مطالعے دا مضمون نمبر 12
کیہہ تُسی وی اوہ ویکھدے او جو زکریاہ نے ویکھیا سی؟
میری روح نال ربُالافواج فرماندا اے۔—زکریاہ 4:6۔
گیت نمبر 122: تگڑے ہوو، ڈٹے رہوو
مضمون تے اِک نظر *
1. بابل چ رہن والے یہودی کیہڑی وجہ توں خوش سن؟
یہودی بڑے خوش سن۔ یہوواہ نے فارس دے بادشاہ خورس دے دل چ ایہہ گل پائی سی کہ اوہ اوہناں یہودیاں نُوں آزاد کر دَوے جنہاں نُوں زبردستی بابل لیایا گیا سی تے اوہ کئی سالاں توں اوتھے رہ رہے سن۔ بادشاہ خورس نے حکم دِتا کہ یہودی اپنے ملک واپس چلے جان تے یہوواہ اِسرائیل دے خدا دے گھر نُوں جیہڑا یروشلیم چ سی بنان۔ (عزرا 1:1، 3) ایس حکم دی وجہ توں یہودی بوہت خوش سن۔ ہُن اوہ اوس ملک چ جا کے فیر توں یہوواہ دی عبادت کر سکدے سن جیہڑا اوہنے اوہناں نُوں دِتا سی۔
2. جدوں یہودی یروشلیم واپس آئے تے شروع چ اوہناں نے کیہڑا کم کر لیا؟
2 سن 537 قبلازمسیح چ کجھ یہودی یروشلیم واپس آ گئے جیہڑا کسے ویلے ملک یہوداہ دا درالحکومت ہوندا سی۔ واپس آ کے اوہناں یہودیاں نے فوراً ہیکل نُوں بنانا شروع کر دِتا تے سن 536 قبلازمسیح تک اوہناں نے ایہدیاں بنیاداں پالئیاں۔
3. کیہڑے لوکاں نے یہودیاں دی مخالفت کیتی تے کیویں؟
3 جدوں یہودیاں نے ہیکل نُوں دُبارہ توں بنانا شروع کیتا تے بوہت سارے لوک اوہناں دی مخالفت کرن لگ پئے۔ بائبل چ دَسیا گیا اے کہ یروشلیم دے آلے دوالے دِیاں قوماں یہوداہ دے لوکاں دی مخالفت کرن تے ہیکل نُوں بناندے ویلے اوہناں نُوں تکلیف دین لگ پئیاں تاکہ اوہ مایوس ہو کے ہیکل نُوں بنانا چھڈ دین۔ (عزرا 4:4) یہودی اوہناں لوکاں دی وجہ توں پہلاں ای پریشان سن کہ ہُن اوہناں دے سامنے اِک نوِیں مصیبت آ گئی۔ 522 قبلازمسیح چ فارس دا اِک نواں بادشاہ بنیا جدا ناں ارتخششتا سی۔ * مخالفاں نُوں لگیا کہ اوہ قانون دا سہارا لے کے یعنی ایس نویں بادشاہ دے ذریعے یہودیاں نُوں ہیکل بنان توں ہمیشاں لئی روک دین گے۔ (زبور 94:20) اوہناں نے بادشاہ ارتخششتا نُوں اِک خط لکھیا جدے چ اوہناں نے کہیا کہ یہودی اوہدے خلاف بغاوت کرن دی سوچ رہے نیں۔ (عزرا 4:11-16) بادشاہ نے اوہناں دے جھوٹھ تے یقین کر لیا تے ہیکل بنان دے کم تے پابندی لا دِتی۔ (عزرا 4:17-23) ایس وجہ توں یہودیاں نُوں ہیکل بنان دا کم روکنا پیا۔—عزرا 4:24۔
4. جدوں مخالفاں نے ہیکل نُوں دُبارہ بنان دے کم تے پابندی لوا دِتی تے یہوواہ نے کیہہ کیتا؟ (یسعیاہ 55:11)
