1،‏ 2.‏ اَسی کیوں کہہ سکنے آں کہ بائبل خدا وَلّوں اِک ودھیا تحفہ اے؟‏

جدوں تواڈا کوئی دوست توانوں تحفہ دیندا اے تے توانوں بوہت خوشی ہوندی اے۔‏ تُسی اپنے دوست دا شکریہ ادا کردے او تے بڑے چانواں نال تحفے نُوں کھول دے او۔‏

² بائبل وی اِک بوہت ودھیا تحفہ اے۔‏ ایہہ سانوں ساڈے خالق یہوواہ خدا نے دِتا اے۔‏ ایہدے چ ایہو جہیاں گلاں پائیاں جاندیاں نیں جیہڑ‌یاں کسے ہور کتاب چ نئیں مِلدیاں۔‏ مثال دے طور تے ایہدے چ دَسیا گیا اے کہ اسمان،‏ زمین تے انساناں نُوں خدا نے بنایا اے۔‏ ایہدے چ ایہو جہے اصول پائے جاندے نیں جنہاں تے عمل کرکے اَسی اپنے مسئلے حل کر سکنے آں۔‏ نالے بائبل ایہہ وی دَسدی اے کہ یہوواہ خدا زمین تے پھیلی ہوئی بُرائی نُوں کیویں ختم کرے گا۔‏

3.‏ بائبل دی تلیم حاصل کرن نال توانوں کیہہ پتہ چلے گا؟‏

³ بائبل دی تلیم حاصل کرن نال توانوں پتہ چلے گا کہ خدا چاہندا اے کہ تُسی اوہدے دوست بنو۔‏ جِنّاں زیادہ تُسی یہوواہ خدا بارے سکھو گے اونا ای زیادہ اوہدے نال تواڈی دوستی گُوڑھی ہوئے گی۔‏

4.‏ توانوں بائبل بارے کیہڑی گل چنگی لگی اے؟‏

⁴ بائبل دا ترجمہ 2800 توں زیادہ زباناں چ ہو چُکیا اے تے ایہدیاں ارباں کاپیاں چھپ چُکیاں نیں۔‏ پوری دُنیا چ 90 فیصد توں زیادہ لوک اینوں اپنی زبان چ پڑھ سکدے نیں۔‏ ہر ہفتے دس لکھ توں زیادہ لوک بائبل لیندے نیں۔‏ واقعی،‏ بائبل ورگی ہور کوئی کتاب نئیں۔‏

5.‏ اَسی کیوں کہہ سکنے آں کہ بائبل خدا دے الہام نال لکھی گئی اے؟‏

⁵ بائبل خدا دے الہام نال لکھی گئی اے۔‏ ‏(‏2-‏تیمُتھیُس 3:‏16 نُوں پڑھو۔‏)‏ پر شاید کجھ لوک کہن کہ بائبل نُوں تے انساناں نے لکھیا سی فیر ایہہ خدا وَلّوں کیویں ہو سکدی اے؟‏ ایہدا جواب بائبل وچ  ای پایا جاندا اے۔‏ ایہدے چ دَسیا گیا اے کہ انسان پاک روح دی طاقت نال خدا وَلّوں بولدے سن۔‏ (‏2-‏پطرس 1:‏21‏)‏ فرض کرو کہ اِک دادا اپنے پوترے کولوں اِک چٹھی لکھواؤندا اے۔‏ تواڈے خیال چ اوہ چٹھی کدے وَلّوں سمجھی جائے گی،‏ دادے وَلّوں کہ پوترے وَلّوں۔‏ ظاہر اے کہ اوہ چٹھی دادے وَلّوں ہوئے گی کیونکہ ایہدے چ اوہدیاں گلاں لکھیاں ہوئیاں نیں۔‏ ایسے طرحاں بائبل نُوں لکھیا تے انساناں نے وے پر اصل چ ایہہ خدا وَلّوں اے کیونکہ ایہدے چ خدا دِیاں گلاں لکھیاں ہوئیاں نیں۔‏ بےشک بائبل خدا دا کلام اے۔‏—‏1-‏تھسلُنیکیوں 2:‏13‏،‏ کتاب دے آخر چ نکتہ نمبر 2 نُوں ویکھو۔‏

