پاک کلام وچ ایہہ خوشخبری دِتی گئی اے کہ انسان زمین تے ہمیشاں تک زندہ رہن گے۔‏ (‏زبور 37:‏29‏)‏ بائبل وچ 66 کتاباں نیں تے خدا نے 40 وفادار آدمیاں دے ذریعے ایہنوں لکھوایا۔‏ ایہدیاں پہلیاں پنج کتاباں موسیٰ نے تقریباً 500،‏3 سال پہلے لکھیاں تے آخری کتاب یوحنا رسول نے تقریباً 900،‏1 سال پہلے لکھی سی۔‏ اَسی کیوں کہہ سکنے آں کہ بائبل خدا دا کلام اے؟‏ کیونکہ خدا نے اپنی پاک رُوح دے ذریعے ایہناں آدمیاں دے دِلاں وچ اپنے خیال پائے سن۔‏ (‏2-‏سموئیل 23:‏2‏)‏ اوہناں نے اپنے نئیں سگوں خدا دے خیال لکھے۔‏ ایس لئی یہوواہ خدا ای بائبل دا لکھاری اے۔‏​‏—‏2-‏تیمُتھیُس 3:‏16؛‏ 2-‏پطرس 1:‏20،‏ 21 نوں پڑھو۔‏

ویڈیو ‏”‏بائبل دا اصل لکھاری کون اے؟‏“‏ ویکھو۔‏

کوئی وی انسان نئیں دس سکدا کہ کل کیہہ ہون والا اے،‏ پر بائبل مستقبل بارے صحی صحی دسدی اے۔‏ (‏یشوع 23:‏14‏)‏ صرف قادرِمطلق خدا یہوواہ کول ای انساناں دے مستقبل بارے صحی علم اے۔‏ ایس لئی اَسی پکا یقین کر سکنے آں کہ بائبل خدا دا کلام اے۔‏​‏—‏یسعیاہ 42:‏9؛‏ 46:‏10 نوں پڑھو۔‏

بائبل واقعی اِک خاص کتاب اے۔‏ ایہدیاں کروڑاں کاپیاں سینکڑاں زباناں وچ ونڈیاں گئیاں نیں۔‏ بھاویں بائبل اِک بوہت پرانی کتاب اے،‏ پر فیر وی ایہدیاں گلاں سائنس نال میل کھاندیاں نیں۔‏ ایہدے 40 لکھاریاں دیاں گلاں وچ وی انوکھا تال میل اے۔‏ ایس توں علاوہ پاک کلام وچ خدا دے پیار دی مُہر لگی ہوئی اے تے ایہدیاں سچائیاں لوکاں دی زندگی بدلن دی طاقت رکھدیاں نیں۔‏ سب توں ودھ کے قادرِمطلق خدا کدی وی کسے نوں اپنا کلام بدلن دی اجازت نئیں دوے گا۔‏ ایہناں ساریاں گلاں توں لکھاں لوکاں نوں ثبوت ملیا اے کہ بائبل خدا دا کلام اے۔‏​‏—‏یسعیاہ 40:‏8؛‏ 1-‏تھسلُنیکیوں 2:‏13 نوں پڑھو۔‏

ویڈیو ‏”‏اَسی کیویں یقین کر سکنے آں کہ بائبل خدا دا کلام اے؟‏“‏ ویکھو۔‏

بائبل خاص طور تے ایہہ خوشخبری دیندی اے کہ خدا دا انساناں لئی اِک بوہت سوہنا مقصد اے۔‏ ایہہ دسدی اے کہ شروع وچ انساناں نے زمین اُتے فردوس وچ خوشیاں بھری زندگی گزارن دا موقع کیویں گنوایا تے خدا زمین نوں دُبارہ فردوس کیویں بنائے گا۔‏​‏—‏مکاشفہ 21:‏4،‏ 5 نوں پڑھو۔‏

پاک کلام وچ کئی قانون،‏ اصول تے ہدیتاں نیں۔‏ ایہدے وچ ایہہ وی دسیا گیا اے کہ ماضی وچ جدوں انساناں نے چنگے یاں بُرے کم کیتے تے خدا اوہناں نال کیویں پیش آیا۔‏ ایس طرحاں بائبل سانوں خدا دی ذات بارے دسدی اے تاکہ اَسی اوہنوں چنگی طرحاں جان سکیے نالے بائبل دسدی اے کہ اَسی ابراہام نبی وانگوں خدا دے دوست کیویں بن سکنے آں۔‏​‏—‏زبور 19:‏7،‏ 11؛‏ یعقوب 2:‏23؛‏ 4:‏8 نوں پڑھو۔‏

تُسی ایس کتاب دی مدد نال پاک کلام نوں سمجھ سکو گے کیونکہ ایہدے وچ تلیم دین دا اوہو ای طریقہ اے جیہڑ‌ا یسوع مسیح نے استمال کیتا سی۔‏ اوہ پاک کلام دے حوالے دے دے کے اوہناں دا مطلب سمجھاندے سن۔‏​—‏لُوقا 24:‏27،‏ 45 نوں پڑھو۔‏

خدا وَلوّں مِلن والی خوشخبری توں ودھ کوئی خبر نئیں۔‏ فیر وی کئی لوک ایس خوشخبری وچ دلچسپی نئیں لیندے،‏ کجھ تے ایس پیغام نوں سُن کے ناراض وی ہو جاندے نیں۔‏ پر تُسی حوصلہ نہ ہارو۔‏ یاد رکھو خدا بارے سکھن نال ای توانوں ہمیشاں دی زندگی مل سکدی اے۔‏​—‏یوحنا 17:‏3 نوں پڑھو۔‏