ایہہ مہارت ضروری کیوں اے؟‏ صرف اوہ ای لوک نجات پاؤن گے جیہڑ‌ے یہوواہ دا ناں لین گے۔‏ (‏رومیوں 10:‏13،‏ 14‏)‏ پر ضروری نئیں کہ بائبل کورس کرن والا ہر بندہ یہوواہ دے معیاراں مطابق زندگی وی گزارنا چاہندا اے۔‏ مُنادی چ کدی کدار سانوں ایہو جہے لوک مِلدے نیں جیہڑ‌ے خدا نُوں خوش کرن لئی اپنی زندگی چ تبدیلیاں کرنا چاہندے نیں۔‏ ایہناں لوکاں دی مدد کر کے اَسی اپنے وقت دا صحی استمال کرنے آں۔‏ جے کوئی مناسب وقت دے بعد وی یہوواہ خدا دی خدمت چ اَگے نئیں ودھدا تے سمجھ‌داری دی گل ایہہ ہوئے گی کہ اَسی اوہدے نال بائبل کورس بند کر دئیے۔‏ سانوں اوہناں لوکاں دی مدد کرنی چاہی دی اے جنہاں نُوں یہوواہ خدا اپنے وَل تے اپنی تنظیم وَل کھچ رہیا اے۔‏ (‏یوحنا 6:‏44‏)‏ پر جے اوہ بندہ مستقبل چ ظاہر کردا اے کہ اوہ ہمیشاں دی زندگی دی راہ تے چلنا چاہندا اے تے اَسی اوہدے نال دُبارہ توں بائبل کورس شروع کر سکنے آں۔‏—‏اعمال 13:‏48‏۔‏

تُسی کیہہ کر سکدے او؟‏

•  طالبِ‌علم نُوں شاباش دَوو کیونکہ اوہ سچائی دے بارے صحی علم حاصل کرنا چاہندا اے۔‏—‏1-‏تیمُتھیُس 2:‏4‏۔‏

•  اوہدی ایہہ سمجھن چ مدد کرو کہ سکھیاں ہوئیاں گلاں تے عمل کرنا کیوں ضروری اے۔‏—‏لُوقا 6:‏46-‏49‏۔‏

•  طالبِ‌علم نُوں بڑی نرمی نال یسوع مسیح دی بیج بون والی مثال بارے دَسو۔‏ اوہنوں کہوو کہ اوہ ایس گل بارے سوچے کہ کیہڑی چیز اوہنوں خدا دی خدمت چ اَگے ودھن توں روک رہی اے۔‏—‏متی 13:‏18-‏23‏۔‏

•  اوہنوں بڑے پیار نال ایہہ گل دَسو کہ ہُن توں تُسی اوہدے نال بائبل کورس جاری کیوں نئیں رکھ سکدے۔‏

•  اوہنوں دَسو کہ تُسی اوہدی حوصلہ‌افزائی کرن لئی آؤندے رہوو گے تے جے اوہ خدا دی خدمت چ اَگے قدم ودھائے گا تے بائبل کورس دُبارہ شروع کیتا جا سکدا اے۔‏

ویڈیو ویکھو تے ایہناں سوالاں دے جواب دَوو:‏

•  طالبِ‌علم تے مبشر دی گل‌بات توں کیویں پتہ چلدا اے کہ طالبِ‌علم خدا دی خدمت چ اَگے نئیں ودھ رہیا سی؟‏

•  مبشر نے طالبِ‌علم دی ایہہ سمجھن چ مدد کیویں کیتی کہ اوہنوں اپنی زندگی چ تبدیلیاں لیاؤن دی لوڑ اے؟‏

•  مبشر نے ایہہ کیویں ظاہر کیتا کہ جدوں طالبِ‌علم خدا دی خدمت چ اَگے ودھن لئی تیار ہوئے گا تے اوہ اوہدے نال دُبارہ بائبل کورس شروع کر دَوے گا؟‏