مطالعے دا مضمون نمبر 14
بزرگو! پولُس دی مثال تے عمل کردے رہوو
میری مثال تے عمل کرو۔—1-کُرنتھیوں 11:1۔
گیت نمبر 101: ایکا رکھو
مضمون تے اِک نظر *
1، 2. پولُس رسول دی مثال تے غور کر کے بزرگاں نُوں فائدہ کیوں ہو سکدا اے؟
پولُس رسول اپنے بھین بھراواں نال بوہت پیار کردا سی تے اوہنے اوہناں دی دیکھبھال کرن لئی سخت محنت کیتی۔ (اعمال 20:31) ایس وجہ توں بھین بھرا وی پولُس نال بوہت پیار کردے سن۔ اِک واری جدوں اِفسس دے بزرگاں نُوں پتہ لگیا کہ ہُن اوہ پولُس نُوں دُبارہ نئیں ویکھ سکن گے تے اوہ پُھٹ پُھٹ کے رون لگ پئے۔ (اعمال 20:37) اَج کلیسیا دے محنتی بزرگ وی اپنے بھین بھراواں نال بوہت پیار کردے نیں تے اوہناں دی مدد کرن چ کوئی کسر نئیں چھڈدے۔ (فِلپّیوں 2:16، 17) پر کدی کدار بزرگاں نُوں کجھ مشکلاں دا سامنا وی کرنا پیندا اے۔ اوہ ایہناں مشکلاں دا مقابلہ کیویں کر سکدے نیں؟
2 کلیسیا دے بزرگ پولُس دی مثال تے عمل کر سکدے نیں۔ (1-کُرنتھیوں 11:1) پولُس کوئی فرشتہ نئیں سگوں ساڈے ورگا ای عیبدار انسان سی تے اوہنوں وی ساڈے وانگوں کدی کدار صحی کم کرنا مشکل لگدا سی۔ (رومیوں 7:18-20) اوہنوں کئی مسئلیاں دا سامنا وی کرنا پیا۔ پر ایس وجہ توں اوہ مایوس نئیں ہویا تے نہ ای اوہنے اپنے بھین بھراواں دی دیکھبھال کرنی چھڈی۔ جدوں بزرگ پولُس رسول دی مثال تے عمل کردے نیں تے اوہ یہوواہ وَلّوں مِلن والیاں ذمےداراں نُوں خوشی خوشی پورا کر سکدے نیں۔ آؤ ویکھئے کہ بزرگ پولُس دی مثال تے کیویں عمل کر سکدے نیں۔
3. ایس مضمون چ اَسی کیہڑیاں خاص گلاں تے غور کراں گے تے ہور کیہہ سکھاں گے؟
3 ایس مضمون چ اَسی اوہناں چار مشکلاں تے غور کراں گے جنہاں دا بزرگاں نُوں اکثر سامنا کرنا پیندا اے۔ (1) دُوجیاں ذمےداریاں دے نال نال مُنادی دا کم کرنا، (2) بھین بھراواں دا حوصلہ ودھان لئی وقت کڈھنا، (3) اپنیاں خامیاں نال لڑنا تے (4) دُوجیاں دِیاں خامیاں دے باوجود اوہناں نال مل کے کم کرنا۔ اَسی ویکھاں گے کہ پولُس نے ایہناں ساریاں مشکلاں دا مقابلہ کیویں کیتا تے بزرگ اوہدی مثال تے عمل کیویں کر سکدے نیں۔
دُوجیاں ذمے داریاں دے نال نال مُنادی دا کم کرنا
4. کدی کدار بزرگاں لئی مُنادی کرن دے معاملے چ چنگی مثال قائم کرنا مشکل کیوں ہو سکدا اے؟
