مطالعے دا مضمون نمبر 45
یہوواہ مُنادی کردے رہن چ ساڈی مدد کیویں کردا اے؟
پر اوہناں نُوں ایہہ ضرور پتہ لگ جاوے گا کہ اوہناں وچ اِک نبی ہوندا سی۔—حِزقیایل 2:5۔
گیت نمبر 61: رب دے خادمو اَگے ودھو
مضمون تے اِک نظر a
1. سانوں کیس گل دی توقع اے پر کیس گل دا پکا یقین اے؟
مُنادی کردے ویلے سانوں ایس گل دی توقع ہوندی اے کہ لوک ساڈی مخالفت کرن گے۔آن والے ویلے چ ایہہ مخالفت شاید ہور وی ودھ جائے۔ (دانیایل 11:44؛ 2-تیمُتھیُس 3:12؛ مکاشفہ 16:21) پر سانوں ایس گل دا پکا یقین اے کہ یہوواہ ساڈی مدد ضرور کرے گا۔ پر اَسی ایہہ کیوں کہہ سکنے آں؟کیونکہ یہوواہ نے ہمیشاں اپنے بندیاں دی مدد کیتی اے تاکہ اوہ اوکھی توں اوکھی ذمےداری نُوں وی پورا کر سکن۔ مثال لئی، آؤ اَسی حِزقیایل دی زندگی دے کجھ واقعیاں تے غور کر ئیے جنہے بابل چ غلام یہودیاں نُوں مُنادی کیتی۔
2. (الف) یہوواہ نے اوہناں لوکاں بارے کیہہ دَسیا جنہاں نُوں حِزقیایل نے مُنادی کرنی سی؟ (حِزقیایل 2:3-6) (ب) ایس مضمون چ اَسی کیہڑیاں گلاں تے غور کراں گے؟
2 حِزقیایل نے کیہو جہے لوکاں چ مُنادی کرنی سی؟ یہوواہ نے اوہناں لوکاں بارے کہیا کہ اوہ ڈھیٹھ، پتھر دل تے باغی نیں۔ اوہ لوک کنڈیاں وانگوں تیز تے بچھوؤاں وانگوں زہریلے سن۔ ایس لئی یہوواہ نے حِزقیایل نُوں وار وار کہیا کہ اوہ اوہناں توں نہ ڈرے۔ (حِزقیایل 2:3-6 نُوں پڑھو۔) حِزقیایل ایہناں تن گلاں دی وجہ توں لوکاں نُوں یہوواہ دا پیغام سُنا پایا۔ (1) یہوواہ نے اوہنوں گھلیا سی، (2) یہوواہ نے اپنی پاک روح دے ذریعے اوہنوں طاقت دِتی سی، تے (3) یہوواہ دے کلام نے اوہدے ایمان نُوں مضبوط کیتا سی۔ایہناں تن گلاں نے حِزقیایل دی مدد کیویں کیتی؟ تے ایہہ اَج ساڈی مدد کیویں کردیاں نیں؟
حِزقیایل نُوں یہوواہ نے گھلیا سی
3. (الف) کیس گل توں حِزقیایل دا حوصلہ ودھیا ہوئے گا؟ (ب) یہوواہ نے حِزقیایل نُوں ایہہ یقین کیویں دَوایا کہ اوہ اوہدے نال اے؟
3 یہوواہ نے حِزقیایل نُوں کہیا کہ میں تینوں گھل رہیا واں۔ (حِزقیایل 2:3، 4) ایس گل توں حِزقیایل دا حوصلہ ضرور ودھیا ہوئے گا۔ پر کیوں؟ شاید اوہنوں یاد آیا ہوئے گا کہ ایہی گل یہوواہ نے موسیٰ تے یسعیاہ نُوں گھل دے ویلے وی کہی سی۔ (خروج 3:10؛ یسعیاہ 6:8) حِزقیایل ایہہ وی جان دا سی کے یہوواہ نے مشکلاں نال نبڑن چ اپنے ایہناں نبیاں دی مدد کیویں کیتی سی۔ یہوواہ نے اوہنوں دو وار کہیا کہ میں تینوں گھل رہیا واں ایس لئی حِزقیایل نُوں پکا یقین سی کہ یہوواہ اوہدی مدد ضرور کرے گا۔ حِزقیایل نے کئی وار کہیا: یہوواہ دا کلام میرے تے نازل ہویا۔ (حِزقیایل 3:16) ایہناں گلاں توں پتہ لگدا اے کہ حِزقیایل نُوں ذرا وی شک نئیں سی کہ یہوواہ نے اوہنوں گھلیا اے۔ (حِزقیایل 6:1) ایہدے علاوہ حِزقیایل اِک کاہن دا پُتر سی تے اوہدے پیو نے اوہنوں سکھایا ہوئے گا کہ یہوواہ نے پچھلے وقتاں چ کیویں اپنے نبیاں دی مدد کیتی۔ یہوواہ نے اِضحاق، یعقوب تے یرمیاہ نُوں کہیا سی: میں تیرے نال آں۔—پیدایش 26:24؛ 28:15؛ یرمیاہ 1:8۔
4. کیس گل نے حِزقیایل دی ہمت ودھائی ہوئے گی؟
4 یہوواہ نے حِزقیایل نُوں پہلاں توں دَس دِتا سی کہ زیادہتر اِسرائیلی اوہدا پیغام سُن کے کیہہ کرن گے۔ یہوواہ نے اوہنوں کہیا سی: اِسرائیلی تیری گل نئیں سنن گے کیونکہ اوہ میری سننا نئیں چاہندے۔ (حِزقیایل 3:7) حِزقیایل نُوں ردّ کرن نال اصل چ اوہ یہوواہ نُوں رد کر رہے سن۔ یہوواہ دی ایس گل توں حِزقیایل نُوں ایہہ حوصلہ ملیاِ ہوئے گا کہ جہے لوک اوہنوں قبول نئیں کرن گے تے ایہدا ایہہ مطلب نئیں کہ اوہ اِک نبی دے طور تے اپنی ذمےداری نبھان چ ناکام ہو گیا اے۔ یہوواہ نے اوہنوں ایہہ یقین وی دَوایا کہ سزا دا جیہڑا پیغام اوہ سُنا رہیا سی جدوں اوہ پورا ہوئے گا تے لوکاں نُوں پتہ لگ جائے گا کہ اوہناں وچ اِک نبی ہوندا سی۔ (حِزقیایل 2:5؛ 33:33) ایہدے چ کوئی شک نئیں کہ ایہناں گلاں توں حِزقیایل نُوں اپنی ذمےداری نُوں پوری کرن دی طاقت ملی ہوئے گی۔
سانوں یہوواہ نے گھلیا اے
حِزقیایل دے زمانے وانگوں لوک اَج وی ساڈا پیغام نئیں سُن دے تے ساڈی مخالفت کردے نیں۔ پر سانوں پتہ اے کہ یہوواہ ساڈے نال اے۔ (پیراگراف نمبر 5، 6 نُوں ویکھو۔)
5. یسعیاہ 44:8 دے مطابق سانوں کیس گل توں ہمت مِلدی اے؟
5 سانوں وی ایس گل توں ہمت مِلدی اے کہ سانوں یہوواہ نے مُنادی کرن لئی گھلیا اے۔ یہوواہ نے سانوں اپنا گواہ کہہ کے بوہت عزت دِتی اے۔ (یسعیاہ 43:10) ایہہ ساڈے لئی کِنّاں وڈا شرف اے۔ یہوواہ نے حِزقیایل نُوں کہیا سی: تُوں اوہناں توں نہ ڈرِیں تے اَج اوہ سانوں وی ایہی کہندا اے۔ پر سانوں اپنے مخالفاں توں کیوں نئیں ڈرنا چاہی دا؟ کیونکہ حِزقیایل وانگوں سانوں وی یہوواہ نے گھلیا اے تے اوہ ساڈے نال اے۔—یسعیاہ 44:8 نُوں پڑھو۔
6. (الف) یہوواہ سانوں کیویں یقین دَواندا اے کہ اوہ ساڈے نال اے؟ (ب) سانوں کیہڑی گل توں ہمت تے تسلی مِلدی اے؟