4 یروشلیم دے آلے دوالے دِیاں بُتپرست قوماں تے فارس دی حکومت دے کجھ افسراں نے پکا ارادہ کیتا ہویا سی کہ بھانویں کجھ وی ہو جائے اوہ یہودیاں نُوں ہیکل نئیں بنان دین گے۔ پر یہوواہ وی ایہہ ارادہ کر چُکیا سی کہ اوہ ہیکل نُوں دُبارہ ضرور بنوائے گا تے جدوں اوہ کسے چیز دا ارادہ کر لیندا اے تے اوہ اوہنوں ضرور پورا کردا اے۔ (یسعیاہ 55:11 نُوں پڑھو۔) یہوواہ نے یہودیاں کول اِک بڑا دلیر نبی گھلیا جدا ناں زکریاہ سی۔ اوہنے زکریاہ نُوں اِک توں بعد اِک اَٹھ زبردست رویاواں وکھائیاں تے اوہنوں کہیا کہ اوہ ایہناں بارے یہودیاں نُوں دَسے تاکہ اوہناں دا حوصلہ ودھے۔ رویاواں بارے سُن کے یہودیاں نُوں پکا یقین ہو گیا کہ اوہناں نُوں اپنے مخالفاں توں ڈرن دی کوئی لوڑ نئیں اے۔ ایہدی بجائے اوہناں نُوں اوہ کم جاری رکھنا چاہی دا اے جیہڑا یہوواہ نے اوہناں نُوں دِتا اے۔یہوواہ نے زکریاہ نُوں جیہڑی پنجویں رویا وکھائی اوہ اِک شمعدان تے زیتون دے دو درختاں بارے سی۔
5. ایس مضمون چ اَسی کیہہ سکھاں گے؟
5 اَسی سارے کدی نہ کدی بےحوصلہ ہو جانے آں۔ ایس لئی سانوں وی زیتون دے درختاں تے شمعدان دی رویا تے غور کرنا چاہی دا اے جدے ذریعے یہوواہ خدا نے بنی اِسرائیل دا حوصلہ ودھایا سی۔ ایس رویا دے ذریعے سانوں ہمت ملے گی کہ اَسی اوس ویلے وی یہوواہ دے وفادار رہیے جدوں لوک ساڈی مخالفت کردے نیں، جدوں حالات پہلے ورگے نئیں رہندے یاں فیر جدوں سانوں یہوواہ وَلّوں کوئی ایہو جہی ہدیت مِلدی اے جنہوں سمجھنا سانوں مشکل لگدا اے۔
جدوں لوک ساڈی مخالفت کردے نیں
زکریاہ نے اِک رویا چ زیتون دے دو درختاں نُوں ویکھیا جنہاں چوں تیل نکل کے شمعدان دے سَت چراغاں چ جا رہیا اے۔ (پیراگراف نمبر 6 نُوں ویکھو۔)
6. زکریاہ 4:1-3 چ شمعدان تے زیتون دے درختاں دی رویا توں اِسرائیلیاں دا حوصلہ کیوں ودھیا ہوئے گا؟ (پہلے صفحے دی تصویر نُوں ویکھو۔)
6 زکریاہ 4:1-3 نُوں پڑھو۔ شمعدان تے زیتون دے درختاں دی رویا توں بنیاِسرائیل نُوں ہمت ملی ہوئے گی کہ او ہ مخالفت دے باوجود ہیکل نُوں بناندے رہن۔ پر ایس رویا توں اوہناں نُوں ہمت کیوں ملی؟ شاید تُسی غور کیتا ہوئے کہ زیتون دے دو درختاں چوں تیل لگاتار کٹورے چ جا رہیا سی تے ایس کٹورے چوں تیل شمعدان دے سَت چراغاں چ جا رہیا سی۔ ایس تیل دی وجہ توں اوہ چراغ لگاتار بل رہے سن۔ جدوں زکریاہ نے فرشتے نُوں پچھیا کہ ایہناں چیزاں دا کیہہ مطلب اے تے فرشتے نے زکریاہ نُوں یہوواہ دا ایہہ پیغام دِتا: نہ زور نال تے نہ طاقت نال سگوں میری روح نال ربُالافواج یہوواہ فرماندا اے۔ (زکریاہ 4:4، 6) درختاں چوں نِکلن والا تیل یہوواہ دی پاک روح وَل اشارہ کردا اے جیہڑی کدی ختم نئیں ہوندی۔ فارس دی ساری فوج دی طاقت وی یہوواہ دی پاک روح دے اَگے کجھ وی نئیں سی۔ اصل چ ایس رویا دے ذریعے یہوواہ یہودیاں نُوں سمجھا رہیا سی کہ اوہ ہمیشاں اوہناں دے نال اے تے اوہ ہر طرحاں دی مخالفت دے باوجود ہیکل نُوں بنا لین گے۔ یہودیاں نُوں بس یہوواہ تے بھروسا رکھنا سی تے ہیکل دا کم دُبارہ شروع کرنا سی۔ بھانویں کہ ہیکل بنان دے کم تے حالے وی پابندی لگی ہوئی سی پر فیر وی اوہناں نے ایہہ کم دُبارہ توں شروع کر دِتا۔
7. ہیکل نُوں دُبارہ توں بنان والے یہودیاں نُوں کیہڑی تبدیلی دا بڑا فائدہ ہویا؟
7 ہیکل نُوں دُبارہ توں بنان والے یہودیاں نُوں اِک خاص تبدیلی دا بڑا فائدہ ہویا۔ ایہہ کیہڑی تبدیلی سی؟ سن 520 قبلازمسیح چ دارا اوّل فارس دا نواں بادشاہ بنیا۔ اپنی حکومت دے دُوجے سال اوہنوں پتہ چلیا کہ ہیکل دی تعمیر تے جیہڑی پابندی لائی گئی اے اوہ غیر قانونی اے۔ ایس لئی اوہنے حکم دِتا کہ ہیکل نُوں بنان دا کم پورا کیتا جائے۔ (عزرا 6:1-3) لوک بادشاہ دے ایس حکم توں بڑے حیران ہوئے پر فیر بادشاہ نے جو کیتا اوہدے بارے تے شاید کسے نے سوچیا وی نئیں سی۔ بادشاہ نے حکم دِتا کہ یروشلیم دے آلے دوالے دِیاں قوماں ہیکل دی تعمیر چ کسے قسم دی دخلاندازی نہ کرن سگوں یہودیاں نُوں ایس کم لئی پیسے تے ضروری چیزاں دین۔ (عزرا 6:7-12) ایس وجہ توں تقریباً چار سالاں چ یعنی 515 قبلازمسیح چ ہیکل دُبارہ بن گئی۔—عزرا 6:15۔
مخالفت دا سامنا کردے ویلے یہوواہ دی طاقت تے بھروسا رکھو۔ (پیراگراف نمبر 8 نُوں ویکھو۔)
8. جدوں لوک تواڈی مخالفت کردے نیں تے توانوں ہمت نال کم کیوں لینا چاہی دا اے؟
8 اَج وی یہوواہ دے بوہت سارے بندیاں نُوں مخالفت دا سامنا کرنا پیندا اے۔ مثال لئی، یہوواہ دے کجھ بندے ایہو جہے مُلکاں چ رہندے نیں جِتھے حکومت نے ساڈے کم تے پابندی لائی ہوئی اے۔ ایہناں مُلکاں چ ساڈے بھین بھراواں نُوں گرفتار کیتا جاندا اے تے اوہناں نُوں حاکماں تے بادشاہواں دے سامنے پیش کیتا جاندا اے تاکہ اوہناں نُوں گواہی ملے۔ (متی 10:17، 18) پر کدی کدار ایہو جہے مُلکاں چ حکومتاں بدلن دی وجہ توں بھین بھرا آزادی نال یہوواہ دی عبادت کر پاندے نیں یاں فیر کوئی انصاف پسند جج اوہناں دے حق چ فیصلہ سناندا اے۔ کجھ بھین بھراواں نُوں حکومتاں وَلّوں تے مخالفت دا سامنا کرنا نئیں پیندا پر شاید اوہناں دے گھر والے اوہناں دی مخالفت کردے نیں تے اپنی پوری کوشش کردے نیں کہ ساڈے ایہہ بھین بھرا یہوواہ دی عبادت کرنا چھڈ دین۔ (متی 10:32-36) پر کئی وار جدوں مخالفت کرن والیاں نُوں ایہہ احساس ہو جاندا اے کہ اوہ ساڈے بھین بھراواں نُوں یہوواہ دی خدمت کرن توں روک نئیں سکدے تے اوہ مخالفت کرنا چھڈ دیندے نیں۔ کدی کدار تے مخالفت کرن والے لوک وی یہوواہ دی عبادت کرن لگ پیندے نیں۔ جدوں توانوں مخالفت دا سامنا ہوندا اے تے ہمت نہ ہارو، حوصلہ رکھو۔ یہوواہ تواڈے نال اے تے اپنی پاک روح دے ذریعے تواڈی مدد کر رہیا اے۔ ایس لئی توانوں ڈرن دی کوئی لوڑ نئیں۔
جدوں ساڈے حالات پہلے ورگے نئیں رہندے
9. جدوں کجھ یہودیاں نے نوِیں ہیکل دی بنیاداں نُوں ویکھیا تے اوہ دُکھی کیوں ہو گئے؟
9 جدوں ہیکل دِیاں بنیاداں پائیاں گئیاں تے کجھ بُڈھے یہودی اوہناں نُوں ویکھ کے رون لگ پئے۔ (عزرا 3:12) اوہناں نے اوس شاندار ہیکل نُوں ویکھیا سی جیہڑی سلیمان نے بنوائی سی تے اوہناں نُوں لگ رہیا سی کہ نوِیں ہیکل اوس پرانی ہیکل دے مقابلے چ کجھ وی نئیں اے۔ (حجی 2:2، 3) ایہہ سوچ کے اوہ بڑے دُکھی ہو گئے۔ پر زکریاہ دی رویا تے غور کرن نال اوہناں دی خوشی فیر توں واپس آ سکدی سی۔ پر اوہ کیویں؟
10. زکریاہ 4:8-10 چ فرشتے نے جو کجھ وی کہیا اوہدی وجہ توں یہودیاں نُوں تسلی کیوں مِلی ہوئے گی؟
10 زکریاہ 4:8-10 نُوں پڑھو۔ فرشتے دی ایس گل دا کیہہ مطلب سی کہ یہودی خوشی نال اوس ساہول نُوں ویکھن گے جیہڑا (یہودی گورنر) زرُبابل دے ہتھ چ وے؟ ساہول اِک ایہو جیہا اوزار ہوندا اے جدی مدد نال ایہہ ویکھیا جاندا اے کہ اِک چیز بالکل سدھی اے یاں نئیں۔ فرشتے دی گل توں یہودی ایہہ سمجھ گئے کہ بھانویں کجھ لوکاں نُوں نوِیں ہیکل پرانی ہیکل جِنّی شاندار نئیں لگدی پر فیر وی ایہدی تعمیر مکمل ہو جائے گی تے ایہہ یہوواہ دی مرضی دے عین مطابق ہوئے گی۔ جے یہوواہ ایس نوِیں ہیکل نُوں ویکھ کے خوش ہوئے گا تے یہودیاں نُوں وی ایہنوں ویکھ کے خوش ہونا چاہی دا اے۔ یہوواہ دی نظر چ ایہہ گل سب توں اہم سی کہ ایس نوِیں ہیکل چ اوہدی عبادت اوہدی مرضی دے مطابق ہوئے۔ یہوواہ ایہہ چاہندا سی کہ یہودی اپنا دھیان اوہدی مرضی مطابق اوہدی عبادت کرن تے اوہنوں خوش کرن تے رکھن تاکہ اوہناں دی خوشی واپس آ جائے۔
