مطالعے دا مضمون نمبر 33
یہوواہ اپنے بندیاں دا خیال رکھدا اے
یہوواہ دی نگاہ اوہدے توں ڈرن والیاں تے اے۔—زبور 33:18۔
گیت نمبر 4: یہوواہ میرا چرواہا
مضمون تے اِک نظر *
1. یسوع مسیح نے یہوواہ کولوں ایہہ دُعا کیوں کیتی کہ اوہ اوہدے پیروکاراں دی حفاظت کرے؟
اپنی موت توں پہلے دی رات یسوع مسیح نے اپنے اسمانی باپ کولوں اِک خاص گل لئی درخاست کیتی۔ اوہنے یہوواہ نُوں کہیا کہ اوہ اوہدے پیروکاراں دی حفاظت کرے۔ (یوحنا 17:15، 20) بےشک یہوواہ ہمیشاں اپنے بندیاں دا خیال رکھدا اے تے اوہناں دی حفاظت کردا اے۔ پر یسوع جان دا سی کہ اوہدے پیروکاراں نُوں شیطان وَلّوں سخت مخالفت دا سامنا ہوئے گا۔ اوہ ایہہ وی جان دا سی کہ شیطان دے حملیاں دا مقابلہ کرن لئی اوہدے پیروکاراں نُوں یہوواہ دی مدد دی لوڑ ہوئے گی۔
2. زبور 33:18-20 مطابق سانوں مشکلاں چوں لنگھ دے ویلے ڈرن دی لوڑ کیوں نئیں اے؟
2 اَج سچے مسیحیاں نُوں شیطان دی دُنیا چ رہندے ہوئیاں بوہت ساریاں مشکلاں سہنیاں پیندیاں نیں۔ کجھ مشکلاں ایہو جہیاں ہوندیاں نیں جنہاں دی وجہ توں اَسی بےحوصلہ ہو سکنے آں، ایتھوں تک کہ یہوواہ لئی ساڈی وفاداری دا اِمتحان وی ہو سکدا اے۔ پر جیویں کہ اَسی ایس مضمون چ ویکھاں گے، سانوں ڈرن دی بالکل لوڑ نئیں اے۔ یہوواہ ویکھ رہیا اے کہ اَسی کیہڑیاں مشکلاں چوں لنگھ رہے آں تے اوہ ایہناں مشکلاں نال نبڑن چ ساڈی مدد کرن لئی تیار اے۔ آؤ، بائبل چوں دو ایہو جہیاں مثالاں تے غور کرئیے جنہاں توں پتہ چلدا اے کہ یہوواہ دی نظر اوہناں تے وے جیہڑے اوہدے توں ڈردے نیں۔—زبور 33:18-20 نُوں پڑھو۔
جدوں اَسی محسوس کرنے آں کہ اَسی کلّے آں
3. اَسی کدوں اپنے آپ نُوں کلّا محسوس کر سکنے آں؟
3 بھانویں کلیسیا چ ساڈے بوہت سارے بھین بھرا نیں پر شاید کدی کدار اَسی اپنے آپ نُوں کلّا محسوس کرئیے۔ مثال دے طور تے نوجوان اوس ویلے اپنے آپ نُوں کلّا محسوس کر سکدے نیں جدوں اوہناں نُوں سکول چ اپنی کلاس دے بچیاں دے سامنے اپنے عقیدیاں بارے گل کرنی پیندی اے۔ یاں فیر شاید اوہ اوس ویلے اپنے آپ نُوں کلّا محسوس کرن جدوں اوہ کسے نوِیں کلیسیا چ چلے جاندے نیں۔ یاں فیر ساڈے وچوں کجھ شاید اوس ویلے اُداس ہو جاندے نیں یاں پٹھیاں سدھیاں گلاں سوچن لگ پیندے نیں جدوں اوہناں نُوں لگدا اے کہ مشکلاں چ کوئی وی اوہناں دے نال نئیں اے۔ شاید اَسی ایہہ سوچ کے دُوجیاں نُوں اپنے دل دِیاں گلاں دَسن توں ڈرئیے کہ اوہ سانوں نئیں سمجھن گے۔ کدی کدار تے شاید اَسی ایس حد تک سوچن لگ پینے آں کہ کسے نُوں ساڈی فکر نئیں۔ ایہناں ساریاں گلاں توں پتہ چلدا اے کہ کلّے محسوس کرن دی وجہ توں اَسی بڑے بےبس تے پریشان ہو سکنے آں۔ یہوواہ کدی وی ایہہ نئیں چاہندا کہ اَسی اِنج محسوس کرئیے۔ اَسی ایہہ گل کیوں کہہ سکنے آں؟
