ساڈی زندگی لئی ضروری گلاں
کنونشناں—محبت ظاہر کرن دا ودھیا موقع
اَسی ہر سال کنونشن تے جا کے اینے خوش کیوں ہنے آں؟ اِسرائیلیاں وانگوں سانوں وی کنونشناں تے اپنے ہزاراں ہم ایمان بھین بھراواں نال مل کے یہوواہ دی عبادت کرن دا موقع مِلدا اے۔ کنونشناں تے اَسی ایہو جہیاں گلاں سکھنے آں جنہاں دے ذریعے اَسی یہوواہ دے نیڑے جا سکنے آں۔ نالے اوتھے سانوں اپنے گھر والیاں تے دوستاں نال وقت گزارنا وی بوہت چنگا لگدا اے۔ اَسی کنونشناں دی بوہت قدر کرنے آں ایسے لئی اَسی تنوں دن حاضر ہون دی پوری کوشش کرنے آں۔
جدوں اَسی کنونشناں تے جانے آں تے سانوں صرف ایہہ نئیں سوچنا چاہی دا اے کہ اوتھے جان نال سانوں ذاتی طور تے کیہہ فائدہ ہوئے گا سگوں سانوں ایہہ وی سوچنا چاہی دا اے کہ ایہناں موقعیاں تے اَسی دُوجیاں لئی محبت کیویں وکھا سکنے آں۔ (گلتیوں 6:10؛ عبرانیوں 10:24، 25) جدوں اَسی دُوجے بھین بھراواں لئی دروازہ کھولنے آں تے اپنے لئی فالتو سیٹاں نئیں رکھدے تے اَسی ظاہر کرنے آں کہ اَسی دُوجیاں دے بھلے بارے وی سوچنے آں۔ (فِلپّیوں 2:3، 4) کنونشناں تے سانوں نویں دوست بنان دا موقع وی مِلدا اے۔ اَسی پروگرام شروع ہون توں پہلاں، کھانے دے وقفے چ تے پروگرام ختم ہون توں بعد ایہو جہے بھین بھراواں نال گل بات کرن بارے سوچ سکنے آں جنہاں نُوں اَسی نئیں جاندے۔(2-کُرنتھیوں 6:13) ایس طرحاں شاید اَسی ایہو جہے دوست بنا لواں گے جیہڑے کدی ساڈا ساتھ نئیں چھڈن گے۔ایہدے علاوہ، جدوں کنونشن تے آن والے نویں لوک ساڈے چ سچی محبت ویکھن گے تے شاید اوہ وی ساڈے نال مل کے یہوواہ دی عبادت کرن لگ پین۔—یوحنا 13:35۔
ویڈیو ”بینالاقوامی کنونشناں، ”محبت کدی ختم نئیں ہوئے گی““ ویکھو تے فیر ایہناں سوالاں دے جواب دَوو:
-
2019 دی بین الاقوامی کنونشناں دے دوران فرق فرق مُلکاں توں آن والے بھین بھراواں لئی پیار کیویں وکھایا گیا؟
-
یہوواہ دے بندیاں چ جیہڑا پیار تے اتحاد پایا جاندا اے اوہ ایناں خاص کیوں اے؟
-
گورننگ باڈی دے ممبراں نے مسیحی محبت دے کیہڑے خاص پہلوواں تے دھیان دَوایا؟
-
تُسی اوس محبت چ اپنا حصہ کیویں پا سکدے او جیہڑی ساڈیاں کنونشناں تے وکھائی جاندی اے؟
جرمنی تے جنوبی کوریا چ ساڈے بھین بھرا مسیحی محبت دی وجہ توں کیویں اِک مُٹھ ہوئے نیں؟
-
سانوں کیہہ عزم کرنا چاہی دا اے؟