6 یہوواہ سانوں یقین دَواندا اے کہ اوہ ساڈے نال اے۔مثال لئی، ایہہ کہن توں پہلاں کہ تُسی میرے گواہ او یہوواہ نے کہیا: جدوں تُوں سیلاب چوں لنگھیں گا تے میں تیرے نال ہوواں گا تے جدوں توں ندیاں نُوں پار کریں گا تے اوہ تینوں نئیں ڈُبون گیاں۔ (یسعیاہ 43:2) مُنادی کردے ویلے ساڈے سامنے ایہو جہیاں رکاوٹاں تے مشکلاں آ سکدیاں نیں جیہڑیاں سیلاب یاں اَگ ورگیاں ہوندیاں نیں۔پر فیر وی اَسی یہوواہ دی مدد نال مُنادی کردے رہنے آں۔ (یسعیاہ 41:13) حِزقیایل دے زمانے وانگوں اَج وی بوہت سارے لوک ساڈا پیغام نئیں سُن دے۔ پر اَسی ایہہ یاد رکھ سکنے آں کہ جے لوک ساڈے پیغام نُوں ردّ کردے نیں تے ایہدا ایہہ مطلب نئیں کہ اَسی یہوواہ بارے گواہی دین چ ناکام ہو گئے آں۔ سانوں ایس گل توں بڑی ہمت تے تسلی مِلدی اے کہ جدوں اَسی وفاداری نال لوکاں نُوں یہوواہ دا پیغام سُناندے رہنے آں تے یہوواہ وی ساڈے توں بوہت خوش ہوندا اے۔ (1-کُرنتھیوں 3:8؛ 4:1، 2) اِک بھین جیہڑی بوہت سالاں توں پہل کار اے کہندی اے: مینوں ایہہ سوچ کے بڑی خوشی مِلدی اے کہ یہوواہ سانوں ساڈی محنت دا اَجر دیندا اے۔
یہوواہ نے اپنی پاک روح دے ذریعے حِزقیایل نُوں طاقت دِتی
حِزقیایل نے رویا چ یہوواہ دا اسمانی رتھ ویکھیا جدے توں ایس گل تے اوہدا یقین مضبوط ہو گیا کہ اپنی ذمےداری پوری کرن چ یہوواہ اوہدی مدد کرے گا۔ (پیراگراف نمبر 7 نُوں ویکھو۔)
7. جدوں وی حِزقیایل نے اوس رویا تے غور کیتا جیہڑی اوہنے ویکھی سی تے ایہدا اوہدے تے کیہہ اثر ہویا ہوئے گا؟ (پہلے صفحے دی تصویر نُوں ویکھو۔)
7 حِزقیایل نے ویکھیا سی کے یہوواہ دی پاک روح کِنّی طاقتور اے۔ رویا چ اوہنے ویکھیا کہ یہوواہ دی پاک روح طاقتور فرشتیاں تے اثر کر رہی اے تے بوہت ای وڈے اسمانی رتھ نُوں چلا رہی اے۔ (حِزقیایل 1:20، 21) ایہہ سب ویکھ کے اوہدے تے کیہہ اثر ہویا؟ اوہنے دَسیا: ایہہ ویکھدے ای میں موُنہہ بھار ڈِگ پیا۔ (حِزقیایل 1:28) حِزقیایل بوہت ای حیران ہو گیا۔ بعد چ اوہنے جدوں وی ایس رویا تے غور کیتا ہوئے گا تے ضرور اوہدا حوصلہ ودھیا ہوئے گا کہ یہوواہ دی پاک روح دی مدد نال اوہ اپنی ذمے داری نُوں پورا کر سکدا اے۔
8، 9. (الف) یہوواہ دے حکم دا حِزقیایل تے کیہہ اثر ہویا؟ (ب) ڈھیٹھ لوکاں نُوں مُنادی کرن بارے یہوواہ نے حِزقیایل دا حوصلہ کیویں ودھایا؟
