مطالعے دا مضمون نمبر 35
اِک دُوجے دا حوصلہ ودھاندے رہوو
اِک دُوجے نُوں تسلی دیندے رہوو تے اِک دُوجے دا حوصلہ ودھاندے رہوو۔—1-تھسلُنیکیوں 5:11۔
گیت نمبر 48: روز یہوواہ دے سنگ سنگ چلو
مضمون تے اِک نظر *
1. 1-تھسلُنیکیوں 5:11 دے مطابق اَسی سارے کیہڑا کم کر سکنے آں؟
کیہہ تواڈی کلیسیا نے کدی عبادتگاہ نُوں بنان یاں ایہدی مرمت کرن دے کم چ حصہ لیا اے؟ جے ہاں تے توانوں اوس نوِیں عبادتگاہ چ اپنی پہلی عبادت ضرور یاد ہوئے گی۔ اوس ویلے تُسی دِلوں یہوواہ دا شکریہ ادا کیتا ہوئے گا۔ شاید تُسی اینے جذباتی ہو گئے سو کہ تواڈے کولوں عبادت تے پہلا گیت وی نئیں گایا جا رہیا سی۔ ایہدے چ کوئی شک نئیں کہ ساڈیاں اچھیاں عبادتگاہواں دی وجہ توں یہوواہ دی وڈیائی ہوندی اے۔ پر اِک کم ایہو جیہا اے جدے توں یہوواہ دی ہور وی زیادہ وڈیائی ہوندی اے تے ایہہ کم عبادتگاہواں بنان توں وی زیادہ اہم اے۔ ایہہ کم ایہہ وے کہ سانوں اپنی عبادت گاہواں چ آن والے لوکاں دا حوصلہ ودھانا وے۔ ایہو ای گل پولُس رسول نے ساڈی مرکزی ایت یعنی 1-تھسلُنیکیوں 5:11 چ کہی۔—ایس ایت نُوں پڑھو۔
2. ایس مضمون چ اَسی کیہڑیاں گلاں تے غور کراں گے؟
2 پولُس رسول نے اپنے ہمایماناں دا حوصلہ ودھان بارے بوہت ودھیا مثال قائم کیتی۔ اوہدے دل چ اپنے ہمایماناں لئی بوہت زیادہ ہمدردی سی۔ ایس مضمون چ اَسی ویکھاں گے کہ پولُس نے ایہناں تِن معاملیاں چ اپنے بھین بھراواں دی مدد کیویں کیتی: (1)مشکلاں نُوں برداشت کرن چ، (2) اِک دُوجے دے نال صلح صفائی نال رہن چ تے (3) یہوواہ تے اوہناں دے ایمان نُوں مضبوط کرن چ۔ آؤ ویکھنے آں کہ اَسی پولُس رسول وانگوں اپنے بھین بھراواں دا حوصلہ کیویں ودھا سکنے آں۔—1-کُرنتھیوں 11:1۔
پولُس نے مشکلاں نُوں برداشت کرن چ اپنے ہمایماناں دی مدد کیتی
3. پولُس یہوواہ دی خدمت تے اپنیاں ضرورتاں نُوں پورا کرن بارے کیہو جہی سوچ رکھدا سی؟
3 پولُس اپنے بھین بھراواں نال بوہت پیار کردا سی۔ کیونکہ اوہنے آپ وی بڑیاں مشکلاں دا سامنا کیتا سی ایس لئی اوہ اپنے اوہناں ہمایماناں لئی ہمدردی وکھا سکدا سی جیہڑے مشکلاں چوں لنگھ رہے سن۔ اِک ویلا ایہو جیہا آیا کہ پولس کول سارے پیسے مُک گئے سن تے اوہنوں اپنی تے اپنے ساتھیاں دی ضرورتاں پوریاں کرن لئی کم لبھنا پیا۔ (اعمال 20:34) اوہ تمبو بنان دا کم کردا سی۔ ایس لئی جدوں اوہ کُرنتھس گیا تے شروع شروع چ اوہنے اَکوِلہ تے پرِسکِلّہ دے نال تمبو بنان دا کم کیتا۔ پر ہر سبت والے دن اوہ یہودیاں تے یونانیاں نُوں گواہی دیندا سی۔ فیر جدوں سیلاس تے تیمُتھیُس اوتھے آئے تے پولُس اپنا سارا دھیان خدا دے کلام نُوں سنان تے دین لگ پیا۔ (اعمال 18:2-5) پولُس نے کدی وی اپنا دھیان ایس گل توں نئیں ہٹن دِتا کہ اوہدی زندگی دا سب توں اہم مقصد یہوواہ دی خدمت کرنا اے۔ پولُس نے یہوواہ دی خدمت تے اپنیاں ضرورتاں نُوں پورا کرن بارے بوہت ودھیا مثال قائم کیتی سی۔ ایس لئی اوہ اپنے ہمایماناں دا حوصلہ ودھا سکدا سی۔ اوہنے اپنے ہمایماناں نُوں یاد دَوایا کہ اوہ زندگی دی پریشانیاں نُوں یاں گھر والیاں دِیاں ضرورتاں پوریاں کرن نُوں اپنے اُتے ایناں سوار نہ کر لین کہ اوہ زیادہ اہم گلاں نُوں ای بُھل جان یعنی اوہناں گلاں نُوں جیہڑیاں یہوواہ دی عبادت نال تعلق رکھدیاں نیں۔—فِلپّیوں 1:10۔
4. پولُس تے تیمُتھیُس نے اذیت برداشت کرن چ اپنے ہمایماناں دی مدد کیویں کیتی؟
4 جدوں تھسلُنیکے چ کلیسیا قائم ہوئی تے ایہدے کجھ ہی عرصے بعد نویں مسیحیاں نُوں سخت اذیت دا سامنا کرنا پیا۔ جدوں غصے نال بھرے لوکاں نُوں پولُس تے سیلاس نئیں لبھے تے اوہ کجھ ہور بھراواں نُوں گھسیٹ کے شہر دے حاکماں کول لے گئے تے اُچی آواز چ کہن لگے کہ ایہہ سارے دے سارے قیصر دے حکماں دی خلافورزی کردے نیں۔ (اعمال 17:6، 7) ذرا سوچو کہ جدوں ایہناں نویں مسیحیاں نے ویکھیا ہوئے گا کہ شہر دے لوک اوہناں دے خلاف ہو گئے نیں تے اوہ کِنّاں ڈر گئے ہون گے۔ ایہدی وجہ توں یہوواہ دی خدمت چ ایہناں مسیحیاں دا جوش ٹھنڈا پے سکدا سی۔ پر پولُس نئیں چاہندا سی کہ اِنج ہوئے۔ بھانویں کہ اوہنوں تے سیلاس نُوں اوہ شہر چھڈنا پیا پر اوہنے ایس گل دا خاص خیال رکھیا کہ ایس نوِیں کلیسیا دی چنگی طرحاں دیکھبھال ہوندی رہوے۔ پولُس نے تھسلُنیکے دے مسیحیاں نُوں یاد دَوایا کہ اوہنے اوہناں دے ایمان نُوں مضبوط کرن تے اوہناں دا حوصلہ ودھان لئی تیمُتھیُس نُوں اوہناں کول گھلیا سی تاکہ اوہناں چوں کوئی وی اَذیتاں دا سامنا کردے ویلے ڈولے نہ۔ (1-تھسلُنیکیوں 3:2، 3) شاید تیمُتھیُس نے اپنے شہر لِسترہ چ آپ وی اذیت دا سامنا کیتا سی تے ویکھیا سی کہ پولُس نے اوتھوں دے بھین بھراواں دا حوصلہ کیویں ودھایا سی۔ تے ایہدا جو نتیجہ نکلیا سی اوہدی وجہ توں تیمُتھیُس تھسلُنیکے دے بھین بھراواں نُوں یقین دَوا سکدا سی کہ سب کجھ ٹھیک ہو جائے گا۔—اعمال 14:8، 19-22؛ عبرانیوں 12:2۔
5. بھرا برائنٹ نُوں کلیسیا دے اِک بزرگ دی مدد نال کیہہ فائدہ ہویا؟
