مطالعے دا مضمون نمبر 39
کیہہ تواڈا ناں زندگی دی کتاب چ لکھیا اے؟
اوہناں لئی جیہڑے یہوواہ توں ڈردے سن اوہدے حضور یادگار لئی اِک کتاب لکھی گئی۔—ملاکی 3:16۔
گیت نمبر 61: رب دے خادمو اَگے ودھو
مضمون تے اِک نظر *
شروع توں ای یہوواہ زندگی دی کتاب چ لوکاں دے ناں لکھدا آ رہیا اے۔ (پیراگراف نمبر 1، 2 نُوں ویکھو۔)
1. ملاکی 3:16 دے مطابق یہوواہ کیہڑی کتاب لکھدا آ رہیا اے تے ایس کتاب چ کیہہ لکھیا اے؟
ہزاراں سالاں توں یہوواہ اِک بوہت ای خاص کتاب چ اپنے بندیاں دے ناں لکھ رہیا اے۔ ایس کتاب چ سب توں پہلاں یہوواہ دے وفادار بندے ہابل دا ناں لکھیا گیا سی۔ * (لُوقا 11:50، 51) اوس ویلے توں یہوواہ نے ایس کتاب چ ہور وی بوہت سارے لوکاں دے ناں شامل کیتے نیں تے ہُن تے ایہدے چ لکھاں لوکاں دے ناں نیں۔ بائبل چ ایس کتاب نُوں ”یادگاری دی کتاب،“ ”زندگی دی کتاب“ تے ”زندگی دا طومار“ کہیا گیا اے۔ ایس مضمون چ ایس کتاب نُوں ”زندگی دی کتاب“ کہیا گیا اے۔—ملاکی 3:16 نُوں پڑھو؛ مکاشفہ 3:5؛ 17:8۔
2. زندگی دی کتاب چ کِنہاں دے ناں لکھے نیں تے اَسی کیہہ کر سکنے آں تاکہ ساڈا ناں وی ایس کتاب چ لکھیا جائے؟
2 ایس کتاب چ اوہناں لوکاں دے ناں لکھے نیں جیہڑے یہوواہ کولوں ڈردے نیں، بڑی عزت نال اوہدی عبادت کردے نیں تے اوہدے ناں نُوں پاک من دے نیں۔ اوہناں لوکاں کول ہمیشاں دی زندگی پان دا موقع ہوئے گا۔ جے اَسی یسوع مسیح دی قربانی تے ایمان لیا کے یہوواہ نال اپنی دوستی مضبوط کراں گے تے ساڈے ناں وی ایس کتاب چ لکھے جا سکدے نیں۔ (یوحنا 3:16، 36) اَسی سارے ای چاہنے آں کہ ساڈے ناں ایس کتاب چ لکھے ہون فیر بھانویں اَسی اسمان تے ہمیشاں دی زندگی پان دی امید رکھدے ہوئیے یاں زمین تے۔
3، 4. (الف) جے ہُن ساڈا ناں زندگی دی کتاب چ لکھیا ہویا اے تے کیہہ سانوں ہمیشاں دی زندگی لازمی ملے گی؟ (ب) ایس مضمون تے اگلے مضمون چ اَسی کیہڑیاں گلاں تے غور کراں گے؟
3 جنہاں دا ناں زندگی دی کتاب چ لکھیا ہویا اے، کیہہ اوہناں نُوں ہمیشاں دی زندگی لازمی ملے گی؟ ایس سوال دا جواب سانوں اوس گل توں مِلدا اے جیہڑی یہوواہ نے موسیٰ نُوں کہی سی۔ خروج 32:33 چ یہوواہ نے کہیا: جنہے میرا گُناہ کیتا اے میں اوہدے ناں نُوں اپنی کتاب چوں مٹا دَواں گا۔ ایہدا مطلب اے کہ زندگی دی کتاب چ جیہڑے ناں لکھے ہوئے نیں اوہ مٹائے جا سکدے نیں۔ ایہہ بالکل اِنج ای اے جیویں یہوواہ نے حالے ایہہ ناں پنسل نال لکھے نیں۔ (مکاشفہ 3:5) ایس لئی سانوں پوری کوشش کرنی چاہی دی اے کہ یہوواہ ایس کتاب چ ساڈے ناں سیاہی نال یعنی ہمیشاں لئی لکھ دَوے۔