8 یہوواہ نے حِزقیایل نُوں حکم دِتا: اے آدمزاد اپنے پیراں تے کھلو تاکہ میں تیرے نال گل کراں۔ ایس حکم تے پاک روح دی مددنال حزقیایل چ کھلون دی طاقت آ گئی۔ حزقی ایل نے لکھیا: جدوں اوہنے مینوں ایہہ کہیا تے روح میرے چ آئی تے میں پیراں تے کھلو گیا۔ (حِزقیایل 2:1، 2) بعد چوں ساری زندگی مُنادی کردے ویلے حِزقیایل نے یہوواہ دے ہتھ یعنی اوہدی پاک روح نُوں محسوس کیتا۔ (حِزقیایل 3:22؛ 8:1؛ 33:22؛ 37:1؛ 40:1) یہوواہ دی پاک روح دی مدد نال حِزقیایل ایہو جہے لوکاں نُوں مُنادی کر سکیا جیہڑے ڈھیٹھ تے پتھر دل سن۔ (حِزقیایل 3:7) یہوواہ نے حِزقیایل نُوں کہیا: میں اوہناں دے چہریاں دے مقابلے چ تیرا چہرا تے اوہناں دے متھیاں دے مقابلے چ تیرے متھے نُوں سخت کر دِتا اے۔ میں تیرے متھے نُوں ہیرے وانگوں تے چقماق دے پتھر نالوں بوہتا سخت کر دِتا اے۔ اوہناں توں نہ ڈر تے اوہناں دا موُنہہ ویکھ کے خوف چ نہ آ۔ (حِزقیایل 3:8، 9) اِک لحاظ نال یہوواہ، حِزقیایل نُوں کہہ رہیا سی کہ لوکاں دے ڈھیٹھ ہون دی وجہ توں بےحوصلہ نہ ہووِیں، میں تینوں ہمت دَواں گا۔
9 بعد چ یہوواہ دی پاک روح مُنادی کرن چ حِزقیایل دی مدد کردی رہی۔ حِزقیایل نے کہیا: یہوواہ دا ہتھ پورے زور نال میرے اُتے ٹھہریا ہویا سی۔ (حِزقیایل 3:14، 15) پورے یقین نال لوکاں نُوں یہوواہ دا پیغام سُنان لئی حِزقیایل نُوں آپ اوس پیغام نُوں چنگی طرحاں سکھنا تے سمجھنا سی۔ ایہدے چ اوہنوں پورا اِک ہفتہ لگ گیا۔ (حِزقیایل 3:14، 15) ایہدے بعد یہوواہ نے اوہنوں اِک میدان چ جان لئی کہیا جِتھے پاک روح اوہدے چ داخل ہوئی۔ (حِزقیایل 3:23، 24) حِزقیایل اپنی خدمت شروع کرن لئی ہُن بالکل تیار سی۔
یہوواہ اپنی پاک روح دے ذریعے سانوں طاقت دیندا اے
کیہڑیاں گلاں ساڈی مدد کر سکدیاں نیں تاکہ حِزقیایل وانگوں اَسی وی مُنادی کر دے رہیے؟ (پیراگراف نمبر 10 نُوں ویکھو۔)
10. مُنادی کردے رہن لئی سانوں کیس چیز دی ضرورت اے تے کیوں؟
10 مُنادی دا کم کردے رہن لئی سانوں کیس چیز دی ضرورت اے؟ ایس گل دا جواب جانن لئی ذرا سوچو کہ حِزقیایل نال کیہہ ہویا سی؟ ایس توں پہلاں کہ حِزقیایل نے مُنادی دا کم شروع کیتا یہوواہ نے اپنی پاک روح دے ذریعے اوہنوں ایہہ کم کرن دی طاقت دِتی۔ حِزقیایل وانگوں اَج اَسی وی یہوواہ دی پاک روح دی مدد نال ای مُنادی کر سکنے آں۔ اَسی ایہہ کیوں کہہ سکنے آں؟ کیونکہ ایس کم نُوں روکن لئی شیطان ساڈے خلاف جنگ لڑ رہیا اے۔ (مکاشفہ 12:17) جے انسانی نظر نال ویکھیا جائے تے شیطان دی طاقت اَگے ساڈی طاقت کجھ وی نئیں اے۔ پر مُنادی دا کم کرن نال اَسی شیطان نُوں ہرا رہے ہنے آں۔ پر کیس طرحاں؟ جدوں اَسی مُنادی کرنے آں تے اَسی ثابت کرنے آں کہ اَسی شیطان دِیاں دھمکیاں توں نئیں ڈردے۔ (مکاشفہ 12:9-11) ہر وار جدوں اَسی مُنادی کرن جانے آں تے شیطان دی ہار ہوندی اے۔ فیر مخالفت دے باوجود مُنادی کرن نال سانوں کیس گل دا یقین ہو جاندا اے؟ ایس گل دا یقین کہ یہوواہ اپنی پاک روح دے ذریعے سانوں طاقت دے رہیا اے تے اوہ ساڈے توں خوش اے۔—متی 5:10-12؛ 1-پطرس 4:14۔