5 پولُس نے ہور کیویں اپنے ہمایماناں دا حوصلہ ودھایا؟ جدوں اوہ تے برنباس لِسترہ، اِکُنیُم تے انطاکیہ واپس گئے تے اوہناں نے کلیسیا چ بزرگ مقرر کیتے۔ (اعمال 14:21-23) اوہناں بزرگاں نے اُنج ای کلیسیاواں نُوں تسلی دِتی ہوئے گی جنج اَج کل ساڈی کلیسیاواں چ بزرگ دیندے نیں۔ ایس بارے ذرا بھرا برائنٹ دی گل تے غور کرو جنہے کہیا: ”جدوں میں 15 سال دا ساں تے میرے ابو گھر چھڈ کے چلے گئے تے میری امی نُوں کلیسیا توں کڈھ دِتا گیا۔ میں بوہت ٹُٹ گیا تے اپنے آپ نُوں بڑا کلّا محسوس کرن لگ پیا۔“ بھرا برائنٹ نے ایس مشکل ویلے چ اپنے آپ نُوں کیویں سنبھالیا؟ اوہنے دَسیا: ”ساڈی کلیسیا چ اِک بزرگ سی جدا ناں ٹونی سی۔ اوہ عبادتاں تے دُوجے موقعیاں تے میرے نال گل کردا سی۔ اوہنے مینوں بوہت سارے ایہو جہے لوکاں دِیاں مثالاں دِتیاں جنہاں نُوں بوہت ساریاں مشکلاں دا سامنا ہویا پر اوہ فیر وی خوش رہے۔ اوہنے میرے نال زبور 27:10 پڑھی تے اوہ اکثر میرے نال بادشاہ حِزقیاہ بارے گل کردا سی جنہے وفاداری نال یہوواہ دی خدمت کیتی۔ بھانویں کہ اوہدے پیو دی مثال بوہت بُری سی۔“ اوس بزرگ دی مدد توں بھرا برائنٹ نُوں کیہہ فائدہ ہویا؟ اوہنے کہیا: ”بھرا ٹونی نے جیویں میرا حوصلہ ودھایا اوہدی وجہ توں میں کُل وقتی طور تے یہوواہ دی خدمت کر سکیا جدے توں مینوں بڑا سکون ملیا۔“ بزرگو، بھرا برائنٹ ورگے بھراواں دی مدد کرن لئی تیار رہوو جنہاں دا کسے چنگی گل نال حوصلہ ودھ سکدا اے۔—امثال 12:25۔
6. بائبل چ جیہڑے خدا دے وفادار بندیاں دا ذکر کیتا گیا اے پولُس نے اوہناں دی زندگی بارے دَسن نال اپنے ہمایماناں دا حوصلہ کیویں ودھایا؟
6 پولُس رسول نے اپنے ہمایماناں نُوں دَسیا کہ گواہواں دا وڈا بدّل ایس لئی سخت مشکلاں چ وی یہوواہ دا وفادار رہیا کیونکہ یہوواہ نے اوہنوں ایہناں مشکلاں نُوں برداشت کرن دی طاقت دِتی سی۔ (عبرانیوں 12:1) پولُس نُوں پتہ سی کہ پرانے زمانے دے خدا دے بندیاں دی زندگی بارے دَسن نال اوہدے ہمایماناں چ دلیری پیدا ہو سکدی اے تے اوہ اپنا دھیان زندہ خدا دے شہر تے رکھن دے قابل ہو سکدے نیں۔ (عبرانیوں 12:22) ایہہ گل اَج وی سچ اے۔ کیہہ سانوں ساریاں نُوں جدعون، برق، داؤد، سموئیل تے خدا دے ہور بندیاں بارے پڑھ کے حوصلہ نئیں مِلدا؟ (عبرانیوں 11:32-35) ساڈے زمانے دے خدا دے اوہناں وفادار بندیاں بارے پڑھ کے وی سانوں حوصلہ مِلدا اے جنہاں نے ایمان دی چنگی مثال قائم کیتی۔ ساڈے ہیڈ کوارٹر چ اکثر ایہو جہے بھین بھراواں دے خط آندے رہندے نیں جنہاں دا ایمان اوس ویلے بوہت مضبوط ہویا جدوں اوہناں نے ساڈے زمانے دے خدا دے کسے وفادار بندے دی زندگی بارے پڑھیا۔
پولُس نے اپنی مثال توں اپنے ہمایماناں نُوں سکھایا کہ اوہناں نُوں آپس چ امن نال رہنا چاہی دا اے
7. رومیوں 14:19-21 چ پولُس نے جیہڑی نصیحت کیتی،اوہدے توں اَسی کیہہ سکھنے آں؟