4 پر شاید ساڈے ذہن چ ایہو جہے سوال آن: بائبل چ اوہناں لوکاں بارے کیہہ دَسیا گیا اے جنہاں دے ناں زندگی دی کتاب چ لکھے ہوئے نیں تے جنہاں دے ناں ایہدے چ نئیں لکھے ہوئے؟ جنہاں لوکاں دے ناں ایس کتاب چ لکھے رہن گے اوہناں نُوں ہمیشاں دی زندگی کدوں ملے گی؟ نالے کیہہ اوہناں لوکاں دے ناں وی زندگی دی کتاب لکھے جا سکدے نیں جیہڑے یہوواہ نُوں جانے بغیر ای فوت ہو گئے نیں؟ ایس مضمون تے اگلے مضمون چ اَسی ایہناں سوالاں دے جواب حاصل کراں گے۔
کِنہاں دے ناں کتاب چ لکھے نیں؟
5، 6. (الف) فِلپّیوں 4:3 دے مطابق زندگی دی کتاب چ لکھے نانواں چ کِنہاں دے ناں شامل نیں؟ (ب) اوہناں دے ناں زندگی دی کتاب چ ہمیشاں لئی کدوں لکھے جان گے؟
5 زندگی دی کتاب چ کِنہاں دے ناں شامل نیں؟ ایس سوال دا جواب جانن لئی آؤ لوکاں دے پنج فرق فرق گروہواں تے غور کرئیے۔ ایہناں وچوں کجھ دے ناں ایس کتاب چ لکھے نیں تے کجھ دے نئیں۔
6 پہلے گروہ چ اوہ لوک شامل نیں جنہاں نُوں اسمان تے یسوع نال حکمرانی کرن لئی چُنیا گیا اے۔ کیہہ اوہناں دے ناں ایس کتاب چ لکھے ہوئے نیں؟ جی ہاں۔ پولُس رسول نے فِلپّی چ رہن والے مسیحیاں نُوں دَسیا کہ مسح شُدہ مسیحیاں یعنی یسوع نال حکمرانی کرن والیاں دے ناں زندگی دی کتاب چ لکھے ہوئے نیں۔ (فِلپّیوں 4:3 نُوں پڑھو۔) جے ایہہ مسیحی چاہندے نیں کہ اوہناں دے ناں ایس کتاب چ لکھے رہن تے اوہناں نُوں یہوواہ دا وفادار رہنا ہوئے گا۔ فیر جدوں اوہناں تے آخری مُہر لگ جائے گی تے اوہناں دے ناں ایس کتاب چ ہمیشاں لئی لکھ دِتے جان گے۔ ایہہ یاں تے اوہناں دی موت توں پہلاں ہوئے گا یاں فیر وڈی مصیبت دے شروع ہون توں پہلاں۔—مکاشفہ 7:3۔
7. مکاشفہ 7:16، 17 دے مطابق وڈی بِھیڑ چ شامل لوکاں دے ناں زندگی دی کتاب چ کدوں ہمیشاں لئی لکھ دِتے جان گے؟
7 دُوجے گروہ چ یسوع دِیاں ہور بھیڈاں دی وڈی بِھیڑ شامل اے۔ کیہہ اوہناں دے ناں حالے زندگی دی کتاب چ لکھے ہوئے نیں؟ جی ہاں۔ کیہہ اوہناں دے ناں اوہدوں وی ایس کتاب چ لکھے ہون گے جدوں اوہ ہرمجِدّون توں بچ جان گے؟ جی بالکل۔ (مکاشفہ 7:14) یسوع مسیح نے دَسیا سی کہ ایہناں لوکاں نُوں ہمیشاں دی زندگی ملے گی۔ (متی 25:46) پر جیہڑے لوک ہرمجِدّون توں بچ جان گے، اوہناں نُوں ہمیشاں دی زندگی فوراً نئیں ملے گی۔ اِک طرحاں نال اوہناں دے ناں زندگی دی کتاب چ پنسل نال لکھے رہن گے۔ یسوع مسیح اپنی ہزار سالہ حکومت دے دوران اوہناں دی گلہبانی کرے گا تے اوہناں نُوں زندگی دے پانی دے چشمیاں کول لے جائے گا۔ جیہڑے لوک یسوع مسیح دی رہنمائی نُوں قبول کرن گے تے آخری اِمتحان دے ویلے یہوواہ دے وفادار رہن گے، اوہناں دے ناں ہمیشاں لئی زندگی دی کتاب چ لکھ دِتے جان گے۔—مکاشفہ 7:16، 17 نُوں پڑھو۔
