے اپنے ملک یروشلیم واپس آئے سن؟ یہوواہ نے اوہناں نُوں بڑیاں برکتاں دِتیاں۔ یہوواہ نے اوہناں دی ہر ضرورت دا خیال رکھیا تاکہ اوہ زندہ رہن تے خوش رہن۔ پر سب توں ودھ کے اوہنے اوہناں نُوں ہر اوہ شے دِتی جیہڑی اوہدے نیڑے رہن تے صحی طریقے نال اوہدی عبادت کرن لئی ضروری سی۔ یہودیاں نُوں اِکو وقت چ اینیاں برکتاں پہلے نئیں ملیاں سن۔ جیویں کہ 26 ایت توں پتہ چلدا اے کہ یہوواہ نے اپنے کلام دے علم دی روشنی نُوں بوہت ودھا دِتا۔ (یسعیاہ 60:2) یہوواہ دِیاں برکتاں دی وجہ توں اوہدے بندیاں نُوں ہمت ملی کہ اوہ دل دی خوشی نال اوہدی خدمت کردے رہن۔—یسعیاہ 65:14۔
13. صحی طرحاں یہوواہ دی عبادت کرن بارے پیشینگوئی اَج ساڈے زمانے چ کیویں پوری ہو رہی اے؟
13 کیہہ صحی طرحاں یہوواہ دی عبادت کرن بارے پیشینگوئی اَج ساڈے زمانے چ پوری ہو رہی اے؟ جی بالکل۔ پر کیویں؟ 1919 توں لے کے ہُن تک لکھاں لوکاں نُوں وڈے بابل یعنی جھوٹھے مذہب دی غلامی توں آزادی ملی اے۔ اوہناں نُوں اوس جگہ توں وی زیادہ بہتر جگہ ملی اے جیہڑی یہوواہ نے بنیاِسرائیل نُوں دِتی سی۔ یہوواہ اوہناں نُوں روحانی فردوس چ لے آیا اے۔ (یسعیاہ 51:3؛ 66:8) پر روحانی فردوس کیہہ اے؟
14. روحانی فردوس کیہہ اے تے اَج ایس فردوس چ کون رہ رہے نیں؟ (اِصطلاح دی وضاحت نُوں ویکھو۔)
14 سن 1919 توں روح نال مسح کیتے ہوئے مسیحی روحانی فردوس چ رہ رہے نیں۔ b پر وقت دے نال نال مسیح دِیاں ہور بھیڈاں یعنی اوہناں لوکاں نُوں وی ایس فردوس چ رہن دا موقع ملیا اے جیہڑے زمین تے ہمیشاں دی زندگی پان دی امید رکھدے نیں۔ ایس روحانی فردوس چ رہ کے اوہ یہوواہ وَلّوں مِلن والیاں برکتاں توں فائدہ حاصل کر رہے نیں۔—یوحنا 10:16؛ یسعیاہ 25:6، 65:13۔
15. روحانی فردوس کتھے وے؟
15 اَج روحانی فردوس کتھے وے؟ یہوواہ دے بندے دُنیا دے فرق فرق حصیاں چ رہندے نیں۔ ایس لئی جتھے یہوواہ دے بندے نیں، اوتھے روحانی فردوس وی اے۔ اَسی دُنیا دے بھانویں جیہڑے وی حصے چ رہندے ہوئیے، اَسی روحانی فردوس دا حصہ بن سکنے آں۔ پر ایہہ صرف اوہدوں ای ہوئے گا جدوں اَسی پورے دل نال یہوواہ دی عبادت کراں گے۔
روحانی فردوس دی خوبصورتی نُوں ودھان لئی ساڈے وچوں ہر اِک نُوں کیہہ کرنا چاہی دا اے؟ (پیراگراف نمبر 17،16 نُوں ویکھو۔)
16. اَسی کیہہ کر سکنے آں تاکہ ساڈی نظر روحانی فردوس دی خوبصورتی تے رہوے؟