7 جدوں اَسی اپنیاں گلاں تے کماں توں کلیسیا چ صلح قائم رکھنے آں تے اِنج اَسی اپنے بھین بھراواں دا حوصلہ ودھانے آں۔ ساڈے ساریاں دی سوچ اِک دوسرے توں فرق ہو سکدی اے۔ پر ایہدی وجہ توں اَسی اِک دُوجے توں دُور نئیں ہو جاندے تے جے بائبل دا کوئی اصول نہ ٹُٹ رہیا ہووے تے اَسی اپنیاں خواہشاں تے مرضی نُوں بدل لینے آں۔ ذرا اِک مثال تے غور کرو۔ روم دی کلیسیا چ یہودی تے غیریہودی دونویں طرحاں دے مسیحی سن۔ جدوں موسیٰ دی شریعت ختم ہو گئی تے اوہناں مسیحیاں لئی ایہہ لازمی نئیں سی کہ اوہ اوہناں چیزاں نُوں کھان توں پرہیز کرن جنہاں نُوں کھان توں شریعت چ منع کیتا گیا سی۔ (مرقس 7:19) ایس لئی کجھ یہودی مسیحی ہر طرحاں دا کھانا کھان لگ پئے جد کہ کجھ مسیحیاں نُوں لگ رہیا سی کہ ایہناں نُوں کھانا ٹھیک نئیں۔ ایس مسئلے دی وجہ توں کلیسیا چ پُھٹ پے گئی۔ پولُس نے کلیسیا چ امن قائم رکھن دی اہمیت تے زور دین لئی ایہہ کہیا: چنگا ہوئے گا کہ تُوں گوشت نہ کھا تے نہ شراب پی تے نہ کوئی ایہو جیہا کم کر جدی وجہ توں تیرے بھرا نُوں ٹھوکر لگے۔ (رومیوں 14:19-21 نُوں پڑھو۔) ایس طرحاں پولُس نے اپنے ہمایماناں دی ایہہ سمجھن چ مدد کیتی کہ ایہو جہے مسئلیاں دی وجہ توں نہ صرف اوہناں نُوں سگوں پوری کلیسیا نُوں نقصان ہو سکدا اے۔ پولُس آپ وی ہر اوہ کم چھڈن نُوں تیار سی جدی وجہ توں دُوجیاں دا ایمان کمزور پے سکدا سی۔ (1-کُرنتھیوں 9:19-22) جے اَسی وی اپنی پسند نا پسند تے اَڑے نئیں رہواں گے تے اَسی دُوجیاں دا حوصلہ ودھاواں گے تے امن نُوں قائم رکھاں گے۔
8. پولُس نے اوس ویلے کیہہ کیتا جدوں کلیسیا چ اِک ایہو جیہا مسئلہ کھڑا ہو گیا جدی وجہ توں کلیسیا دا امن تباہ ہو سکدا سی؟
8 پولُس اوہناں مسیحیاں دے نال صلح صفائی نال رہیا جیہڑے کجھ اہم معاملیاں بارے دُوجے مسیحیاں نال متفق نئیں سن۔ مثال لئی پہلی صدی دی کلیسیا چ کجھ مسیحی ایس گل تے زور دے رہے سن کہ غیر یہودی مسیحیاں نُوں ختنہ کروانا چاہی دا اے۔ شاید اوہ ایس لئی کہہ رہے سن تاکہ غیرایمان والے لوک اوہناں تے نکتہ چینی نہ کرن۔ (گلتیوں 6:12) بھانویں کہ پولُس اوہناں دی ایس گل توں متفق نئیں سی پر اوہنے دُوجیاں تے اپنی رائے تھوپن دی بجائے بڑی خاکساری نال یروشلیم دے رسولاں تے بزرگاں کولوں مشورہ منگیا۔ (اعمال 15:1، 2) پولُس نے جیویں ایس معاملے نُوں حل کیتا اوہدی وجہ توں اوہ مسیحی اپنی خوشی تے کلیسیا چ امن قائم رکھ سکے۔—اعمال 15:30، 31۔
9. اَسی پولُس دی مثال تے کیویں عمل کر سکنے آں؟