6،‏ 7.‏ اَسی ایہہ کیوں کہہ سکنے آں کہ بائبل چ لکھیاں ساریاں گلاں اِک دُوجے نال میل کھاؤندیاں نیں؟‏

⁶ بائبل 1600 سال توں وی بوہتے عرصے چ لکھی گئی۔‏ اینوں لکھن والے لوک فرق فرق زمانے  چ رہندے سن۔‏ ایہناں چوں کجھ بوہت پڑھے لکھے تے کجھ اَن‌پڑھ سن۔‏ مثال دے طور تے ایہناں چوں اِک تے ڈاکٹر سی جد کہ کجھ کسان،‏ مچھیرے،‏ چرواہے،‏ نبی،‏ قاضی تے بادشاہ سن۔‏ ایہہ سچ اے کہ بائبل نُوں فرق فرق لوکاں نے لکھیا اے پر ایہدے چ لکھیاں ساریاں گلاں اِک دُوجے نال میل کھاؤندیاں نیں۔‏ ایہہ نئیں کہ اِک باب چ جیہڑ‌ی گل لکھی اے اوہ دُوجے باب چ لکھی گل نالوں بالکل فرق ہووے۔‏ *

⁷ بائبل دے شروع چ دَسیا گیا اے کہ انسان مشکلاں چ کیویں پے گئے تے ایہدے آخر چ دَسیا گیا اے کہ خدا مشکلاں نُوں ختم کرکے زمین نُوں عدن دے باغ وانگوں سوہنا بنا دَوے گا۔‏ بائبل چ اوہ واقعے لکھے نیں جیہڑ‌ے ہزاراں سالاں دے دوران ہوئے نیں۔‏ ایہہ دَسدی اے کہ یہوواہ خدا اپنے مقصد نُوں ہمیشاں پورا کردا اے۔‏

8.‏ مثالاں دے ذریعے دَسو کہ بائبل چ سائنس دے حوالے نال جنیاں وی گلاں لکھیاں نیں اوہ بالکل سچ نیں۔‏

⁸ بائبل لوکاں نُوں سائنس دی تلیم دین واسطے نئیں لکھی گئی۔‏ پر فیر وی بائبل چ سائنس دے حوالے نال جنیاں وی گلاں لکھیاں نیں اوہ بالکل سچ نیں۔‏ مثال دے طور تے اَج سائنس‌دان جان دے نیں کہ جراثیماں تے قابو پاؤن نال بیماریاں نُوں پھیلن توں روکیا جا سکدا اے۔‏ پر خدا نے احبار دی کتاب چ کئی سو سال پہلاں ای بنی‌اِسرائیل نُوں دَس دِتا سی کہ اوہ بیماریاں نُوں پھیلن توں کیویں روک سکدے نیں۔‏ بائبل چ ایہہ وی دَسیا گیا اے کہ زمین خلا وچ لٹکی ہوئی اے۔‏ (‏ایوب 26:‏7‏)‏ جیس زمانے چ بائبل لکھی گئی سی اوس ویلے زمین دی شکل دے بارے لوک فرق فرق سوچ رکھدے سن۔‏ پر یسعیاہ نبی نے دَسیا کہ زمین گول اے۔‏ (‏یسعیاہ 40:‏22‏)‏ ایہو جہیاں سچیاں تے صحی گلاں صرف اوسے کتاب چ ہو سکدیاں نیں جیہڑ‌ی خدا دے الہام توں ہووے۔‏