8. کِنہاں دے ناں زندگی دی کتاب چ نئیں لکھے جان گے تے اوہناں نال کیہہ ہوئے گا؟
8 تیجے گروہ چ اوہ لوک شامل نیں جنہاں نُوں بکریاں کہیا گیا اے تے اوہناں نُوں ہرمجِدّون دی جنگ چ ہلاک کیتا جائے گا۔ اوہناں دے ناں زندگی دی کتاب چ نئیں لکھے ہوئے۔ یسوع مسیح نے کہیا سی کہ اوہناں دی سزا ہمیشاں دی موت ہوئے گی۔ (متی 25:46) ایس بارے پولُس رسول نے کہیا کہ اوہناں لوکاں نُوں ہمیشاں دی ہلاکت دی سزا سنائی جائے گی۔ (2-تھسلُنیکیوں 1:9؛ 2-پطرس 2:9) پاک روح دے خلاف گُناہ کرن والے لوکاں نُوں وی ہمیشاں دی زندگی نئیں سگوں ہمیشاں دی ہلاکت ملے گی۔ ایس لئی اوہناں نُوں مُردیاں چوں زندہ نئیں کیتا جائے گا۔ (متی 12:32؛مرقس 3:28، 29؛عبرانیوں 6:4-6) آؤ ہُن اوہناں دو گروہواں بارے گل کرئیے جنہاں نُوں زمین تے مُردیاں چوں زندہ کیتا جائے گا۔
اوہ لوک جنہاں نُوں زندہ کیتا جائے گا
9. اعمال 24:15 دے مطابق لوکاں دے کِنہاں دو گروہواں نُوں زمین تے مُردیاں چوں زندہ کیتا جائے گا تے ایہناں دونواں گروہواں چ کیہہ فرق اے؟
9 بائبل چ دَسیا گیا اے کہ نیک تے بُرے لوکاں نُوں زمین تے مُردیاں چوں زندہ کیتا جائے گا تے اوہناں نُوں ہمیشاں دی زندگی حاصل کرن دا موقع دِتا جائے گا۔ (اعمال 24:15 نُوں پڑھو۔) نیک لوک اوہ نیں جنہاں نے مردے دم تک وفاداری نال یہوواہ دی عبادت کیتی۔ بُرے لوک اوہ نیں جنہاں نے یہوواہ دی عبادت نئیں کیتی سگوں اوہناں چوں زیادہتر لوکاں نے بھیڑے کم کیتے سن۔ نیک تے بُرے دونواں طرحاں دے لوکاں نُوں زندہ کیتا جائے گا تے کیہہ فیر اوہناں ساریاں دے ناں زندگی دی کتاب چ لکھے نیں؟ ایس سوال دا جواب جانن لئی آؤ اِک اِک کر کے ایہناں دونواں گروہواں بارے گل کریئے۔
10. نیک لوکاں نُوں کیوں زندہ کیتا جائے گا تے اوہناں چوں کجھ نُوں کیہہ کرن دا شرف ملے گا؟ (ایس رسالے چ زمین تے مُردیاں نُوں زندہ کرن بارے ”اہم سوال“ نُوں ویکھو۔)