9 جدوں کلیسیا چ کوئی وڈا مسئلہ کھڑا ہو جاندا اے تے اَسی اوہناں بھراواں کولوں مدد لے سکنے آں جنہاں نُوں یہوواہ نے کلیسیا دی دیکھبھال کرن لئی مقرر کیتا اے۔ اِنج کرن نال اَسی کلیسیا چ امن قائم کر رہے ہوواں گے۔ سانوں اپنے مسئلیاں دا حل تنظیم وَلّوں مِلن والیاں ہدیتاں یاں کتاباں تے ویڈیوز وغیرہ چ مِل سکدا اے۔ جے اَسی اپنی سوچ تے زور دین دی بجائے اپنا دھیان ایہناں ہدیتاں تے عمل کرن تے لاواں گے تے اَسی کلیسیا چ امن قائم رکھاں گے۔
10. پولُس نے کلیسیا چ امن نُوں قائم رکھن لئی ہور کیہہ کیتا؟
10 پولُس نے کلیسیا چ صلح نُوں قائم رکھن لئی اپنے بھین بھراواں دی خامیاں دی بجائے اوہناں دی خوبیاں بارے گل کیتی۔ مثال لئی، رومیوں دے ناں اپنے خط دے آخر چ اوہنے بوہت سارے بھین بھراواں دا ناں لے کے ذکر کیتا تے ایہہ وی دَسیا کہ اوہناں چ کیہڑیاں کیہڑیاں خوبیاں نیں۔ پولُس رسول وانگوں سانوں وی اپنے بھین بھراواں دِیاں خوبیاں بارے گل کرنی چاہی دی اے۔ اِنج کرن نال ساڈے بھین بھراواں دے وچ گہری دوستی ہو جائے گی تے اوہ وی اِک دُوجے نال ہور زیادہ پیار کرن لگ پین گے۔
11. جدوں کسے بھین یاں بھرا نال ساڈی اَن بن ہو جاندی اے تے اَسی صلح کیویں کر سکنے آں؟
11 کدی کدار پُختہ مسیحیاں چ وی کسے گل نُوں لے کے آپس چ اَن بن یاں بحث ہو سکدی اے۔ پولُس تے اوہدے قریبی دوست برنباس دے درمیان وی اِنج ای ہویا۔ اوہناں دونواں دی ایس گل تے سخت بحث ہوئی کہ اوہ اگلے دورے تے مرقس نُوں اپنے نال لے کے جان گے یاں نئیں۔ اوہناں دونواں چ ایس گل توں جھگڑا ہویا تے اوہناں نے فیصلہ کیتا کہ اوہ کٹھے دورہ کرن نئیں جان گے۔ (اعمال 15:37-39) پر پولُس، برنباس تے مرقس نے آپس دے تعلقات نُوں ٹھیک کر لیا تے اِنج ثابت کیتا کہ اوہناں دی نظر چ کلیسیا دا امن تے اتحاد زیادہ اہم اے۔ بعد چ پولُس نے برنباس تے مرقس دے بارے بوہت چنگیاں گلاں کہیاں۔ (1-کُرنتھیوں 9:6؛ کُلسّیوں 4:10) جے ساڈی وی کسے بھین یاں بھرا نال اَن بن ہو گئی اے تے سانوں وی مسئلے نُوں حل کرنا چاہی دا اے تے اپنے بھین بھراواں دِیاں خوبیاں تے دھیان دیندے رہنا چاہی دا اے۔ اِنج کرن نال اَسی امن تے اتحاد نُوں ودھا رہے ہوواں گے۔—اِفسیوں 4:3۔
پولُس نے اپنے ہمایماناں دے ایمان نُوں مضبوط کیتا
12. کجھ ایہو جہے مسئلیاں بارے دَسو جنہاں دا ساڈے بھین بھراواں نُوں سامنا کرنا پیندا اے؟
12 اَسی اپنے بھین بھراواں دے ایمان نُوں مضبوط کرن نال اوہناں دا حوصلہ ودھانے آں۔ کجھ بھین بھراواں دے غیر ایمان رشتے دار اوہناں دے نال کم کرن والے یاں اوہناں دے نال سکول چ پڑھن والے اوہناں دا مذاق اُڈاندے نیں۔ کجھ نُوں کوئی خطرناک بیماری اے یاں فیر کجھ بھین بھراواں دا کسے نے دل دُکھایا اے۔ تے کجھ بھین بھراواں نُوں بپتسمہ لئے ہوئے کئی سال ہو گئے نیں تے اوہ کافی لمے چِر توں ایس دُنیا دے خاتمے دا اِنتظار کر رہے نیں۔ ایہو جہیاں صورتاں چ اِک مسیحی دے ایمان دا اِمتحان ہو سکدا اے۔ پہلی صدی دی کلیسیا دے مسیحیاں نُوں وی ایہو جہیاں مسئلیاں دا سامنا سی۔ پولُس نے اپنے ایہناں بھین بھراواں دا حوصلہ ودھان لئی کیہہ کیتا؟