11. (الف) یہوواہ دی پاک روح ساڈے لئی کیہہ کرے گی؟ (ب) اَسی کیہہ کر سکنے آں تاکہ سانوں پاک روح مِلدی رہوے؟
11 جدوں اَسی ایس گل تے غور کرنے آں کہ یہوواہ نے حِزقیایل دے چہرے تے متھے نُوں سخت کر دِتا تے سانوں ہور کیہڑی گل دی ہمت مِلدی اے؟ مُنادی کردے ویلے بھانویں سانوں جنیاں وی وڈیاں مشکلاں دا سامنا ہوندا اے، یہوواہ اپنی پاک روح دے ذریعے سانوں اونی ای زیادہ طاقت دیندا اے۔ (2-کُرنتھیوں 4:7-9) تے فیر اَسی کیہہ کر سکنے آں تاکہ سانوں یہوواہ دی پاک روح مِلدی رہوے؟ سانوں ایہدے لئی دُعا کردے رہنا چاہی دا اے تے ایس گل دا یقین رکھنا چاہی دا اے کہ یہوواہ ساڈیاں دُعاواں نُوں ضرور سنے گا۔ یسوع مسیح نے اپنے شاگرداں نُوں کہیا سی: ”منگدے رہوو، لبھدے رہوو، دروازہ کھڑکاندے رہوو۔“ جے اَسی اِنج کراں گے تے یہوواہ سانوں اپنی پاک روح دَوے گا۔—لُوقا 11:9، 13؛ اعمال 1:14؛ 2:4۔
یہوواہ دے کلام نے حِزقیایل دے ایمان نُوں مضبوط کیتا
12. حِزقیایل 2:9–3:3 دے مطابق حِزقیایل نُوں طومار کتھوں ملیا سی تے اوہدے چ کیہہ لکھیا سی؟
12 یہوواہ نے نہ صرف حِزقیایل نُوں اپنی پاک روح دے ذریعے طاقت دِتی سگوں اوہنے اپنے کلام دے ذریعے اوہدے ایمان نُوں مضبوط وی کیتا۔ رویا چ حِزقیایل نے اِک ہتھ ویکھیا جنہے طومار پھڑیا ہویا سی۔ (حِزقیایل 2:9–3:3 نُوں پڑھو۔) ایہہ طومار کتھوں آیا سی تے ایہدے چ کیہہ لکھیا سی؟ ایس طومار دے ذریعے حِزقیایل دا ایمان کیویں مضبوط ہویا؟ ایہہ طومار یہوواہ وَلّوں آیا سی۔ ایہہ طومار دین لئی یہوواہ نے شاید اوہناں چار فرشتیاں چوں کسے اِک نُوں استمال کیتا جنہاں نُوں حِزقیایل نے پہلاں وی ویکھیا سی۔ (حِزقیایل 1:8؛ 10:7، 20) ایس طومار چ اوہناں باغی یہودیاں لئی یہوواہ وَلّوں سزا دا پیغام سی جیہڑے بابل چ غلام سن۔ (حِزقیایل 2:7) ایہہ پیغام طومار دے اَگے تے پچھے دونواں پاسے لکھیا ہویا سی۔
13. یہوواہ نے حِزقیایل نُوں طومار نال کیہہ کرن لئی کہیا تے ایہہ طومار مٹھا کیوں سی؟