4. ایلیاہ نبی نے ایہہ کیوں کہیا کہ میں ای کلّا بچیا واں؟
4 ذرا یہوواہ دے بندے ایلیاہ دی مثال تے غور کرو۔ اوہ تقریباً 40 دن توں اپنی جان بچان لئی ایدھر اودھر بھج رہیا سی کیونکہ ملکہ اِیزِبل نے قسم کھادی سی کہ اوہ اوہنوں جانوں مار دے گی۔ (1-سلاطین 19:1-9) فیر جدوں ایلیاہ غار چ کلّا سی تے اوہنے گِڑگِڑا کے یہوواہ نُوں کہیا کہ اِک میں ای کلّا نبی بچیا واں۔ (1-سلاطین 19:10) پر ملک چ یہوواہ دے ہور وی نبی ہے سن۔ عبدیاہ نے 100 نبیاں نُوں اِیزِبل دے ہتھوں بچا لیا سی۔ (1-سلاطین 18:7، 13) تے فیر ایلیاہ اپنے آپ نُوں کلّا کیوں محسوس کر رہیا سی؟ کیہہ اوہنوں ایہہ لگ رہیا سی کہ عبدیاہ نے جیہڑے نبیاں نُوں بچایا سی ہُن تک اوہناں نُوں مار دِتا گیا ہوئے گا؟ یاں فیر اوہ ایس لئی کلّا محسوس کر رہیا سی کیونکہ کوہِ کرمل تے بعل دے جھوٹھا ثابت ہون دے بعد وی کسے نے یہوواہ دی عبادت کرنی شروع نئیں کیتی سی؟ یاں کیہہ اوہ ایہہ سوچ رہیا سی کہ کوئی وی نئیں جان دا کہ اوہ کِنّے خطریاں چوں لنگھ رہیا اے؟ یاں فیر شاید اوہنوں ایہہ لگ رہیا سی کہ کسے نُوں وی اوہدی پرواہ نئیں اے؟ بائبل چ ایہہ تے نئیں دَسیا گیا کہ ایلیاہ کلّا کیوں محسوس کر رہیا سی پر اَسی ایہہ ضرور جاننے آں کہ یہوواہ نُوں ایہہ پتہ سی کہ ایلیاہ اِنج کیوں محسوس کر رہیا اے تے اوہ اوہدی مدد کیویں کرے گا۔
جیس طرحاں یہوواہ نے ایلیاہ دا حوصلہ ودھایا، اوہدے تے غور کرن نال سانوں اوس ویلے تسلی کیویں مِلدی اے جدوں اَسی کلّا محسوس کرنے آں؟ (پیراگراف نمبر 5، 6 نُوں ویکھو۔)
5. یہوواہ نے ایلیاہ نُوں ایہہ یقین کیویں دَوایا کہ اوہ کلّا نئیں اے؟
5 یہوواہ نے کئی طریقیاں نال ایلیاہ دی مدد کیتی۔ اوہنے ایلیاہ نُوں موقع دِتا کہ اوہ دل کھول کے گل کرے۔ یہوواہ نے دو وار ایلیاہ توں پچھیا: توں ایتھے کیہہ کر رہیا ایں؟ (1-سلاطین 19:9، 13) جدوں ایلیاہ نے دل کھول کے یہوواہ نال گل کیتی تے یہوواہ نے بڑے دھیان نال اوہدی گل سنیُ۔ یہوواہ نے ایلیاہ نُوں یقین دَوایا کہ اوہ اوہدے نال اے تے بڑا طاقتور اے۔ اوہنے ایلیاہ نُوں ایہہ یقین وی دَوایا کہ اوہدے وانگوں ہور وی بوہت سارے لوک اوہدی عبادت کر رہے نیں۔ (1-سلاطین 19:11، 12، 18) بےشک دل کھول کے گل کرن تے یہوواہ دا جواب سُنن توں بعد ایلیاہ نُوں بڑا سکون ملیا ہوئے گا۔ یہوواہ نے ایلیاہ نُوں بوہت ساریاں خاص ذمےداریاں وی دِتیاں۔ یہوواہ نے اوہنوں کہیا کہ اوہ حزائیل نُوں ارام دا بادشاہ، یاہو نُوں اِسرائیل دا بادشاہ تے اِلیشع نُوں نبی مقرر کرے۔ (1-سلاطین 19:15، 16) ایلیاہ نُوں ایہہ ذمےداریاں دین نال یہوواہ نے اوہدی مدد کیتی کہ اوہ اپنا دھیان چنگیاں گلاں تے رکھے۔ ایہدے علاوہ یہوواہ نے اوہنوں اِک چنگا دوست وی دِتا جدا ناں اِلیشع سی۔ جدوں تُسی کلّا محسوس کردے او تے یہوواہ تواڈی مدد کیویں کر سکدا اے؟
6. جدوں تُسی اپنے آپ نُوں کلّا محسوس کردے او تے تُسی یہوواہ کولوں کیس بارے دُعا کر سکدے او؟ (زبور 62:8)
6 یہوواہ چاہندا اے کہ تُسی اوہدے کولوں دُعا کرو۔ اوہ ویکھ رہیا اے کہ تُسی کیہڑیاں مشکلاں چوں لنگھ رہے او تے اوہ توانوں یقین دَواندا اے کہ تُسی جدوں وی اوہدے کولوں دُعا کرو گے، اوہ تواڈی دُعا نُوں سنے گا۔ (1-تھسلُنیکیوں 5:17) اوہنوں اپنے بندیاں دِیاں دُعاواں سننا بوہت چنگا لگدا اے۔ (امثال 15:8) جدوں تُسی اپنے آپ نُوں کلّا محسوس کردے او تے تُسی کیس بارے دُعا کر سکدے او؟ ایلیاہ وانگوں تُسی وی دل کھول کے یہوواہ نُوں ہر گل دَس سکدے او۔ (زبور 62:8 نُوں پڑھو۔) اوہنوں دَسو کہ تُسی کیہڑیاں گلاں دی وجہ توں پریشان او تے کیہو جیہا محسوس کر رہے او۔ یہوواہ توں اِلتجا کرو کہ اوہ اُداسی تے تنہائی تے قابو پان چ تواڈی مدد کرے۔ مثال لئی، جدوں سکول چ کسے نُوں گواہی دیندے ویلے توانوں لگدا اے کہ تُسی بالکل کلّے او تے گھبرا رہے او تے یہوواہ کولوں دلیری منگو۔ تُسی یہوواہ کولوں درخاست کر سکدے او تاکہ تُسی دُوجیاں نُوں چنگی طرحاں اپنے عقیدیاں بارے دَس سکو۔ (لُوقا 21:14، 15) جے تُسی اُداس یاں بےحوصلہ او تے یہوواہ کولوں مدد منگو کہ اوہ کسے پُختہ مسیحی نال گل کرن لئی توانوں ہمت دے۔ یہوواہ کولوں دُعا کرو کہ جیس بندے نال تُسی گل کر رہے او، اوہ تواڈی گل نُوں سمجھے۔ یہوواہ دے سامنے اپنا دل کھول دَوو۔ ویکھو کہ اوہ کیہڑے طریقیاں نال تواڈیاں دُعاواں دا جواب دیندا اے نالے دُوجیاں دی مدد نُوں قبول کرو۔ اِنج تُسی اپنے آپ نُوں کلّا محسوس نئیں کرو گے۔
کیہہ تُسی یہوواہ دی ہور زیادہ خدمت کرن دے طریقیاں بارے سوچ سکدے او تے دُوجیاں دے نال مِل کے اِنج کر سکدے او؟ (پیراگراف نمبر 7 نُوں ویکھو۔)
7. تُسی بھرا موریسیو توں کیہہ سکھیا اے؟
