کسے دی درستی کرن چ صرف اوہدی تربیت کرنا تے اوہنوں تلیم دینا ای نئیں سگوں اوہنوں اوہدیاں غلطیاں دَسنا تے اوہنوں سزا دینا وی شامل ہوندا اے۔‏ یہوواہ ساڈی درستی ایس لئی کردا اے تاکہ اَسی اوہدی عبادت اوہدی مرضی مطابق کر سکئے۔‏ (‏رومیوں 12:‏1؛‏ عبرانیوں 12:‏10،‏ 11‏)‏ کدی کدی سانوں چنگا نئیں لگدا کہ کوئی ساڈی درستی کرے پر جے اَسی ایہنوں قبول کر لینے آں تے سانوں بڑا فائدہ ہوندا اے۔‏ اَسی نیکی دی راہ تے چلنے آں تے سانوں برکتاں مِلدیاں نیں۔‏ (‏امثال 10:‏7‏)‏ درستی کرن والیاں نُوں کیہڑی گل ذہن چ رکھنی چاہی دی اے؟‏ تے جنہاں دی درستی ہوندی اے اوہناں نُوں کیہہ یاد رکھنا چاہی دا اے؟‏

درستی کرن والے۔‏ ماں پیو،‏ بزرگاں تے دُوجے بھین بھراواں نُوں کوشش کرنی چاہی دی اے کہ اوہ پیار تے نرمی نال درستی کرن جیویں یہوواہ کردا اے۔‏ (‏یرمیاہ 46:‏28‏)‏ پر جے کدی سختی نال درستی کرن دی لوڑ پوے وی تے اوہناں نُوں پیار محبت نال پیش آنا چاہی دا اے۔‏—‏طِطُس 1:‏13‏۔‏

جنہاں دی درستی ہوندی اے۔‏ سانوں ایہہ گل ہمیشاں یاد رکھنی چاہی دی اے کہ ساڈی درستی بھانویں جیس طرحاں وی کیتی جائے سانوں ایہنوں فوراً قبول کرنا چاہی دا اے۔‏ ایہدے چ نُقص نئیں کڈھنے چاہی دے۔‏ (‏امثال 3:‏11،‏ 12‏)‏ اَسی عیب‌دار انسان آں،‏ سانوں ساریاں نُوں درستی دی لوڑ اے تے ساڈی درستی فرق فرق طریقیاں نال ہوندی اے۔‏ بائبل یاں عبادتاں توں مِلن والی تلیم توں ساڈی درستی ہو سکدی اے۔‏ یاں فیر کدی کدار عدالتی کمیٹی نُوں کسے بھین یاں بھرا دی درستی کرنی پیندی اے۔‏ جے اَسی درستی نُوں قبول کراں گے تے نہ صرف ہُن ساڈی زندگی سکھی ہوئے گی سگوں سانوں ہمیشاں تک زندہ رہن دا موقع وی ملے گا۔‏—‏امثال 10:‏17‏۔‏

ویڈیو ‏”‏یہوواہ اوہناں دی درستی کردا اے جنہاں نال اوہ محبت کردا اے‏“‏ ویکھو تے فیر ایہناں سوالاں دے جواب دَوو:‏

• شروع چ بھرا کینن دی زندگی کیہو جہی سی پر بعد چ کیہو جہی ہو گئی؟‏

• یہوواہ نے اوہدی درستی کیویں کیتی؟‏

• اَسی اوہدے تجربے توں کیہہ سکھنے آں؟‏