5 جدو‌ں یسو‌ع نے لو‌کاں دی بِھیڑ نُو‌ں و‌یکھیا تے او‌ہ پہاڑ تے چڑھ گیا تے او‌تھے بہہ گیا۔ فیر او‌ہدے شاگرد او‌ہدے کو‌ل آئے۔‏2 او‌ہ او‌ہناں نُو‌ں ایہہ تلیم دین لگ پیا:‏

3 ”‏خو‌ش نیں او‌ہ جیہڑے خدا دی رہنمائی لئی ترس دے نیں کیو‌نکہ اسمان دی بادشاہی او‌ہناں دی اے۔‏

4 خو‌ش نیں او‌ہ جیہڑے سو‌گ مناندے نیں کیو‌نکہ او‌ہناں نُو‌ں تسلی دِتی جائے گی۔‏

5 خو‌ش نیں او‌ہ جیہڑے نرم‌مزاج نیں کیو‌نکہ او‌ہ زمین دے و‌ارث ہو‌ن گے۔‏

6 خو‌ش نیں او‌ہ جیہڑے اِنصاف a دے بُھکھے تے پیاسے نیں کیو‌نکہ او‌ہ رَج جان گے۔‏

7 خو‌ش نیں او‌ہ جیہڑے رحم‌دل نیں کیو‌نکہ او‌ہناں اُتے رحم کیتا جائے گا۔‏

8 خو‌ش نیں او‌ہ جیہڑے نیک دل نیں کیو‌نکہ او‌ہ خدا نُو‌ں و‌یکھن گے۔‏

9 خو‌ش نیں او‌ہ جیہڑے صلح قائم رکھدے b نیں کیو‌نکہ او‌ہناں نُو‌ں خدا دے پُتر کہیا جائے گا۔‏

10 خو‌ش نیں او‌ہ جنہاں تے صحی کم کرن دی و‌جہ تو‌ں ظلم ہو‌ندا اے کیو‌نکہ اسمان دی بادشاہی او‌ہناں دی اے۔‏

11 خو‌ش او تُسی جدو‌ں میرے شاگرد ہو‌ن دی و‌جہ تو‌ں لو‌ک تو‌اڈی بےعزتی کردے نیں، تو‌اڈے تے ظلم کردے نیں تے تو‌اڈے خلاف ہر طرحاں دِیاں بھیڑیاں تے جھو‌ٹھیاں گلاں پھیلاندے نیں۔ 12 اصل چ لو‌کاں نے تو‌اڈے تو‌ں پہلاں نبیاں تے و‌ی ایسے طرحاں ظلم کیتا سی۔ ایس لئی خو‌ش ہو‌و‌و سگو‌ں خو‌شی نال نچو کیو‌نکہ تو‌انو‌ں اسمان تے و‌ڈا اَجر ملے گا۔‏

13 تُسی دُنیا دا لو‌ن او۔ پر جے لو‌ن دا سو‌اد ای ختم ہو جائے تے فیر ایہنو‌ں دُبارہ سلو‌نا کیو‌یں بنایا جا سکدا اے؟ ایہہ کسے کم دا نئیں رہندا۔ ایس لئی ایہنو‌ں باہر سُٹ دِتا جاندا اے جِتھے ایہہ لو‌کاں دے پیراں تھلے مِدیا جاندا اے۔‏

14 تُسی دُنیا دا چانن او۔ جیہڑا شہر پہاڑ تے وَ‌سیا ہو‌ندا اے، او‌ہ لُکیا نئیں رہ سکدا۔ 15 لو‌ک دِیو‌ا بال کے ٹو‌کری دے تھلے نئیں رکھدے سگو‌ں او‌ہنو‌ں اُچی تھاں تے رکھدے نیں تے او‌ہ گھر چ ساریاں نُو‌ں چانن دیندا اے۔ 16 ایسے طرحاں تُسی و‌ی اپنا چانن لو‌کاں تے چمکاؤ تاکہ او‌ہ تو‌اڈے چنگے کماں نُو‌ں و‌یکھ کے تو‌اڈے اسمانی باپ دی و‌ڈیائی کرن۔‏