7 یہوواہ خدا نے سانوں ساریاں نُوں بوہت خاص کم دِتا اے۔ تُسی ایس گل دا پورا یقین رکھ سکدے او کہ جدوں تُسی کلیسیا چ اپنیاں ذمےداریاں نُوں پورا کردے او تے مُنادی کردے او تے یہوواہ ایہہ سب ویکھدا اے تے ایہدی بڑی قدر کردا اے۔ (زبور 110:3) جدوں تُسی اپنے آپ نُوں کلّا محسوس کردے او تے تُسی اوس ویلے وی ایہناں کماں چ مصروف کیویں رہ سکدے او؟ ذرا ایس بارے اِک جوان بھرا موریسیو * دی مثال تے غور کرو۔ جدوں بھرا موریسیو نے بپتسمہ لیا تے ایہدے کجھ ای عرصے بعد اوہدے اِک قریبی دوست نے یہوواہ نُوں چھڈ دِتا۔ بھرا موریسیو نے کہیا: ”جدوں میرے دوست نے اِنج کیتا تے میں سوچن لگ پیا کہ پتہ نئیں میں یہوواہ دا وفادار تے اوہدے خاندان دا حصہ رہ سکاں گا یاں نئیں۔ میں اپنے آپ نُوں بوہت کلّا محسوس کر رہیا ساں تے مینوں لگ رہیا سی کہ کوئی وی مینوں نئیں سمجھے گا۔“ کیہڑی چیز نے بھرا موریسیو دی مدد کیتی؟ اوہنے کہیا: ”میں ہور زیادہ مُنادی کرن لگ پیا۔ ایس طرحاں میرا دھیان اپنے آپ توں تے پٹھیاں سدھیاں گلاں توں ہٹ گیا۔ میں خوش رہن لگ پیا تے دُوجیاں نال مُنادی کر دے ویلے میں اپنے آپ نُوں کلّا محسوس نئیں کردا ساں۔“ ایہہ سچ اے کہ ہُن اَسی اپنے ہمایماناں نال اِک جگہ کٹھے ہو کے مُنادی نئیں کر سکدے۔ پر اَسی دُوجیاں نُوں گواہی دین لئی اپنے بھین بھراواں نال مل کے خط لکھ سکنے آں یاں فیر دُوجیاں نُوں فون کر سکنے آں۔ بھرا موریسیو نے اِک ہور گل وی دَسی جدی وجہ توں اوہنے تنہائی تے قابو پایا۔ اوہنے کہیا: ”میں کلیسیا دے کماں چ ہور زیادہ مصروف رہن لگ پیا۔ میں دل لا کے عبادتاں لئی اپنے حصیاں دی تیاری کرن لگ پیا تے اِنج مینوں محسوس ہویا کہ یہوواہ تے کلیسیا دے بھین بھرا میری بڑی قدر کردے نیں۔“
جدوں سخت مشکلاں دی وجہ توں اَسی بےحوصلہ ہو جانے آں
8. جدوں سخت مشکلاں آندیاں نیں تے ساڈے نال کیہہ ہو سکدا اے؟
8 اَسی جاننے آں کہ ایس آخری زمانے چ سانوں مشکلاں دا سامنا کرنا پئے گا۔ (2-تیمُتھیُس 3:1) پر کجھ مشکلاں ساڈے تے اچانک آ جاندیاں نیں۔ شاید سانوں اچانک پیسے دھیلے دی تنگی دا سامنا کرنا پووے۔ یاں شاید سانوں پتہ چلے کہ سانوں کوئی خطرناک بیماری ہو گئی اے یاں فیر ساڈا کوئی عزیز فوت ہو جائے۔ ایہناں گلاں دی وجہ توں شاید اَسی بالکل ٹُٹ جائیے۔ خاص طور تے اوس ویلے جدوں ساڈے تے اِک دے بعد اِک مشکل دا پہاڑ ٹُٹ پووے۔ پر یاد رکھو کہ یہوواہ ویکھ رہیا اے کہ ساڈے تے کیہہ بیت رہی اے تے اوہدی مدد نال اَسی ہر طرحاں دی مشکل دا سامنا کر سکنے آں۔
