مطالعے دا مضمون نمبر 40
اوہ بوہت سارے لوکاں نُوں نیکی دی راہ تے لیان گے
جنہاں دی کوشش توں کئی نیکی دی راہ تے چلن لگ پئے اوہ ہمیشاں ہمیشاں تک تاریاں وانگوں چمکن گے۔—دانیایل 12:3۔
گیت نمبر 145: نوِیں دُنیا دا وعدہ
مضمون تے اِک نظر ایس *
1. مسیح دی ہزار سالہ حکمرانی دے دوران کیہڑیاں شاندار گلاں ہون گیاں؟
اوہ بڑا شاندار وقت ہوئے گا جدوں مسیح دی ہزار سالہ حکمرانی دے دوران زمین تے مُردیاں نُوں زندہ کیتا جائے گا۔ اَسی اپنے اوہناں عزیزاں نُوں ویکھن لئی بڑے بےتاب آں جیہڑے موت دی وجہ توں ساڈے توں وِچھڑ گئے نیں۔ یہوواہ وی بالکل ایہو جیہا ای محسوس کردا اے۔ (ایوب 14:15) ذرا سوچو کہ زمین تے ہر کوئی اوس ویلے کِنّاں خوش ہوئے گا جدوں یہوواہ اوہدے عزیزاں نُوں زندہ کر دَوے گا۔ جیویں کہ اَسی پچھلے مضمون چ سکھیا سی نیک لوک جنہاں دے ناں زندگی دی کتاب چ لکھے نیں، اوہناں نُوں زندگی دی قیامت لئی زندہ کیتا جائے گا۔ (اعمال 24:15؛ یوحنا 5:29 ”اُردو ریوائزڈ ورشن“) ہو سکدا اے کہ ساڈے بوہت سارے عزیز اوہناں مُردیاں چ شامل ہون جنہاں نُوں ہرمجِدّون دے بعد، پہلے زندہ کیتا جائے گا۔ * پچھلے مضمون چ اَسی بُرے لوکاں بارے وی گل کیتی سی جیویں کہ اوہ لوک جنہاں نُوں اپنی موت توں پہلاں یہوواہ نُوں جانن یاں اوہدی خدمت کرن دا موقع نئیں ملیا سی۔ اوہناں نُوں عدالت دی قیامت لئی زندہ کیتا جائے گا۔
2، 3. (الف) یسعیاہ 11:9، 10 دے مطابق تلیم دین دا اوہ کیہڑا بندوبست شروع ہوئے گا جیہڑا پہلاں کدی وی نئیں ہویا؟ (ب) ایس مضمون چ اَسی کیہہ سکھاں گے؟
2 جدوں مُردیاں نُوں زندہ کیتا جائے گا تے اوہناں نُوں بوہت ساریاں ہدیتاں دی ضرورت پووے گی۔ (یسعیاہ 26:9؛ 61:11) ایس لئی اوس وقت تلیم دین دا اِک ایہو جیہا بندوبست شروع کیتا جائے گا جیہڑا تریخ چ پہلے کدی نئیں ہویا۔ (یسعیاہ 11:9، 10 نُوں پڑھو۔) ایہہ بندوبست بنان دی کیہہ وجہ ہوئے گی؟ اِک وجہ تے ایہہ وے کہ جیہڑے بھیڑے لوکاں نُوں زندہ کیتا جائے گا اوہناں نُوں یسوع مسیح تے اوہدے فدیے، خدا دی بادشاہی، یہوواہ دے ناں تے اوہدی حکمرانی تے چُکے جان والے اِعتراض بارے سکھنا ہوئے گا۔ ایہدے نال نال نیک لوکاں نُوں وی اوہناں گلاں بارے سکھنا پئے گا جیہڑیاں یہوواہ نے زمین لئی اپنے مقصد بارے ہولی ہولی ظاہر کیتیاں نیں۔ یہوواہ دے ایہناں بندیاں وچوں کجھ تے اوہدا کلام یعنی بائبل دے مکمل ہون توں پہلاں ای فوت ہو گئے سن۔ ایس لئی نیک لوکاں تے بُرے لوکاں دونواں نُوں بوہت کجھ سکھنا پووے گا۔
