مطالعے دا مضمون نمبر 11
بپتسمہ لین دے بعد وی نوِیں شخصیت نُوں پاندے رہوو
نوِیں شخصیت نُوں پا لوو۔—کُلسّیوں 3:10۔
گیت نمبر 49: یہوواہ دا جی خوش کرو
مضمون تے اِک نظر *
1. کیہڑی شے خاص طور تے ساڈی شخصیت تے اثر پاندی اے؟
بھانویں ساڈے بپتسمے نُوں کجھ دن ای ہوئے نیں یاں فیر کئی سال،اَسی سارے چاہنے آں کہ ساڈی شخصیت یہوواہ نُوں پسند آئے۔ ایہدے لئی ضروری اے کہ اَسی اپنی سوچ نُوں قابو چ رکھئے۔ پر کیوں؟ کیونکہ ساڈی سوچ دا ساڈی شخصیت تے بڑا اثر ہوندا اے۔ جے ساڈی سوچ بھیڑی ہوئے گی تے اَسی بھیڑیاں گلاں کراں گے تے بھیڑے کم کراں گے۔ (اِفسیوں 4:17-19) پر جے ساڈی سوچ چنگی ہوئے گی تے اَسی چنگیاں گلاں کراں گے تے ایہو جہے کم کراں گے جنہاں توں ساڈا اسمانی باپ خوش ہوئے گا۔—گلتیوں 5:16۔
2. ایس مضمون چ اَسی کیہڑے سوالاں تے غور کراں گے؟
2 جیویں کہ پچھلے مضمون چ دَسیا گیا سی، اَسی بھیڑے خیالاں نُوں اپنے ذہن چ آن توں روک نئیں سکدے۔ پر اَسی ایناں ضرور کر سکنے آں کہ اَسی اوہ بھیڑے کم نہ کرئیے جیہڑے ساڈے ذہن چ آندے نیں۔ سانوں بپتسمہ لین توں پہلاں ایہو جہیاں گلاں تے کم چھڈنے پین گے جنہاں توں یہوواہ نفرت کر دا اے۔ایہہ اوہ پہلاں تے خاص قدم اے جیہڑا سانوں اپنی پرانی شخصیت نُوں لا کے سُٹ دین لئی چکنا پووے گا۔ پر یہوواہ نُوں پوری طرحاں خوش کرن لئی سانوں ایس حکم تے وی عمل کرنا پئے گا: نوِیں شخصیت نُوں پا لوو۔ (کُلسّیوں 3:10) ایس مضمون چ ایہناں سوالاں دے جواب دِتے جان گے: نوِیں شخصیت کیہہ اے؟ تے اَسی کیہہ کر سکنے آں تاکہ اَسی نوِیں شخصیت پا لئیے تے ایہنوں کدی وی نہ لائیے؟
نوِیں شخصیت کیہہ اے؟
3. گلتیوں 5:22، 23 دے مطابق نوِیں شخصیت کیہہ اے؟ تے اَسی ایہنوں کیویں پا سکنے آں؟
3 جیس بندے نے نوِیں شخصیت پائی ہوندی اے، اوہ یہوواہ ورگی سوچ رکھدا اے تے اوہدی مثال تے عمل کر دا اے۔ اوہ اوہناں خوبیاں نُوں وی ظاہر کر دا اے جیہڑیاں پاک روح دے پھل دا حصہ نیں۔ ایس طرحاں اوہ ثابت کر دا اے کہ اوہدی سوچ، جذبات تے کماں تے پاک روح دا اثر اے۔ (گلتیوں 5:22، 23 نُوں پڑھو۔) مثال لئی، اوہ یہوواہ دے بندیاں نال پیار کردا اے۔ (متی 22:36-39) اوہ اوس ویلے وی خوش رہندا اے جدوں اوہنوں مشکلاں دا سامنا کرنا پیندا اے۔ (یعقوب 1:2-4) اوہ صلحپسند ہوندا اے۔ (متی 5:9) اوہ دُوجیاں دے نال صبر تے پیار نال پیش آندا اے۔ (کُلسّیوں 3:13) اوہ اچھائی نال محبت کر دا اے تے چنگے کم کردا اے۔ (لُوقا 6:35) اوہ اپنے کماں توں ثابت کردا اے کہ اوہ اپنے اسمانی باپ تے مضبوط ایمان رکھدا اے۔ (یعقوب 2:18) جدوں دُوجے اوہنوں غصہ دَواندے نیں تے اوہ بےقابو نئیں ہو جاندا۔ جدوں اوہدے سامنے کوئی غلط کم کرن دی ازمیش آندی اے تے اوہ اپنے آپ نُوں قابو چ رکھدا اے۔—1-کُرنتھیوں 9:25، 27؛ طِطُس 3:2۔
