ساڈی زندگی لئی ضروری گلاں
مُنادی دا گروپ لین والے بھراواں لئی کجھ مشورے
ساڈیاں دُوجیاں عبادتاں وانگوں مُنادی دے گروپ وی یہوواہ وَلّوں اِک نعمت نیں جنہاں دے ذریعے اَسی اِک دُوجے لئی پیار وکھا سکنے آں تے اِک دُوجے دا حوصلہ ودھا سکنے آں۔ (عبرانیوں 10:24، 25) مُنادی دا گروپ 5 توں 7 منٹ تک دا ہونا چاہی دا اے جدے چ بھین بھراواں نُوں وَنڈنا، علاقے بارے دَسنا تے دُعا کرنا شامل اے۔ (جے مُنادی دے گروپ دے بعد کوئی ہور عبادت وی اے تے گروپ دا وقت ہور گھٹ کیتا جا سکدا اے۔) مُنادی دا گروپ لین والے بھرا نُوں ایہدی پہلاں توں تیاری کرنی چاہی دی اے تاکہ اوہ ایہدے چ حصہ لین والے بھین بھراواں نُوں مُنادی بارے کجھ چنگے مشورے دے سکے۔ مثال لئی، زیادہتر بھین بھرا ہفتے والے دن مُنادی چ حصہ لیندے نیں۔ ایس لئی بہتر ہوئے گا کہ بھرا اوہناں نُوں دَسے کہ مُنادی چ کیس موضوع تے گل کرنی چاہی دی اے۔ مُنادی دے گروپ چ تُسی ہور کیہڑے نکتیاں بارے گل بات کر سکدے او؟
-
تُسی ”ساڈی مسیحی زندگی تے خدمت“ والے قاعدے چوں ”گل بات لئی مشورے“ نُوں استمال کر سکدے او۔
-
تُسی دَس سکدے او کہ حال چ ای پیش آئے کسے واقعے یاں خبر نُوں استمال کر دے ہوئیاں گل بات کیویں شروع کیتی جا سکدی اے۔
-
تُسی سمجھا سکدے او کہ ساڈے عقیدیاں بارے اکثر پچھے جان والے سوالاں دا جواب کیویں دِتا جا سکدا اے۔
-
تُسی دَس سکدے او کہ کسے ایہو جہے بندے نال گل کیویں کرنی اے جیہڑا خدا نُوں نئیں من دا یاں فیر اِرتقا دے نظریے دی حمایت کر دا اے، کوئی دُوجی زبان بولدا اے یاں فیر کسے ایہو جہے مذہب نال تعلق رکھدا اے جیہڑا تواڈے علاقے چ ایناں عام نئیں۔
-
تُسی دَس سکدے او کہ بائبل نُوں یاں ساڈی ویبسائٹ jw.org تے جےڈبلیو لائبریری ایپ نُوں کیویں استمال کرنا اے۔
-
تُسی سمجھا سکدے او کہ تلیم دین دے اوزاراں چوں کسے کتاب یاں رسالے نُوں کیویں استمال کرنا اے۔
-
تُسی دَس سکدے او کہ مُنادی کرن دے دُوجے طریقیاں چ کیویں حصہ لینا اے جیویں کہ فون دے ذریعے،خط دے ذریعے، کسے عوامی جگہ تے گواہی دینا، واپسی ملاقات کرنا یاں بائبل کورس کرانا۔
-
تُسی دَس سکدے او کہ مُنادی دے دوران لوکاں نال کیویں پیش آنا اے، کنہاں چیزاں دا خیال رکھنا اے تے ایہو جہیاں ہور گلاں۔
-
تُسی کتاب ”تلیم دین تے پڑھن چ ماہر بنو“ چوں کسے سبق یاں ویڈیو تے گل بات کر سکدے او۔
-
تُسی دَس سکدے او کہ اپنے نال مُنادی کرن والے بھین بھرا دی مدد کیویں کرنی اے تے اوہدا حوصلہ کیویں ودھانا اے۔
-
تُسی بائبل چوں کوئی ایہو جہی ایت پڑھ سکدے او جیہڑی مُنادی دے دوران کم آئے گی یاں فیر تُسی کوئی حوصلہ ودھان والا تجربہ دَس سکدے او۔