16 روحانی فردوس چ رہن لئی ایہہ وی ضروری اے کہ اَسی دُنیا بھر چ موجود ساڈیاں کلیسیاواں لئی قدر ظاہر کردے رہیے۔ پر اَسی اِنج کیویں کر سکنے آں؟ سانوں اپنی نظر روحانی فردوس دی خوبصورتی تے رکھنی چاہی دی اے نہ کہ ایہدے چ رہن والیاں دِیاں غلطیاں تے۔ (یوحنا 17:20، 21) اِنج کرنا ضروری کیوں اے؟ ذرا ایس گل تے غور کرو کہ جدوں اَسی کسے باغ چ جانے آں تے سانوں پتہ ہوندا اے کہ اوتھے فرق فرق قسم دے درخت نیں تے سانوں اوہناں نُوں ویکھ کے چنگا لگدا اے۔ ساڈے کلیسیا دے بھین بھرا وی اِک طرحاں اوہناں درختاں وانگوں نیں تے اوہناں دی شخصیت اِک دُوجے توں فرق اے۔ (یسعیاہ 44:4؛ 61:3) ایس لئی ایہہ بوہت ضروری اے کہ اَسی درختاں دِیاں خامیاں تے دھیان دین دی بجائے اپنی نظر باغ دی خوبصورتی تے رکھئے۔ ایسے طرحاں سانوں اپنیاں یاں دُوجیاں دِیاں خامیاں ویکھن دی بجائے اپنا دھیان اوس خوبصورت ایکے تے رکھنا چاہی دا اے جیہڑا دُنیا بھر دِیاں ساڈیاں کلیسیاواں چ وے۔
17. ساڈے وچوں ہر اِک نُوں کیہہ کرنا چاہی دا اے تاکہ ساڈی کلیسیا دا ایکا قائم رہوے؟
17 ساڈے وچوں ہر اِک نُوں کیہہ کرنا چاہی دا اے تاکہ ساڈی کلیسیا دا ایکا قائم رہوے؟ سانوں صلحپسند بننا چاہی دا اے۔ (متی 5:9؛ رومیوں 12:18) جدوں اَسی کلیسیا دے بھین بھراواں نال صلح کرن چ پہل کرنے آں تے اَسی روحانی فردوس دی خوبصورتی نُوں ودھا رہے ہنے آں۔ سانوں یاد رکھنا چاہی دا اے کہ یہوواہ ساڈے وچوں ہر اِک نُوں ایس روحانی فردوس چ لیایا اے تاکہ اَسی صحی طریقے نال اوہدی عبادت کر سکئے۔ (یوحنا 6:44) ذرا سوچو کہ یہوواہ ایہہ ویکھ کے کِنّاں خوش ہوندا ہوئے گا کہ اَسی اوہدے بندیاں چ امن تے ایکے نُوں قائم رکھن لئی کِنّی محنت کر رہے آں۔—یسعیاہ 26:3؛ حجی 2:7۔
18. سانوں کیہڑی گل تے سوچوچار کردے رہنا چاہی دا اے تے کیوں؟
18 یہوواہ نے اپنے بندیاں نُوں بوہت ساریاں چنگیاں چیزاں دِتیاں نیں۔ پر اَسی ایہناں چیزاں توں پورا فائدہ حاصل کرن لئی کیہہ کر سکنے آں؟ اَسی بائبل چوں تے ساڈیاں کتاباں تے ویڈیوز چوں جو کجھ وی پڑھنے آں یاں ویکھنے آں، سانوں اوہدے تے گہرائی نال سوچوچار کرنا چاہی دا اے۔ اِنج کرن نال اَسی اپنے اندر ایہو جہیاں خوبیاں پیدا کر سکاں گے جیہڑیاں کلیسیا چ اِک دُوجے نُوں بھین بھراواں وانگوں پیار کرن لئی ضروری نیں۔ (رومیوں 12:10) جدوں اَسی اوہناں برکتاں تے سوچوچار کرنے آں جیہڑیاں ہُن یہوواہ سانوں دے رہیا اے تے اوہدے نال ساڈی دوستی پکی ہوندی اے۔ تے جدوں اَسی اوہناں برکتاں بارے سوچنے آں جیہڑیاں یہوواہ سانوں مستقبل چ دَوے گا تے ساڈا ایہہ عزم ہور وی پکا ہو جاندا اے کہ اَسی ہمیشاں تک اوہدی عبادت کردے رہواں گے۔ ایہہ ساریاں گلاں ہُن وی خوشی نال یہوواہ دی خدمت کرن چ ساڈے بڑے کم آن گیاں۔