4. نوِیں شخصیت پان لئی اوہ خوبیاں ظاہر کرنا کیوں ضروری اے جیہڑیاں گلتیوں 5:22، 23 تے بائبل دِیاں دُوجیاں ایتاں چ لکھیاں نیں؟
4 نوِیں شخصیت نُوں پان لئی سانوں اوہ ساریاں خوبیاں ظاہر کرنیاں پین گیاں جیہڑیاں گلتیوں 5:22، 23 تے بائبل دِیاں دُوجیاں ایتاں چ لکھیاں ہوئیاں نیں۔ * ایہہ خوبیاں ساڈے فرق فرق سُوٹاں وانگوں نئیں نیں جیہڑا اَسی اِک وقت چ اِک ای پانے آں۔اصل چ ایہناں چوں ہر خوبی دا تعلق دُوجی خوبی نال اے۔ مثال لئی، جے اَسی واقعی اپنے گوانڈھی نال محبت کرنے آں تے اَسی اوہدے نال صبر تے رحم نال پیش آواں گے۔ تے جے اَسی واقعی چنگے انسان آں تے اَسی نرمی نال کم لوَاں گے تے اپنے آپ نُوں قابو چ رکھاں گے۔
اَسی نوِیں شخصیت کیویں پا سکنے آں؟
اَسی جِنّی زیادہ یسوع مسیح ورگی سوچ رکھاں گے اوناں ای زیادہ اَسی اپنی شخصیت نُوں اوہدی شخصیت وانگوں بنا لواں گے۔ (پیراگراف نمبر 5، 8، 10، 12، 14 نُوں ویکھو۔)
5. مسیح ورگی سوچ رکھن دا کیہہ مطلب اے تے سانوں یسوع دی زندگی تے کیوں غور کرنا چاہی دا اے؟ (1-کُرنتھیوں 2:16)
5 1-کُرنتھیوں 2:16 نُوں پڑھو۔ نوِیں شخصیت نُوں پان لئی سانوں مسیح ورگی سوچ رکھنی ہوئے گی۔ ایہدا مطلب ایہہ وے کہ سانوں سکھنا پووے گا کہ کسے معاملے بارے یسوع دی سوچ کیہہ اے تے فیر سانوں اوہدی مثال تے عمل کرنا پووے گا۔ یسوع مسیح اوہناں خوبیاں نُوں پوری طرحاں ظاہر کردا اے جیہڑیاں پاک روح دے پھل دا حصہ نیں۔ یسوع مسیح اِک ایہو جہے شیشے وانگوں اے جدے چ یہوواہ دِیاں خوبیاں بالکل صاف نظر آندیاں نیں۔ (عبرانیوں 1:3) اَسی جِنّاں زیادہ یسوع وانگوں سوچاں گے اوناں ای زیادہ اَسی اوہدے ورگے کم کراں گے تے اپنی شخصیت نُوں اوہدی شخصیت ورگا بنا سکاں گے۔—فِلپّیوں 2:5۔
6. جدوں اَسی نوِیں شخصیت نُوں پان دی کوشش کرنے آں تے سانوں کیہڑیاں گلاں نُوں یاد رکھنا چاہی دا اے؟