4 ایہہ مشکل کیوں ہو سکدا اے؟ بزرگاں دی ذمےداری اے کہ اوہ مُنادی کرن دے معاملے چ بھین بھراواں لئی اِک چنگی مثال قائم کرن۔ پر اوہناں دِیاں ہور وی کئی ذمےداریاں ہوندیاں نیں۔ مثال لئی، کئی بزرگ اکثر زندگی تے خدمت والی عبادت چ میزبانی کردے نیں یاں فیر کلیسیا دے طور تے مطالعیا کراندے نیں۔ ایہدے علاوہ اوہ تقریراں وی دیندے نیں۔ اوہ بڑی لگن نال کلیسیا چ خادماں نُوں تربیت دیندے نیں تے خوشی نال بھین بھراواں دا حوصلہ ودھاندے نیں۔ (1-پطرس 5:2) کجھ بزرگ ساڈیاں عبادتگاہواں تے تنظیم دِیاں دُوجیاں عمارتاں نُوں بنان تے اوہناں دی دیکھبھال کرن چ حصہ لیندے نیں۔ پر باقی مبشراں وانگوں کلیسیا دے بزرگ وی جیہڑی سب توں اہم ذمےداری نبھاندے نیں اوہ بادشاہی دی خوشخبری سنانا اے۔—متی 28:19، 20۔
5. پولُس نے مُنادی کرن دے معاملے چ اِک چنگی مثال کیویں قائم کیتی؟
5 پولُس دی مثال۔ فِلپّیوں 1:10 توں پتہ چلدا اے کہ پولُس لگن نال مُنادی کیوں کردا سی۔ ایس ایت چ اوہنے مسیحیاں نُوں کہیا: پتہ لاندے رہوو کہ کیہڑیاں گلاں زیادہ ضروری نیں۔ پولُس نے ایس گل تے آپ وی عمل کیتا۔ یہوواہ خدا نے پولُس نُوں مُنادی کرن دی ذمےداری دِتی سی تے اوہنے ساری زندگی ایس ذمےداری نُوں سب توں زیادہ اہمیت دِتی۔ اوہنے عوامی تھانواں تے گھر گھر جا کے مُنادی کیتی۔ (اعمال 20:20) اوہنے ایہہ نئیں سوچیا ہویا سی کہ اوہ بس فلانے وقت یاں فلانے دن مُنادی کرے گا۔ اوہنوں جدوں وی موقع مِلدا سی اوہ دُوجیاں نُوں بادشاہی دی خوشخبری سُناندا سی۔ مثال لئی، جدوں اوہ ایتھنز چ اپنے ساتھیاں دا اِنتظار کر رہیا سی تے اوہنے اوتھوں دے کجھ مشہور لوکاں نُوں بادشاہی دی خوشخبری سُنائی۔ جنہاں وچوں کجھ لوک یسوع تے ایمان وی لے آئے۔ (اعمال 17:16، 17، 34) ایتھوں تک کے قید چ وی پولُس نے گواہی دین دا کوئی وی موقع ہتھوں جان نئیں دِتا۔—فِلپّیوں 1:13، 14؛ اعمال 28:16-24۔
6. پولُس نے دُوجیاں نُوں کیہڑے کماں دی تربیت دِتی؟
6 پولُس نے اپنے وقت نُوں بڑی چنگی طرحاں استمال کیتا۔ اوہ اکثر دُوجیاں نُوں اپنے نال بادشاہی دی مُنادی کرن لئی لے کے جاندا سی۔ مثال لئی، جدوں اوہ پہلی واری فرق فرق علاقیاں چ بادشاہی دی مُنادی کرن گیا تے اوہ اپنے نال یوحنا مرقس نُوں لے کے گیا تے دُوجی واری اوہ اپنے نال تیمُتھیُس نُوں لے کے گیا۔ (اعمال 12:25؛ 16:1-4) بےشک پولُس نے اوہناں دونواں نُوں کلیسیا دا اِنتظام سنبھالن دی بڑی چنگی تربیت دِتی سی۔نالے اوہنے اوہناں نُوں ایہہ وی سکھایا کہ اوہ بھین بھراواں دا حوصلہ کیویں ودھا سکدے نیں تے چنگی طرحاں تلیم کیویں دے سکدے نیں۔—1-کُرنتھیوں 4:17۔
