ساڈی زندگی لئی ضروری گلاں
یقین رکھو کہ تُسی دُنیا دے خاتمے توں بچ جاؤ گے
اوہ وقت آن والا اے جدوں یہوواہ ایس بھیڑی دُنیا نُوں مزید برداشت نئیں کرے گا۔ بوہت چھیتی جھوٹھے مذہب ختم ہو جان گے، قوماں یہوواہ دے بندیاں تے حملہ کرن گیاں تے یہوواہ بھیڑے لوکاں نُوں ہرمجدون دی جنگ چ ختم کر دَوے گا۔ یہوواہ دے بندے ایہناں زبردست واقعیاں دے ہون دا اِنتظار کر رہے نیں۔
ایہہ سچ اے کہ سانوں وڈی مصیبت بارے ساریاں گلاں دا نئیں پتہ۔ مثال لئی اَسی نئیں جاندے کہ ایہہ کدوں شروع ہوئے گی، حکومتاں کیہڑیاں گلاں نُوں وجہ بنا کے مذہباں تے حملہ کرن گیاں، خدا دے بندیاں تے قوماں دا حملہ کِنّی دیر تک رہوے گا تے ایہدے چ کیہہ کجھ شامل ہووے گا۔ ایہدے علاوہ سانوں ایہہ وی نئیں پتہ کہ یہوواہ ہرمجدون دی جنگ چ بھیڑے لوکاں نُوں ختم کرن لئی کیہڑے طریقیاں نُوں استمال کرے گا۔
پر پاک کلام سانوں اوہ سب کجھ دَسدا اے جدی وجہ توں اَسی ایہناں چیزاں دا سامنا دلیری نال کر سکنے آں۔ مثال لئی ایہدے چ دَسیا گیا اے کہ اَسی آخری زمانے چ رہ رہے آں۔ (2-تیمُتھیُس 3:1) ایہدے چ ایہہ وی دَسیا گیا اے کہ اوس عرصے نُوں گھٹایا جائے گا جدے چ مذہباں تے حملہ کیتا جاوے گا تاکہ سچا مذہب تباہ نہ ہووے۔ (متی 24:22) ایہدے علاوہ ایہہ سانوں دَسدا اے کہ یہوواہ اپنے بندیاں نُوں بچائے گا۔ (2-پطرس 2:9) نالے ایہدے چ ایہہ وی دَسیا گیا اے کہ یہوواہ نے ہرمجدون دی جنگ چ بھیڑے لوکاں نُوں ختم کرن تے وڈی بِھیڑ نُوں بچان لئی جنہوں چُنیا اے،اوہ بڑا طاقتور تے انصافپسند اے۔—مکاشفہ 19:11، 15، 16۔
مستقبل وچ جو کجھ ہون والا اے اوہدی وجہ توں لوک ڈر دے مارے چکرا جان گے۔ پر جدوں اَسی ایس گل تے غور کراں گے کہ یہوواہ نے ماضی چ اپنے بندیاں نُوں کیویں بچایا تے اوہنے مستقبل بارے کیہڑے وعدے کیتے نیں تے اَسی ایس یقین نال سدھے کھلو سکاں گے تے اپنے سر چُک سکاں گے کہ ساڈی نجات دا وقت نیڑے وے۔—لُوقا 21:26، 28۔