9. کجھ ایہو جہیاں مشکلاں بارے دَسو جنہاں دا ایوب نُوں سامنا کرنا پیا۔
9 ذرا غور کرو کہ یہوواہ نے اپنے بندے ایوب دی مدد کیویں کیتی۔ ایوب تے اِک دے بعد اِک مشکلاں دا پہاڑ ٹُٹ پیا۔ ایوب نُوں پتہ چلیا کہ اوہدا مال ڈنگر یاں تے چوری ہو گیا اے یاں فیر ماریا گیا اے، اوہدے نوکر وی مارے گئے نیں، ایتھوں تک کہ اوہدے بچے وی مر گئے نیں۔ ایہہ سب کجھ اِک ای دن چ ہویا سی۔ (ایوب 1:13-19) ایوب حالے ایس غم توں نکلیا وی نئیں سی کہ اوہنوں اِک بوہت ای تکلیف دین والی بیماری لگ گئی۔ (ایوب 2:7) ایوب دی حالت اینی بھیڑی سی کہ اوہنے کہیا: مینوں اپنی جان توں نفرت اے۔ میں زندہ نئیں رہنا چاہندا۔—ایوب 7:16۔
یہوواہ نے ایوب نُوں دَسیا کہ اوہ اپنی بنائی ہوئی ہر چیز دا بڑی چنگی طرحاں خیال رکھدا اے۔ اِنج اوہنے ایوب نُوں یقین دَوایا کہ اوہ اوہدے نال محبت کردا اے تے اوہدی فکر کردا اے۔ (پیراگراف نمبر 10 نُوں ویکھو۔)
10. مشکلاں نُوں برداشت کرن چ یہوواہ نے ایوب دی مدد کیویں کیتی؟ (پہلے صفحے دی تصویر نُوں ویکھو۔)
10 یہوواہ ایوب تے آن والی ہر مشکل نُوں ویکھ رہیا سی۔ کیونکہ اوہ ایوب نال بوہت پیار کردا سی ایسے لئی اوہنے ایہناں مشکلاں نُوں برداشت کرن چ ایوب دی مدد کیتی۔ یہوواہ نے ایوب نال گل کیتی تے اوہنوں یقین دَوایا کہ اوہدی دانشمندی دی کوئی حد نئیں اے تے اوہ اپنی مخلوق دا بوہت زیادہ خیال رکھدا اے۔ اوہنے حیران کر دین والے بوہت سارے جانوراں دا ذکر کیتا۔ (ایوب 38:1، 2؛ 39:9، 13، 19، 27؛ 40:15؛ 41:1، 2) یہوواہ نے اپنے بندے اِلیہو دے ذریعے وی ایوب نُوں تسلی تے ہمت دِتی۔ اِلیہو نے ایوب نُوں یقین دَوایا کہ یہوواہ اپنے اوہناں بندیاں نُوں ہمیشاں اجر دیندا اے جیہڑے مشکلاں چ وفادار رہندے نیں۔ پر یہوواہ نے اِلیہو دے ذریعے کجھ گلاں چ ایوب دی درستی وی کیتی۔ اِلیہو نے ایوب دی مدد کیتی تاکہ اوہ اپنے بارے حد توں زیادہ نہ سوچے سگوں ایہہ یاد رکھے کہ کائنات دے خالق یہوواہ دے اَگے اَسی کجھ وی نئیں آں۔ (ایوب 37:14) یہوواہ نے ایوب نُوں اِک کم وی دِتا۔ اوہنے ایوب نُوں کہیا کہ اوہ اپنے تناں دوستاں لئی دُعا کرے کیونکہ اوہناں تناں نے گُناہ کیتا سی۔ (ایوب 42:8-10) جدوں سانوں مشکلاں دا سامنا ہوندا اے تے یہوواہ ساڈی مدد کیویں کردا اے؟
11. جدوں ساڈے تے مشکلاں آندیاں نیں تے بائبل توں سانوں تسلی کیویں مِلدی اے؟
