ساڈی زندگی لئی ضروری گلاں
قدرتی آفت توں بعد مدد کیویں کرنی چاہی دی اے؟
اَج کل قدرتی آفتاں بوہت زیادہ ودھدیاں جا رہیاں نیں۔ جدوں قدرتی آفتاں آندیاں نیں تے ایہہ بڑا ضروری ہوندا اے کہ امدادی کم منظم طریقے نال کیتے جان۔ ایس لئی گورننگ باڈی نے ہر برانچ چ اِمدادی کماں دی نگرانی کرن والا شعبہ بنایا اے۔
جدوں کسے علاقے چ قدرتی آفت آندی اے تے ایس شعبے چ کم کرن والے بھرا مقامی بزرگاں نال رابطہ کردے نیں تاکہ اوہ پتہ لا سکن کہ اوتھوں دے بھین بھراواں نُوں کیہو جہی مدد دی لوڑ اے۔ جے نقصان ایناں زیادہ ہو جائے کہ مقامی بھین بھراواں لئی صورتحال سنبھالنا مشکل ہو جائے تے برانچ اِمدادی کماں لئی کجھ بھراواں نُوں مقرر کردی اے۔ ایہہ بھرا دُوجے بھین بھراواں نُوں اِمدادی کماں چ حصہ لین لئی یاں فیر آفت توں متاثر ہون والے بھین بھراواں نُوں ضرورت دِیاں شیواں دین لئی کہندے نیں۔ یاں فیر ایہہ بھرا آپ جا کے ضرورت دِیاں شیواں خرید کے اوہناں بھین بھراواں تک پونچاندے۔
ایس طرحاں اِمدادی کم کرن دے بوہت فائدے ہوندے نیں۔ ساریاں نُوں پتہ ہوندا اے کہ کنہے کیہڑا کم کرنا اے جدی وجہ توں محنت تے پیسہ وی بچ دا اے نالے چیزاں وی ضائع نئیں ہوندیاں۔ پر جے ہر بھین بھرا اپنے طریقے نال اِمدادی کماں چ حصہ لینا شروع کردے گا تے کوئی وی کم منظم طریقے نال نئیں ہوئے گا۔
برانچ جنہاں بھراواں نُوں اِمدادی کماں دی نگرانی لئی مقرر کردی اے، اوہ صحی طرحاں اندازہ لا سکدے نیں کہ کسے جگہ تے مدد دین لئی کِنّے رضاکاراں تے کِنّے عطیات دی لوڑ اے۔ ایہہ بھرا مقامی افسراں نال گل کر سکدے نیں تاکہ ساڈے وَلّوں کیتے جان والے اِمدادی کم تیزی نال ہو سکن۔ ایس لئی جدوں تک کہیا نہ جائے اوہدوں تک آفت توں متاثر ہون والے بھین بھراواں لئی نہ تے عطیات کٹھے کرو، نہ اوہناں نُوں کوئی شیواں گھلو تے نہ ای آفت توں متاثر ہون والے علاقے چ مدد لئی جاؤ۔
پر فیر وی جدوں کوئی آفت آندی اے تے سانوں اپنے بھین بھراواں دی مدد کرن توں پچھے نئیں ہٹنا چاہی دا۔ (عبرانیوں 13:16) اَسی اپنے بھین بھراواں نال پیار کرنے آں۔ تے فیر اَسی اوہناں دی مدد کرن لئی کیہہ کرن سکنے آں؟ سب توں اہم گل تے ایہہ وے کہ اَسی آفت دا شکار ہون والے بھین بھراواں تے اوہناں دی مدد کرن والیاں لئی دُعا کر سکنے آں۔ اَسی اوہناں دی مدد کرن لئی عالمگیر کم لئی عطیات وی دے سکنے آں۔ گورننگ باڈی دی ہدیت دے مطابق برانچ کمیٹی ایہہ چنگی طرحاں ویکھ سکدی اے کہ عطیات نُوں کتھے استمال کرنا چاہی دا اے۔ پر جے اَسی آپ امدادی کم چ حصہ لینا چاہنے آں تے فیر اَسی ”لوکل ڈیزئن/کنسٹرکشن میں رضاکارانہ خدمات انجام دینے کے لیے درخواست“ (DC-50) فارم بھر سکنے آں۔
ویڈیو ”برازیل چ تباہی مچان والا سیلاب“ نُوں ویکھو تے فیر ایس سوال دا جواب دَوو:
سن 2020 چ برازیل چ سیلاب توں بعد یہوواہ دے گواہواں نے جیہڑے امدادی کم کیتے اوہناں بارے توانوں کیہڑی گل بوہت چنگی لگی اے؟