9.‏ ایس گل توں کیہہ ظاہر ہوندا اے کہ بائبل لکھن والیاں نے ہر گل سچ سچ لکھی؟‏

 ⁹ بائبل چ تریخ دے حوالے نال لکھیاں ہوئیاں گلاں وی بالکل سچ نیں۔‏ پر بوہت ساریاں تریخی کتاباں بارے ایہہ نئیں کہیا جا سکدا کیونکہ ایہناں دے لکھاریاں نے سب کجھ سچ سچ نئیں لکھیا۔‏ مثال دے طور تے اوہناں نے اپنیاں کتاباں چ اپنی قوم دی فتح دا ذکر تے کیتا پر ہار دا ذکر نئیں کیتا۔‏ پر بائبل لکھن والیاں نے ہر گل سچ سچ لکھی اے۔‏ اوہناں نے بوہت ساریاں جنگاں دا ذکر کیتا جنہاں چ بنی‌اِسرائیل نُوں بوہت بھیڑی ہار دا سامنا کرنا پیا۔‏ اوہناں نے تے اپنیاں غلطیاں دا وی ذکر کیتا۔‏ مثال دے طور تے گنتی دی کتاب چ موسیٰ نبی نے دَسیا کہ اوہناں کولوں اِک بوہت وڈی غلطی ہو گئی جدی وجہ توں یہوواہ نے اوہناں نُوں سزا دِتی۔‏ (‏گنتی 20:‏2-‏12‏)‏ ایس توں پتہ چلدا اے کہ بائبل لکھن والیاں نے ہر گل سچے دل نال لکھی۔‏ ایہہ ایس گل دا ثبوت اے کہ بائبل خدا دے الہام توں اے تے اَسی ایہدے تے پورا بھروسا کر سکنے آں۔‏

10.‏ بائبل چ لکھیاں ہوئیاں گلاں اَج وی ساڈے لئی فائدےمند کیوں نیں؟‏

¹⁰ بائبل خدا دے الہام توں اے تے تلیم دین،‏ اصلاح کرن تے معاملیاں نُوں سدھارن لئی فائدےمند اے۔‏ (‏2-‏تیمُتھیُس 3:‏16‏)‏ بائبل چ لکھیاں ہوئیاں گلاں اَج وی ساڈے بوہت کم آؤندیاں نیں۔‏ یہوواہ خدا ساڈا خالق اے ایس لئی اوہ ساڈی سوچ تے جذباتاں نُوں جان دا اے۔‏ جِنّی چنگی طرحاں اوہ سانوں جان دا اے اونی چنگی طرحاں تے اَسی وی اپنے آپ نُوں نئیں جان دے۔‏ اوہ جان دا اے کہ ساڈے لئی کیہہ چنگا اے تے کیہہ بھیڑا اے۔‏ اوہ ایہہ وی چاہندا اے کہ اَسی ہمیشاں خوش رہیے۔‏

11،‏ 12.‏ (‏الف)‏ متی 5 توں 7 باب وچ یسوع مسیح نے کیہڑے معاملیاں بارے مشورے دِتے؟‏ (‏ب)‏ اَسی بائبل توں ہور کیہہ سکھ سکنے آں؟‏

¹¹ متی 5 توں 7 باب وچ یسوع مسیح نے بوہت سارے معاملیاں بارے ودھیا مشورے دِتے۔‏ اوہناں نے دَسیا کہ اَسی دُعا کیویں کر سکنے آں،‏ خوش کیویں رہ سکنے آں،‏ دُوجیاں نال چنگے تعلقات کیویں  رکھ سکنے آں تے روپےپیسے بارے صحی نظریہ کیویں رکھ سکنے آں۔‏ بھانویں کہ اوہناں نے ایہہ مشورے 2000 سال پہلاں دِتے سن پر ایہہ اَج وی اونے ای فائدےمند نیں جِنّے اوس زمانے چ سن۔‏

¹² بائبل چ یہوواہ خدا نے ایہو جہے اصول وی دِتے نیں جنہاں تے عمل کرکے اَسی اپنے گھرانے چ خوشیاں لیا سکنے آں،‏ محنت کرنا سکھ سکنے آں تے دُوجیاں نال صلح صفائی نال رہ سکنے آں۔‏ بائبل چ لکھے اصول ہر طرحاں دے لوکاں لئی فائدےمند نیں بھانویں اوہ کسے وی نسل دے ہون،‏ کسے وی علاقے دے ہون یاں کسے وی مشکل دا سامنا کر رہے ہون۔‏‏—‏یسعیاہ 48:‏17 نُوں پڑھو،‏ کتاب دے آخر چ نکتہ نمبر 3 نُوں ویکھو۔‏