3 ایس مضمون چ اَسی ایہناں سوالاں تے غور کراں گے: لوکاں نُوں اینے وڈے پیمانے تے تلیم دین دا کم کیویں کیتا جائے گا؟ جے لوک ایس تلیم نُوں قبول کرن گے تے کیہہ ہوئے گا؟ تے جے اوہ اِنج نئیں کرن گے تے فیر کیہہ ہوئے گا؟ ساڈے لئی ایہناں سارے سوالاں دے جواب جاننا بڑا ضروری اے۔ اَگے چل کے اَسی دانیایل تے مکاشفہ دی کتاب چ لکھیاں کجھ ایہو جہیاں پیشینگوئیاں تے غور کراں گے جنہاں دی وجہ توں اَسی ایہہ سمجھ پانواں گے کہ جدوں مُردیاں نُوں زندہ کیتا جائے گا تے کیہہ ہوئے گا۔ آؤ سب توں پہلاں دانیایل 12:1، 2 چ لکھے کجھ شاندار واقعیاں تے غور کرئیے۔
جیہڑے مٹی چ سو رہے نیں جاگ اُٹھن گے
4، 5. دانیایل 12:1 چ کیہڑی خاص گل دَسی گئی اے؟
4 دانیایل 12:1 نُوں پڑھو۔ دانیایل دی کتاب چ اِک توں بعد اِک کئی شاندار واقعے ترتیب نال دَسے گئے نیں جنہاں نے آخری زمانے چ ہونا سی۔ مثال لئی، دانیایل 12:1 چ دَسیا گیا اے کہ میکائیل یعنی یسوع مسیح ”خدا دے بندیاں دے حق چ کھلووے گا۔“ ایس پیشینگوئی چ لکھی ایہہ گل 1914 چ پوری ہوئی جدوں یسوع مسیح نُوں خدا دی بادشاہی دا بادشاہ بنایا گیا۔
5 پر دانیایل نے ایہہ وی دَسیا کہ یسوع مسیح خدا دے بندیاں دے حق چ تکلیف دے اِک ایہو جہے ویلے چ اُٹھے گا جیہڑا قوماں دے شروع توں کدی نئیں ہویا ہوئے گا۔ تکلیف دے ایس ویلے نُوں متی 24:21 چ ”وڈی مصیبت“ کہیا گیا اے۔ تکلیف دا ایہہ وقت ختم ہون تے یعنی ہرمجِدّون چ یسوع مسیح اُٹھے گا۔ ایہدا مطلب اے کہ اوہ خدا دے بندیاں نُوں بچان لئی کاروائی کرے گا۔ مکاشفہ دی کتاب چ ایہناں لوکاں نُوں وڈی بِھیڑ کہیا گیا اے جیہڑی وڈی مصیبت توں نکل آئی اے۔—مکاشفہ 7:9، 14۔
6. جدوں وڈی بِھیڑ وڈی مصیبت توں بچ جائے گی تے اوہدے بعد کیہہ ہوئے گا؟ وضاحت کرو۔ (زمین تے مُردیاں نُوں زندہ کیتے جان بارے ایس رسالے چ مضمون ”اہم سوال“ نُوں وی ویکھو۔)
6 دانیایل 12:2 نُوں پڑھو۔ جدوں وڈی بِھیڑ تکلیف دے ویلے توں نکل آئے گی تے اوہدے بعد کیہہ ہوئے گا؟ پہلے اَسی سمجھنے ساں کہ دانیایل 12:2 چ اسمان تے لوکاں نُوں زندہ کرن دی گل کیتی جا رہی اے یاں اوس وقت دی گل ہو رہی اے جدوں 1918 دے بعد اَسی پہلے توں کِتے زیادہ تیزی نال مُنادی دا کم کرن لگ پئے۔ * پر ہُن اَسی سمجھ گئے آں کہ ایہناں ایتاں چ اوہناں بارے گل کیتی جا رہی اے جنہاں نُوں نوِیں دُنیا چ مُردیاں چوں زندہ کیتا جائے گا۔ اَسی ایہہ کیوں کہہ سکنے آں؟ غور کرو کہ دانیایل 12:2 چ لفظ ”خاک“ استمال ہویا اے تے ایوب 17:16 چ وی لفظ ”خاک“ استمال ہویا اے جدا اشارہ قبر وَل اے۔ ایس لئی اَسی کہہ سکنے آں کہ دانیایل 12:2 چ اصل چ مُردیاں نُوں زندہ کیتے جان دی گل ہو رہی اے تے ایہہ آخری زمانے دے ختم ہون تے ہرمجِدّون دے بعد ہوئے گا۔