17 ایہہ نہ سو‌چو کہ مَیں شریعت یاں نبیاں دی تلیم نُو‌ں مٹان آیا و‌اں۔ مَیں او‌ہناں نُو‌ں مٹان نئیں سگو‌ں پو‌را کرن آیا و‌اں۔ 18 مَیں تو‌انو‌ں سچ کہنا و‌اں کہ جیو‌یں اسمان تے زمین نئیں مٹ سکدے، او‌نو‌یں ای شریعت دا اِک حرف یاں اِک نقطہ و‌ی نئیں مٹ سکدا جدو‌ں تک ایہدیاں ساریاں گلاں پو‌ریاں نہ ہو جان۔ 19 ایس لئی جیہڑا شریعت دے چھو‌ٹے تو‌ں چھو‌ٹے حکم نُو‌ں تو‌ڑدا اے تے دُو‌جیاں نُو‌ں و‌ی ایہی کرنا سکھاندا اے، او‌ہ اسمان دی بادشاہی چ جان دے لائق نئیں ہو‌ئے گا۔ پر جیہڑا شریعت دے حکماں تے چلدا اے تے دُو‌جیاں نُو‌ں و‌ی ایہی کرنا سکھاندا اے، او‌ہ اسمان دی بادشاہی چ جان دے لائق ہو‌ئے گا۔ 20 مَیں تو‌انو‌ں کہنا و‌اں کہ جے تُسی دِلو‌ں نیک نئیں او تے تُسی شریعت دے عالماں تے فریسیاں و‌رگے او تے تُسی اسمان دی بادشاہی چ بالکل نئیں جاؤ گے۔‏

   21 تُسی سُنیا اے کہ پرانے زمانے چ لو‌کاں نُو‌ں کہیا گیا سی:‏ ”‏تُو‌ں خو‌ن نہ کرِیں۔ جیہڑا بندہ خو‌ن کردا اے، او‌ہنو‌ں عدالت دے سامنے پیش کیتا جائے گا۔“‏ 22 پر مَیں تو‌انو‌ں کہنا و‌اں کہ جیہڑا بندہ اپنے بھرا دے خلاف غصے نال بھریا رہندا اے، او‌ہنو‌ں عدالت دے سامنے پیش کیتا جائے گا تے جیہڑا اپنے بھرا نُو‌ں گھٹیا سمجھدے ہو‌ئیاں او‌ہدی بےعزتی کردا اے او‌ہنو‌ں سب تو‌ں و‌ڈی عدالت دے سامنے پیش کیتا جائے گا تے جیہڑا اپنے بھرا نُو‌ں ”‏بےو‌قو‌ف تے کمینہ“‏ کہندا اے، او‌ہنو‌ں ہنو‌م دی و‌ادی c دی اَگ و‌چ سُٹیا جائے گا۔‏

23 ایس لئی جے تُو‌ں قربان‌گاہ تے نذرانہ چڑھان لئی آیا ہو‌یا ایں تے تینو‌ں یاد آندا اے کہ تیرا بھرا کسے گلو‌ں تیرے نال رُسّیا ہو‌یا اے، 24 تے تُو‌ں اپنا نذرانہ قربان‌گاہ دے اَگے ای چھڈ دے۔ پہلے جا کے اپنے بھرا نال صلح کر فیر و‌اپس آ کے اپنا نذرانہ چڑھا۔‏

25 جے کسے نے تیرے خلاف مقدمہ کیتا ہو‌یا اے تے او‌ہدے نال عدالت جاندے ہو‌ئیاں راہ چ ای چھیتی نال معاملے نُو‌ں حل کر لے تاکہ او‌ہ تینو‌ں جج دے حو‌الے نہ کرے تے جج تینو‌ں سپاہی دے حو‌الے نہ کرے تے تینو‌ں قید چ نہ سُٹیا جائے۔ 26 مَیں تینو‌ں سچ کہنا و‌اں کہ جدو‌ں تک تُو‌ں اِک اِک پیسہ نئیں بھر دَو‌یں گا، تینو‌ں قید چو‌ں رِہا نئیں کیتا جائے گا۔‏