پولُس وانگوں ہر موقعے تے دُوجیاں نُوں خوشخبری سُنان لئی تیار رہوو۔ (پیراگراف نمبر 7 نُوں ویکھو۔) *
7. بزرگ اوس گل تے عمل کیویں کر سکدے نیں جیہڑی پولُس نے اِفسیوں 6:14، 15 چ لکھی؟
7 بزرگ کیہہ سکھ سکدے نیں؟ پولُس وانگوں کلیسیا دے بزرگاں نُوں وی نہ صرف گھر گھر جا کے مُنادی کرنی چاہی دی اے سگوں ہر موقعے تے خوشخبری سنان لئی تیار رہنا چاہی دا اے۔ (اِفسیوں 6:14، 15 نُوں پڑھو۔) مثال لئی، جدوں اوہ بازار جاندے نیں یاں اپنے کم تے ہوندے نیں تے اوہ دُوجیاں نُوں گواہی دے سکدے نیں۔ یاں فیر جدوں اوہ عبادتگاہ بنان دے کم چ حصہ لیندے نیں تے اوہ آلے دوالے رہن والے لوکاں نُوں یاں فیر اوہناں لوکاں نُوں گواہی دے سکدے نیں جنہاں کولوں اوہ سامان خریددے نیں۔ پولُس رسول وانگوں کلیسیا دے بزرگ وی مُنادی کردے ویلے بھین بھراواں تے خادماں نُوں تربیت دے سکدے نیں۔
8. کدی کدار کسے بزرگ نُوں کیہہ کرنا پے سکدا اے؟
8 بزرگاں نُوں کلیسیا یاں تنظیم دے دُوجے کماں چ ایناں مصروف نئیں ہو جانا چاہی دا کہ اوہناں کول مُنادی کرن لئی وقت ای نہ بچے۔ جے اوہ چاہندے نیں کہ اوہناں کول اپنیاں ساریاں ذمےداریاں نُوں پورا کرن لئی وقت ہوئے تے ہو سکدا اے کہ اوہناں نُوں ہور ذمےداریاں لین توں انکار کرنا پووے۔ دُعا کرن تے سوچوچار کرن دے بعد شاید اوہناں نُوں محسوس ہوئے کہ جے اوہ کوئی نوِیں ذمےداری لے لین گے تے اوہناں کول زیادہ ضروری کم کرن لئی وقت نئیں بچے گا۔ ایہناں ضروری کماں چ ہر ہفتے خاندانی عبادت کرنا، لگن نال مُنادی کرنا تے اپنے بچیاں نُوں مُنادی کرنا سکھانا شامل اے۔ ہو سکدا اے کہ کجھ بزرگاں نُوں کوئی ذمےداری لین توں انکار کرنا مشکل لگے۔ پر اوہ یقین رکھ سکدے نیں کہ یہوواہ ایہہ جان دا اے کہ اوہ اِنکار ایس لئی کر رہے نیں تاکہ اوہ اپنیاں ذمےداریاں چنگی طرحاں نبھا سکن۔
بھین بھراواں دا حوصلہ ودھان لئی کم کرنا
9. اپنیاں بوہت ساریاں ذمےداریاں دی وجہ توں بزرگاں نُوں کیہڑا کم کرنا مشکل لگ سکدا اے؟
