ساڈی زندگی لئی ضروری گلاں
ستمبر دے مہینے چ بائبل کورس شروع کران دی خاص مہم
ستمبر دے مہینے چ اَسی لوکاں نُوں تِن سبقاں والی کتاب ”خوشیاں بھری زندگی پاؤ“ چوں بائبل کورس کرن دی دعوت دَواں گے۔ ایس مہم چ پورے دل نال حصہ لین لئی مبشر مددگار پہلکار دے طور تے 30 گھنٹے خدمت کر سکدے نیں۔ اَسی ایس خاص مہم چ کیویں حصہ لے سکنے آں؟
-
پہلی ملاقات کردے ویلے: تُسی کسے نال گل بات شروع کرن لئی تِن سبقاں والی کتاب ”خوشیاں بھری زندگی پاؤ“ دے آخری صفحے نُوں استمال کر سکدے او تے اوہنوں وکھا سکدے او کہ اَسی بائبل کورس کیویں کرانے آں۔ اوہناں لوکاں کول ضرور جاؤ جنہاں نے بائبل دے پیغام چ دلچسپی وکھائی سی یاں جنہاں نُوں تُسی بائبل دا پیغام سنان لئی جاندے ہوندے سو۔ شاید اوہناں نے پہلاں بائبل کورس کرن توں منع کر دِتا ہووے پر ہو سکدا اے کہ اوہناں نُوں ایہہ نوِیں کتاب چنگی لگے تے اوہ بائبل کورس کرن لئی تیار ہو جان۔ سانوں ایہہ کتاب اوہناں لوکاں نُوں نئیں گھلنی چاہی دی جیہڑے دلچسپی نئیں وکھاندے تے سانوں اوہناں گھراں چ وی کتاب نئیں چھڈنی چاہی دی جتھے کوئی نئیں مِلدا۔ کلیسیا دی خدمتی کمیٹی ایس مہم لئی مہینے چ معمول توں زیادہ مُنادی دے گروپ رکھ سکدی اے۔
-
دُوجے موقعیاں تے گواہی دیندے ویلے: جے تواڈی کلیسیا چ ٹرالی دے ذریعے مُنادی کرن دا بندوبست بنایا جاندا اے تے ٹرالی تے کتاب ”خوشیاں بھری زندگی پاؤ“ نُوں بالکل سامنے رکھو۔ جیہڑے لوک ایس کتاب چ دلچسپی وکھاندے نیں اوہناں نُوں دَسو کہ اوہ ایہدے چوں مُفت بائبل کورس کر سکدے نیں۔ جے ممکن ہوئے تے تُسی اوسے ویلے یاں فیر بعد چوں اوہناں نُوں وکھا سکدے او کہ اَسی ایہہ کورس کیویں کرانے آں۔ خدمتی نگہبان ایہہ بندوبست وی بنا سکدا اے کہ تجربہکار مبشر کاروباری علاقے چ جا کے لوکاں نُوں بائبل کورس کرن دی دعوت دین۔ تُسی اوہناں لوکاں نُوں وی بائبل کورس کرن دی دعوت دے سکدے او جیہڑے تواڈے نال کم کر دے نیں یاں جنہاں نُوں تُسی اکثر گواہی دیندے او۔
یسوع نے سانوں حکم دِتا اے کہ اَسی لوکاں نُوں تلیم دَئیے تے اوہناں نُوں شاگرد بنائیے۔ (متی 28:19، 20) دُعا اے کہ ایس مہم دے دوران اَسی کتاب ”خوشیاں بھری زندگی پاؤ“ نُوں استمال کر دے ہوئیاں ایس مقصد نُوں پورا کر سکئے۔