7. (الف) ہمیشاں دی زندگی پان لئی مُردیاں چوں زندہ ہون والے لوکاں نُوں کیہہ کرنا پئے گا؟ (ب) اَسی ایہہ کیوں کہہ سکنے آں کہ ایہناں لوکاں نُوں بہتر لحاظ نال زندہ کیتا جائے گا؟
7 دانیایل 12:2 دے مطابق کجھ لوکاں نُوں ہمیشاں دی زندگی دین لئی زندہ کیتا جائے گا۔ ایہدا مطلب اے کہ زندہ ہون والے جیہڑے لوک مسیح دی ہزار سالہ حکمرانی دے دوران یہوواہ بارے جانن گے، اوہدے نال اپنی دوستی مضبوط کردے رہن گے تے اوہدے تے اوہدے پُتر دے حکماں تے عمل کرن گے اوہناں نُوں ہمیشاں دی زندگی ملے گی۔ (یوحنا 17:3) ماضی چ زندہ ہون والے لوکاں نالوں ایہناں لوکاں نُوں بہتر لحاظ نال زندہ کیتا جائے گا۔ (عبرانیوں 11:35) اَسی ایہہ کیوں کہہ سکنے آں؟ کیونکہ ماضی چ جیہڑے لوکاں نُوں زندہ کیتا گیا اوہ فیر توں فوت ہو گئے سن۔
8. کجھ لوکاں نُوں کیس لحاظ نال ہمیشاں تک ذلیل ہون لئی زندہ کیتا جائے گا؟
8 جیہڑے لوکاں نُوں زندہ کیتا جائے گا اوہناں چوں ہر کوئی یہوواہ توں تلیم پانا نئیں چاہوے گا۔ دانیایل دی کتاب چ پیشینگوئی کیتی گئی سی کہ کجھ لوکاں نُوں ہمیشاں تک ذلیل ہون لئی زندہ کیتا جائے گا۔ اِنج کیوں ہوئے گا؟ کیونکہ اوہ یہوواہ دے حکماں دے خلاف جان گے۔ اوہناں دے ناں زندگی دی کتاب چ نئیں لکھے جان گے تے نہ ای اوہناں نُوں ہمیشاں دی زندگی ملے گی۔ ایہدی بجائے اوہ ہمیشاں تک ذلیل ہون گے یعنی اوہناں نُوں ہمیشاں لئی ہلاک کر دِتا جائے گا۔ دانیایل 12:2 چ دَسیا گیا اے کہ مُردیاں چوں زندہ ہون والے لوک بعد چوں جیہڑے کم کرن گے اوہدی بِنا تے یاں تے اوہناں نُوں ہمیشاں دی زندگی ملے گی یاں فیر ہمیشاں دی موت۔—مکاشفہ 20:12۔ *
بوہت سارے لوکاں نُوں نیکی دی راہ تے لیایا جائے گا
9، 10. وڈی مصیبت دے بعد ہور کیہہ ہوئے گا؟ تے کون اسمان دی روشنی وانگوں چمکن گے؟
9 دانیایل 12:3 نُوں پڑھو۔ تکلیف دا ویلا آن دے بعد ہور کیہہ ہوئے گا؟ دانیایل 12:2 دے بعد 3 ایت چ وی اِک ایہو جہے کم بارے دَسیا گیا اے جیہڑا وڈی مصیبت دے بعد ہوئے گا۔
10 کون اسمان دی روشنی وانگوں چمکن گے؟ ایہدا جواب سانوں متی 13:43 چ یسوع مسیح دی ایس گل توں مِلدا اے: اوس ویلے نیک لوک اپنے اسمانی باپ دی بادشاہی چ سورج وانگوں چمکن گے۔ ایس ایت توں پچھلیاں ایتاں توں پتا چلدا اے کہ یسوع مسیح بادشاہی دے بیٹیاں یعنی اپنے مسح شُدہ بھراواں دی گل کر رہیا سی، جیہڑے اوہدے نال مِل کے اسمان توں حکمرانی کرن گے۔ (متی 13:38) تے فیر دانیایل 12:3 چ وی مسحشُدہ مسیحیاں تے اوس کم بارے گل ہو رہی اے جیہڑا اوہ مسیح دی ہزار سالہ حکمرانی دے دوران کرن گے۔