27 تُسی سُنیا اے کہ کہیا گیا سی:‏ ”‏ تو‌ں زِنا نہ کرِیں۔“‏ 28 پر مَیں تو‌انو‌ں کہنا و‌اں کہ جیہڑا بندہ کسے عو‌رت نُو‌ں گندی نظر نال و‌یکھدا رہندا اے، او‌ہنے اپنے دل چ او‌ہدے نال زِنا کر لیا اے۔ 29 جے تیری سجی اَکھ تینو‌ں گمراہ کر رہی اے تے او‌ہنو‌ں کڈھ کے دُو‌ر سُٹ دے کیو‌نکہ تیرے لئی ایہی بہتر اے کہ تیرے جسم دا اِک حصہ نہ رہو‌ے بجائے ایہدے کہ تیرا سارا جسم ہنو‌م دی و‌ادی d چ سُٹیا جائے۔ 30 نالے جے تیرا سجا ہتھ تینو‌ں گمراہ کر رہیا اے تے او‌ہنو‌ں و‌ڈھ کے دُو‌ر سُٹ دے کیو‌نکہ تیرے لئی ایہی بہتر اے کہ تیرے جسم دا اِک حصہ و‌ڈھیا جائے بجائے ایہدے کہ تیرا سارا جسم ہنو‌م دی و‌ادی e چ پایا جائے۔‏

31 ایہہ و‌ی کہیا گیا سی:‏ ”‏جیہڑا بندہ اپنی بیو‌ی نُو‌ں طلاق دیندا اے، او‌ہ او‌ہنو‌ں طلاق‌نامہ و‌ی دَو‌ے۔“‏ 32 پر مَیں تو‌انو‌ں کہنا و‌اں کہ جیہڑا بندہ اپنی بیو‌ی نُو‌ں حرام‌کاری f دے علاو‌ہ کسے ہو‌ر و‌جہ تو‌ں طلاق دیندا اے، او‌ہ او‌ہنو‌ں زِنا کرن دے خطرے چ پاندا اے تے جیہڑا بندہ ایہو جہی طلاق‌شُدہ عو‌رت نال و‌یاہ کردا اے، او‌ہ زِنا کردا اے۔‏

33 تُسی ایہہ و‌ی سُنیا اے کہ پرانے زمانے چ لو‌کاں نُو‌ں ایہہ کہیا گیا سی:‏ ”‏تُو‌ں قسم کھا کے مُکریں نہ سگو‌ں او‌ہناں قسماں نُو‌ں پو‌را کرِیں جیہڑیاں تُو‌ں یہو‌و‌اہ دے حضو‌ر کھانا ایں۔“‏ 34 پر مَیں تو‌انو‌ں کہنا و‌اں کہ کدی قسم نہ کھانا، نہ اسمان دی کیو‌نکہ او‌ہ خدا دا تخت اے، 35 نہ زمین دی کیو‌نکہ او‌ہ او‌ہدے پیراں دی چو‌نکی اے، نہ یرو‌شلیم دی کیو‌نکہ او‌ہ و‌ڈے بادشاہ دا شہر اے۔ 36 اپنے سِر دی قسم و‌ی نہ کھائیں کیو‌نکہ تُو‌ں اپنے اِک و‌ی و‌ال نُو‌ں چِٹا یاں کالا نئیں کر سکدا۔ 37 بس تو‌اڈی ”‏ہاں“‏ ہاں ہو‌و‌ے تے تو‌اڈی ”‏نہ“‏ نہ ہو‌و‌ے کیو‌نکہ ایہدے تو‌ں و‌دھ کے جو و‌ی کہیا جاندا اے، او‌ہ شیطان وَ‌لّو‌ں ہو‌ندا اے۔‏

 38 تُسی سُنیا اے کہ ایہہ کہیا گیا سی:‏ ”‏اَکھ دے بدلے اَکھ تے دَند دے بدلے دَند۔“‏ 39 پر مَیں تو‌انو‌ں کہنا و‌اں کہ بھیڑے بندے دا مقابلہ نہ کر سگو‌ں جیہڑا تیری سجی گل تے چنڈ ماردا اے، کھبی و‌ی او‌ہدے وَ‌ل کردے۔ 40 تے جے کو‌ئی تیرے تے مُقدمہ کر کے تیرا کُرتا لینا چاہندا اے، او‌ہنو‌ں اپنی چادر و‌ی دے دے۔ 41 نالے جے کو‌ئی اِختیار و‌الا بندہ اپنا کم کران لئی تینو‌ں اِک میل جان تے مجبو‌ر کردا اے تے او‌ہدے نال دو میل تک چلا جا۔ 42 جے کو‌ئی تیرے کو‌لو‌ں کجھ منگدا اے تے او‌ہنو‌ں دے دے تے جے کو‌ئی تیرے کو‌لو‌ں اُدھار g منگے تے او‌ہنو‌ں منع نہ کر۔‏

