ساڈی زندگی لئی ضروری گلاں
کیہہ تُسی خدا دی کائنات چ اوہدیاں صفتاں نُوں ویکھدے او؟
جدوں تُسی تاریاں نال بھریا ہویا اسمان، رنگبرنگے پُھل یاں پانی دے خوبصورت چشمے ویکھدے او تے کیہہ توانوں ایہناں چ خالق دی شان وکھائی دیندی اے؟ ساڈے آلےدَوالے یہوواہ دِیاں بنائیاں ہوئیاں بوہت ساریاں ایہو جہیاں شیواں نیں جنہاں چ اوہدیاں صفتاں صاف نظر آؤندیاں نیں۔ (رومیوں 1:20) جدوں اَسی ایہناں شیواں تے غور کرنے آں تے سانوں خدا دی طاقت، محبت، حکمت، انصاف تے دریادلی دا پتہ چلدا اے۔—زبور 104:24۔
تُسی ہر روز یہوواہ دِیاں بنائیاں ہوئیاں کیہڑیاں شیواں تے غور کر سکدے او؟ بھانویں تُسی کسے شہر چ رہندے ہووو فیر وی تُسی پرندیاں یاں درختاں نُوں ویکھ سکدے او۔ یہوواہ دِیاں بنائیاں ہوئیاں شیواں تے غور کرن نال اَسی اپنے بارے حد توں زیادہ پریشان نئیں ہونواں گے۔ اَسی اپنیاں مشکلاں بارے سوچدے نئیں رہواں گے سگوں زیادہ ضروری گلاں تے دھیان دَواں گے۔ ایہدے علاوہ ایس گل تے ساڈا ایمان وی پکا ہوئے گا کہ یہوواہ ہمیشاں تک ساڈیاں لوڑاں نُوں پورا کر سکدا اے۔ (متی 6:25-32) جے تواڈے بچے ہے نیں تے فیر یہوواہ دِیاں بےمثال خوبیاں بارے سکھن چ اوہناں دی مدد کرو۔ جِنّاں زیادہ اَسی یہوواہ دِیاں بنائیاں ہوئیاں شیواں دی قدر کراں گے اونا ای زیادہ اَسی اپنے خالق دے نیڑے ہوندے جانواں گے۔—زبور 8:3، 4۔
ویڈیو ”تخلیق سے خدا کی شان ظاہر ہوتی ہے—روشنی اور رنگ“ ویکھو تے ایہناں سوالاں دے جواب دَوو:
-
اَسی رنگاں نُوں ویکھن دے قابل کیویں ہنے آں؟
-
کجھ شیواں نُوں فرق فرق پاسیوں ویکھن نال اوہناں دا رنگ فرق نظر آؤندا اے، ایہدی کیہہ وجہ اے؟
-
سانوں اسمان تے فرق فرق رنگ کیوں نظر آؤندے نیں؟
-
تُسی اپنے آلےدَولے قدرت دے کیہڑے خوبصورت رنگ ویکھدے او؟
-
سانوں خدا دِیاں بنائیاں ہوئیاں شیواں تے غور کرن لئی وقت کیوں کڈھنا چاہی دا اے؟