فرض کرو صوفیہ نُوں مائیک نال ملیاں دو مہینے ہوئے نیں پر اوہنوں لگدا اے جیویں اوہ مائیک نُوں ہمیشاں توں جان دی اے۔‏ اوہ دونویں ہر ویلے اِک دُوجے نُوں میسج کر دے تے کئی کئی گھنٹے فون تے گلاں کر دے رہندے نیں۔‏ کئی وار تے اوہ اِک دُوجے دے دل دی گل بجھ لیندے نیں۔‏ پر ہُن مائیک ایس توں اَگے ودھنا چاہندا اے۔‏

پچھلے دو مہینیاں دوران اوہناں نے اِک دُوجے دا ہتھ پھڑن تے کدی کدار کس کرن توں علا‌وہ کجھ نئیں کیتا۔‏ صوفیہ کوئی غلط کم نئیں کرنا چاہندی۔‏ پر اوہ مائیک بغیر رہ وی نئیں سکدی کیونکہ مائیک اوہنوں بڑا پیار کردا اے۔‏ صوفیہ سوچ دی اے کہ ”‏اَسی دونویں اِک دُوجے لئی بنے آں۔‏“‏

جے تُواڈی عمر ڈیٹنگ کرن دی ہوندی تے تُسی صوفیہ دی تھاں ہوندے تے کیہہ کر دے؟‏

جے تُسی ٹریفک دا کوئی قانون توڑو گے تے توانوں نقصان بھگتنا پوے گا۔‏ ایسے طرحاں جے تُسی سیکس بارے خدا دے قانون توڑو گے تے توانوں نقصان ہووے گا۔‏ خدا دا قانون اے کہ حرام‌کاری توں بچو۔‏—‏1-‏تھسلُنیکیوں 4:‏3‏۔‏

ایس قانون نُوں توڑن دا نقصان کیہہ اے؟‏ پاک کلام وچ لکھیا اے کہ جیہڑ‌ا حرام‌کاری کر دا اے اوہ اپنے ای جسم دے خلا‌ف گناہ کر دا اے۔‏ (‏1-‏کُرنتھیوں 6:‏18‏)‏ ایہدا کیہہ مطلب اے؟‏

 اِک رپورٹ توں پتہ چلدا اے کہ شادی توں پہلے سیکس کرن والے منڈُے کُڑیاں نُوں عام طور تے بڑے بھیڑے نتیجے بھگتنے پیندے نیں جیویں:‏

• پچھتاوا۔‏ شادی توں پہلے سیکس کرن والے منڈُے کُڑیاں نے کہیا کہ اوہناں نُوں بعد چ بڑا پچھتاوا ہویا۔‏

• شک۔‏ شادی توں پہلے سیکس کرن والے منڈُے کُڑیاں اپنے ساتھی بارے ایہہ شک کر دے نیں کہ ”‏ایہنے ہور پتہ نئیں کدے کدے نال سیکس کیتا ہونا اے؟‏“‏

• مایوسی۔‏ بوہت ساریاں کُڑیاں چاہندیاں نیں کہ اوہناں نُوں کوئی ایسا منڈُا ملے جیہڑ‌ا اوہناں دی عزت کرے نہ کہ اوہناں دی عزت لٹے۔‏ تے بوہت سارے منڈُے ایسیاں کُڑیاں نُوں پسند نئیں کر دے جیہڑ‌یاں ایویں پھس جان۔‏

• ساریاں گلاں دا نچوڑ:‏ شادی توں پہلا‌ں سیکس کرکے تُسی اپنے جسم نُوں ذلیل کر دے او۔‏ (‏رومیوں 1:‏24‏)‏ تواڈا جسم کوئی معمولی شے نئیں جنہوں جدے مرضی حوالے کر دِتا جائے۔‏

حرام‌کاری توں بچ کے تُسی ایہہ ظاہر کر دے او کہ تُسی پاک صاف چال چلن دے مالک او۔‏ (‏1-‏تھسلُنیکیوں 4:‏3‏)‏ فیر اِک دن جدوں تواڈا ویاہ ہووے گا تے تُسی سیکس کرن دی نعمت توں خوشی حاصل کر سکو گے۔‏ توانوں اوہناں لوکاں وانگوں پریشانی،‏ شرمندگی تے ڈر دا سامنا نئیں ہووے گا جیہڑ‌ے شادی توں پہلا‌ں سیکس کر لیندے نیں۔‏—‏امثال 7:‏22،‏ 23؛‏ 1-‏کُرنتھیوں 7:‏3‏۔‏

• جے کوئی توانوں سچا پیار کر دا اے تے کیہہ اوہ توانوں جسمانی یا جذباتی طور تے نقصان پہنچائے گا؟‏

• جے کوئی توانوں دلوں پیار کر دا اے تے کیہہ اوہ خدا نال تواڈی دوستی نُوں خطرے چ پائے گا؟‏—‏عبرانیوں 13:‏4‏۔‏