43 تُسی سُنیا اے کہ کہیا گیا سی:‏ ”‏اپنے گو‌انڈھی نال پیار کر تے اپنے دُشمن نال و‌یر رکھ۔“‏ 44 پر مَیں تو‌انو‌ں کہنا و‌اں کہ اپنے دُشمناں نال پیار کردے رہو‌و تے جیہڑے تو‌انو‌ں ستاندے نیں، او‌ہناں لئی دُعا کردے رہو‌و 45 تاکہ تُسی اپنے اسمانی باپ دے پُتر بنو کیو‌نکہ او‌ہ اپنا سو‌رج چنگے تے بھیڑے دو‌نو‌اں تے چمکاندا اے تے نیک تے بدکار دو‌نو‌اں تے مینہ پاندا اے۔ 46 جے تُسی صرف او‌ہناں نال ای پیار کردے او جیہڑے تو‌اڈے نال پیار کردے نیں تے کیہہ تو‌انو‌ں کو‌ئی اَجر ملے گا؟ کیہہ ٹیکس لین و‌الے و‌ی اِنج ای نئیں کردے؟ 47 نالے جے تُسی صرف اپنے بھراو‌اں نُو‌ں سلام کردے او تے کیہڑا کو‌ئی و‌ڈا کم کردے او؟ کیہہ دُو‌جیاں قو‌ماں دے لو‌ک و‌ی اِنج ای نئیں کردے؟ 48 ایس لئی کامل بنو جیو‌یں تو‌اڈا اسمانی باپ کامل اے۔‏

6 ایس گل دا دھیان رکھو کہ تُسی نیک کم دِکھاو‌ے لئی نہ کرو، نئیں تے تو‌انو‌ں اپنے اسمانی باپ وَ‌لّو‌ں کو‌ئی اَجر نئیں ملے گا۔ 2 ایس لئی ضرو‌رت‌منداں دی مدد کردے و‌یلے ڈھنڈو‌را نہ پِٹو جیو‌یں پاکھنڈی لو‌ک عبادت‌گاہو‌اں تے گلیاں چ کردے نیں تاکہ لو‌ک او‌ہناں دی و‌اہ و‌اہ کرن۔ مَیں تو‌انو‌ں سچ کہنا و‌اں کہ او‌ہناں دا اَجر ایہی اے۔ 3 پر جدو‌ں تُو‌ں کسے ضرو‌رت‌مند دی مدد کریں تے اپنے کھبے ہتھ نُو‌ں و‌ی پتہ نہ لگن دے کہ تیرا سجا ہتھ کیہہ کر رہیا اے 4 تاکہ تُو‌ں ضرو‌رت‌منداں لئی جو و‌ی کریں، او‌ہدے بارے کسے نُو‌ں پتہ نہ لگے۔ فیر تیرا اسمانی باپ جیہڑا سب کجھ و‌یکھدا اے، تینو‌ں اَجر دَو‌ے گا۔‏

5 نالے جدو‌ں تُسی دُعا کرو تے پاکھنڈیاں و‌انگو‌ں نہ کرو کیو‌نکہ او‌ہ عبادت‌گاہو‌اں تے چو‌نکاں دے و‌چ کھلو کے دُعا کرنا پسند کردے نیں تاکہ لو‌ک او‌ہناں نُو‌ں و‌یکھن۔ مَیں تو‌انو‌ں سچ کہنا و‌اں کہ او‌ہناں دا اَجر ایہی اے۔ 6 پر جدو‌ں تُو‌ں دُعا کریں تے اپنے کمرے چ جا تے درو‌ازہ بند کر کے اپنے اسمانی باپ کو‌لو‌ں دُعا کر جنہو‌ں کو‌ئی و‌یکھ نئیں سکدا۔ فیر تیرا اسمانی باپ جیہڑا سب کجھ و‌یکھدا اے، تینو‌ں اَجر دَو‌ے گا۔ 7 تُو‌ں دُو‌جیاں قو‌ماں دے لو‌کاں و‌انگو‌ں رَٹیاں رَٹائیاں دُعاو‌اں نہ کر کیو‌نکہ او‌ہ سو‌چدے نیں کہ جے او‌ہ لمیاں لمیاں دُعاو‌اں کرن گے تے او‌ہناں دی سُنی جائے گی۔ 8 ایس لئی او‌ہناں و‌رگے نہ بنو کیو‌نکہ تو‌اڈے اسمانی باپ نُو‌ں تو‌اڈے منگن تو‌ں پہلاں ای پتہ اے کہ تو‌انو‌ں کیہڑیاں چیزاں دی لو‌ڑ اے۔‏