6 کیہہ یسوع مسیح دی مثال تے عمل کرنا ممکن اے؟ شاید اَسی سوچئے: ”یسوع مسیح تے بےعیب اے۔ میں کدی وی پوری طرحاں اوہدے ورگا نئیں بن سکدا۔“ جے توانوں اِنج لگدا اے تے ایہناں گلاں نُوں یاد رکھو: سب توں پہلی گل ایہہ وے کہ یہوواہ نے توانوں اِنج بنایا اے کہ تُسی اوہدے تے یسوع ورگے بن سکو۔ جے تُسی اوہناں دی مثال تے عمل کر دے او تے تُسی کافی حد تک ایہدے چ کامیاب ہو سکدے او۔ (پیدایش 1:26) دُوجی گل ایہہ وے کہ یہوواہ دی پاک روح ایس کائنات چ سب توں وڈی طاقت اے۔ایہدی مدد نال تُسی ایہو جہے کم وی کر سکدے او جیہڑے تُسی اپنی طاقت نال نئیں کر سکدے۔ تیجی گل ایہہ وے کہ یہوواہ جان دا اے کہ ایس ویلے اَسی اوہناں خوبیاں نُوں پوری طرحاں ظاہر نئیں کر سکدے جیہڑیاں پاک روح دے پھل دا حصہ نیں۔ساڈا اسمانی باپ تے سانوں نوِیں دُنیا چ وی اِک ہزار سال دے گا تاکہ اَسی بےعیب ہو جائیے تے ایہناں خوبیاں نُوں پوری طرحاں ظاہر کر سکئے۔ (مکاشفہ 20:1-3) پر فیالحال یہوواہ ساڈے کولوں ایہہ چاہندا اے کہ اَسی اپنے وَلّوں پوری کوشش کرئیے تے اوہدی مدد تے بھروسا رکھئے۔
7. ہُن اَسی کیہڑی گل تے غور کراں گے؟
7 اَسی کیہڑیاں گلاں چ یسوع مسیح وانگوں بن سکنے آں؟ اَسی چار ایہو جہیاں خوبیاں تے گل کراں گے جیہڑیاں پاک روح دے پھل دا حصہ نیں۔ اَسی ہر خوبی بارے ویکھاں گے کہ یسوع نے ایہنوں کیویں ظاہر کیتا تے اَسی ایہنوں کیویں ظاہر کر سکنے آں۔ اَسی ایہو جہے سوالاں تے وی غور کراں گے جنہاں دی مدد نال اَسی ایہہ ویکھ سکاں گے کہ اَسی نوِیں شخصیت نُوں کِنّی چنگی طرحاں پایا ہویا اے۔
8. یسوع مسیح نے محبت کیویں ظاہر کیتی؟
8 یہوواہ نال گہری محبت دی وجہ توں یسوع نے اپنے باپ تے ساڈے لئی قربانیاں دِتیاں۔ (یوحنا 14:31؛ 15:13) یسوع نے زمین تے جیس طرحاں زندگی گزاری، اوہدے توں ثابت ہویا کہ اوہنوں انساناں نال کِنّی محبت اے۔ اوہ ہمیشاں دُوجیاں نال پیار نال پیش آندا سی تے اوہناں نال ہمدردی کردا سی، اوہدوں وی جدوں لوک اوہدی مخالفت کردے سن۔ اِک خاص طریقہ جدے نال اوہنے دُوجیاں لئی محبت ظاہر کیتی، اوہ ایہہ سی کہ اوہنے دُوجیاں نُوں خدا دی بادشاہت دے بارے دَسیا۔ (لُوقا 4:43، 44) یسوع نے خدا تے انساناں لئی محبت دا سب توں وڈا ثبوت ایہہ دِتا کہ اوہنے گُناہگار انساناں دے ہتھوں بڑی اذیت والی موت نُوں برداشت کیتا۔ ایس طرحاں اوہنے ساڈے ساریاں لئی ہمیشاں دی زندگی پان دی راہ کھول دِتی۔
9. اَسی یسوع مسیح وانگوں دُوجیاں لئی محبت کیویں وکھا سکنے آں؟