9 ایہہ مشکل کیوں ہو سکدا اے؟ یہوواہ دے بندیاں نُوں بوہت ساریاں مشکلاں دا سامنا پیندا اے۔ایس آخری زمانے چ سانوں ساریاں نُوں مدد، حوصلے تے تسلی دی ضرورت اے تے کدی کدار کجھ بھین بھراواں نُوں غلط کماں توں بچن لئی وی مدد دی ضرورت ہوندی اے۔ (1-تھسلُنیکیوں 5:14) ایہہ سچ اے کہ بزرگ اوہناں ساریاں مشکلاں نُوں ختم نئیں کر سکدے جنہاں دا یہوواہ دے بندیاں نُوں سامنا ہوندا اے۔ پر فیر وی یہوواہ چاہندا اے کہ بزرگ اوہدیاں بھیڈاں دا حوصلہ ودھان تے اوہناں دی حفاظت کرن لئی جو کجھ وی کر سکدے نیں، اوہ ضرور کرن۔ پر بزرگ اینے مصروف ہون دے باوجود اپنے بھین بھراواں دی مدد کرن لئی وقت کیویں کڈھ سکدے نیں؟
دُوجیاں دی تعریف کرو تے اوہناں دا حوصلہ ودھاؤ۔ (پیراگراف نمبر 10، 12 نُوں ویکھو۔) *
10. 1-تھسلُنیکیوں 2:7 دے مطابق پولُس نے یہوواہ دے بندیاں دا خیال رکھن لئی کیہہ کیتا؟
10 پولُس دی مثال۔ پولُس ہمیشاں اپنے بھین بھراواں دے چنگے کماں دی وجہ توں اوہناں دی تعریف کردا سی تے اوہناں دا حوصلہ ودھاندا سی۔ اوہدے وانگوں بزرگاں نُوں بھین بھراواں نال پیار تے ہمدردی نال پیش آنا چاہی دا اے۔ (1-تھسلُنیکیوں 2:7 نُوں پڑھو۔) پولُس نے اپنے بھین بھراواں نُوں یقین دَوایا کہ اوہ اوہناں نُوں بوہت پیار کردا اے تے یہوواہ وی اوہناں نُوں بوہت پیار کردا اے۔ (2-کُرنتھیوں 2:4؛ اِفسیوں 2:4، 5) پولس کلیسیا دے بھین بھراواں نال دوستاں وانگوں رہندا سی تے اوہناں نال وقت گزاردا سی۔ اوہنے کُھل کے اوہناں نُوں اپنیاں کمزوریاں تے پریشانیاں بارے دَسیا تے اِنج ثابت کیتا کہ اوہنوں اپنے بھین بھراواں تے بھروسا اے۔ (2-کُرنتھیوں 7:5، 1-تیمُتھیُس 1:15) پر پولُس دی توجہ اپنیاں پریشانیاں تے نئیں سی سگوں اوہ اپنے بھین بھراواں دی مدد کرنا چاہندا سی۔
11. پولُس رسول نے کیس وجہ توں اپنے بھین بھراواں دی درستی کیتی؟
11 پولُس رسول نُوں کدی کدار اپنے بھین بھراواں دی درستی وی کرنی پئی۔ پر اوہنے اِنج ایس لئی نئیں کیتا کیونکہ اوہنوں اپنے بھین بھراواں تے غصہ سی۔ سگوں ایہدی وجہ ایہہ سی کہ اوہ اوہناں نال پیار کردا سی تے اوہناں نُوں کئی خطریاں توں بچانا چاہندا سی۔ پولُس پوری کوشش کردا سی کہ اوہ بھین بھراواں دی درستی اِنج کرے کہ اوہناں نُوں اوہدی گل سمجھ وی آ جائے تے اوہناں نُوں بُرا وی نہ لگے۔مثال لئی جدوں پولُس نے کُرنتھس دی کلیسیا نُوں پہلا خط لکھیا تے اوہنے بھین بھراواں دی درستی کرن لئی اوہناں نُوں کجھ گلاں صاف صاف دَسیاں۔ ایس خط نُوں لکھن توں بعد پولُس نے طِطُس نُوں کُرنتھس دے مسیحیاں کول گھلیا کیونکہ اوہ جاننا چاہندا سی کہ اوہدے ایس خط نُوں سُن کے اوتھوں دے بھین بھرا کیہو جیہا محسوس کر رہے نیں۔ اوہنوں ایہہ سُن کے بوہت خوشی ہوئی کہ کُرنتھس دے بھین بھراواں نے اوہدے مشورے نُوں منیا اے۔—2-کُرنتھیوں 7:6، 7۔