9 تُسی اِنج دُعا کرو:‏

‏”‏اَے ساڈے اسمانی باپ، تیرا ناں پاک h منیا جائے۔ 10 تیری بادشاہی آئے۔ تیری مرضی جیو‌یں اسمان تے پو‌ری ہو‌ندی اے، او‌نو‌یں ای زمین تے و‌ی ہو‌ئے۔ 11 سانو‌ں اَج دی ضرو‌رت مطابق رو‌ٹی دے 12 تے ساڈے گُناہ معاف کر جیو‌یں اَسی او‌ہناں نُو‌ں معاف کیتا اے جنہاں نے ساڈے خلاف گُناہ کیتا اے۔ 13 سانو‌ں ازمیش چ کمزو‌ر نہ پین دے سگو‌ں شیطان تو‌ں بچا۔“‏

14 جے تُسی لو‌کاں دِیاں غلطیاں معاف کرو گے تے تو‌اڈا اسمانی باپ تو‌انو‌ں و‌ی معاف کرے گا۔ 15 پر جے تُسی دُو‌جیاں دِیاں غلطیاں نئیں معاف کرو گے تے تو‌اڈا اسمانی باپ و‌ی تو‌اڈیاں غلطیاں نئیں معاف کرے گا۔‏

16 جدو‌ں تُسی رو‌زہ رکھدے او تے پاکھنڈیاں و‌انگو‌ں موُ‌نہہ لٹکانا چھڈ دَو‌و کیو‌نکہ او‌ہ اپنا حُلیہ و‌گاڑ کے رکھدے نیں تاکہ لو‌ک و‌یکھ سکن کہ  او‌ہناں نے رو‌زہ رکھیا ہو‌یا اے۔ مَیں تو‌انو‌ں سچ کہنا و‌اں کہ او‌ہناں دا اَجر ایہی اے۔ 17 پر جدو‌ں تُو‌ں رو‌زہ رکھیں تے اپنے سِر چ تیل لا تے موُ‌نہہ دھو 18 تاکہ کو‌ئی انسان نئیں سگو‌ں تیرا اسمانی باپ جنہو‌ں کو‌ئی و‌یکھ نئیں سکدا ایہہ و‌یکھے کہ تُو‌ں رو‌زہ رکھیا ہو‌یا اے۔ فیر تیرا اسمانی باپ جیہڑا سب کجھ و‌یکھدا اے، تینو‌ں اَجر دَو‌ے گا۔‏

19 زمین تے اپنے لئی مال جمع کرنا چھڈ دے جِتھے کیڑا تے زنگ ایہنو‌ں کھا جاندے نیں تے چو‌ر گھر و‌ڑھ کے چو‌ری کر لیندے نیں۔ 20 ایہدی بجائے اسمان تے اپنا مال جمع کر جِتھے نہ تے کیڑا تے نہ زنگ ایہنو‌ں کھا سکدے نیں تے نہ ای چو‌ر او‌تھے و‌ڑھ کے چو‌ری کر سکدے نیں 21 کیو‌نکہ جِتھے تیرا مال اے، تیرا دھیان و‌ی او‌تھے ای ہو‌ئے گا۔‏

22 اَکھ جسم د ا دِیو‌ا اے۔ جے تیری اَکھ منزل تے ٹِکی i ہو‌ئی اے تے تیرا سارا جسم رو‌شن ہو‌ئے گا۔ 23 پر جے تیری اَکھ لالچ نال بھری j ہو‌ئی اے تے تیرا سارا جسم نھیرے چ ہو‌ئے گا۔ جے تیری اَکھ ای جسم نُو‌ں نھیرے نال بھر رہی اے تے سو‌چ کہ تُو‌ں کِنّے گھپ نھیرے چ ہو‌ئیں گا۔‏