تُسی پولُس وانگوں دُوجیاں دا حوصلہ کیویں ودھا سکدے او؟ (پیراگراف نمبر 13 نُوں ویکھو۔) *
13. پولُس نے اپنے اوہناں بھین بھراواں دی مدد کیویں کیتی جنہاں دا اوہناں دے عقیدیاں دی وجہ توں مذاق اُڈایا جاندا سی؟
13 پولُس نے پاک کلام دے ذریعے اپنے بھین بھراواں دا ایمان مضبوط کیتا۔ مثال لئی، یہودی مسیحیاں نُوں ایہہ سمجھ نئیں آ رہیا سی کہ اوہ اپنے اوہناں غیرایمان رشتےداراں نُوں کیویں جواب دین جیہڑے ایہہ دعویٰ کر رہے سن کہ یہودی مذہب مسیحی مذہب توں وڈا اے۔ پولُس نے عبرانیوں دے ناں جیہڑا خط لکھیا اوہدے توں ایہناں مسیحیاں نُوں ضرور حوصلہ ملیا ہوئے گا۔ (عبرانیوں 1:5، 6؛2:2، 3؛ 9:24، 25) پولُس دِیاں دلیلاں نُوں استمال کر کے ایہہ مسیحی اپنے مخالفاں نُوں جواب دے سکدے سن۔ جدوں اَج ساڈے ہمایماناں دا مذاق اُڈایا جاندا اے تے اَسی اوہناں دی مدد کر سکنے آں کہ اوہ دُوجیاں نُوں اپنے عقیدیاں بارے دَسن لئی تنظیم دِیاں کتاباں تے ویڈیوز وغیرہ نُوں کیویں استمال کر سکدے نیں۔ جے ساڈے نوجواناں دا ایس وجہ توں مذاق اُڈایا جاندا اے کہ اوہ ایس گل تے ایمان رکھدے نیں کہ خدا نے ساریاں چیزاں نُوں بنایا اے تے اَسی اوہناں دی مدد کر سکنے آں کہ اوہ دُوجیاں نُوں جواب دین لئی اُردو زبان چ سلسلہوار مضمون ”کیا یہ خالق کی کاریگری ہے؟“ توں معلومات کیویں حاصل کر سکدے نیں۔
تُسی پولُس وانگوں دُوجیاں دا حوصلہ کیویں ودھا سکدے او؟ (پیراگراف نمبر 14 نُوں ویکھو۔) *
14. بھانویں کہ پولُس مُنادی کرن تے تلیم دین دے کم چ بوہت مصروف رہندا سی پر فیر وی اوہنے کیہہ کیتا؟
14 پولُس نے اپنے بھین بھراواں دی مدد کیتی کہ اوہ چنگے کماں دے ذریعے اِک دُوجے لئی محبت وکھان۔ (عبرانیوں 10:24) پولُس نے نہ صرف اپنیاں گلاں سگوں اپنے کماں توں وی اپنے ہمایماناں دی مدد کیتی۔ مثال لئی، جدوں یہودیہ چ رہن والے مسیحیاں نُوں کال دا سامنا کرنا پیا تے پولُس نے اوہناں لئی ضرورت دِیاں چیزاں گھلیاں۔ (اعمال 11:27-30) بھانویں پولُس رسول مُنادی کرن تے تلیم دین دے کم چ بوہت مصروف رہندا سی پر اوہ ایس گل دا خیال رکھدا سی کہ اوہ کیہڑے کیہڑے طریقیاں نال اپنے بھین بھراواں دِیاں ضرورتاں نُوں پورا کر سکدا اے۔ (گلتیوں 2:10) تے اِنج اوہنے اپنے بھین بھراواں دا ایس گل تے ایمان مضبوط کیتا کہ یہوواہ اوہناں دا خیال رکھے گا۔ اَج اَسی وی آفت دا سامنا کرن والے بھین بھراواں دی مدد کرن لئی خوشی نال اپنا وقت، طاقت تے صلاحیتاں نُوں استمال کر کے اوہناں دی مدد کرنے آں تے اِنج اوہناں دے ایمان نُوں مضبوط کرنے آں۔ اَسی تنظیم دے کم لئی عطیات دین نال وی اِنج کر سکنے آں۔ جدوں اَسی ایہناں تے ہور طریقیاں نال اپنے بھین بھراواں دے کم آنے آں تے اَسی اوہناں دی مدد کرنے آں کہ اوہ ایس گل تے بھروسا رکھن کہ یہوواہ اوہناں نُوں کدی کلّا نئیں چھڈے گا۔
تُسی پولُس وانگوں دُوجیاں دا حوصلہ کیویں ودھا سکدے او؟ (پیراگراف نمبر 15، 16 نُوں ویکھو۔) *
15، 16. سانوں اوہناں بھین بھراواں دے نال کیویں پیش آنا چاہی دا اے جنہاں دا ایمان کمزور پے گیا اے؟
15 پولُس نے اوہناں بھین بھراواں دی مدد کرن چ ہمت نئیں ہاری جنہاں دا ایمان کمزور پے گیا سی۔ اوہنے اوہناں لئی ہمدردی وکھائی تے حوصلہ ودھان والیاں چنگیاں گلاں کیتیاں۔ (عبرانیوں 6:9؛ 10:39) مثال لئی، عبرانیوں دے ناں اپنے پورے خط چ اوہنے اکثر لفظ اَسی استمال کیتا جدے توں اوہنے ایہہ ظاہر کیتا کہ جیہڑی نصیحت اوہ اوہناں نُوں دے رہیا اے، اوہدے تے اوہنوں آپ وی عمل کرن دی لوڑ اے۔ (عبرانیوں 2:1، 3) پولُس وانگوں سانوں وی اوہناں بھین بھراواں دی مدد کرن چ ہمت نئیں ہارنی چاہی دی جنہاں دا ایمان کمزور پے گیا اے۔ ایہدی بجائے اوہناں دا حوصلہ ودھان لئی اَسی ایہہ ثابت کر سکنے آں کہ سانوں اوہناں دی فکر اے۔ اِنج کر کے اَسی اوہناں لئی محبت وکھا رہے ہوواں گے۔ جدوں اَسی پیار تے نرمی نال اوہناں نال گل کراں گے تے ساڈیاں گلاں دا اوہناں تے چنگا اثر پووے گا۔
16 پولُس نے اپنے بھین بھراواں نُوں ایس گل دا یقین دَوایا کہ یہوواہ اوہناں دے چنگے کماں بارے جان دا اے۔ (عبرانیوں 10:32-34) اَسی وی اوس ویلے اِنج کر سکنے آں جدوں اَسی کسے بھین یاں بھرا دی مدد کر رہے ہنے آں جدا ایمان کمزور پے گیا اے۔ اَسی اوہدے کولوں پچھ سکنے آں کہ اوہ سچائی چ کیویں آیا یاں اَسی اوہنوں کہہ سکنے آں کہ اوہ اوس ویلے نُوں یاد کرے جدوں یہوواہ نے اوہدی مدد کیتی۔ ایس موقعے تے اَسی اوہنوں یقین دَوا سکنے آں کہ یہوواہ اوس محبت نُوں نئیں بُھلیا جیہڑی اوہنے ماضی چ یہوواہ لئی ظاہر کیتی سی تے اوہ اوہنوں کدی کلّا نئیں چھڈے گا۔ (عبرانیوں 6:10؛ 13:6،5) ساڈی ایس گل بات توں اوہناں بھین بھراواں چ یہوواہ دی عبادت کردے رہن دا جذبہ پیدا ہو سکدا اے۔
اِک دُوجے دا حوصلہ ودھاندے رہوو
17. اَسی اپنے اندر کیہڑی مہارت نُوں ہور زیادہ نکھار سکنے آں؟
