خدا نال دوستی کرن لئی ضروری اے کہ بائبل کورس کرن والے لوک اوہدے تے اپنے ایمان نُوں مضبوط کرن۔ (‏عبرانیوں 11:‏6‏)‏ ایس حوالے نال اوہناں دی مدد کرن لئی اَسی کتاب ‏”‏خوشیاں بھری زندگی پاؤ‏“‏ نُوں استمال کر سکنے آں۔ ایہدے چ بائبل دِیاں ایتاں، زبردست دلیلاں، سوال، ویڈیوز تے تصویراں نیں۔ جدوں اَسی بائبل کورس کرن والیاں دی مدد کراں گے کہ اوہ اپنی زندگی بائبل دے اصولاں مطابق ڈھالن تے خدا نال اپنا رشتہ مضبوط کرن تے اوہناں دا ایمان اَگ ورگیاں مشکلاں چ وی نئیں ڈولے گا۔—‏1-‏کُرنتھیوں 3:‏12-‏15‏۔‏

کجھ لوک سوچدے نیں کہ اوہ خدا نال دوستی نئیں کر سکدے کیونکہ اوہ اوہنوں ویکھ نئیں سکدے۔ سانوں اوہناں دی مدد کرن دی لوڑ اے تاکہ اوہ یہوواہ نُوں جانن تے اوہدے تے بھروسا کرن۔‏

ویڈیو ‏”‏کتاب ‏”‏خوشیاں بھری زندگی پاؤ—‏ہُن تے ہمیشاں تک“‏ دے ذریعے یہوواہ تے ایمان مضبوط کرو“‏ نُوں ویکھو تے فیر ایہناں سوالاں دے جواب دَوو:‏

• کیس گل توں پتہ چلدا اے کہ بھین نے بائبل کورس کران توں پہلاں ایہدی چنگی تیاری کیتی ہوئی سی؟‏

• اوہنے بائبل کورس کرن والی کُڑی دے دل دی گل جانن لئی یسعیاہ 41:‏10،‏ 13 بارے کیہڑے اضافی سوال پچھے؟‏

• ویڈیو تے بائبل دِیاں ایتاں دا اوس کُڑی دے دل تے کیہہ اثر ہویا؟‏

بوہت سارے لوک یسوع مسیح دے فدیے بارے نئیں جاندے یاں فیر اوہ فدیے دے بندوبست نُوں اپنے لئی خدا وَلّوں اِک تحفہ نئیں سمجھدے۔ (‏گلتیوں 2:‏20‏)‏ ایس لئی سانوں اوہناں دی مدد کرنی چاہی دی اے کہ اوہ یسوع مسیح دے فدیے تے اپنے ایمان نُوں مضبوط کرن۔‏

ویڈیو ‏”‏کتاب ‏”‏خوشیاں بھری زندگی پاؤ—‏ہُن تے ہمیشاں تک“‏ دے ذریعے یسوع تے ایمان مضبوط کرو“‏ نُوں ویکھو تے فیر ایہناں سوالاں دے جواب دَوو:‏

• کیس گل توں پتہ چلدا اے کہ بھرا نے بائبل کورس کران توں پہلاں ایہدی چنگی تیاری کیتی ہوئی سی؟‏

• اوہنے ‏”‏ہور جانن لئی“‏ والے حصے چ دِتے گئے مضمون نُوں کیویں استمال کیتا تاکہ اوہ بائبل کورس کرن والے بندے دی مدد کر سکے؟‏

• ایہہ کیوں ضروری اے کہ اَسی بائبل کورس کرن والے بندے لئی دُعا کرئیے؟‏