11 اَج یہوواہ ساڈے نال اوس طرحاں تے گل نئیں کردا جیس طرحاں اوہنے ایوب نال کیتی سی۔ پر اوہ اپنے کلام بائبل دے ذریعے ساڈے نال گل کردا اے۔ (رومیوں 15:4) اوہ سانوں مستقبل بارے امید دے کے تسلی دیندا اے۔ ذرا بائبل چوں کجھ ایہو جہیاں ایتاں تے غور کرو جنہاں توں سانوں اوس ویلے تسلی مِل سکدی اے جدوں سانوں مشکلاں دا سامنا ہوندا اے۔ یہوواہ نے بائبل چ سانوں ایس گل دا یقین دَوایا اے کہ دُنیا دی کوئی وی طاقت یاں مشکل سانوں اوہدی محبت توں جُدا نئیں کر سکدی۔ (رومیوں 8:38، 39) اوہنے سانوں ایہہ یقین وی دَوایا اے کہ یہوواہ اوہناں سارے لوکاں دے نیڑے وے جیہڑے اوہدے کولوں دُعا کردے نیں۔ (زبور 145:18) یہوواہ نے سانوں دَسیا اے کہ جے اَسی اوہدے تے بھروسا رکھاں گے تے اَسی ہر طرحاں دی مشکل دا سامنا کر سکاں گے،ایتھوں تک کہ تکلیفاں چ وی خوش رہ سکاں گے۔ (1-کُرنتھیوں 10:13؛ یعقوب 1:2، 12) یہوواہ نے اپنے کلام چ سانوں ایہہ وی یقین دَوایا اے کہ جنہاں مشکلاں چوں اَسی ہُن لنگھ رہے آں، اوہ وقتی نیں تے ایہہ اوہناں برکتاں اَگے کجھ وی نئیں جیہڑیاں سانوں مستقبل چ مِلن گیاں۔ (2-کُرنتھیوں 4:16-18) یہوواہ نے سانوں پکی امید دِتی اے کہ اوہ ساریاں مشکلاں نُوں جڑوں ختم کردے گا یعنی شیطان تے اوہناں سارے لوکاں نُوں جیہڑے اوہدا ساتھ دیندے نیں۔ (زبور 37:10) کیہہ تُسی بائبل چوں کجھ ایہو جہیاں ایتاں یاد کیتیاں نیں جنہاں توں توانوں آن والیاں مشکلاں دا سامنا کردے ویلے تسلی مِل سکدی اے؟
12. اَسی یہوواہ دے کلام توں پوری طرحاں فائدہ حاصل کرن لئی کیہہ کر سکنے آں؟
12 یہوواہ چاہندا اے کہ اَسی ہر روز بائبل پڑھن تے ایہدے تے گہرائی نال سوچوچار کرن لئی اِک وقت طے کرئیے۔ جدوں اَسی اوہناں گلاں تے عمل کرنے آں جیہڑیاں اَسی سکھنے آں تے ساڈا ایمان ہور زیادہ مضبوط ہو جاندا اے تے اِنج اَسی یہوواہ دے ہور نیڑے ہو جانے آں۔ ایس طرحاں سانوں مشکلاں نُوں برداشت کرن دی طاقت مِلدی اے۔ یہوواہ اوہناں لوکاں نُوں اپنی پاک روح وی دیندا اے جیہڑے اوہدے پاک کلام چ لکھیاں گلاں تے بھروسا کردے نیں۔ ایہہ پاک روح سانوں ہر طرحاں دی مشکل دا مقابلہ کرن لئی اوہ طاقت دے سکدی اے جیہڑی انسانی طاقت نالوں ودھ کے وے۔—2-کُرنتھیوں 4:7-10۔
13. وفادار تے سمجھدار غلام سانوں جیہڑا روحانی کھانا دیندا اے، اوہدے ذریعے اَسی مشکلاں نُوں برداشت کرن دے قابل کیویں ہنے آں؟