10 چوتھے گروہ چ زندہ ہون والے نیک لوک شامل نیں۔ مرن توں پہلاں اوہناں دے ناں زندگی دی کتاب چ لکھے گئے سن۔ پر جدوں اوہ فوت ہو گئے تے کیہہ اوہناں دے ناں ایس کتاب چوں ہٹا دِتے گئے؟ جی نئیں، کیونکہ اوہ سب یہوواہ دی یاد چ حالے وی زندہ نیں۔ یاد کرو کہ یسوع مسیح نے کہیا سی کہ یہوواہ مُردیاں دا نئیں سگوں زندہ لوکاں دا خدا اے کیونکہ اوہدی نظر چ اوہ سارے زندہ نیں۔ (لُوقا 20:38) ایہدا مطلب ایہہ وے کہ جدوں نیک لوکاں نُوں زمین تے مُردیاں چوں زندہ کیتا جائے گا تے اوہناں دے ناں زندگی دی کتاب چ موجود ہون گے پر ایہہ پنسل نال لکھے ہون گے۔ (لُوقا 14:14) اوہناں لوکاں چوں کجھ نُوں زمین تے سرداراں دے طور تے مقرر کیتا جائے گا۔—زبور 45:16۔
11. بُرے لوکاں نُوں کیہہ کرن دی ضرورت ہوئے گی تاکہ اوہناں دے ناں زندگی دی کتاب چ لکھے جان؟
11 آؤ ہُن پنجویں گروہ بارے گل کریئے یعنی مُردیاں چوں زندہ ہون والے بُرے لوک۔ شاید اوہ یہوواہ دے حکماں بارے نئیں جان دے سن ایس لئی اوہناں نے مرن توں پہلاں اوہدے معیاراں مطابق زندگی نئیں گزاری سی۔ ایسے وجہ توں اوہناں دے ناں زندگی دی کتاب چ نئیں لکھے گئے سن۔ ایہناں لوکاں نُوں مُردیاں چوں زندہ کر کے یہوواہ اوہناں نُوں موقع دَوے گا تاکہ اوہناں دے ناں وی ایس کتاب چ لکھے جان۔ ایہناں بُرے لوکاں نُوں بوہت زیادہ مدد دی لوڑ ہوئے گی تاکہ اوہ اپنے آپ نُوں بدلن کیونکہ ایہناں وچوں کجھ نے مرن توں پہلاں اپنی زندگی چ بوہت ای بھیڑے کم کیتے سن۔ ایس لئی اوہناں نُوں یہوواہ دے معیاراں مطابق چلنا سکھنا پووے گا۔ خدا دی بادشاہی چ ایہناں لوکاں نُوں اوہدی مرضی بارے سکھان دا بندوبست کیتا جائے گا تے اینے وڈے پیمانے تے تلیم دین دا کم زمین تے پہلاں کدی نئیں ہویا ہوئے گا۔
12. (الف) بُرے لوکاں نُوں کون تلیم دَوے گا؟ (ب) اوہناں لوکاں نال کیہہ ہوئے گا جیہڑے سکھیاں ہوئیاں گلاں تے عمل کرن توں اِنکار کر دین گے؟
12 بُرے لوکاں نُوں یہوواہ دے نیک معیاراں بارے کون سکھائے گا؟ ایہہ کم وڈی بِھیڑ چ شامل لوک تے اوہ نیک لوک کرن گے جنہاں نُوں مُردیاں چوں زندہ کیتا جائے گا۔ زندہ ہون والے بُرے لوکاں نُوں کیہہ کرنا ہوئے گا تاکہ اوہناں دے ناں زندگی دی کتاب چ لکھے جان؟ اوہناں نُوں یہوواہ نال قریبی دوستی کر کے اپنی زندگی اوہدے ناں کرنی ہوئے گی۔ یسوع مسیح تے اوہدے نال عدالت کرن والے مسحشُدہ مسیحی اسمان توں ویکھ رہے ہون گے کہ بُرے لوک سکھیاں ہوئیاں گلاں تے عمل کر رہے نیں یاں نئیں۔ (مکاشفہ 20:4) جیہڑے لوک یہوواہ دی تلیم نُوں قبول نئیں کرن گے اوہناں نُوں ختم کر دِتا جائے گا فیر بھانویں اوہناں دی عمر 100 سال ای کیوں نہ ہووے۔ (یسعیاہ 65:20) یہوواہ خدا تے یسوع مسیح دلاں نُوں پڑھ سکدے نیں تے اوہ نوِیں دُنیا چ کسے وی طرحاں دی بُرائی نُوں برداشت نئیں کرن گے۔—یسعیاہ 11:9؛ 60:18؛ 65:25؛ یوحنا 2:25۔