13 یہوواہ نے حِزقیایل نُوں کہیا کہ اوہ طومار کھا لوَے تے اوہدے نال اپنا ٹیڈ بھر لوَے۔ یہوواہ دی گل من دے ہوئیاں حِزقیایل نے پورا طومار کھا لیا۔ رویا دے ایس حصے دا کیہہ مطلب سی؟ ایہدا مطلب ایہہ سی کہ حِزقیایل نے پہلاں آپ اوس پیغام نُوں چنگی طرحاں سمجھنا سی جیہڑا اوہنے دُوجیاں نُوں سُنانا سی۔ ایہہ بڑا ضروری سی کہ ایہہ پیغام پہلاں اوہدے اپنے دل تے اثر کرے۔ جدوں حِزقیایل نے ایہہ طومار کھادا تے اِک بڑی حیرانی دی گل ہوئی۔ اوہنوں ایہہ طومار شہد وانگوں مٹھا لگیا۔ (حِزقیایل 3:3) اوہنوں ایہہ مٹھا کیوں لگیا؟ کیونکہ حِزقیایل لئی یہوواہ وَلّوں پیغام سُنان دا شرف شہد وانگوں مٹھا سی۔ (زبور 19:8-11) اوہ ایس گل لئی یہوواہ دا دِلوں شکر گزار سی کہ اوہنے اوہنوں اپنا نبی چُنیا اے۔
14. کیہڑی چیز نے حِزقیایل دی مدد کیتی تاکہ اوہ یہوواہ وَلّوں مِلن والی ذمےداری نُوں قبول کر لوَے؟
14 بعد چ یہوواہ نے حِزقیایل نُوں کہیا: میریاں ساریاں گلاں نُوں جیہڑیاں میں تینوں کہنا واں دِلوں قبول کر تے اپنے کناں نال سُن۔ (حِزقیایل 3:10) ایہہ پیغام دین نال اصل چ یہوواہ حِزقیایل نُوں کہہ رہیا سی کہ اوہ طومار چ لکھے پیغام نُوں چنگی طرحاں یاد کر لوَے تے ایہدے تے سوچوچار کرے۔ جدوں حِزقیایل نے اِنج کیتا تے اوہدا ایمان مضبوط ہویا تے اوہ سمجھ گیا کہ اوہنے کیہڑا زبردست پیغام سُنانا اے۔ (حِزقیایل 3:11) جدوں حِزقیایل پیغام نُوں چنگی طرحاں سمجھ گیا تے اوہنوں پورا یقین ہو گیا کہ ہُن اوہ پورے ایمان تے جوش نال مُنادی دا کم کرن لئی تیار اے۔—زبور 19:14 تے غور کرو۔
یہوواہ ہ دا کلام ساڈے ایمان نُوں مضبوط کردا اے
15. سانوں کیہڑی چیز نُوں دِلوں قبول کرنا چاہی دا اے تاکہ اَسی ہمت ہارے بغیر مُنادی کردے رہیے؟
15 جے اَسی چاہنے آں کہ اَسی مُنادی کرن چ ہمت نہ ہاریئے تے سانوں وی خدا دے کلام دے ذریعے اپنے ایمان نُوں مضبوط کر دے رہنا چاہی دا اے۔ سانوں یہوواہ دِیاں ساریاں گلاں نُوں دِلوں قبول کرنا چاہی دا اے۔ اَج یہوواہ ساڈے نال اپنے کلام بائبل دے ذریعے گل کردا اے۔ اَسی کیہہ کر سکنے آں تاکہ خدا دا کلام ساڈی سوچ،جذباتاں تے کماں تے اثر کر دا رہوے؟
16. (الف) سانوں خدا دے کلام توں فائدہ چُکن لئی کیہہ کرنا چاہی دا اے؟ (ب) اَسی خدا دے کلام دِیاں گلاں نُوں اپنے دل چ کیویں بٹھا سکنے آں؟
16 جیویں کھانا کھان تے ایہنوں ہضم کرن نال ساڈا جسم مضبوط ہوندا اے اونویں ای خدا دا کلام پڑھن تے ایہدے تے سوچوچار کرن نال ساڈا ایمان مضبوط ہوندا اے۔ طومار والی رویا توں اَسی ایہی سبق سکھنے آں۔ یہوواہ چاہندا اے کہ اَسی اوہدے کلام نال اپنا ٹیڈھ بھر لئیے یعنی ایہنوں چنگی طرحاں سمجھئے۔ اَسی دُعا کرن، بائبل پڑھن تے ایہدے تے سوچوچار کرن نال اِنج کر سکنے آں۔ پہلاں سانوں دُعا کرنی چاہی دی اے تاکہ اَسی خدا دِیاں گلاں نُوں قبول کر سکئے۔ فیر سانوں بائبل پڑھنی چاہی دی اے تے ایہدے بعد گہرائی نال ایہدے چ لکھیاں گلاں تے سوچوچار کرنا چاہی دا اے۔ایہدے نال سانوں کیہہ فائدہ ہوئے گا؟ جِنّاں زیادہ اَسی خدا دے کلام تے سوچوچار کراں گے اوناں ای زیادہ اوہدیاں گلاں ساڈے دل چ بیہہ جان گیاں۔