13.‏ یسعیاہ نبی نے بابل دے شہر بارے کیہہ پیشین‌گوئی کیتی سی؟‏

¹³ بائبل چ لکھیاں بوہت ساریاں پیشین‌گوئیاں پوریاں ہو گئیاں نیں۔‏ ایہدی اِک مثال تے غور کرو۔‏ یسعیاہ نبی نے پیشین‌گوئی کیتی سی کہ بابل دا شہر تباہ ہو جائے گا۔‏ (‏یسعیاہ 13:‏19‏)‏ اوہناں نے دَسیا کہ ایس شہر نُوں کیویں فتح کیتا جائے گا۔‏ ایس شہر دے دروازے بوہت ای وڈے سن تے ایہدے آلے دوالے اِک دریا سی۔‏ پر یسعیاہ نے پیشین‌گوئی کیتی کہ ایہہ دریا سُک جائے گا تے شہر دے دروازے کُھلے رہ جان گے۔‏ ایہدے تے حملہ کرن والے لڑے بغیر ای اینوں فتح کر لین گے۔‏ یسعیاہ نے تے ایہہ وی دَسیا کہ جیہڑ‌ا بادشاہ ایس شہر نُوں فتح کرے گا اوہدا ناں خورس ہووے گا۔‏‏—‏یسعیاہ 44:‏27–‏45:‏2 نُوں پڑھو،‏ کتاب دے آخر چ نکتہ نمبر 4 نُوں ویکھو۔‏

14،‏ 15.‏ یسعیاہ نبی دی پیشین‌گوئی کیویں پوری ہوئی؟‏

¹⁴ یسعیاہ نبی دی پیشین‌گوئی دے دو سو سال بعد فارس دے ملک دی فوج نے بابل تے حملہ کیتا۔‏ فارس دا بادشاہ ایس فوج دا سردار سی۔‏ تے اوہدا ناں کیہہ سی؟‏ پیشین‌گوئی دے مطابق اوہدا ناں خورس سی۔‏ پر کیہہ یسعیاہ نبی دی پیشین‌گوئی دِیاں باقی گلاں وی پوریاں ہوئیاں؟‏

¹⁵ جیس رات بابل تے حملہ ہویا اوس رات بابل دے لوک جشن منا رہے سن۔‏ اوہناں دا خیال  سی کہ شہر دِیاں اُچیاں دیواراں تے دریا دی وجہ توں کوئی وی اوہناں تے حملہ نئیں کر سکدا۔‏ پر شہر دے باہر خورس تے اوہناں دی فوج نے اِک نالہ بنا کے دریا دا رُخ موڑ دِتا۔‏ ایس طرحاں دریا دا پانی ایناں گھٹ ہو گیا کہ فوجی اینوں پیدل ای پار کر گئے۔‏ پر اوہ اُچیاں دیواراں دے باوجود شہر دے اندر کیویں وڑھ گئے؟‏ پیشین‌گوئی دے مطابق شہر دے دروازے کُھلے رہ گئے سن۔‏ ایس لئی فوجی اسانی نال شہر چ وڑھ گئے تے لڑے بغیر ای اینوں فتح کر لیا۔‏

16.‏ (‏الف)‏ یسعیاہ نبی دی پیشین‌گوئی دے مطابق بابل دے شہر نال اخیر کیہہ ہونا سی؟‏ (‏ب)‏ سانوں کیویں پتہ اے کہ بابل بارے یسعیاہ دی پیشین‌گوئی پوری ہوئی؟‏

 ¹⁶ یسعیاہ نبی نے پیشین‌گوئی کیتی کہ بابل فیر کدی آباد نئیں ہوئے گا تے ہمیشاں تک ایہدے چ کوئی نہ وَسے گا۔‏ (‏یسعیاہ 13:‏20‏)‏ کیہہ ایہہ پیشین‌گوئی پوری ہوئی؟‏ جی بالکل۔‏ ایہہ شہر اَج تک ویران اے تے ایہدے کھنڈر عراق دے شہر بغداد توں تقریباً 80 کلومیٹر (‏50 میل)‏ دُور موجود نیں۔‏ واقعی یہوواہ نے ایس شہر نُوں تباہی دے جھاڑو نال ہُونجھ دِتا اے۔‏—‏یسعیاہ 14:‏22،‏ 23‏۔‏ *