جدوں حالات پہلے ورگے نہ رہن تے ایہناں نُوں یہوواہ دی نظر نال ویکھو تاکہ تُسی خوش رہ سکو۔ (پیراگراف نمبر 11، 12 نُوں ویکھو۔) *
11. اَج یہوواہ دے کجھ بندیاں نُوں کیہڑی مشکل دا سامنا کرنا پیندا اے؟
11 کئی بھین بھراواں نُوں نوِیاں تبدیلیاں نُوں قبول کرنا مشکل لگدا اے۔ مثال لئی، کجھ بھین بھرا بوہت سالاں توں کُل وقتی طور تے خدمت کر رہے سن پر فیر اوہناں نُوں کسے ہور طریقے نال یہوواہ دی خدمت کرن لئی کہیا گیا۔ کجھ بھین بھراواں نُوں اپنی عمر دی وجہ توں اوہ ذمےداری چھڈنی پئی جیہڑی اوہناں نُوں بوہت پسند سی۔ جدوں ساڈی زندگی چ ایہو جہیاں تبدیلیاں آندیاں نیں تے اَسی سارے بڑے دُکھی ہو جانے آں۔ شاید شروع شروع چ سانوں ایہہ سمجھ نہ آئے کہ ایہہ فیصلہ کیوں کیتا گیا اے یاں فیر اَسی اوس فیصلے نال اِتفاق نہ کرئیے۔ ہو سکدا اے کہ سانوں پرانا وقت بڑا یاد آئے تے شاید ایس وجہ توں اَسی بےحوصلہ ہو جائیے تے ایہہ سوچن لگ پیئے کہ ہُن اَسی پہلے وانگوں ودھ چڑھ کے یہوواہ دی خدمت نئیں کر سکدے۔ (امثال 24:10) پر ایس سب دے باوجود زکریاہ دی رویا ساڈی مدد کیویں کردی اے تاکہ اَسی جی جان نال یہوواہ دی خدمت کردے رہیے؟
12. زکریاہ دی رویا تے غور کرن نال اَسی اوس ویلے وی خوش کیویں رہ سکنے آں جدوں ساڈی زندگی چ تبدیلیاں ہوندیاں نیں؟
12 ہو سکدا اے کہ ساڈے حالات پہلے ورگے نہ رہن۔ پر جے اَسی اپنے حالاتاں نُوں یہوواہ دی نظر نال ویکھنے آں تے ساڈے لئی تبدیلیاں نُوں قبول کرنا اسان ہو جاندا اے۔ اَج یہوواہ بوہت وڈے وڈے کم کر رہیا اے تے ساڈے کول ایہہ شرف اے کہ اَسی اوہدے نال مِل کے کم کرئیے۔ (1-کُرنتھیوں 3:9) ہو سکدا اے کہ وقت دے نال نال یہوواہ دی خدمت چ سانوں مِلن والیاں ذمےداریاں بدل جان، پر ساڈے لئی یہوواہ دی محبت کدی نئیں بدلے گی۔ ایس لئی جے تنظیم کوئی تبدیلی کردی اے تے توانوں کسے ہور طریقے نال یہوواہ دی خدمت کرن لئی کہندی اے تے ایس بارے ای نہ سوچدے رہوو کہ تنظیم نے ایہہ فیصلہ کیوں کیتا۔ پرانے دِناں بارے سوچ کے دُکھی ہون دی بجائے یہوواہ کولوں مدد منگو تاکہ تُسی نویں حالات نُوں اوہدی نظر نال ویکھ سکو۔ (واعظ 7:10) ایہہ سوچن دی بجائے کہ تُسی ہُن کیہہ نئیں کر سکدے، ایہہ سوچو کہ تُسی موجودہ وقت چ کیہہ کجھ کر سکدے او۔ زکریاہ نے جیہڑی رویا ویکھی اوہدے توں اَسی سکھنے آں کہ سانوں ہر معاملے نُوں یہوواہ دی نظر نال ویکھنا چاہی دا اے۔ اِنج اَسی ہر طرحاں دے حالاتاں چ وفاداری تے خوشی نال اوہدی خدمت کر سکاں گے۔
جدوں سانوں کسے ہدیت نُوں قبول کرنا مشکل لگدا اے
13. کجھ یہودیاں نُوں ایہہ کیوں لگیا کہ ہیکل نُوں دُبارہ بنان دی ہدیت صحی نئیں اے؟
13 ہیکل نُوں بنان دے کم تے پابندی لگی ہوئی سی۔ پر فیر وی وڈے کاہن یشوع تے گورنر زرُبابل نے خدا دے گھر نُوں دُبارہ بنانا شروع کر دِتا۔ (عزرا 5:1، 2) کجھ یہودیاں نُوں لگیا ہوئے گا کہ ہیکل نُوں دُبارہ بنان دا فیصلہ صحی نئیں اے۔ اوہناں نُوں پتہ سی کہ اوہ اپنے دُشمناں توں چھپ کے ہیکل نئیں بنا سکدے تے اوہناں دے دُشمن ایس کم نُوں روکن لئی کسے وی حد تک جا سکدے نیں۔ ایہو جہے وقت چ یہوواہ نے یشوع تے زرُبابل نُوں یقین دَوایا کہ اوہ اوہناں دے نال اے۔ یہوواہ نے اِنج کیویں کیتا؟
14. زکریاہ 4:12، 14 دے مطابق یہوواہ نے وڈے کاہن یشوع تے زرُبابل نُوں ایہہ یقین کیویں دَوایا کہ اوہ اوہناں دے نال اے؟
14 زکریاہ 4:12، 14 نُوں پڑھو۔ رویا دے ایس حصے چ فرشتے نے زکریاہ نُوں دَسیا کہ زیتون دے دو درخت دو مسح شُدہ بندے نیں یعنی یشوع تے زرُبابل، تے اِک لحاظ نال ایہہ دونویں بندے پوری دُنیا دے مالک یہوواہ دے حضور کھلوتے ہوئے نیں۔ (زکریاہ 4:14) ایہہ اوہناں دونواں لئی کِنّے مان دی گل سی۔ یہوواہ نُوں اوہناں تے پورا بھروسا سی تے یہودیاں نُوں وی اوہناں دی ہر ہدیت تے بھروسا کرنا چاہی دا سی کیونکہ یہوواہ ایہناں دونواں دے ذریعے ای اوہناں دی رہنمائی کر رہیا سی۔
15. اَسی کیویں ثابت کر سکنے آں کہ اَسی خدا دے کلام چ لکھیاں ہدیتاں دی دلوں قدر کرنے آں؟
15 یہوواہ اَج وی فرق فرق طریقیاں نال اپنے بندیاں نُوں ہدیتاں دیندا اے تے اِک طریقہ اوہدا پاک کلام اے۔ اپنے کلام چ اوہنے دَسیا اے کہ اَسی اوہدی مرضی مطابق اوہدی عبادت کیویں کر سکنے آں۔ پر اَسی ایہہ کیویں ثابت کر سکنے آں کہ اَسی اوہدے کلام چ لکھیاں ہدیتاں دی دلوں قدر کرنے آں؟ سانوں اوہناں ہدیتاں نُوں دھیان نال پڑھنا چاہی دا اے تے اوہناں نُوں سمجھن دی کوشش کرنی چاہی دی اے۔ اَسی اپنے آپ کولوں ایہہ سوال پچھ سکنے آں: ”جدوں میں بائبل یاں ساڈی تنظیم دی کوئی کتاب پڑھنا واں تے کیہہ میں اوہناں گلاں تے سوچوچار کرنا واں جیہڑیاں میں پڑھنا واں؟ کیہہ میں پاک کلام دِیاں مشکل گلاں نُوں وی سمجھن دی کوشش کرنا واں یاں فیر اوہناں نُوں بس سرسری جیہا پڑھ لینا واں؟“ (2-پطرس 3:16) جے اَسی اوہناں گلاں تے گہرائی نال سوچوچار کراں گے جیہڑیاں یہوواہ سانوں سکھاندا اے تے فیر اَسی اوہناں تے عمل وی کر سکاں گے تے اوس خاص کم نُوں پورا وی کر سکاں گے جیہڑا یہوواہ نے سانوں دِتا اے یعنی مُنادی دا کم۔—1-تیمُتھیُس 4:15، 16۔
وفادار تے سمجھدار غلام وَلّوں مِلن والیاں ہدیتاں تے بھروسا رکھو۔ (پیراگراف نمبر 16 نُوں ویکھو۔) *
16. جے سانوں وفادار تے سمجھدار غلام دی کوئی ہدیت سمجھ نئیں آندی تے کیہڑی چیز ایس ہدیت تے عمل کرن چ ساڈی مدد کرے گی؟
16 یہوواہ وفادار تے سمجھدار غلام دے ذریعے وی سانوں ہدیتاں دیندا اے۔ (متی 24:45) پر ہو سکدا اے کہ کدی کدار سانوں وفادار تے سمجھدار غلام دِیاں کجھ ہدیتاں سمجھ نہ آن۔ ہو سکدا اے کہ سانوں ایہہ ہدیت دِتی جائے کہ اَسی کسے قدرتی آفت توں بچن لئی پہلاں توں تیاری کرئیے۔ پر شاید اَسی سوچئے کہ ساڈے علاقے چ تے ایہہ قدرتی آفت نئیں آئے گی یاں شاید اَسی ایہہ سوچئے کہ کورونا وبا دے دوران وفادار غلام کجھ زیادہ ای احتیاط کرن نُوں کہہ رہیا اے۔ جے سانوں لگدا اے کہ تنظیم دی کوئی ہدیت اینی مناسب نئیں اے تے فیر سانوں کیہہ کرنا چاہی دا اے؟ اَسی غور کر سکنے آں کہ یہودیاں نُوں اوہناں ہدیتاں تے عمل کر کے کِنّاں فائدہ ہویا جیہڑیاں یہوواہ نے یشوع تے زرُبابل دے ذریعے اوہناں نُوں دِتیاں سن۔ نالے اَسی پاک کلام چ لکھے کجھ واقعیاں تے وی غور کر سکنے آں۔ کدی کدار خدا نے اپنے بندیاں نُوں ایہو جہیاں ہدیتاں دِتیاں جیہڑیاں اوہناں نُوں بوہت عجیب لگیاں۔ پر اوہناں نُوں منن نال اوہناں دی زندگی بچ گئی۔—قضاۃ 7:7؛ 8:10۔
اوہ ویکھو جو زکریاہ نے ویکھیا
17. شمعدان تے زیتون دے دو درختاں دی رویا دا یہودیاں تے کیہہ اثر ہویا؟
17 زکریاہ نے جیہڑی پنجویں رویا ویکھی اوہ ہے تے بوہت چھوٹی سی پر اوہدا یہودیاں تے بڑا گُوڑھا اثر ہویا۔ ایس رویا دی وجہ توں اوہناں دے اندر ہیکل نُوں دُبارہ بنان تے یہوواہ دی عبادت کرن دی خواہش فیر توں پیدا ہو گئی۔ جدوں اوہناں نے زکریاہ دی رویا دے مطابق عمل کیتا تے اوہ سمجھ گئے کہ یہوواہ اوہناں دے نال اے تے اوہناں دی رہنمائی کر رہیا اے۔ یہوواہ نے اپنی پاک روح دے ذریعے اوہناں دی مدد کیتی تاکہ اوہ ہیکل نُوں بنان دا کم جاری رکھن تے اپنی خوشی نُوں دُبارہ توں پا لین۔—عزرا 6:16۔
