1.‏ ایس کتاب دے ذریعے بائبل کورس کرن توں بعد تواڈے ذہن چ کیہڑا سوال آ سکدا اے؟‏

تُسی ایس کتاب دے ذریعے ہُن تک پاک کلام چوں بوہت ساریاں سچائیاں سکھ لئیاں نیں جیویں کہ خدا نے انساناں نُوں ہمیشاں دی زندگی دین دا وعدہ کیتا اے‏،‏ مُردے کجھ وی نئیں جان دے تے اِک ویلا آئے گا جدوں مُردیاں نُوں زندہ کر دِتا جائے گا۔‏ (‏واعظ 9:‏5؛‏ لُوقا 23:‏43؛‏ یوحنا 5:‏28،‏ 29؛‏ مکاشفہ 21:‏3،‏ 4‏)‏ شاید تُسی یہوواہ دے گواہواں دِیاں عبادتاں تے وی آؤن لگ پئے او تے ایہہ من دے او کہ اوہ خدا دی عبادت صحی طریقے نال کردے نیں۔‏ (‏یوحنا 13:‏35‏)‏ شاید تُسی خدا نال اپنی دوستی نُوں ہور گُوڑھا کرن دی کوشش کر رہے او تے تُسی اوہدی خدمت کرن دا فیصلہ کر لیا اے۔‏ ایس لئی شاید ہُن تُسی سوچو کہ یہوواہ خدا دی خدمت کرن لئی توانوں ہور کیہہ کجھ کرن دی لوڑ اے؟‏

2.‏ ایتھوپیا دا رہن والا اِک بندہ بپتسمہ کیوں لینا چاہندا سی؟‏

 ² ایہی گل ایتھوپیا دے رہن والے اِک بندے دے ذہن چ وی سی جیہڑ‌ا یسوع مسیح دے زمانے چ رہندا سی۔‏ اصل چ یسوع مسیح دے اسمان تے جان توں بعد اوہناں دے اِک شاگرد فِلپّس نے ایس بندے نُوں ایہہ گواہی دِتی کہ یسوع ای مسیح نیں۔‏ فِلپّس نے جیہڑ‌ے ثبوت دِتے اوہناں دا ایس بندے دے دل تے ایناں اثر ہویا کہ اوہنے فِلپّس نُوں پچھیا کہ ہُن کیہڑی چیز مینوں بپتسمہ لین توں روکدی اے؟‏—‏اعمال 8:‏26-‏36‏،‏ ‏”‏اُردو ریوائزڈ ورشن۔‏“‏

3.‏ (‏الف)‏ یسوع مسیح نے اپنے پیروکاراں نُوں کیہہ حکم دِتا سی؟‏ (‏ب)‏ بپتسمہ کیویں دِتا جانا چاہی دا اے؟‏

³ پاک کلام چ صاف صاف دَسیا گیا اے کہ یہوواہ خدا دی خدمت کرن لئی بپتسمہ لینا ضروری اے۔‏ یسوع مسیح نے اپنے پیروکاراں نُوں کہیا سی کہ ساریاں قوماں دے لوکاں نُوں شاگرد بناؤ تے اوہناں نُوں بپتسمہ دیو۔‏ (‏متی 28:‏19‏)‏ یسوع مسیح نے آپ وی بپتسمہ لیا سی۔‏ اوہناں دا بپتسمہ صرف اوہناں دے سر تے پانی چھڑکن نال نئیں سی ہویا سگوں اوہناں نُوں پانی چ ڈبکی دِتی گئی سی۔‏ (‏متی 3:‏16‏)‏ اَج وی جدوں کسے نُوں بپتسمہ دِتا جاندا اے تے اوہنوں پانی چ ڈبکی دِتی جاندی اے۔‏

4.‏ جدوں تُسی بپتسمہ لوو گے تے دُوجیاں نُوں کیہہ پتہ چل جائے گا؟‏

⁴ جدوں تُسی بپتسمہ لوو گے تے ساریاں نُوں پتہ چل جائے گا کہ تُسی دِلوں خدا دے دوست بننا چاہندے او تے اوہدی خدمت کرنا چاہندے او۔‏ (‏زبور 40:‏7،‏ 8‏)‏ شاید تُسی سوچو کہ توانوں بپتسمہ لین لئی کیہہ کجھ کرنا پوے گا؟‏