9 اَسی اپنے اسمانی باپ نال محبت کرنے آں ایس لئی اَسی اپنی زندگی اوہدے لئی وقف کیتی تے بپتسمہ لیا۔ یہوواہ لئی اپنی محبت ثابت کرن لئی ضروری اے کہ اَسی یسوع مسیح وانگوں دُوجیاں لئی محبت وکھائیے۔ یوحنا رسول نے لکھیا: جیہڑا اپنے بھرا نُوں پیار نئیں کردا جنہوں اوہ ویکھ سکدا اے، اوہ خدا نُوں وی پیار نئیں کردا جنہوں اوہنے نئیں ویکھیا۔ (1-یوحنا 4:20) سانوں اپنے آپ کولوں پچھنا چاہی دا اے:کیہہ مَیں اپنے دل چ دُوجیاں لئی گہری محبت پیدا کر لئی اے؟ کیہہ مَیں اوس ویلے وی دُوجیاں نال ہمدردی کرنا واں جدوں اوہناں دا رویہ میرے نال چنگا نئیں ہوندا؟ کیہہ مَیں محبت دی وجہ نال اپنا وقت، پیسہ تے توانائی لا کے دُوجیاں نُوں یہوواہ بارے سکھانا واں؟ کیہہ مَیں اوس ویلے وی اِنج کرنا واں جدوں دُوجے ایہدے لئی کوئی قدر نئیں وکھاندے یاں فیر میری مخالفت کردے نیں؟ مَیں لوکاں نُوں یسوع دا شاگرد بنان لئی ہور زیادہ وقت کیویں کڈھ سکنا واں؟—اِفسیوں 5:15، 16۔
10. یسوع مسیح نے کیویں ثابت کیتا کہ اوہ صلحپسند اے؟
10 یسوع صلحپسند سی۔ جدوں لوک اوہدے نال بھیڑا سلوک کردے سن تے اوہ بُرائی دے بدلے بُرائی نئیں کردا سی۔ اوہنے صرف ایہہ ای نئیں کیتا سگوں اوہ صلح کرن چ پہل کردا سی تے دُوجیاں نُوں وی سمجھاندا سی کہ اوہ آپسی جھگڑے ختم کر کے صلح صفائی نال رہن۔ مثال لئی، یسوع نے دُوجیاں نُوں سکھایا کہ جے اوہ چاہندے نیں کہ یہوواہ اوہناں دی عبادت قبول کرے تے اوہناں نُوں پہلاں اپنے بھرا نال صلح کرنی چاہی دی اے۔ (متی 5:9، 23، 24) اوہنے وار وار اپنے رسولاں دی مدد کیتی کہ اوہ ایس گل تے بحث کرنا چھڈ دین کہ اوہناں وچوں کِنہوں سب توں وڈا سمجھیا جاندا اے۔—لُوقا 9:46-48؛ 22:24-27۔
11. اَسی صلحپسند کیویں بن سکنے آں؟
11 صلحپسند بنن لئی ایہہ کافی نئیں کہ اَسی لڑائی جھگڑیاں توں دُور رہیے۔ سانوں دُوجیاں نال صلح کرن لئی پہل کرنی چاہی دی اے تے اپنے بھین بھراواں دی مدد کرنی چاہی دی اے کہ اوہ اپنے جھگڑیاں نُوں ختم کر کے صلح صفائی نال رہن۔ (فِلپّیوں 4:2، 3؛ یعقوب 3:17، 18) اَسی اپنے آپ کولوں ایہہ سوال پچھ سکنے آں: میں دُوجیاں نال صلح کرن لئی کیس حد تک جان لئی تیار آں؟ جدوں کوئی بھین یاں بھرا میرا دل دُکھاندا اے تے کیہہ میں اوہدے نال ناراض رہنا واں؟ کیہہ میں ایس گل دا اِنتظار کرنا واں کہ اوہ آپ میرے نال صلح کرن دی کوشش کرے یاں کیہہ میں پہلاں صلح کرن دی کوشش کرنا واں فیر بھانویں مینوں ایہہ ای کیوں نہ لگدا ہووے کہ غلطی اوہدی اے؟ جے مناسب ہوئے تے کیہہ میں دُوجیاں نُوں سمجھانا واں کہ اوہ اپنے جھگڑیاں نُوں ختم کر کے صلح صفائی نال رہن؟
12. یسوع نے کیویں ظاہر کیتا کہ اوہ نرممزاج اے تے اوہنوں دُوجیاں دی فکر اے؟