13 یہوواہ دی مدد نال وفادار تے سمجھدار غلام سانوں بوہت سارے مضمون، ویڈیوز تے ایہو جہے گانے تیار کر کے دیندا اے جنہاں توں ساڈا ایمان مضبوط ہو سکدا اے تے اَسی یہوواہ دے نیڑے رہ سکنے آں۔ (متی 24:45) سانوں یہوواہ وَلّوں مِلن والیاں ایہناں نعمتاں توں پوری طرحاں فائدہ حاصل کرنا چاہی دا اے۔ کجھ عرصہ پہلاں امریکہ توں اِک بھین نے دَسیا کہ اوہ روحانی کھانے لئی کِنّی شکرگزار اے۔ اوہنے کہیا: ”میں پچھلے 40 سالاں توں یہوواہ دی عبادت کر رہی آں تے ایس عرصے چ کئی وار یہوواہ لئی میری وفاداری دا اِمتحان ہویا اے۔“ اوس بھین نُوں بوہت سخت مشکلاں چوں لنگھنا پیا۔ اِک بندے نے شراب دے نشے چ اوس بھین دے نانے نُوں اپنی گڈی تھلے دے دِتا، اوہدے ماں پیو اِک خطرناک بیماری دی وجہ توں فوت ہو گئے تے اوہنوں آپ دو وار کینسر ہویا۔ مشکلاں نُوں برداشت کرن چ کیہڑی چیز نے اوس بھین دی مدد کیتی؟ اوہنے کہیا: ”یہوواہ نے ہمیشاں میرا خیال رکھیا اے۔ اوہنے وفادار تے سمجھدار غلام دے ذریعے جیہڑا روحانی کھانا دِتا اے، اوہدے توں مینوں بڑی ہمت ملی اے۔ ایس وجہ توں میں وی ایوب وانگوں کہہ سکنی آں کہ میں مردے دم تک اپنی راستی نئیں چھڈاں گی۔“—ایوب 27:5۔
اَسی کلیسیا دے بھین بھراواں لئی برکت کیویں ثابت ہو سکنے آں؟ (پیراگراف نمبر 14 نُوں ویکھو۔)
14. یہوواہ مشکل ویلے چ سانوں اپنے ہمایماناں دے ذریعے سہارا کیویں دیندا اے؟ (1-تھسلُنیکیوں 4:9)
14 یہوواہ نے اپنے بندیاں نُوں سکھایا اے کہ اوہ مشکل ویلے چ اِک دُوجے لئی محبت کیویں وکھا سکدے نیں تے اِک دُوجے نُوں تسلی کیویں دے سکدے نیں۔ (2-کُرنتھیوں 1:3، 4؛ 1-تھسلُنیکیوں 4:9 نُوں پڑھو۔) اِلیہو وانگوں ساڈے بھین بھرا ساڈی مدد کرنا چاہندے نیں تاکہ اَسی مشکلاں دے باوجود یہوواہ دے وفادار رہ سکیے۔ (اعمال 14:22) مثال لئی، ذرا غور کرو کہ جدوں بھین کرسٹین دے شوہر نُوں صحت دا اِک بوہت وڈا مسئلہ ہو گیا تے کلیسیا دے بھین بھراواں نے کیویں اوہدا حوصلہ ودھایا تے اوہدی مدد کیتی تاکہ اوہ یہوواہ دے نیڑے رہ سکے۔ بھین کرسٹین نے کہیا: ”اوہ ساڈے لئی اِک مشکل ویلا سی۔ پر سانوں اِنج لگیا کہ اوس ویلے یہوواہ نے بڑے پیار نال سانوں اپنیاں بانہواں چ چُکیا ہویا اے۔ ساڈی کلیسیا نے ساڈی مدد لئی بوہت کجھ کیتا۔ بھین بھرا سانوں مِلن آندے سن، سانوں فون کردے سن تے سانوں گلے لاندے سن۔ ایہدے توں ساڈی ہمت بوہت ودھ جاندی سی۔ میں گڈی نئیں چلا سکدی ساں، ایس لئی بھین بھراواں نے ایس گل دا خیال رکھیا کہ میں عبادتاں تے جا سکاں تے جدوں وی میرے لئی ممکن ہوئے مُنادی کر سکاں۔“ ایہہ ساڈے لئی کِنّی وڈی برکت اے کہ سانوں کلیسیا چ ایناں زیادہ پیار کرن والے بھین بھرا ملے نیں!