18. زکریاہ نے جیہڑی رویا ویکھی اوہدا تواڈے تے کیہہ اثر ہو سکدا اے؟
18 زکریاہ نے شمعدان تے زیتون دے دو درختاں دی جیہڑی رویا ویکھی اوہدا تواڈی زندگی تے بڑا گُوڑھا اثر پے سکدا اے۔ جیویں کہ اَسی ایس مضمون چ ویکھیا کہ ایس رویا دی وجہ توں سانوں اوس وقت ہمت مل سکدی اے جدوں لوک ساڈی مخالفت کردے نیں۔ اَسی اوہدوں وی خوش رہ سکنے آں جدوں ساڈے حالات پہلے ورگے نئیں رہندے تے اَسی اوہناں ہدیتاں تے وی بھروسا رکھ سکنے آں جیہڑیاں سانوں سمجھ نئیں آندیاں۔ جدوں توانوں زندگی چ مشکلاں دا سامنا ہوندا اے تے توانوں کیہہ کرنا چاہی دا اے؟ سب توں پہلاں اوہ ویکھو جو زکریاہ نے ویکھیا سی یعنی ایس گل دا ثبوت کہ یہوواہ نُوں اپنے بندیاں دی فکر اے۔ فیر ایس ثبوت دی بِنا تے یہوواہ تے بھروسا رکھو تے پورے دل نال اوہدی عبادت کردے رہوو۔ (متی 22:37) جدوں تُسی اِنج کرو گے تے یہوواہ تواڈی مدد کرے گا تاکہ تُسی ہمیشاں خوشی نال اوہدی عبادت کردے رہوو۔—کُلسّیوں 1:10، 11۔
گیت نمبر 7: یہوواہ ساڈا زور اے
^ یہوواہ خدا نے زکریاہ نبی نُوں اِک توں بعد اِک بڑی زبردست رویا وکھائی۔ ہر رویا چ زکریاہ نبی نے جو کجھ ویکھیا اوہدے توں اوہنوں تے یہوواہ دے باقی بندیاں نُوں اپنیاں مشکلاں نال نبڑن تے ہیکل نُوں دُبارہ بنان دی طاقت ملی۔ ایہناں تے غور کر کے اَج سانوں وی طاقت مِلدی اے کہ اَسی وی مشکلاں دے باوجود یہوواہ دے وفادار رہیے۔ زکریاہ نے جیہڑی اِک رویا ویکھی اوہ شمعدان تے زیتون دے دو درختاں بارے سی۔ ایس مضمون چ اَسی ویکھاں گے کہ اَسی ایس رویا توں کیہڑا خاص سبق سکھ سکنے آں۔
^ کئی سال بعد گورنر نحمیاہ دے زمانے چ اِک نویں بادشاہ نے یہودیاں دی مدد کیتی۔ اوہدا ناں وی ارتخششتا سی۔
^ تصویر دی وضاحت: اِک بھرا بڑھاپے تے خراب صحت دی وجہ توں اوہ کم نئیں کر سکدا جیہڑا اوہ پہلے کر سکدا سی۔ اوہ ایس بارے سوچ رہیا اے کہ اوہ اپنے آپ نُوں نویں حالاتاں دے مطابق کیویں ڈھال سکدا اے۔
^ تصویر دی وضاحت: اِک بھین سوچ رہی اے کہ جیویں یہوواہ، یشوع تے زرُبابل دے نال سی ایسے طرحاں اَج اوہ وفادار تے سمجھدار غلام دے نال وی اے۔