12 یسوع مسیح نرممزاج سی تے اوہ دُوجیاں دی فکر کردا سی۔ (متی 11:28-30) اوہ مشکل حالاتاں چ وی دُوجیاں نال نرمی نال پیش آندا سی تے اوہناں لئی فکر ظاہر کردا سی۔ مثال دے طور تے اِک وار فینیکے دی اِک عورت نے اوہدے کولوں درخاست کیتی کہ اوہ اوہدی دھی نُوں ٹھیک کر دے تے شروع چ یسوع نے اوہدی گل نئیں منی۔پر جدوں اوس عورت نے ثابت کیتا کہ اوہدا ایمان کِنّاں مضبوط اے تے یسوع نے اوہدی دھی نُوں ٹھیک کر دِتا۔ (متی 15:22-28) یسوع مسیح نرممزاج تے سی پر اوہ دُوجیاں دی غلطی تے اوہناں نُوں سمجھاندا وی سی۔ کدی کدار اوہدی نرممزاجی تے فکرمندی ایس گل توں ظاہر ہوئی کہ جیہڑے لوکاں نال اوہ پیار کردا سی،اوہناں نُوں اوہنے صاف لفظاں چ سمجھایا کہ اوہناں نُوں کتھے بہتری لیان دی لوڑ اے۔ مثال لئی، جدوں پطرس نے یسوع نُوں یہوواہ دی مرضی دے مطابق عمل کرن توں روکن دی کوشش کیتی تے یسوع نے دُوجے رسولاں دے سامنے اوہدی درستی کیتی۔ (مرقس 8:32، 33) یسوع نے ایہہ پطرس دی بےعزتی کرن لئی نئیں کیتا سگوں اوہ پطرس تے دُوجے رسولاں نُوں اِک خاص گل سکھانا چاہندا سی۔ اوہ گل ایہہ سی کہ اوہناں نُوں کدی وی کوئی ایہو جہی گل نئیں کہنی چاہی دی جیہڑی یہوواہ دی مرضی دے خلاف ہوئے۔ ایہدے چ کوئی شک نئیں کہ پطرس نُوں شرمندگی تے ہوئی پر جیہڑی گل اوہنوں سمجھائی گئی سی، اوہدے توں باقی شاگرداں نُوں وی فائدہ ہویا۔
13. اَسی کیویں ظاہر کر سکنے آں کہ اَسی نرممزاج آں تے سانوں دُوجیاں دی فکر اے؟
13 جے اَسی واقعی نرممزاج آں تے سانوں دُوجیاں دی فکر اے تے فیر جنہاں نُوں اَسی پیار کرنے آں اوہناں نُوں اَسی ضرورت پین تے کُھلے لفظاں چ دَساں گے کہ اوہناں نُوں کتھے اپنے اندر بہتری لیان دی لوڑ اے۔ اِنج کرن لئی اَسی یسوع مسیح وانگوں ہمیشاں خدا دے کلام نُوں استمال کراں گے۔ کسے نُوں کوئی گل سمجھان لئی اوہدے نال نرمی نال پیش آؤ۔ایس گل تے بھروسا رکھو کہ اوہ صحی کم کرنا چاہندا اے۔ ایہہ وی یقین رکھو کہ اوہ یہوواہ نال تے تواڈے نال محبت کر دا اے تے تواڈے مشورے تے عمل کرے گا۔ اپنے آپ کولوں ایہہ سوال پچھو: ”جیس بندے نال میں محبت کرن واں، جے اوہ کوئی غلط کم کرے تے کیہہ میرے چ اینی ہمت ہے وے کہ میں ایس بارے اوہدے نال گل کر سکاں؟ جے اوہنوں صحی راہ تے لیان لئی مینوں اوہدے نال گل کرنی پیندی اے تے کیہہ میں نرمی نال گل کرنا واں یاں سختی نال؟ میں کس وجہ توں اوہدی درستی کرنا چاہنا واں؟ کیہہ ایس وجہ توں کہ مینوں اوہدے تے غصہ اے یاں فیر ایس لئی کہ میں اوہدا بھلا چاہنا واں؟“