12. بزرگ بھین بھراواں دا حوصلہ کیویں ودھا سکدے نیں؟
12 بزرگ کیہہ سکھ سکدے نیں؟ پولُس وانگوں کلیسیا دے بزرگاں نُوں وی بھین بھراواں نال وقت گزارنا چاہی دا اے۔ ایہدا اِک طریقہ ایہہ وے کہ اوہ عبادت شروع ہون توں پہلاں آن تے بھین بھراواں دا حوصلہ ودھان لئی اوہناں نال گل بات کرن۔ کسے بھین بھرا دا حوصلہ ودھان لئی بس کجھ منٹ ای لگدے نیں۔ (رومیوں 1:12؛ اِفسیوں 5:16) جیہڑا بزرگ پولُس دی مثال تے عمل کردا اے اوہ خدا دے کلام دے ذریعے اپنے بھین بھراواں دے ایمان نُوں مضبوط کردا اے تے اوہناں نُوں یقین دَواندا اے کہ خدا اوہناں نال بوہت پیار کردا اے۔اوہ اوہناں نال باقاعدگی نال گل بات کردا اے تے اوہناں دے چنگے کماں لئی اوہناں دی تعریف کردا اے۔ اوہنوں جدوں کدی کسے بھین بھرا دی درستی کرنی پیندی اے تے اوہ ایہدے لئی خدا دے کلام نُوں استمال کردا اے۔ اوہ اوس بھین یاں بھرا نُوں صاف لفظاں چ دَسدا اے کہ اوہنوں کیس معاملے چ بہتری لیان دی ضرورت اے۔ پر اوہ ایہہ ساری گل بات بڑے پیار تے نرمی نال کردا اے کیونکہ اوہ چاہندا ا ے کہ اوہ بھین یاں بھرا اوہدے مشورے تے عمل کرے۔—گلتیوں 6:1۔
اپنیاں خامیاں نال لڑنا
13. اِک بزرگ اپنیاں خامیاں دی وجہ توں کیہہ محسوس کر سکدا اے؟
13 ایہہ مشکل کیوں ہو سکدا اے؟ کلیسیا دے بزرگ وی عیبدار نیں۔ دُوجے بھین بھراواں وانگوں اوہناں کولوں وی غلطیاں ہو جاندیاں نیں۔ (رومیوں 3:23) کجھ بزرگ اپنیاں خامیاں بارے ایناں زیادہ سوچدے نیں کہ اوہ بے حوصلہ ہو جاندے نیں۔ جد کہ کجھ بزرگاں نُوں لگدا اے کہ اوہناں نُوں اپنے آپ نُوں بدلن دی کوئی ضرورت نئیں تے دُوجیاں نُوں اوہناں دِیاں خامیاں تے دھیان نئیں دینا چاہی دا۔
14. فِلپّیوں 4:13 دے مطابق خاکساری نے پولُس دی مدد کیویں کیتی تاکہ اوہ اپنیاں خامیاں نال لڑ سکے؟
14 پولُس دی مثال۔ پولُس بڑا خاکسار سی ایس لئی اوہ ایہہ گل سمجھ گیا سی کہ اوہ کلّا اپنیاں خامیاں نال نئیں لڑ سکدا سگوں اوہنوں خدا دی مدد دی ضرورت اے۔ اِک وقت سی جدوں پولُس صرف اپنی مرضی دے مطابق چلدا سی تے مسیحیاں نُوں بوہت زیادہ اذیت دیندا سی۔ پر فیر اوہنوں اپنیاں غلطیاں دا احساس ہویا تے اوہنے اپنے آپ نُوں بدلیا۔ (1-تیمُتھیُس 1:12-16) یہوواہ دی مدد نال پولُس اِک ایہو جیہا چرواہا بن گیا جیہڑا یہوواہ دِیاں بھیڈاں نال بڑا پیار کردا سی، اوہناں نال ہمدردی کردا سی تے بڑا خاکسار سی۔ پولُس نُوں اپنیاں خامیاں دا پتہ سی پر اوہ صرف ایہناں بارے ای نئیں سوچدا رہیا سگوں اوہنے ایس گل تے پورا یقین رکھیا کہ یہوواہ نے اوہنوں معاف کر دِتا اے۔ (رومیوں 7:21-25) اوہنے ایہہ نئیں سوچیا سی کہ اوہدے کولوں کدی کوئی غلطی نئیں ہوئے گی سگوں اوہ اپنے اندر بہتری لیان دی کوشش کردا رہیا تے ایہہ بھروسا رکھیا کہ یہوواہ بادشاہی دی خوشخبری سُنان چ اوہدی مدد ضرور کرے گا۔—1-کُرنتھیوں 9:27؛ فِلپّیوں 4:13 نُوں پڑھو۔
اپنیاں خامیاں نال لڑن دی پوری کوشش کرو۔ (پیراگراف نمبر 14، 15 نُوں ویکھو۔) *
15. بزرگاں نُوں اپنیاں خامیاں بارے کیہو جہی سوچ رکھنی چاہی دی اے؟
15 بزرگ کیہہ سکھ سکدے نیں؟ جیہڑے بھراواں نُوں بزرگ بنایا جاندا اے اوہ بےعیب نئیں ہوندے۔ ایس لئی یہوواہ چاہندا اے کہ اوہ اپنیاں غلطیاں نُوں منن تے اِک مثالی مسیحی بنن دی کوشش کردے رہن۔ (اِفسیوں 4:23، 24) اِک بزرگ نُوں خدا دے کلام دے ذریعے اپنا جائزہ لینا چاہی دا اے۔ جیہڑیاں گلاں چ اوہنوں بہتری دی ضرورت اے اوہناں چ بہتری لیانی چاہی دی اے۔ فیر یہوواہ اوہدی مدد کرے گا کہ اوہ اپنیاں خامیاں دے باوجود خوش رہوے تے اپنیاں ذمےداریاں نُوں چنگی طرحاں پورا کرے۔—یعقوب 1:25۔
دُوجیاں دِیاں خامیاں دے باوجود اوہناں نال مِل کے کم کرنا
16. جدوں اِک بزرگ صرف دُوجیاں دِیاں خامیاں تے دھیان دیندا اے تے کیہہ ہو سکدا اے؟
16 ایہہ مشکل کیوں ہو سکدا اے؟ جدوں کلیسیا دے بزرگ بھین بھراواں دے نال کافی زیادہ وقت گزاردے نیں تے اوہناں نُوں بھین بھراواں دِیاں خامیاں بڑیاں صاف نظر آندیاں نیں۔ جے بزرگ احتیاط نئیں کردے تے ہو سکدا اے کہ اوہ بھین بھراواں دِیاں خامیاں دی وجہ توں اوہناں توں چڑ جان، اوہناں نال سختی نال پیش آن یاں اوہناں چ کیڑے کڈھن لگ پین۔ پولُس نے مسیحیاں نُوں خبردار کیتا کہ شیطان تے چاہندا ای ایہہ وے کہ مسیحی ایہہ سب کجھ کرن۔—2-کُرنتھیوں 2:10، 11۔
17. اپنے بھین بھراواں بارے پولُس کیہہ سوچدا سی؟
