جدوں اَسی کسے نُوں تلیم دیندے ویلے اوہنوں کوئی ویڈیو یاں تصویر وکھاؤنے آں تے اوہدے چ ہور جانن دا شوق ودھدا اے۔‏ نالے اوہ اوہناں گلاں نُوں اسانی نال سمجھ سکدا اے تے یاد رکھ سکدا اے جیہڑ‌یاں اوہ سکھ رہیا ہوندا اے۔‏ ساڈے سب توں عظیم اُستاد یعنی یہوواہ خدا نے وی اپنے بندیاں نُوں کجھ خاص گلاں سکھاؤن لئی اوہناں نُوں فرق فرق شیواں وکھائیاں۔‏ (‏پیدایش 15:‏5؛‏ یرمیاہ 18:‏1-‏6‏)‏ عظیم اُستاد یسوع مسیح نے وی لوکاں نُوں تلیم دیندے ویلے اِنج ای کیتا۔‏ (‏متی 18:‏2-‏6؛‏ 22:‏19-‏21‏)‏ اَج کل لوکاں نُوں تلیم دین لئی ویڈیوز بوہت فائدےمند ثابت ہو رہیاں نیں۔‏ کیہہ تُسی لوکاں نُوں بائبل کورس کراؤندے ویلے ویڈیوز نُوں صحی طرحاں نال استمال کردے او؟‏

ساڈی تنظیم نے دَس ایہو جہیاں ویڈیوز تیار کیتیاں نیں جنہاں دے ذریعے اَسی لوکاں نُوں کتاب ‏”‏خدا وَلّوں خوش‌خبری‏“‏ چوں تلیم دیندے ویلے خاص گلاں سکھا سکنے آں۔‏ ایہناں ویڈیوز دے موضوع اوہناں سوالاں توں لئے گئے نیں جیہڑ‌ے ایس کتاب دے سبقاں چ موٹے لفظاں چ لکھے ہوئے نیں۔‏ ساڈی ویب‌سائٹ ®jw.org تے ایس کتاب دے کجھ سبقاں نال ویڈیوز دے لنک دِتے گئے نیں جنہاں توں پتہ چلدا اے کہ کیہڑی ویڈیو کدوں وکھاؤنی اے۔‏ ایہناں ویڈیوز دے علاوہ ساڈی ویب‌سائٹ تے ہور وی ویڈیوز دِتیاں گئیاں نیں جیہڑ‌یاں اوہناں کتاباں چ لکھیاں گلاں نُوں سمجھاؤندیاں نیں جنہاں توں اَسی بائبل کورس کراؤنے آں۔‏

شاید تُسی اپنے طالبِ‌علم نال بائبل چوں کسے ایہو جہے موضوع تے گل کر رہے او جیہڑ‌ا اوہدے لئی مشکل اے۔‏ یاں فیر اوہ آپ کسے مشکل چوں لنگھ رہیا اے۔‏ ایس صورت چ تُسی ®jw.org تے جےڈبلیو براڈکاسٹنگ توں کوئی ایہو جہی ویڈیو لبھو جیہڑ‌ی اوہدے لئی فائدےمند ہووے۔‏ فیر تُسی دونویں مِل کے ایس ویڈیو نُوں ویکھو تے ایہدے تے گل‌بات کرو۔‏

ساڈی ویب‌سائٹ تے ہر مہینے نوِیاں ویڈیوز آؤندیاں نیں۔‏ جدوں تُسی ایہہ ویڈیوز ویکھدے او تے سوچو کہ تُسی دُوجیاں نُوں تلیم دیندے ویلے ایہناں نُوں کیویں استمال کر سکدے او۔‏