1 لکھ 44 ہزار مسحشُدہ مسیحی ہزار سالاں دے دوران یسوع مسیح دے نال مِل کے تلیم دین دے کم چ رہنمائی کرن گے۔ (پیراگراف نمبر 11 نُوں ویکھو۔)
11، 12. مسیح دی ہزار سالہ حکمرانی دے دوران1 لکھ 44 ہزار مسحشُدہ مسیحی کیہڑا کم کرن گے؟
11 مسحشُدہ مسیحیاں دی محنت دی وجہ توں بوہت سارے لوک نیک کیویں بنن گے؟ مسحشُدہ مسیحی ہزار سالاں دے دوران یسوع مسیح نال مِل کے تلیم دین دے کم چ رہنمائی کرن گے۔ 1 لکھ 44 ہزار مسحشُدہ مسیحی صرف بادشاہواں دے طور تے ای نئیں سگوں کاہناں دے طور تے وی خدمت کرن گے۔ (مکاشفہ 1:6؛ 5:10؛ 20:6) اِنج اوہ قوماں نُوں شفا دین گے یعنی اوہ انساناں نُوں ہولی ہولی بےعیب بنا دین گے۔ (مکاشفہ 22:1، 2؛ حِزقیایل 47:12) اوہناں نُوں ایہہ کم کر کے واقعی بڑی خوشی ملے گی۔
12 بوہت سارے نیک لوکاں چ کون کون شامل ہون گے؟ یاد رکھو کہ اوس ویلے نوِیں دُنیا چ صرف اوہ لوک ای نئیں ہون گے جنہاں نُوں زندہ کیتا جائے گا سگوں اوتھے ہرمجِدّون توں بچن والے لوک تے شاید اوہ بچے وی ہون گے جیہڑے نوِیں دُنیا چ پیدا ہون گے۔ ایہہ سارے لوک ہزار سالہ حکمرانی دے آخر تے گُناہ توں پاک ہو جان گے۔ پر ایہناں دے ناں زندگی دی کتاب چ ہمیشاں لئی کدوں لکھے جان گے؟
آخری اِمتحان
13، 14. نوِیں دُنیا چ سارے بےعیب انساناں نُوں ہمیشاں دی زندگی حاصل کرن لئی کیہہ ثابت کرنا ہوئے گا؟
13 یاد رکھو کہ جے کوئی گُناہ توں پاک ہوئے تے ایہدا ایہہ مطلب نئیں کہ اوہنوں ہمیشاں دی زندگی ضرور ملے گی۔ آدم تے حوا وی گُناہ توں پاک سن پر ہمیشاں دی زندگی پان لئی اوہناں نُوں ایہہ ثابت کرنا سی کہ اوہ یہوواہ دے فرمانبردار نیں۔ پر افسوس دی گل اے کہ اوہناں نے اِنج نئیں کیتا۔—رومیوں 5:12۔
14 ہزار سال دے آخر تے زمین تے رہن والے سارے لوک گُناہ توں پاک ہو جان گے۔ پر کیہہ سارے بےعیب انسان ہمیشاں تک یہوواہ دی حکمرانی دی حمایت کرن گے؟ یاں کیہہ اوہناں وچوں کجھ بےعیب ہون دے باوجود آدم تے حوا وانگوں خدا دی نافرمانی کرن گے؟ سانوں ایہناں سوالاں دے جواب کیویں مِل سکدے نیں؟
15، 16. (الف) سارے انساناں نُوں یہوواہ لئی اپنی فرمانبرداری ثابت کرن دا موقع کدوں ملے گا؟ (ب) ایس اِمتحان دا کیہہ نتیجہ نکلے گا؟
15 شیطان نُوں ہزار سالاں لئی اتھاہ گڑھے چ بند کر دِتا جائے گا۔ اوس دوران اوہ کسے نُوں وی گمراہ نئیں کر سکے گا۔ پر ہزار سالاں دے آخر تے شیطان نُوں قید توں رہا کیتا جائے گا۔ اوہدوں اوہ بےعیب انساناں نُوں گمراہ کرن دی کوشش کرے گا۔ اِنج زمین تے موجود بےعیب انساناں کول ایہہ ثابت کرن دا موقع ہوئے گا کہ اوہ خدا دے ناں دی عزت تے اوہدی حکمرانی دی حمایت کردے نیں یاں نئیں۔ (مکاشفہ 20:7-10) ہر انسان دے فیصلے توں ظاہر ہوئے گا کہ کیہہ اوہدا ناں زندگی دی کتاب چ ہمیشاں لئی لکھیا جانا چاہی دا اے یاں فیر نئیں۔