5.‏ (‏الف)‏ بپتسمہ لین توں پہلاں توانوں کیہہ کرن دی لوڑ اے؟‏ (‏ب)‏ یہوواہ دے گواہواں دِیاں عبادتاں تے جانا کیوں ضروری اے؟‏

⁵ بپتسمہ لین توں پہلاں یہوواہ خدا تے یسوع مسیح نُوں چنگی طرحاں جاننا بوہت ضروری اے۔‏ تُسی پاک کلام دی تلیم حاصل کر کے اوہناں نُوں جانن دی کوشش کر وی رہے او۔‏ ‏(‏یوحنا 17:‏3 نُوں پڑھو۔‏)‏ پر ایناں ای کافی نئیں۔‏ بائبل چ دَسیا گیا اے کہ سانوں یہوواہ خدا دی مرضی بارے صحی علم  نال بھرے ہونا چاہی دا اے۔‏ (‏کُلسّیوں 1:‏9‏)‏ یہوواہ دے گواہواں نال مِل کے عبادت کرن نال تُسی یہوواہ خدا دے ہور نیڑے جا سکو گے۔‏ ایس لئی اوہناں دی ہر عبادت تے جان دی پوری کوشش کرو۔‏—‏عبرانیوں 10:‏24،‏ 25‏۔‏

6.‏ بپتسمہ لین توں پہلے تواڈے کول بائبل دا کِنّاں کوُ علم ہونا چاہی دا اے؟‏

⁶ یہوواہ خدا دی سوچ ایہہ نئیں کہ توانوں بپتسمہ لین توں پہلے پاک کلام دی ہر گل پتہ ہووے۔‏ اوہنے ایتھوپیا دے رہن والے بندے بارے وی ایہہ نئیں سی سوچیا۔‏ (‏اعمال 8:‏30،‏ 31‏)‏ ایہہ سچ اے کہ اَسی یہوواہ خدا بارے ہمیشاں ای سکھدے رہواں گے۔‏ (‏واعظ 3:‏11‏)‏ پر بپتسمہ لین لئی بائبل دی بنیادی تلیم نُوں جاننا تے ایہنوں قبول کرنا ضروری اے۔‏—‏عبرانیوں 5:‏12‏۔‏

7.‏ پاک کلام دی تلیم حاصل کرن نال توانوں کیہہ فائدہ ہویا اے؟‏

⁷ پاک کلام چ لکھیا اے کہ ایمان توں بغیر خدا نُوں خوش کرنا ممکن نئیں۔‏ (‏عبرانیوں 11:‏6‏)‏ ایس لئی بپتسمہ لین توں پہلے توانوں اپنے اندر ایمان پیدا کرنا چاہی دا اے۔‏ بائبل چ دَسیا گیا اے کہ کُرنتھس شہر دے لوکاں نے یسوع مسیح دے پیروکاراں دی تلیم سنی تے اوہ ایمان لے آئے تے فیر بپتسمہ لے لیا۔‏ (‏اعمال 18:‏8‏)‏ ایسے طرحاں تُسی وی پاک کلام دی تلیم حاصل کرن نال یہوواہ خدا دے وعدیاں تے ایمان لے آئے او تے ایہہ منن لگ پئے او کہ صرف یسوع مسیح دی قربانی دے ذریعے ای سانوں گناہ تے موت توں چھٹکارا مِل سکدا اے۔‏—‏یشوع 23:‏14؛‏ اعمال 4:‏12؛‏ 2-‏تیمُتھیُس 3:‏16،‏ 17‏۔‏

8.‏ تواڈے دل چ دُوجیاں نُوں اوہ گلاں دَسن دی خواہش کیویں پیدا ہوئے گی جیہڑ‌یاں تُسی سکھ رہے او؟‏