یہوواہ دی محبت لئی شکرگزار ہووو
15. سانوں ایس گل دا پکا یقین کیوں اے کہ اَسی مشکلاں نال نبڑ سکنے آں؟
15 سانوں ساریاں نُوں کدی نہ کدی کسے مشکل دا سامنا کرنا پئے گا۔ پر اَسی سکھ لیا اے کہ ایہناں مشکلاں دا سامنا کردے ویلے اَسی کلّے نئیں ہوواں گے۔ یہوواہ اِک شفیق باپ وانگوں ہمیشاں ساڈا خیال رکھے گا۔ اوہ ساڈیاں اِلتجاواں سُنن تے ساڈی مدد کرن لئی ساڈے نال اے۔ (یسعیاہ 43:2) سانوں پکا یقین اے کہ اَسی کسے وی طرحاں دی مشکل نال نبڑ سکنے آں کیونکہ یہوواہ نے سانوں اوہ سب کجھ دِتا اے جیہڑا مشکلاں نُوں برداشت کرن لئی سانوں چاہی دا اے۔ اوہنے مشکل ویلے چ ساڈی مدد کرن لئی سانوں دُعا کرن دی نعمت، اپنا پاک کلام، ڈھیر سارا روحانی کھانا تے ساڈے ہمایماناں دا ساتھ دِتا اے۔
16. اَسی یہوواہ دی پناہ چ کیویں رہ سکنے آں؟
16 اَسی کِنّے شکرگزار آں کہ ساڈا اسمانی باپ ساڈا ایناں زیادہ خیال رکھدا اے۔ ساڈا دل اوہدے توں خوش اے۔ (زبور 33:21) جدوں اَسی اوہناں ساریاں نعمتاں توں پوری طرحاں فائدہ چُکنے آں جیہڑیاں یہوواہ نے ساڈی مدد لئی سانوں دِتیاں نیں تے اَسی ظاہر کرنے آں کہ اَسی ایس گل لئی بڑے شکرگزار آں کہ یہوواہ ساڈا خیال رکھدا اے۔ پر یہوواہ دی پناہ چ رہن لئی سانوں وی کجھ کرن دی لوڑ اے۔ جے اَسی یہوواہ دے وفادار رہن دی پوری کوشش کراں گے تے اوہ کم کراں گے جیہڑے اوہدی نظر چ صحی نیں تے اَسی ہمیشاں یہوواہ دی پناہ چ رہواں گے۔—1-پطرس 3:12۔
گیت نمبر 105: خدا پیار اے
^ اَج سانوں جیہڑیاں مشکلاں دا سامنا کرنا پیندا اے، اوہناں نال نبڑن لئی سانوں یہوواہ دی مدد دی لوڑ اے۔ ایس مضمون چ سانوں یقین دَوایا گیا اے کہ یہوواہ اپنے بندیاں دا خیال رکھدا اے۔ یہوواہ جان دا اے کہ اوہدا ہر بندہ کیہڑی مشکل چوں لنگھ رہیا اے تے اوہ ایس مشکل نال نبڑن چ اوہدی مدد کردا اے۔
^ ایس مضمون چ کجھ ناں بدل دِتے گئے نیں۔