16 کجھ لوک جنہاں دی تعداد سانوں نئیں پتہ آدم تے حوا وانگوں یہوواہ توں موُنہہ پھیر لین گے تے اوہدی حکمرانی دی حمایت نئیں کرن گے۔ اوہناں دا کیہہ انجام ہوئے گا؟ ایہدا جواب سانوں مکاشفہ 20:15 چوں مِلدا اے۔ جِتھے لکھیا اے:جیس کسے دا ناں زندگی دی کتاب چ نئیں لکھیا سی اوہنوں اَگ دی جھیل چ سُٹیا جائے گا۔ ایہدا مطلب اے کہ اوہناں باغی لوکاں نُوں ہمیشاں لئی ختم کر دِتا جائے گا۔ پر خوشی دی گل اے کہ زیادہتر بےعیب انسان ایس آخری اِمتحان چ پورے اُترن گے تے اوہناں دے ناں ہمیشاں لئی زندگی دی کتاب چ لکھ دِتے جان گے۔
آخری زمانے دے دوران
17. اِک فرشتے نے دانیایل نُوں ساڈے زمانے بارے کیہہ دَسیا؟ (دانیایل 12:4، 8-10)
17 اَسی بڑی بےصبری نال اوس وقت دا اِنتظار کر رہے آں جدوں ایہہ ساریاں گلاں پوریاں ہون گیاں۔ پر اِک فرشتے نے دانیایل نُوں آخری زمانے یعنی ساڈے زمانے بارے کجھ ہور خاص گلاں وی دَسیاں۔ (دانیایل 12:4، 8-10 نُوں پڑھو؛ 2-تیمُتھیُس 3:1-5) فرشتے نے کہیا کہ صحی علم بوہت ودھ جائے گا۔ ایہدے چ کوئی شک نئیں کہ دانیایل دی کتاب چ لکھیاں پیشینگوئیاں نُوں خدا دے بندیاں نے ہور چنگی طرحاں سمجھ جانا سی۔ فرشتے نے ایہہ وی کہیا کہ آخری زمانے چ بھیڑے لوک بھیڑے کم کردے رہن گے تے اوہناں وچوں کوئی نئیں سمجھے گا۔
18. چھیتی ای بھیڑے لوکاں نال کیہہ ہوئے گا؟
18 شاید سانوں لگے کہ بھیڑے لوکاں نُوں اوہناں دے بھیڑے کماں لئی سزا نئیں مِلدی۔ (ملاکی 3:14، 15) پر بوہت چھیتی یسوع مسیح بکریاں یعنی بھیڑے لوکاں دی عدالت کرے گا تے بھیڈاں نُوں بکریاں توں وَکھ کرے گا۔ (متی 25:31-33) بھیڑے لوک وڈی مصیبت چ مارے جان گے تے اوہناں نُوں نوِیں دُنیا چ زندہ نئیں کیتا جائے گا۔ اوہناں دے ناں یادگیری دی اوس کتاب چ نئیں لکھے ہون گے جدا ذکر ملاکی 3:16 چ ہویا اے۔
19. سانوں ہُن کیہہ کرنا چاہی دا اے تے کیوں؟ (ملاکی 3:16-18)
19 ساڈے کول ہُن ایہہ ثابت کرن دا موقع اے کہ اَسی بھیڑے لوکاں چ شامل نئیں آں۔ (ملاکی 3:16-18 نُوں پڑھو۔) یہوواہ اوہناں لوکاں نُوں جمع کر رہیا اے جنہاں نُوں اوہ اپنی خاص ملکیت سمجھدا اے یعنی جنہاں نُوں اوہ بوہت عزیز خیال کردا اے۔ ایہدے چ کوئی شک نئیں کہ اَسی وی اوہناں لوکاں چ شامل ہونا چاہنے آں۔
اوہ کِنّاں شاندار ویلا ہوئے گا جدوں اَسی دانیایل، اپنے عزیزاں تے ہور بوہت سارے لوکاں نُوں نوِیں دُنیا چ زندہ ہوندیاں ویکھاں گے۔ (پیراگراف نمبر 20 نُوں ویکھو۔)
