یعقوب نُوں پتہ سی کہ یہوواہ چاہندا اے کہ صرف اوہدی ای عبادت کیتی جائے بھانویں کہ اوہنے بُت‌پرستی دے خلاف حالے تک کوئی قانون نئیں دِتا سی۔‏ (‏خروج 20:‏3-‏5‏)‏ جدوں یہوواہ نے یعقوب نُوں بیت‌ایل واپس جان دا حکم دِتا تے یعقوب نے اپنے نال دے سارے لوکاں نُوں کہیا کہ اوہ اپنے اپنے بُتاں نُوں سُٹ دین۔‏ فیر یعقوب نے سارے بُتاں ایتھوں تک کہ اوہناں والیاں نُوں وی زمین چ دبا دِتا جیہڑ‌یاں لوکاں نے تعویتاں دے طور تے کناں چ پائیاں ہوئیاں سن۔‏ (‏پیدایش 35:‏1-‏4‏)‏ واقعی یعقوب دے ایس کم توں یہوواہ بوہت خوش ہویا ہوئے گا۔‏

اَسی کیہہ کر سکنے آں تاکہ اَسی صرف یہوواہ دی عبادت کر ئیے؟‏ سب توں ضروری گل ایہہ وے کہ اَسی بُت‌پرستی یاں جادو ٹونے توں دُور رہیے۔‏ ایہدا مطلب اے کہ اَسی ہر اوس شے یاں کم توں دُور رہیے جدا تعلق جادو منتر یاں بدروحواں نال اے۔‏ ایہہ ویکھنا وی ضروری اے کہ اَسی کیہو جہی تفریح کرنے آں۔‏ مثال لئی اپنے آپ کولوں پچھو:‏ کیہہ مینوں ایہو جہیاں کتاباں تے فلماں پسند نیں جنہاں چ جن،‏ بھوت،‏ چڑیلاں تے دیو وغیرہ دا ذکر ہوندا اے؟‏ کیہہ مَیں ایہو جہیاں فلماں ویکھنا،‏ گانے سُننا یاں ویڈیو گیمز کھیڈنا واں جنہاں چ دَسیا جاندا اے کہ جادومنتر،‏ کالا علم یاں تعویت گنڈا وغیرہ کرن چ کوئی بُرائی نئیں؟‏ سانوں ہر اوس شے توں دُور رہنا چاہی دا اے جدے توں یہوواہ نفرت کردا اے۔‏—‏زبور 97:‏10‏۔‏

ویڈیو ‏”‏اِبلیس دا مقابلہ کرو‏“‏ ویکھو تے فیر ایہناں سوالاں دے جواب دَوو:‏

• ماریہ نُوں کیس مسئلے دا سامنا سی؟‏

• جے تُسی یاں تواڈا کوئی جانن والا جادوٹونے یاں کالے علم دی وجہ توں پریشان اے تے کلیسیا دے بزرگاں کولوں مدد لینا ضروری کیوں اے؟‏

• جے اَسی یہوواہ دی پناہ چ رہنا چاہنے آں تے سانوں کیہڑے کماں توں دُور رہنا چاہی دا اے؟‏

• ماریہ نے کیہہ فیصلہ کیتا؟‏

• تُسی شیطانی طاقتاں دے اثر توں بچن لئی کیہہ کجھ کر سکدے او؟‏