زندگی پان تے سزا پان لئی زندہ کیتے جان والے مُردے
13، 14. (الف) پہلاں اَسی یوحنا 5:29 چ لکھی یسوع دی گل دی کیہہ وضاحت کرنے ساں؟ (ب) ایس ایت نُوں پڑھدے ویلے سانوں کیہڑی گل تے غور کرنا چاہی دا اے؟
13 یسوع مسیح نے وی اوہناں لوکاں دا ذکر کیتا جنہاں نُوں زمین تے مُردیاں چوں زندہ کیتا جائے گا۔ اوہنے کہیا:ایس گل توں حیران نہ ہووو کیونکہ اوہ ویلا آندا اے کہ جِنّے وی قبراں وچ نیں اوہدی آواز سُن کے نِکلن گے۔ جنہاں نے نیکی کیتی اے زندگی دی قیامت دے واسطے تے جنہاں نے بدی کیتی اے سزا دی قیامت دے واسطے۔ (یوحنا 5:28، 29 ”اُردو ریوائزڈ ورشن“) یسوع مسیح دی ایس گل دا کیہہ مطلب سی؟
14 ہُن تک اَسی سمجھنے ساں کہ یسوع مسیح ایہناں ایتاں چ اوہناں کماں دا ذکر کر رہیا اے جیہڑے لوک زندہ ہون توں بعد کرن گے یعنی کجھ لوک چنگے کم کرن گے تے کجھ لوک بھیڑے کم کرن گے۔ پر غور کرو کہ 29 ایت چ یسوع مسیح نے ایہہ نئیں کہیا کہ لوک مُردیاں چوں زندہ ہون توں بعد نیکی یاں بدی کرن گے، سگوں اوہنے کہیا کہ جنہاں نے چنگے کم کیتے سن تے جنہاں نیں بھیڑے کم کیتے سن۔ ایہدے توں پتہ چلدا اے کہ ایہناں لوکاں نے چنگے یاں بھیڑے کم اپنی موت توں پہلاں کیتے سن۔ ایہہ وضاحت بالکل ٹھیک اے کیونکہ نوِیں دُنیا چ کوئی بُرائی برداشت نئیں کیتی جائے گی۔ پر ایس ایت چ ”زندگی دی قیامت“ تے ”سزا دی قیامت“ دا کیہہ مطلب اے؟
15. کِنہاں نُوں ”زندگی دی قیامت“ ملے گی تے کیوں؟
15 جنہاں نیک لوکاں نے مرن توں پہلاں چنگے کم کیتے سن اوہناں نُوں زندگی دی قیامت ملے گی کیونکہ اوہناں دے ناں پہلاں توں ای زندگی دی کتاب چ لکھے ہوئے سن۔ ایہدا مطلب اے کہ جنہاں لوکاں دی نیکی بارے یوحنا 5:29 چ دَسیا گیا اے، اوہناں نُوں ای اعمال 24:15 چ نیک کہیا گیا اے۔ ایہہ وضاحت رومیوں 6:7 نال وی میل کھاندی اے جِتھے لکھیا اے: جیہڑا بندہ مر گیا اوہدا گُناہ معاف ہو گیا۔ جدوں نیک لوک مر جاندے نیں تے یہوواہ اوہناں دے گُناہواں نُوں معاف کر دیندا اے۔ پر اوہ اوہناں دے چنگے کماں نُوں نئیں بُھل دا۔ (عبرانیوں 6:10) ایہدے چ کوئی شک نئیں کہ مُردیاں چوں زندہ ہون والے نیک لوکاں نُوں ہمیشاں یہوواہ دے وفادار رہنا پئے گا تاکہ اوہناں دے ناں زندگی دی کتاب چ لکھے رہن۔
16. ”سزا دی قیامت“ دا کیہہ مطلب اے؟