مشکلاں نُوں برداشت کرن دا عزم کرو
19. (الف) یسعیاہ 30:18 دے مطابق اَسی کیہڑی گل دا پکا یقین رکھ سکنے آں؟ (ب) کیہڑی چیز مشکلاں نُوں برداشت کرن چ ساڈی مدد کرے گی؟
19 ایس بھیڑی دُنیا نُوں ختم کرن لئی یہوواہ ساڈی خاطر اُٹھ کھلوئے گا۔ (یسعیاہ 30:18) اَسی ایس گل دا پکا یقین رکھ سکنے آں کہ یہوواہ اِنصاف کرن والا خدا اے تے اوہ شیطان دی بھیڑی دُنیا نُوں دیر تک برداشت نئیں کرے گا۔ (یسعیاہ 25:9) یہوواہ وانگوں اَسی وی صبر نال اوس وقت دا اِنتظار کر رہے آں جدوں شیطان دی دُنیا ختم ہو جائے گی۔ پر جدوں تک اوہ وقت نئیں آندا ساڈا عزم اے کہ اَسی دُعا کرن دے شرف دی قدر کردے رہواں گے، بائبل پڑھدے تے ایہدے چ لکھیاں گلاں تے عمل کردے رہواں گے تے یہوواہ وَلّوں مِلن والیاں برکتاں تے سوچوچار کردے رہواں گے۔ جدوں اَسی اِنج کراں گے تے یہوواہ ساڈی مدد کرے گا کہ اَسی مشکلاں نُوں برداشت کرئیے تے خوشی نال اوہدی عبادت کردے رہیے۔
گیت نمبر 145: نوِیں دُنیا دا وعدہ
a ایس مضمون چ اَسی تِن ایہو جہے طریقیاں تے غور کراں گے جنہاں دے ذریعے یہوواہ مشکلاں نُوں برداشت کرن چ اپنے بندیاں دی مدد کردا اے۔ ایہناں طریقیاں بارے جانن لئی اَسی یسعیاہ 30 باب تے غور کراں گے۔ ایس باب دے ذریعے اَسی ویکھ سکاں گے کہ ایہہ کیوں ضروری اے کہ اَسی یہوواہ کولوں دُعا کرئیے، بائبل پڑھئے تے ایس گل تے سوچوچار کرئیے کہ یہوواہ ہُن ساڈے لئی کیہہ کر رہیا اے تے اوہ مستقبل چ ساڈے لئی کیہہ کجھ کرے گا؟
b اِصطلاح دی وضاحت: روحانی فردوس اِک ایہو جیہا ماحول اے جیہڑا بوہت ای محفوظ اے تے جِتھے اَسی اِک مُٹھ ہو کے یہوواہ دی عبادت کرنے آں۔ ایتھے سانوں بوہت زیادہ روحانی کھانا مِل رہیا اے جیہڑا جھوٹھے مذہبی عقیدیاں توں پاک اے۔ اَسی لوکاں نُوں خدا دی بادشاہی دی خوشخبری سُنا رہے آں جدے توں سانوں بڑی خوشی مِلدی اے۔ یہوواہ نال ساڈی گُوڑھی دوستی اے تے اَسی اپنے بھین بھراواں نال امن تے صلح نال رہ رہے آں جیہڑے مشکلاں نُوں برداشت کرن چ ساڈی مدد کردے نیں۔ اَسی روحانی فردوس چ اوہدوں داخل ہو جانے آں جدوں اَسی صحی طریقے نال یہوواہ دی عبادت کرنا شروع کرنے آں تے اوہدی مثال تے عمل کرن دی پوری کوشش کرنے آں۔
