یسوع مسیح لئی اوہدی آخری عیدِفسح بوہت ای اہم سی۔‏ اوہدی موت دا وقت نیڑے آ گیا سی۔‏ایس لئی اوہنے اپنی آخری عیدِفسح اپنے شاگرداں نال منان دا فیصلہ کیتا۔‏ اوہدا ارادہ سی کہ ایس موقعے تے اوہ اپنے شاگرداں نُوں حکم دَوے گا کہ ہُن توں اوہ ہر سال اوہدی موت دی یادگیری منایا کرن گے۔‏ سو اوہنے پطرس تے یوحنا نُوں عید منان لئی جگہ تیار کرن واسطے گھلیا۔‏ (‏لُوقا 22:‏7-‏13‏؛‏ پہلے صفحے تے دِتی تصویر نُوں ویکھو)‏۔‏ ایس توں اَسی سکھنے آں کہ سانوں وی یسوع دی موت دی یادگیری منان لئی تیاری کرنی چاہی دی اے جیہڑ‌ی ایس سال 27 مارچ نُوں ہوئے گی۔‏ سانوں یقین اے کہ کلیسیاواں نے ایس خاص موقعے لئی بوہت ساریاں تیاریاں کر لئیاں ہون گیاں جیویں کہ اوہناں نے روٹی تے مے دا بندوبست کر لیا ہوئے گا۔‏ تے شاید ایہہ فیصلہ وی کر لیا ہوئے گا کہ ایس عبادت تے تقریر کون دَوے گا۔‏ پر سوال ایہہ وے کہ اَسی ذاتی طور تے ایس خاص عبادت لئی تیاری کیویں کر سکنے آں؟‏

اپنے دل نُوں تیار کرو۔‏ یادگیری دے حوالے نال دِتیاں گئیاں ایتاں نُوں پڑھو تے اوہناں تے سوچ‌وچار کرو۔‏ ایہناں ایتاں دا شیڈول کتاب ‏”‏روزبروز کتابِ مُقدس سے تحقیق کریں“‏ چوں مل سکدا اے۔‏ ایس توں وی زیادہ معلومات توانوں ‏”‏زمین تے یسوع دی زندگی دا آخری ہفتہ“‏ توں مِل سکدیاں نیں۔‏ (‏ایہنوں ویکھن لئی ساڈی ویب‌سائٹ تے ‏”‏کتاباں تے ویڈیوز‏“‏ والے حصے تے جا کے ‏”‏کتاباں‏“‏ تے کلک کرو۔‏)‏ (‏اپریل 2020 دے ‏”‏ساڈی مسیحی زندگی تے خدمت—‏عبادت لئی قاعدہ“‏ نُوں وی ویکھو۔‏)‏ خاندان مِل کے یسوع دی قربانی دی اہمیت تے غور کر سکدے نیں۔‏ ایہدے لئی اوہ کتاب ‏”‏یہوواہ کے گواہوں کے لئے مطالعے کے حوالے“‏ وچوں فدیے بارے معلومات لبھ سکدے نیں تے فیر اپنی خاندانی عبادت چ ایہناں تے گل بات کر سکدے نیں۔‏

دُوجیاں نُوں یادگیری دی عبادت چ شامل ہون دی دعوت دَوو۔‏ ایس عبادت لئی دعوت‌نامے وَنڈن دی مہم چ ودھ چڑھ کے حصہ لوو۔‏ سوچو کہ تُسی کنہاں نُوں دعوت دَوو گے جیویں کہ اوہ لوک جنہاں نال تُسی واپسی ملاقاتاں کردے او،‏ تواڈے رشتےدار،‏ تواڈے جان پچھان والے یاں فیر اوہ لوک جنہاں نُوں تُسی پہلے کدی بائبل کورس کراندے سو۔‏ بزرگاں نُوں اوہناں بھین بھراواں نُوں وی دعوت دینی چاہی دی اے جنہاں نے مُنادی کرنا تے عبادتاں تے آنا چھڈ دِتا اے۔‏ تُسی جیس بندے نُوں دعوت دینا چاہندے او،‏ جے اوہ تواڈے علاقے چ نئیں رہندا تے تُسی کیہہ کر سکدے او؟‏ ساڈی ویب‌سائٹ jw.org تے حصہ ‏”‏ساڈے بارے معلومات“‏ تے کلک کرو۔‏ فیر حصہ ‏”‏یادگیری‏“‏ تے جا کے ویکھو کہ اوس بندے دے علاقے چ یادگیری دی عبادت کتھے ہوئے گی تے ایہدا وقت کیہہ ہوئے گا۔‏

اَسی یادگیری دی تیاری کرن لئی ہور کیہہ کر سکنے آں؟‏