14. یسوع مسیح نے چنگے کم کیویں کیتے؟
14 یسوع مسیح صرف ایہہ جان دا ای نئیں سی کہ چنگے کم کیہڑے نیں سگوں اوہ چنگے کم کردا وی سی۔ یسوع اپنے باپ نال محبت کردا سی ایس لئی اوہ چنگے کم ہمیشاں چنگی نیت نال کردا سی۔اِک چنگا بندہ ہمیشاں دُوجیاں دی مدد کرن دی کوشش کردا اے تے دُوجیاں لئی ایہو جہے کم کردا اے جنہاں توں اوہناں نُوں فائدہ ہوئے۔ پر ایہہ کافی نئیں کہ سانوں پتہ ہوئے کہ چنگے کم کیہڑے نیں سگوں سانوں چنگے کم چنگی نیت نال کرنے وی چاہی دے نیں۔شاید کجھ لوک ایہہ سوچن: بھلا کوئی بندہ بھیڑی نیت نال وی چنگے کم کر سکدا اے؟ اِنج ہو سکدا اے۔ مثال لئی، یسوع نے ایہو جہے لوکاں بارے دَسیا جیہڑے غریباں نُوں خیرات تے دیندے سن پر اوہ ایہدا بڑا ٹنڈورا وی پٹ دے سن تاکہ لوک اوہناں دی واہ واہ کرن۔ ایہہ کم چنگے تے سن پر جیس نیت نال ایہہ کم کیتے جاندے سن، یہوواہ اوس وجہ توں ایہناں کماں توں خوش نئیں ہوندا سی۔—متی 6:1-4۔
15. اَسی دلوں چنگے کیویں ہو سکنے آں؟
15 اَسی اوہدوں ای دلوں چنگے ہونواں گے جدوں اَسی بغیر لالچ دے چنگے کم کراں گے۔ ایس لئی اپنے آپ کولوں پچھو: کیہہ مینوں چنگے کماں دا پتہ اے تے کیہہ میں چنگے کم کرنا وی آں؟ میں چنگے کم کیہڑی نیت نال کرنا واں؟
اَسی کیہہ کرسکنے آں تاکہ اَسی نوِیں شخصیت نُوں پائی رکھئے؟
16. سانوں ہر روز کیہہ کرنا چاہی دا اے تے کیوں؟
16 ایہہ نہ سوچو کہ بپتسمہ لین نال تُسی نوِیں شخصیت نُوں پوری طرحاں پا لیا اے تے ہُن توانوں ہور کجھ کرن دی لوڑ نئیں۔ نوِیں شخصیت نویں کپڑیاں وانگوں اے جنہاں نُوں چنگی حالت چ رکھنا بوہت ضروری ہوندا اے۔ اِنج کرن دا اِک طریقہ ایہہ وے کہ اَسی ہر روز ایہہ ویکھئے کہ اَسی اوہ خوبیاں کیویں ظاہر کر سکنے آں جیہڑیاں پاک روح دے پھل دا حصہ نیں۔ سانوں اِنج کیوں کرنا چاہی دا اے؟ کیونکہ یہوواہ اوہ خدا اے جیہڑا کدی ویلا نئیں رہندا سگوں کم چ لگا رہندا اے تے اوہدی پاک روح وی اوہ طاقت اے جیہڑی سرگرم رہندی اے۔ (پیدایش 1:2) ایس لئی پاک روح ساڈے دل چ ہر اوس خوبی نُوں ظاہر کرن دی خواہش پیدا کر سکدی اے جیہڑی ایہدے پھل دا حصہ اے۔ مثال لئی، یعقوب نے لکھیا: ایمان کماں دے بغیر مُردہ اے۔ (یعقوب 2:26) ایہی گل پاک روح دے پھل چ شامل دُوجیاں خوبیاں بارے وی کہی جا سکدی اے۔ جدوں وی اَسی ایس پھل چ شامل خوبیاں نُوں ظاہر کرنے آں تے اَسی ثابت کرنے آں کہ اَسی پاک روح دی رہنمائی چ چل رہے آں۔
17. جدوں اَسی پاک روح دا پھل ظاہر نئیں کر پاندے تے سانوں کیہہ کرنا چاہی دا اے؟