20. خدا نے دانیایل نال کیہڑا آخری وعدہ کیتا؟ تُسی ایس وعدے دے پورے ہون دا اِنتظار کیوں کر رہے او؟
20 ایہدے چ کوئی شک نئیں کہ اَسی اِک شاندار دَور چ رہ رہے آں۔ پر چھیتی ای ایس توں وی زیادہ چنگیاں چیزاں ہون والیاں نیں۔ چھیتی ای اَسی ہر بُرائی نُوں ختم ہوندیاں ویکھاں گے۔ اوہدے بعد اَسی اوس وعدے نُوں پورا ہوندیاں ویکھاں گے جیہڑا یہوواہ نے دانیایل نال کیتا سی۔ اوہ وعدہ ایہہ سی: تُوں دِناں دے آخر چ اپنی میراث چ اُٹھ کھلوویں گا۔ (دانیایل 12:13) کیہہ تُسی وی اوس ویلے دا بےصبری نال اِنتظار کر رہے او جدوں تُسی دانیایل تے اپنے اوہناں عزیزاں نُوں ملو گے جیہڑے فوت ہو گئے نیں؟ جے ہاں، تے فیر ہُن توں ای یہوواہ دے وفادار رہن دی پوری کوشش کرو۔ ایس طرحاں تُسی ایس گل تے پکا یقین رکھ سکو گے کہ تواڈا ناں زندگی دی کتاب چ لکھیا رہوے گا۔
گیت نمبر 140: ہمیشاں دی زندگی
^ مضمون چ تلیم دین دے اوس بندوبست بارے نوِیں وضاحت پیش کیتی گئی اے جدا ذکر دانیایل 12:2، 3 چ ہویا اے۔ ایہہ کم بوہت وڈے پیمانے تے کیتا جائے گا۔ اَسی ویکھاں گے کہ ایہہ کم کدوں کیتا جائے گا تے کون کون ایہدے چ حصہ لین گے۔ اَسی ایس گل تے وی غور کراں گے کہ تلیم دین دے ایس بندوبست دے ذریعے زمین تے رہن والے لوک اوس آخری اِمتحان لئی کیویں تیار ہون گے جیہڑا مسیح دی ہزار سالہ حکمرانی دے آخر تے ہوئے گا۔
^ شاید سب توں پہلاں اوہناں مُردیاں نُوں زندہ کیتا جائے جیہڑے آخری زمانے چ وفاداری نال یہوواہ دی خدمت کر رہے سن تے فیر اوہناں مُردیاں نُوں جیہڑے اوہناں توں پہلے فوت ہوئے سن۔ جے مُردیاں نُوں ایس ترتیب نال زندہ کیتا جائے گا تے فیر ہر زمانے دے لوکاں کول ایہہ موقع ہوئے گا کہ اوہ مُردیاں چوں زندہ ہون والے اوہناں لوکاں نُوں خوشی نال مِل سکن جنہاں نُوں اوہ پہلے توں جان دے سن۔ مُردیاں نُوں بھانویں جیہڑی وی ترتیب نال زندہ کیتا جائے بائبل چ دَسیا گیا اے کہ اسمان تے ہمیشاں دی زندگی پان والے لوکاں نُوں ترتیب نال زندہ کیتا جاندا اے۔ جے اوہناں نُوں ایس طریقے نال زندہ کیتا جاندا اے تے اَسی اندازہ لا سکنے آں کہ زمین تے وی اِنج ای ہوئے گا۔—1-کُرنتھیوں 14:33؛ 15:23۔
^ ایہہ اوس وضاحت چ تبدیلی اے جیہڑی کتاب ”دانیایل کی نبوت پر دھیان دیں“ دے باب نمبر 17 تے 1 جولائی 1987 دے”واچٹاور“ رسالے دے صفحہ نمبر 21توں 25 چ دِتی گئی سی۔
^ پر اعمال 24:15 چ نیک تے بُرے لوکاں دا ذکر کیتا گیا اے تے یوحنا 5:29 چ اوہناں لوکاں بارے دَسیا گیا اے جنہاں نے چنگے کم کیتے سن تے جنہاں نے بھیڑے کم کیتے سن۔ اصل چ ایہناں ایتاں چ دَسیا گیا اے کہ ایہناں لوکاں نے اپنی موت توں پہلاں کیہڑے کیہڑے کم کیتے سن۔
