جیویں گُوند چیزاں نُوں جوڑ دی اے اونویں ای پیار گھر دے جیاں نُوں جوڑ کے رکھدا اے۔‏ پیار دے بغیر گھر دے جیاں لئی مِل جُل کے رہنا مشکل ہوندا اے۔‏ میاں بیوی اِک دُوجے لئی تے اپنے بچیاں لئی پیار کیویں وکھا سکدے نیں؟‏

اِک پیار کرن والا خاوند اپنی بیوی دِیاں ضرورتاں،‏ جذباتاں تے اوہدی رائے دا خیال رکھدا اے۔‏ (‏اِفسیوں 5:‏28،‏ 29‏)‏ اوہ اپنے گھرانے دِیاں جسمانی تے روحانی ضرورتاں نُوں پورا کردا اے۔‏ اوہ خاندانی عبادت دا بندوبست ضرور کردا اے۔‏ (‏1-‏تیمُتھیُس 5:‏8‏)‏ اِک پیار کرن والی بیوی اپنے خاوند دی تابع‌دار ہوندی اے تے اوہدی دلوں عزت کردی اے۔‏ (‏اِفسیوں 5:‏22،‏ 33؛‏ 1-‏پطرس 3:‏1-‏6‏)‏ میاں بیوی نُوں اِک دُوجے دِیاں غلطیاں معاف کرن لئی تیار رہنا چاہی دا اے۔‏ (‏اِفسیوں 4:‏32‏)‏ پیار کرن والے ماں پیو اپنے ہر بچے نُوں توجہ دیندے نیں تے اوہنوں یہوواہ نال پیار کرنا سکھاندے نیں۔‏ (‏اِستثنا 6:‏6،‏ 7؛‏ اِفسیوں 6:‏4‏)‏ اوہ جاننا چاہندے نیں کہ اوہناں دے بچیاں نُوں سکول چ کیہو جہے مسئلیاں دا سامنا ہو رہیا اے؟‏ اوہ اپنے دوستاں وَلّوں آن والے دباؤ دا سامنا کیویں کر رہے نیں؟‏ جدوں گھرانے چ پیار ہوندا اے تے ایہدا ہر جی خوش رہندا اے تے محفوظ محسوس کردا اے۔‏

ویڈیو ‏”‏اپنے گھرانے چ کدی ختم نہ ہون والی محبت وکھاؤ‏“‏ ویکھو تے فیر ایہناں سوالاں دے جواب دَوو:‏

• اِک پیار کرن والا خاوند اپنی بیوی دی دیکھ‌بھال کیویں کردا اے؟‏

• اِک پیار کرن والی بیوی اپنے خاوند لئی دلوں عزت کیویں وکھاندی اے؟‏

• پیار کرن والے ماں پیو کیہہ کر سکدے نیں تاکہ خدا دا کلام اوہناں دے بچیاں دے دلاں چ وَس جائے؟‏