17 پولُس دی مثال۔ پولُس اپنے بھین بھراواں بارے ہمیشاں چنگی سوچ رکھدا سی۔ اوہنوں اوہناں دِیاں خامیاں دا پتہ سی۔ کدی کدار تے اوہناں نے پولُس دا دل دُکھی کیتا پر پولُس جان دا سی کہ جے کسے بھین بھرا نے غلطی کیتی اے تے ایہدا ایہہ مطلب نئیں کہ اوہ بھیڑا اے۔ اوہ بھین بھراواں نال بوہت پیار کردا سی تے اوہناں دِیاں خوبیاں تے دھیان دیندا سی۔ جدوں کسے بھین بھرا کولوں غلطی ہو جاندی سی تے پولُس ایہہ سوچ دا سی کہ اوس بھین بھرا دا ارادہ غلط نئیں سی بس اوہنوں تھوڑی مدد دی ضرورت اے۔
18. پولُس نے یوؤدیہ تے سنتخے دی جیویں مددکیتی اوہدے توں تُسی کیہہ سکھیا اے؟ (فِلپّیوں 4:1-3)
18 ذرا غور کرو کہ پولُس نے فِلپّی دی کلیسیا دِیاں دو بھیناں دی مدد کیویں کیتی۔ (فِلپّیوں 4:1-3 نُوں پڑھو۔) اوہناں وچوں اِک بھین دا ناں یوؤدیہ تے اِک دا ناں سنتخے سی۔ اِنج لگدا اے کہ کسے وجہ توں اوہناں دی آپس چ نئیں بن دی سی۔ پولُس نے نہ تے اوہناں نُوں ڈانٹیا تے نہ ای اوہناں چ نُقص کڈھے سگوں اوہنے اوہناں دِیاں خوبیاں تے دھیان دِتا۔ اوہ دونویں بھیناں لمے عرصے توں یہوواہ دی خدمت کر رہیاں سن۔ پولُس جان دا سی کہ یہوواہ اوہناں دونواں بھیناں نال بوہت پیار کردا اے۔ پولُس اوہناں دونواں بھیناں بارے چنگی سوچ رکھدا سی۔ ایس لئی اوہنے اوہناں دونواں نُوں سمجھایا کہ اوہ اپنے مسئلے نُوں حل کر لین۔ دُوجیاں دِیاں خوبیاں تے دھیان دین دی وجہ توں پولُس خوش رہیا تے فِلپّی دی کلیسیا دے بھین بھراواں نال اپنی دوستی وی مضبوط رکھ پایا۔
دُوجیاں چ نُقص نہ کڈھو۔ (پیراگراف نمبر 19 نُوں ویکھو۔) *
19. (الف) کلیسیا دے بزرگ بھین بھراواں بارے چنگی سوچ کیویں رکھ سکدے نیں؟ (ب) تُسی اوس تصویر توں کیہہ سکھیا اے جدے چ اِک بزرگ عبادتگاہ نُوں صاف کر رہیا اے؟
19 بزرگ کیہہ سکھ سکدے نیں؟ بزرگاں نُوں اپنے بھین بھراواں دیاں خوبیاں تے دھیان دینا چاہی دا اے۔ سارے بھین بھرا عیبدار نیں پر ساریاں چ کوئی نہ کوئی ایہو جہی خوبی ضرور ہوندی اے جدی اَسی تعریف کر سکنے آں۔ (فِلپّیوں 2:3) سچ اے کہ کدی کدار بزرگاں نُوں بھین بھراواں دی سوچ نُوں صحی کرنا پیندا اے۔ پر پولُس وانگوں بزرگاں نُوں پوری کوشش کرنی چاہی دی اے کہ اوہ بھین بھراواں دِیاں ایہو جہیاں گلاں تے کماں تے دھیان نہ دین جنہاں دی وجہ توں اوہناں نُوں غصہ آ سکدا اے۔ سگوں اوہناں نُوں ایس گل تے دھیان دینا چاہی دا اے کہ اوہ بھین بھرا یہوواہ نال کِنّاں پیار کردا اے، مشکلاں دے باوجود کِنّی لگن نال یہوواہ دی خدمت کر رہیا اے تے اوہ کیہڑے کیہڑے چنگے کم کر سکدا اے۔ جدوں بزرگ بھین بھراواں دِیاں خوبیاں تے دھیان دیندے نیں تے کلیسیا چ بھین بھراواں دا آپس چ پیار ودھدا اے۔