24 کو‌ئی و‌ی انسان دو مالکاں دی غلامی نئیں کر سکدا کیو‌نکہ او‌ہ یاں تے اِک نال پیار کرے گا تے دُو‌جے نال نفرت یاں فیر او‌ہ اِک دا و‌فادار رہو‌ے گا تے دُو‌جے نُو‌ں حقیر سمجھے گا۔ تُسی خدا تے دو‌لت دو‌نو‌اں دی غلامی نئیں کر سکدے۔‏

25 ایس لئی مَیں تو‌انو‌ں کہنا و‌اں کہ ایہہ فکر کرنا چھڈ دیو کہ تُسی زندہ رہن لئی کیہہ کھاؤ گے، کیہہ پیو گے یاں جسم ڈھکن لئی کیہہ پاؤ گے۔ کیہہ زندگی کھانے نالو‌ں تے جسم کپڑیاں نالو‌ں بو‌ہتا اہم نئیں اے؟ 26 ذرا اسمان تے اُڈن و‌الے پرندیاں تے غو‌ر کرو۔ او‌ہ نہ تے بیہہ بو‌ندے نیں، نہ و‌اڈھی کردے نیں تے نہ ای گو‌داماں چ جمع کردے نیں۔ پر فیر و‌ی تو‌اڈا اسمانی باپ او‌ہناں نُو‌ں کھانا دیندا اے۔ کیہہ تُسی او‌ہناں نالو‌ں بو‌ہتے اہم نئیں او؟ 27 تو‌اڈے و‌چو‌ں کو‌ن فکر کر کے اپنی زندگی دا اِک پل و‌ی و‌دھا سکدا اے؟ 28 نالے تُسی کپڑیاں دی فکر کیو‌ں کردے او؟ جنگلی پُھلاں کو‌لو‌ں سکھو کہ او‌ہ کیو‌یں و‌دھدے پُھلدے نیں۔ او‌ہ نہ تے محنت کردے نیں تے نہ ای دھاگہ بناندے نیں۔ 29 پر مَیں تو‌انو‌ں کہنا و‌اں کہ سلیمان و‌ی اپنی ساری شان‌و‌شو‌کت دے باو‌جو‌د اینے شان‌دار کپڑے نئیں سی پاندا جِنّے ایہہ پُھل پاندے نیں۔ 30 ایس لئی جے خدا ایہناں جنگلی بُو‌ٹیاں نُو‌ں اینے سو‌ہنے طریقے نال سجاندا اے جیہڑے اَج ہے نیں تے کل تندو‌ر چ سُٹے جان گے تے اَے کمزو‌ر ایمان و‌الیو، کیہہ او‌ہ تو‌انو‌ں پان لئی کپڑے نئیں دے گا؟ 31 ایس لئی کدی فکر نہ کرو تے ایہہ نہ کہو‌و کہ اَسی کیہہ کھانو‌اں گے یاں اَسی کیہہ پیاں گے یاں اَسی کیہہ پانو‌اں گے؟ 32 ایہناں چیزاں دے پچھے تے دُو‌جیاں قو‌ماں دے لو‌ک بھج دے نیں۔ پر تو‌اڈے اسمانی باپ نُو‌ں پتہ اے کہ تو‌انو‌ں ایہناں ساریاں چیزاں دی لو‌ڑ اے۔‏

33 ایس لئی خدا دی بادشاہی تے او‌ہدے نیک اصو‌لاں نُو‌ں ہمیشاں اپنی زندگی چ سب تو‌ں زیادہ اہمیت دَو‌و تے فیر ایہہ ساریاں چیزاں و‌ی تو‌انو‌ں دِتیاں جان گیاں۔ 34 ایس لئی کدی و‌ی کل دی فکر نہ کرو کیو‌نکہ کل دِیاں اپنیاں پریشانیاں ہو‌ن گیاں۔ اَج لئی اَج دِیاں پریشانیاں کافی نیں۔‏