16 اوہناں لوکاں نال کیہہ ہوئے گا جنہاں نے اپنی موت توں پہلاں بھیڑے کم کیتے سن؟ ایہہ سچ اے کہ مرن توں بعد اوہناں دے گُناہ معاف ہو گئے پر جیوندے جی اوہ یہوواہ دی مرضی تے نئیں چلدے سن۔ ایس لئی اوہناں دے ناں زندگی دی کتاب چ نئیں لکھے ہوئے۔ ایہدا مطلب اے کہ جنہاں لوکاں دی بدی بارے یوحنا 5:29 چ دَسیا گیا اے، اوہناں نُوں ای اعمال 24:15 چ بُرے کہیا گیا اے۔ اوہناں نُوں سزا دی قیامت ملے گی۔ * ایہدا مطلب ایہہ وے کہ یسوع مسیح اوہناں بُرے لوکاں دے کماں نُوں ویکھ کے اوہناں بارے فیصلہ کرے گا۔ (لُوقا 22:30) ایہہ فیصلہ کرن چ وقت لگے گا کہ اوہناں دے ناں زندگی دی کتاب چ لکھے جان گے یاں نئیں۔ جے بُرے لوک اپنے آپ نُوں بدل کے اپنی زندگی یہوواہ دے ناں کرن گے تے فیر اوہناں دے ناں زندگی دی کتاب چ لکھ دِتے جان گے۔
17، 18. (الف) اوہناں سارے لوکاں نُوں کیہہ کرنا ہوئے گا جنہاں نُوں زمین تے مُردیاں چوں زندہ کیتا جائے گا؟ (ب) مکاشفہ 20:12، 13 چ کِنہاں کماں بارے گل کیتی گئی اے؟
17 بھانویں کسے نے اپنی موت توں پہلاں چنگے کم کیتے سن یاں بھیڑے، زندہ ہون توں بعد اوہنوں اوہناں نوِیاں کتاباں چ لکھے حکماں مطابق زندگی گزارنی ہوئے گی جیہڑیاں 1000 سال دے دوران کھولیاں جان گیاں۔ یوحنا رسول نے اِک رُویا ویکھی جدے بارے اوہنے کہیا: میں ویکھیا کہ سارے مُردے یعنی وڈے تے چھوٹے، تخت دے سامنے کھلوتے نیں تے کتاباں کھولیاں گئیاں سن۔ نالے اِک ہور کتاب وی کھولی گئی۔ ایہہ زندگی دی کتاب سی۔ فیر مُردیاں دی عدالت اوہناں دے کماں مطابق تے اوہناں کتاباں چ لکھیاں گلاں مطابق کیتی گئی۔—مکاشفہ 20:12، 13۔
18 مُردیاں چوں زندہ ہون توں بعد ہر اِک دی عدالت کیہڑے کماں مطابق کیتی جائے گی؟ کیہہ اوہناں کماں دے مطابق جیہڑے اوہناں نے اپنی موت توں پہلاں کیتے سن؟ جی نئیں۔ یاد کرو کہ جدوں اوہ مر گئے تے اوہناں دے گُناہ معاف ہو گئے سن۔ ایس لئی مکاشفہ 20:12، 13 چ اوہناں کماں دی گل نئیں ہو رہی جیہڑے اوہناں نے مرن توں پہلاں کیتے سن، سگوں اوہناں کماں بارے گل کیتی جا رہی اے جیہڑے ایہہ لوک نوِیں دُنیا چ یہوواہ دی مرضی جانن توں بعد کرن گے۔ نوح، سموئیل، داؤد تے دانیایل ورگے وفادار بندیاں نُوں وی یسوع مسیح بارے سکھ کے اوہدی قربانی تے ایمان لیانا ہوئے گا۔ جے یہوواہ دے وفادار بندیاں نُوں اِنج کرنا پووے گا تے فیر بُرے لوکاں نُوں تے سکھیاں ہوئیاں گلاں تے عمل کرن دی ہور وی زیادہ لوڑ ہوئے گی۔
19. اوہناں لوکاں دا کیہہ انجام ہوئے گا جیہڑے زندگی دی کتاب چ اپنا ناں لکھوان دا موقع ہتھوں گنوا دین گے؟