پولُس دی مثال تے عمل کردے رہوو
20. بزرگ کیہہ کر سکدے نیں تاکہ اوہ پولُس دی مثال تے عمل کردے رہن؟
20 بزرگو! جے تُسی پولُس دی مثال تے عمل کردے رہوو گے تے توانوں بوہت فائدہ ہوئے گا۔ ایہدے لئی تُسی کجھ ایہو جہے مضمون پڑھ سکدے او جنہاں چ پولُس دی مثال تے گل کیتی گئی اے جیویں کہ اُردو زبان چ 15 جنوری 2013 دے مینارِنگہبانی چ مضمون ”کلیسیا کے بزرگ خوشی میں آپ کے مددگار ہیں۔“ جدوں تُسی ایہو جہے مضمون پڑھدے او تے تُسی اپنے آپ کولوں پچھ سکدے او: ”میں پولُس دی مثال تے کیویں عمل کر سکنا واں تاکہ میں خوشی نال بزرگ دے طور تے اپنیاں ذمےداریاں نُوں پورا کر سکاں؟“
21. بزرگ کیہڑی گل دا یقین رکھ سکدے نیں؟
21 بزرگو! یاد رکھو کہ یہوواہ توانوں بےعیب بنن لئی نئیں کہندا سگوں اوہ توانوں ایہہ کہندا اے کہ تُسی اوہدے وفادار رہوو۔ (1-کُرنتھیوں 4:2، فٹنوٹ) یہوواہ پولُس دی محنت تے وفاداری توں بوہت خوش سی۔ تُسی وی ایس گل دا یقین رکھ سکدے او کہ تُسی یہوواہ لئی جو کجھ وی کردے او، اوہ اوہدے توں بوہت خوش اے۔ یہوواہ کدی وی اوس محنت تے محبت نُوں نئیں بُھلے گا جیہڑی تُسی مُقدساں دی خدمت کر کے اوہدے ناں لئی ظاہر کیتی اے تے ہُن وی کر رہے او۔—عبرانیوں 6:10۔
گیت نمبر 35: ضروری گلاں تے دھیان دَوو
^ بزرگ ساڈی دیکھبھال کرن لئی جیہڑی محنت کردے نیں اَسی اوہدے لئی اوہناں دے بڑے شکرگزار آں۔ ایس مضمون چ اَسی اوہناں مشکلاں تے گل کراں گے جنہاں دا بزرگاں نُوں اکثر سامنا کرنا پیندا اے۔ اَسی ایہہ وی ویکھاں گے کہ بزرگ پولُس دی مثال تے عمل کر کے ایہناں مشکلاں دا مقابلہ کیویں کر سکدے نیں۔ ایس مضمون تے غور کرن نال اَسی بزرگاں دِیاں مشکلاں نُوں چنگی طرحاں سمجھ سکاں گے،اوہناں لئی ساڈے دل چ پیار ودھے گا تے اَسی چنگی طرحاں اوہناں دا ساتھ دے سکاں گے۔
^ تصویر دی وضاحت: اِک بھرا اپنے نال کم کرن والے اِک بندے نُوں چھٹی دے وقت خوشخبری سُنا رہیا اے۔
^ تصویر دی وضاحت: اِک بزرگ اِک ایہو جیہا بھرا دا حوصلہ ودھا رہیا اے جیہڑا کلّا کلّا رہندا اے۔
^ تصویر دی وضاحت: اِک بھرا اِک ایہو جہے بھرا نُوں مشورہ دے رہیا اے جیہڑا کسے گل دی وجہ توں ناراض ہو گیا اے۔
^ تصویر دی وضاحت: اِک بزرگ اوس بھرا نُوں ڈانٹ نئیں رہیا جنہے کوئی کم کرن دی حامی بھری سی پر اوہدا دھیان اوس کم توں ہٹ گیا اے۔