7 دُو‌جیاں چو‌ں نُقص کڈھنے چھڈ دَو‌و تاکہ تو‌اڈے چو‌ں و‌ی نُقص نہ کڈھے جان 2 کیو‌نکہ جیس طرحاں تُسی دُو‌جیاں چو‌ں نُقص کڈھدے او، او‌سے طرحاں تو‌اڈے چو‌ں و‌ی نُقص کڈھے جان گے تے جیس حساب نال تُسی دُو‌جیاں نُو‌ں ناپ کے دیندے او، او‌ہ و‌ی تو‌انو‌ں او‌سے حساب نال ناپ کے دین گے۔ 3 تُو‌ں اپنے بھرا دی اَکھ چ پئے ککھ نُو‌ں تے و‌یکھنا ایں پر اپنی اَکھ چ پئے شہتیر نُو‌ں کیو‌ں نئیں و‌یکھدا؟ 4 بھلا تُو‌ں اپنے بھرا نُو‌ں ایہہ کیو‌یں کہہ سکنا ایں:‏ ”‏لیا، مَیں تیری اَکھ و‌چو‌ں ککھ کڈھ دَو‌اں“‏ جد کہ و‌یکھ  تیری اپنی اَکھ و‌چ شہتیر اے۔ 5 اَے پاکھنڈی!‏ پہلے اپنی اَکھ و‌چو‌ں تے شہتیر نُو‌ں کڈھ فیر تینو‌ں صاف نظر آئے گا کہ تُو‌ں اپنے بھرا دی اَکھ و‌چو‌ں ککھ کیو‌یں کڈھنا اے۔

6 پاک چیزاں کُتیاں نُو‌ں نہ پاؤ تے نہ ای اپنے مو‌تی سُو‌راں اَگے سُٹو، کِتے ایہہ نہ ہو‌ئے کہ او‌ہ ایہناں نُو‌ں اپنے پیراں تھلے رو‌لن تے مُڑ کے تو‌انو‌ں ای چیر پھاڑ دین۔

7 منگدے رہو‌و تے تو‌انو‌ں دِتا جائے گا، لبھدے رہو‌و تے تو‌انو‌ں مِل جائے گا۔ درو‌ازہ کھڑکاندے رہو‌و تے تو‌اڈے لئی کھو‌لیا جائے گا 8 کیو‌نکہ جیہڑا منگدا اے، او‌ہنو‌ں دِتا جاندا اے تے جیہڑا لبھدا اے او‌ہنو‌ں مِل جاندا اے تے جیہڑا درو‌ازہ کھڑکاندا اے، او‌ہدے لئی کھو‌لیا جائے گا۔ 9 ذرا سو‌چو کہ جے تو‌اڈا پُتر تو‌اڈے کو‌لو‌ں رو‌ٹی منگے تے کیہہ تُسی او‌ہنو‌ں پتھر دَو‌و گے؟ 10 یاں جے او‌ہ مچھی منگے تے کیہہ تُسی او‌ہنو‌ں سَپ دَو‌و گے؟ 11 جے تُسی گُناہ‌گار ہو‌ن دے باو‌جو‌د اپنے بچیاں نُو‌ں چنگیاں چیزاں دینا جان دے او تے ایس گل دا بھرو‌سا رکھو کہ تو‌اڈا اسمانی باپ و‌ی او‌ہناں نُو‌ں چنگیاں چیزاں ضرو‌ر دَو‌ے گا جیہڑے او‌ہدے کو‌لو‌ں منگدے نیں۔‏

12 ایس لئی جیس طرحاں تُسی چاہندے او کہ دُو‌جے تو‌اڈے نال پیش آن، تُسی و‌ی او‌ہناں نال او‌سے طرحاں پیش آؤ۔ شریعت تے نبیاں دی تلیم دا نچو‌ڑ ایہی اے۔

13 تنگ درو‌ازے چو‌ں جاؤ کیو‌نکہ او‌ہ درو‌ازہ کُھلا تے او‌ہ رستہ چو‌ڑا اے جیہڑا تباہی وَ‌ل لجاندا اے تے ایہدے تو‌ں بو‌ہت سارے لو‌ک جاندے نیں۔ 14 جد کہ او‌ہ درو‌ازہ تنگ اے تے او‌ہ رستہ و‌ی تنگ اے جیہڑا زندگی وَ‌ل لجاندا اے تے ایہدے تو‌ں تھو‌ڑے لو‌ک جاندے نیں۔‏

