جدوں شادی‌شُدہ مسیحی کامیاب زندگی گزار دے نیں تے اوہ خوش رہندے نیں تے اِنج یہوواہ دی وڈیائی وی ہوندی اے۔ (‏مرقس 10:‏9‏)‏ جے مسیحی چاہندے نیں کہ اوہناں دی شادی‌شُدہ زندگی خوشیاں نال بھری ہوئے تے اوہناں نُوں چاہی دا اے کہ اوہ بائبل دے اصولاں نُوں ذہن چ رکھدے ہوئے اِک چنگے جیون ساتھی نُوں چُنن۔‏

شادی کرن بارے اوہدوں ای سوچو جدوں عمر دا اوہ دَور ختم ہو جاندا اے جدے چ جوانی دِیاں خواہشاں خاص کر کے جنسی خواہش زوراں تے ہوندی اے کیونکہ ایہدی وجہ توں صحی فیصلہ کرنا مشکل ہو سکدا اے۔ (‏1-‏کُرنتھیوں 7:‏36‏)‏ جے حالے تُسی کنوارے او تے اپنے وقت دا چنگا استمال کرو۔ ایس وقت دے دوران اپنا رشتہ یہوواہ دے نال مضبوط کرو تے اپنے اندر اوہ خوبیاں پیدا کر و جیہڑیاں اِک مسیحی لئی ضروری نیں۔ ایہہ چیزاں شادی دے بعد اِک کامیاب زندگی گزارن لئی تواڈے کم آن گیاں۔‏

کسے نال ویاہ کرن توں پہلاں ایہہ جانن لئی وقت کڈھو کہ اوہ بندہ اندروں کیہو جیہا انسان اے۔ (‏1-‏پطرس 3:‏4‏)‏ جے توانوں اوہدے چ کوئی ایہو جہی گل نظر آ رہی اے جیہڑی توانوں پریشان کر رہی اے تے اوہدے نال گل کرو۔ دُوجے رشتیاں وانگوں شادی دے رشتے چ وی ایہہ بوہت ضروری اے کہ تُسی اپنے توں زیادہ اپنے جیون ساتھی دے بھلے بارے سوچو۔ (‏فِلپّیوں 2:‏3، 4‏)‏ جے تُسی شادی توں پہلاں بائبل دے اصولاں نُوں اہمیت دَوو گے تے شادی دے بعد وی تواڈی زندگی خوش‌گوار ہوئے گی۔‏

ویڈیو ‏”‏شادی توں پہلاں سوچ وچار—‏حصہ 3:‏ پہلاں حساب لاؤ‏“‏ نُوں ویکھو تے فیر ایہناں سوالاں دے جواب دَوو‏:‏ 

• شین نال اوس بھین دا رشتہ کیہو جیہا چل رہیا سی؟‏

• وقت دے نال نال اوہنوں شین چ کیہڑیاں گلاں تے عادتاں نظر آئیاں؟‏

• اوہدے ماں پیو نے اوہدی مدد کیویں کیتی تے اوہنے کیہڑا چنگا فیصلہ کیتا؟‏