17 بوہت سارے مسیحیاں نُوں بپتسمہ لئے کئی سال ہو گئے نیں۔پر فیر وی کدی کدار اوہ اوہناں خوبیاں نُوں ظاہر نئیں کر سکدے جیہڑیاں پاک روح دے پھل دا حصہ نیں۔ پر زیادہ ضروری گل ایہہ وے کہ اوہ ایہناں خوبیاں نُوں ظاہر کرن دی کوشش کردے رہن۔ ذرا ایس مثال تے غور کرو۔ جے تواڈی پسند دے کپڑے پاٹ جاندے نیں تے کیہہ تُسی فوراً اوہناں نُوں سُٹ دیندے او؟ نئیں، سگوں تُسی اوہناں نُوں رفو کراندے او تے فیر دھیان رکھدے او کہ اوہ دُبارہ نہ پاٹن۔ ایسے طرحاں جے تُسی کدی کدار کسے لئی نرممزاجی، فکرمندی، صبر تے محبت ظاہر نئیں کر پاندے تے بےحوصلہ نہ ہووو۔ جے تُسی دلوں معافی منگو گے تے تواڈے تعلقات اِک طرحاں نال رفو ہو جان گے یعنی اوہ صحی ہو جان گے۔ ایہدے بعد عزم کرو کہ تُسی روح دے پھل چ شامل خوبیاں نُوں ظاہر کرن دی پوری کوشش کرو گے۔
18. اَسی کیہڑی گل دا یقین رکھ سکنے آں؟
18 اَسی یسوع دی مثال لئی بوہت شکرگزار آں۔ اَسی جِنّی زیادہ یسوع مسیح ورگی سوچ رکھاں گے، ساڈے لئی اوہدے ورگے کم کرنا اوناں ای آسان ہو جائے گا۔ تے جِنّاں زیادہ اَسی یسوع مسیح ورگے کم کراں گے اوناں ای زیادہ اَسی نوِیں شخصیت نُوں پا لواں گے۔ ایس مضمون چ اَسی روح دے پھل چ شامل چار خوبیاں تے غور کیتا اے۔ کیوں نہ اَسی وقت کڈھ کے ایس پھل چ شامل باقی خوبیاں تے وی غور کرئیے تے ویکھئے کہ اَسی ایہناں نُوں کِنّی چنگی طرحاں ظاہر کر رہے آں؟ جیہڑے مضموناں چ ایہناں خوبیاں تے گل کیتی گئی اے، اوہناں دی فہرست ویکھن لئی اُردو زبان کتاب ”یہوواہ کے گواہوں کے لئے مطالعے کے حوالے“ چ ”مسیحی زندگی“ تے فیر ”روح کا پھل“ نُوں ویکھو۔ یقین رکھو کہ جے تُسی نوِیں شخصیت نُوں پان دی پوری کوشش کرو گے تے یہوواہ ایس معاملے چ تواڈی مدد ضرور کرے گا۔
گیت نمبر 13: مسیح دی ودھیا مثال
^ بھانویں ساڈا ماضی جیہو جیہا وی ہووے، اَسی نوِیں شخصیت نُوں پا سکنے آں۔ اِنج کرن لئی ضروری اے کہ اَسی اپنی سوچ نُوں بدلدے رہیے تے یسوع مسیح وانگوں بنن دی کوشش کردے رہیے۔ ایس مضمون چ اَسی یسوع مسیح دی سوچ تے کماں تے غور کرن لئی کجھ مثالاں تے گل کراں گے۔ اَسی ایہہ وی ویکھاں گے کہ اَسی بپتسمہ لین دے بعد وی یسوع دی مثال تے کیویں عمل کر سکنے آں۔
^ گلتیوں 5:22، 23 چ اوہ ساریاں خوبیاں نئیں لکھیاں ہوئیاں جیہڑیاں اَسی پاک روح دی مدد نال اپنے اندر پیدا کر سکنے آں۔ ایس بارے ہور جانن لئی اُردو زبان چ جون 2020 دے مینارِنگہبانی چ ”قارئین کے سوال“ نُوں ویکھو۔