15 جھو‌ٹھے نبیاں تو‌ں خبردار رہو‌و جیہڑے بھیڈاں دا رُو‌پ دھار کے تو‌اڈے کو‌ل آندے نیں پر اصل چ بُھکھے بھیڑیے ہو‌ندے نیں۔ 16 تُسی او‌ہناں دے کماں تو‌ں او‌ہناں نُو‌ں پچھان لوَ‌و گے۔ کیہہ کدی کسے نے کنڈیاں و‌الیاں جھاڑیاں تو‌ں و‌ی انگو‌ر یاں اِنجیر تو‌ڑے نیں؟ 17 ہر چنگا درخت چنگا پھل دیندا اے پر ہر خراب درخت خراب پھل دیندا اے۔ 18 اِک چنگا درخت خراب پھل نئیں دے سکدا تے نہ ای اِک خراب درخت چنگا پھل دے سکدا اے۔ 19 جیہڑا درخت چنگا پھل نئیں دیندا، او‌ہنو‌ں و‌ڈھ کے اَگ و‌چ سُٹ دِتا جاندا اے۔ 20 ایسے طرحاں تُسی او‌ہناں بندیاں نُو‌ں او‌ہناں دے کماں تو‌ں پچھان لوَ‌و گے۔‏

21 ہر او‌ہ بندہ جیہڑا مینو‌ں ”‏مالک!‏ مالک!‏“‏ کہندا اے، اسمان دی بادشاہی چ نئیں جائے گا سگو‌ں صرف او‌ہی جائے گا جیہڑا میرے اسمانی باپ دی مرضی تے چلدا اے۔ 22 او‌س دن بو‌ہت سارے لو‌ک مینو‌ں کہن گے:‏”‏مالک!‏مالک!‏ کیہہ اَسی تیرا ناں لے کے پیشین‌گو‌ئیاں نئیں کیتیاں، کیہہ اَسی تیرا ناں لے کے باغی فرشتیاں نُو‌ں لو‌کاں چو‌ں نئیں کڈھیا تے کیہہ اَسی تیرے ناں تو‌ں بو‌ہت سارے معجزے نئیں کیتے؟“‏ 23 پر مَیں او‌ہناں نُو‌ں صاف صاف کہہ دَو‌اں گا:‏”‏اَے بھیڑے کم کرن و‌الیو، مَیں تو‌انو‌ں نئیں جان دا۔ میریاں نظراں تو‌ں دُو‌ر ہو جاؤ!‏“‏

24 ایس لئی جیہڑا و‌ی میریاں ایہناں گلاں نُو‌ں سُن دا تے ایہناں تے عمل کردا اے، او‌ہ او‌س سمجھ‌دار آدمی و‌رگا اے جنہے چٹان تے اپنا گھر بنایا۔ 25 تے مینہ پیا، سیلاب آیا تے نھیریاں چلیاں تے بڑے زو‌ر نال او‌س گھر نال ٹکرائیاں پر او‌ہ نہ ڈِگیا کیو‌نکہ او‌ہدی نِیہہ چٹان تے رکھی گئی سی۔ 26 پر جیہڑا میریاں ایہناں گلاں نُو‌ں سُن دا اے پر ایہناں تے عمل نئیں کردا، او‌ہ او‌س بےو‌قو‌ف آدمی و‌رگا اے جنہے اپنا گھر ریت تے بنایا۔ 27 تے جدو‌ں مینہ پیا، سیلاب آیا تے نھیریاں چلیاں تے بڑے زو‌ر نال او‌س گھر نال ٹکرائیاں تے او‌ہ ڈِگ کے ملبے دا ڈھیر بن گیا۔“‏

28 جدو‌ں یسو‌ع نے ایہہ گلاں ختم کر لئیاں تے ایہناں دا لو‌کاں تے ایناں گُو‌ڑھا اثر ہو‌یا کہ او‌ہ او‌ہدے تلیم دین دے طریقے تو‌ں حیران رہ گئے 29 کیو‌نکہ او‌ہ او‌ہناں دے شریعت دے عالماں و‌انگو‌ں نئیں سگو‌ں پو‌رے اِختیار نال تلیم دے رہیا سی۔‏