17 جیویں وقت دے نال نال اِک مستری اپنے کم چ ماہر بن جاندا اے اونویں ای اَسی وی اِک دُوجے دا حوصلہ ودھان چ ماہر بن سکنے آں۔ جدوں اَسی اپنے بھین بھراواں نُوں دَسنے آں کہ ماضی چ کیس طرحاں یہوواہ دے بندے مشکلاں دے باوجود اوہدے وفادار رہے تے اِنج اوہناں بھین بھراواں نُوں وی مشکلاں نُوں برداشت کرن دا حوصلہ مِلدا اے۔ اَسی دُوجیاں دی خوبیاں بارے گل کرن نال صلح نُوں ودھا سکنے آں۔ اَسی اوہدوں وی امن نُوں ودھانے آں جدوں کلیسیا چ ساڈی کسے نال اَنبن ہو جاندی اے تے اَسی فوراً صلح کر لینے آں۔ جدوں اَسی اپنے بھین بھراواں دِیاں خوبیاں بارے گل کرنے آں، مسئلے کھڑے ہون دی صورت چ کلیسیا دے اتحاد نُوں قائم رکھنے آں تے آپسی جھگڑیاں نُوں دُور کر لینے آں تے اَسی امن نُوں قائم رکھنے آں۔ اَسی اپنے بھین بھراواں دے ایمان نُوں مضبوط کرن لئی پاک کلام چوں اوہناں دی مدد کر سکنے آں، ضرورت دے ویلے اوہناں دی مالی مدد کر سکنے آں تے اوہناں بھین بھراواں دا حوصلہ ودھا سکنے آں جنہاں دا ایمان کمزور پے گیا اے۔
18. تُسی کیہہ کرن دا عزم کیتا اے؟
18 جیہڑے بھین بھرا تنظیم دِیاں عمارتاں نُوں بنان دے کم چ حصہ لیندے نیں، اوہناں نُوں بوہت زیادہ خوشی تے سکون محسوس ہوندا اے۔ جدوں اَسی یہوواہ دے نال نال اپنے بھین بھراواں نال وی اپنی دوستی مضبوط کرنے آں تے سانوں وی بوہت خوشی تے سکون مِلدا اے۔عمارتاں اَج نئیں تے کل ختم ہو جاندیاں نیں، پر ساڈے کماں دا جیہڑا نتیجہ نکل دا اے اوہ ہمیشاں رہندا اے۔ آؤ ایس گل دا عزم کرئیے کہ اَسی اِک دُوجے دا حوصلہ ودھاندے رہواں گے۔—1-تھسلُنیکیوں 5:11۔
گیت نمبر 101: ایکا رکھو
^ ایس دُنیا چ زندگی گزارنا بوہت اوکھا ہو گیا اے۔ ساڈے بھین بھراواں تے بوہت زیادہ دباؤ اے۔ پر جدوں اَسی ایس بارے سوچنے آں کہ اَسی کیہڑے کیہڑے طریقیاں نال اپنے بھین بھراواں دا حوصلہ ودھا سکنے آں تے اَسی اوہناں لئی بوہت وڈی برکت ثابت ہو سکنے آں۔ ایس بارے سانوں پولُس رسول دی مثال تے غور کرن نال بوہت فائدہ ہو سکدا اے۔
^ تصویر دی وضاحت: اِک پیو ساڈی ویبسائٹ توں اِک مضمون دے ذریعے اپنی دھی نُوں سمجھا رہیا اے کہ جدوں لوک اوہنوں کرسمس منان لئی کہندے نیں تے اوہ کیہہ کر سکدی اے۔
^ تصویر دی وضاحت: اِک میاں بیوی امدادی کم چ حصہ لین لئی کسے ہور شہر چ گئے ہوئے نیں۔
^ تصویر دی وضاحت: اِک بزرگ اِک ایہو جہے بھرا نُوں مِلن گیا اے جدا ایمان کمزور پے گیا اے۔ اوہ اوہنوں اوس ویلے دِیاں تصویراں وکھا رہیا اے جدوں اوہ دونویں کئی سال پہلاں کٹھے پہلکاراں لئی سکول چ گئے سن۔ ایہہ تصویراں ویکھ کے اوس بھرا دے ذہن چ پرانے وقت دِیاں یاداں تازہ ہو گئیاں نیں۔ اوہدا دل کر رہیا اے کہ اوہ فیر توں یہوواہ دی عبادت کرنا شروع کر دَوے۔کجھ چِر بعد اوہ کلیسیا چ واپس آ گیا اے۔