19 اوہناں لوکاں دا کیہہ انجام ہوئے گا جیہڑے زندگی دی کتاب چ اپنا ناں لکھوان دا شاندار موقع ہتھوں گنوا دین گے؟ مکاشفہ 20:15 چ لکھیا اے: جیس کسے دا ناں زندگی دی کتاب چ نئیں لکھیا سی، اوہنوں اَگ دی جھیل چ سُٹیا گیا۔ ایہدے توں پتہ چلدا اے کہ ایہو جہے لوکاں نُوں ہمیشاں لئی ختم کر دِتا جائے گا۔ ایہہ کِنّاں ضروری اے کہ اَسی پوری کوشش کریئے کہ ساڈا ناں زندگی دی کتاب چ لکھیا جائے تے ایہدے چوں کدی نہ مٹے۔
اِک بھرا مسیح دی ہزار سالہ حکمرانی دے دوران وڈے پیمانے تے ہون والے تلیم دین دے کم چ حصہ لے رہیا اے۔ (پیراگراف نمبر 20 نُوں ویکھو۔)
20. مسیح دی ہزار سالہ حکومت دے دوران کیہڑا شاندار کم کیتا جائے گا؟ (پہلے صفحے دی تصویر نُوں ویکھو۔)
20 سوچو کہ مسیح دی ہزار سالہ حکومت دا ویلا کِنّاں شاندار ہوئے گا۔ اوس ویلے لوکاں نُوں یہوواہ دی مرضی بارے سکھان دا ایہو جیہا بندوبست کیتا جائے گا جیہڑا ایس توں پہلاں کدی نئیں کیتا گیا۔ پر ایہدے نال نال ایس دوران نیک تے بُرے لوکاں دے کماں نُوں پرکھیا جائے گا۔ (یسعیاہ 26:9؛اعمال 17:31) لوکاں نُوں یہوواہ دی مرضی بارے سکھان دا کم کیویں کیتا جائے گا؟ اگلے مضمون چ ایس سوال دا جواب حاصل کر کے ایس شاندار بندوبست لئی ساڈی قدر ودھدے گی۔
گیت نمبر 147: سدا دی زندگی، رَب دا وعدہ
^ ایس مضمون چ یوحنا 5:28، 29 دی نوِیں وضاحت دِتی گئی اے۔ اَسی ویکھاں گے کہ ایہناں ایتاں چ زندگی دی قیامت تے سزا دی قیامت دا کیہہ مطلب اے تے ایہناں نُوں پان والیاں چ کون کون شامل نیں۔
^ ایس کتاب چ لوکاں دے ناں اوہدوں لکھنے شروع ہوئے جدوں دُنیا دی بنیاد رکھی گئی سی۔ دُنیا توں مُراد اوہ لوک نیں جنہاں کول یسوع دی قربانی دی بِنا تے گُناہواں توں معافی پان دا موقع اے۔ (متی 25:34؛مکاشفہ 17:8) یسوع مسیح نے دَسیا سی کہ ہابل دے زمانے توں دُنیا دی بنیاد رکھی گئی سی۔ ایس لئی اَسی کہہ سکنے آں کہ زندگی دی کتاب چ سب توں پہلاں ہابل دا ناں لکھیا گیا۔
^ ایس ایت چ جیہڑے یونانی لفظ دا ترجمہ ”سزا“ کیتا گیا اے، اوہدا مطلب عدالت وی ہو سکدا اے۔ لفظ عدالت سُن کے ساڈے ذہن چ فوراً سزا دا خیال آندا اے پر ایہدا مطلب ہمیشاں ایہی نئیں ہوندا۔ ایہناں ایتاں توں پہلاں تے بعد دِیاں ایتاں توں پتہ لگدا اے کہ جدوں یسوع نے ایہہ کہیا کہ بُرے لوکاں نُوں سزا دِتی جائے گی تے اوہدا مطلب سی کہ بُرے لوکاں دے کماں نُوں ویکھ کے ایہہ فیصلہ کیتا جائے گا کہ اوہناں نُوں ہمیشاں دی زندگی ملے گی یاں ہمیشاں دی موت دی سزا ملے گی۔
