ایہہ مہارت ضروری کیوں اے؟‏ پولس رسول نے مسیحیاں دا حوصلہ ودھاؤن لئی 14 خط لکھے جنہاں چ پہلا کُرنتھیوں دا خط وی شامل اے۔‏ خط لکھن دا فائدہ ایہہ وے کہ لکھن والے کول سوچ سمجھ کے لفظ چنن دا وقت ہوندا اے نالے جدے ناں خط لکھیا جاندا اے،‏ اوہ ایہنوں وار وار پڑھ سکدا اے۔‏ خط اِک بہترین ذریعہ اے جدے نال اَسی اپنے جانن والیاں تے رشتےداراں نُوں گواہی دے سکنے آں۔‏ خطاں دے ذریعے اَسی اوہناں لوکاں نُوں وی چنگی طرحاں گواہی دے سکنے آں جنہاں نال ساڈی آمنےسامنے ملاقات نئیں ہو سکدی۔‏ مثال دے طور تے کدی کدار اِنج ہوندا اے کہ کسے بندے نُوں ساڈا پیغام چنگا لگدا اے پر جدوں اَسی اوہنوں دُبارہ مِلن جانے آں تے اوہ گھر ای نئیں مِلدا۔‏ یاں فیر ایہہ وی ہو سکدا اے کہ کجھ لوک ایہو جہیاں تھانواں تے رہندے نیں جِتھے عام بندے نُوں جان دی اجازت نئیں ہوندی،‏ جِتھے حفاظت لئی سخت انتظام ہوندے نیں یاں جِتھے پونچنا مشکل ہوندا اے۔‏ پر خط لکھدے ہوئیاں توانوں کیہڑیاں گلاں دا دھیان رکھنا چاہی دا اے خاص کر کے اوہدوں جدوں تُسی کسے ایہو جہے بندے نُوں خط لکھ رہے او جنہوں تُسی بالکل نئیں جان دے؟‏

تُسی کیہہ کر سکدے او؟‏

• خط چ اوہی گلاں لکھو جیہڑ‌یاں تُسی اوہنوں مِل کے کہنا چاہندے او۔‏ تُسی شروع چ کجھ اپنے بارے دَس سکدے او تے فیر ایہہ دَس سکدے او کہ تُسی اوہنوں خط کیوں لکھ رہے او۔‏ تُسی کوئی ایہو جیہا سوال لکھ سکدے او جدے نال اوس بندے چ ہور جانن دا شوق پیدا ہووے نالے ساڈی ویب‌سائٹ تے اوہدا دھیان ضرور دَواؤ۔‏ تُسی اوہنوں بائبل کورس کرن دے بندوبست بارے وی دَس سکدے او۔‏ تُسی کسے ایہو جہی کتاب وچوں کجھ مضموناں دے موضوع لکھ سکدے او جدے توں اَسی بائبل کورس کرانے آں۔‏ تُسی خط دے نال رابطے دا کارڈ،‏ کسے عبادت یاں کنونشن دا دعوت‌نامہ یاں کوئی پرچہ وی گھل سکدے او۔‏

• بوہتا لما چوڑا خط نہ لکھو کیونکہ جے تُسی خط چ بوہت زیادہ گلاں لکھ دیو گے تے پڑھن والا اَک جائے گا۔‏—‏صفحہ 8 تے ‏”‏اِک اثردار خط دی مثال‏“‏ نُوں ویکھو۔‏

• خط لکھن توں بعد ایہنوں دُبارہ پڑھو تاکہ کوئی غلطی نہ رہ جائے۔‏ ایس گل دا دھیان رکھو کہ خط دی لکھائی صاف ہووے تے ایہہ پیار تے نرمی والے انداز چ لکھیا ہووے۔‏ خط گھلن دا سارا خرچہ چکو۔‏