17. ایہہ کیوں ضروری اے کہ اَسی بائبل چ لکھیاں گلاں تے سوچوچار کرئیے؟
17 بائبل نُوں پڑھنا تے ایہدے چ لکھیاں گلاں تے سوچوچار کرنا ایناں ضروری کیوں اے؟ اِنج کرن نال نہ صرف سانوں ہُن مُنادی کرن چ طاقت مِلدی اے سگوں سزا دا اوہ پیغام دین دی دلیری وی ملے گی جیہڑا شاید سانوں آن والے ویلے چ سُنانا پووے گا۔ ایہدے علاوہ جدوں اَسی یہوواہ دِیاں شاندار خوبیاں تے غور کرنے آں تے اَسی اوہدے ہور نیڑے ہو جانے آں۔اِنج کرن نال سانوں دِلی سکون تے اطمینان مِلدا اے تے ایہو جہی خوشی مِلدی اے جیہڑی شہد وانگوں مِٹھی ہوندی اے۔—زبور 119:103۔
ہمت ہارے بغیر مُنادی کردے رہوو
18. جیہڑے لوکاں نُوں اَسی مُنادی کرنے آں اوہناں نُوں کیہہ مننا پووے گا تے کیوں؟
18 حِزقیایل وانگوں سانوں پیشینگوئیاں کرن دا الہام تے نئیں ہوندا پر اَسی پکا ارادہ کیتا اے کہ اَسی لوکاں نُوں اوہ پیغام سُناندے رہواں گے جیہڑا یہوواہ نے اپنے کلام بائبل چ لکھوایا اے تے اَسی اوہدوں تک ایہہ کم کر دے رہواں گے جدوں تک یہوواہ چاہندا اے۔ جدوں لوکاں دی عدالت دا ویلا آئے گا تے ساڈے علاقے دے لوک ایہہ نئیں کہہ سکن گے کہ اوہناں نُوں خبردار نئیں کیتا گیا سی یاں خدا نے اوہناں نُوں موقع نئیں دِتا سی۔ (حِزقیایل 3:19؛ 18:23) ایہدی بجائے اوہناں نُوں ایہہ مننا پووے گا کہ اَسی جیہڑا پیغام اوہناں نُوں سُنا رہے ساں اوہ خدا وَلّوں سی۔
19. کیہڑیاں گلاں سانوں مُنادی کردے رہن دی ہمت دین گیاں؟
19 کیہڑیاں گلاں ہمت ہارے بغیر مُنادی کرن چ ساڈی مدد کرن گئیاں؟ اوہی تن گلاں جنہاں توں حِزقیایل دی مدد ہوئی سی۔ اَسی ایس لئی مُنادی کردے رہنے آں کیونکہ سانوں پتہ اے کہ یہوواہ نے سانوں گھلیا اے۔ یہوواہ اپنی پاک روح دے ذریعے سانوں طاقت دیندا اے تے اوہدا کلام ساڈا ایمان مضبوط کردا اے۔ یہوواہ دی مدد نال سانوں مُنادی کردے رہن تے آخر تک ثابت قدم رہن دی طاقت مِلدی اے۔—متی 24:13۔
گیت نمبر 65: اَگے ودھ دے رہوو!
a ایس مضمون چ اَسی تِن گلاں تے غور کراں گے جنہاں دی مدد نال حِزقیایل مُنادی کر دا رہیا۔ غور کرو کہ یہوواہ نے اپنے ایس نبی دی مدد کیویں کیتی۔ اِنج ایس گل تے ساڈا بھروسا ودھے گا کہ یہوواہ مُنادی دے کم چ ساڈی وی مدد کرے گا۔