17.‏ اَسی خدا دے سارے وعدیاں تے یقین کیوں رکھ سکنے آں؟‏

¹⁷ بائبل چ لکھیاں بوہت ساریاں پیشین‌گوئیاں پوریاں ہو گئیاں نیں۔‏ * ایس لئی اَسی یقین رکھ سکنے آں کہ ایہدے چ مستقبل بارے جو کجھ دَسیا گیا اے اوہ وی ضرور پورا ہوئے گا۔‏ سانوں ایہہ وی یقین اے کہ یہوواہ خدا اپنے وعدے دے مطابق ایس زمین نُوں عدن دے باغ وانگوں سوہنا بنا  دَوے گا۔‏ ‏(‏گنتی 23:‏19 نُوں پڑھو۔‏)‏ اَسی اوس ہمیشاں دی زندگی دی امید وی رکھنے آں جدا وعدہ خدا نے صدیاں پہلے کیتا سی تے ساڈا ایمان اے کہ خدا کدی جھوٹھ نئیں بول سکدا۔‏—‏طِطُس 1:‏2‏۔‏

18.‏ پولس رسول نے بائبل دے بارے کیہہ کہیا؟‏

¹⁸ اَسی سکھ لیا اے کہ بائبل ورگی ہور کوئی کتاب نئیں۔‏ ایہدے چ لکھیاں ساریاں گلاں اِک دُوجے نال میل کھاؤندیاں نیں۔‏ ایہدے چ سائنس تے تریخ دے حوالے نال لکھیاں ہوئیاں گلاں وی بالکل سچ نیں۔‏ ایہدے چ ودھیا مشورے دِتے گئے نیں تے ایہدیاں بوہت ساریاں پیشین‌گوئیاں وی پوریاں ہو گئیاں نیں۔‏ پر ایہدے چ اِک ہور خاص گل وی اے جیہڑ‌ی پولس رسول نے دَسی۔‏ اوہناں نے کہیا کہ خدا دا کلام زندہ تے مؤثر اے۔‏ پولس دی ایس گل دا کیہہ مطلب اے؟‏‏—‏عبرانیوں 4:‏12 نُوں پڑھو۔‏

19،‏ 20.‏ (‏الف)‏ تُسی بائبل دے ذریعے اپنے آپ نُوں کیویں پرکھ سکدے او؟‏ (‏ب)‏ تُسی کیویں ظاہر کر سکدے او کہ تُسی بائبل لئی خدا دے شکرگزار او؟‏

¹⁹ بائبل تواڈی زندگی بدل سکدی اے۔‏ ایہدے ذریعے تُسی اپنے آپ نُوں پرکھ سکدے او۔‏ اِنج توانوں اپنی سوچ تے جذباتاں دا پتہ لگ جائے گا۔‏ مثال دے طور تے تُسی شاید کہوو کہ تُسی خدا نُوں محبت کردے او۔‏ پر بائبل پڑھن نال توانوں پتہ چلے گا کہ سچی محبت صرف اِک جذبہ نئیں ہوندی سگوں ایہہ سانوں کجھ کرن دی ہلاشیری وی دیندی اے۔‏ ایس لئی خدا نال محبت دا ثبوت دین لئی ضروری اے کہ اَسی اوہدے کلام چ لکھیاں ہوئیاں گلاں تے عمل وی کرئیے۔‏

²⁰ بائبل واقعی خدا دے الہام نال لکھی گئی اے۔‏ اوہ چاہندا اے کہ تُسی ایہدا مطالعیا کرو تے ایہدی قدر کرو۔‏ ایس شان‌دار تحفے لئی خدا دا شکر ادا کرو تے ایہدی تلیم حاصل کردے رہوو۔‏ ایس طرحاں تُسی سمجھ جاؤ گے کہ انساناں لئی خدا دا مقصد کیہہ اے‏۔‏ اگلے مضمون چ اَسی خدا دے ایسے مقصد بارے گل کراں گے۔‏