⁸ بائبل دی تلیم حاصل کرن تے ایہدے تے عمل کرن نال تُسی ویکھو گے کہ توانوں اپنی زندگی چ بوہت فائدہ ہو رہیا اے تے تواڈا ایمان پکا ہوندا جا رہیا اے۔‏ فیر تواڈا دل کرے گا کہ تُسی دُوجیاں نُوں وی اوہ گلاں دَسو جیہڑ‌یاں تُسی سکھ رہے او۔‏ (‏یرمیاہ 20:‏9؛‏ 2-‏کُرنتھیوں 4:‏13‏)‏ پر تُسی ایہہ گلاں کِنہاں نُوں دَس سکدے او؟‏

9،‏ 10.‏ (‏الف)‏ تُسی کیہڑے لوکاں نُوں اوہ گلاں دَسنا شروع کر سکدے او جیہڑ‌یاں تُسی سکھ رہے او؟‏ (‏ب)‏ کلیسیا نال مِل کے مُنادی دا کم کرن لئی توانوں کیہہ کرنا چاہی دا اے؟‏

 ⁹ تُسی اپنے گھر دے جیاں،‏ دوستاں یاں گوانڈھیاں نُوں اوہ گلاں دَس سکدے او جیہڑ‌یاں تُسی سکھ رہے او۔‏ تُسی ایہہ گلاں اوہناں لوکاں نُوں وی دَس سکدے او جنہاں نال تُسی کم کردے او۔‏ اِنج کرنا چنگی گل اے پر اوہناں نال ہمیشاں نرمی تے پیار نال گل کرو۔‏ فیر اوہ دن وی آئے گا جدوں تُسی کلیسیا نال مِل کے مُنادی دا کم کرن لئی تیار ہو جاؤ گے۔‏ جدوں تُسی محسوس کرو کہ تُسی ایہہ کم کرن لئی تیار او تے اوس یہوواہ دے گواہ نال گل کرو جیہڑ‌ا توانوں بائبل کورس کرا رہیا اے۔‏ جے اوہنوں وی لگے کہ تُسی ایس کم لئی تیار او تے پاک کلام دے اصولاں مطابق زندگی گزار رہے او تے فیر تُسی دونویں کلیسیا دے بزرگاں نال گل کرو۔‏ ایہدے بعد دو بزرگ تواڈے نال گل کرن گے۔‏

¹⁰ بزرگ ایہہ ویکھن گے کہ کیہہ تُسی بائبل دی بنیادی تلیم جان دے او تے اوہدے تے ایمان رکھدے او،‏ کیہہ تُسی اپنی زندگی بائبل دے اصولاں مطابق گزار رہے او نالے کیہہ تُسی واقعی یہوواہ دا گواہ بننا چاہندے او۔‏ ایہہ گل یاد رکھو کہ بزرگ کلیسیا دے سارے رُکناں دی دیکھ‌بھال کردے نیں تے اوہ تواڈا وی خیال رکھنا چاہندے نیں۔‏ ایس لئی اوہناں نال گل کرن چ ذرا وی شرم محسوس نہ کرو۔‏ (‏اعمال 20:‏28؛‏ 1-‏پطرس 5:‏2،‏ 3‏)‏ تواڈے نال گل‌بات کرن توں بعد بزرگ دَسن گے کہ تُسی کلیسیا نال مِل کے مُنادی دا کم کر سکدے او یاں نئیں۔‏

11.‏ کلیسیا نال مِل کے مُنادی دا کم شروع کرن توں پہلاں اپنی زندگی چ تبدیلیاں کرنا ضروری کیوں اے؟‏

¹¹ شاید بزرگ توانوں کہن کہ توانوں کلیسیا نال مِل کے مُنادی دا کم شروع کرن توں پہلاں اپنی زندگی چ کجھ ہور تبدیلیاں کرن دی لوڑ اے۔‏ پر ایہہ تبدیلیاں کرنا ضروری کیوں اے؟‏ کیونکہ جدوں اَسی دُوجیاں نال یہوواہ خدا بارے گل کرنے آں تے اَسی اصل چ ایہہ ظاہر کرنے آں کہ اَسی اوہدے نمائندے آں۔‏ ایس لئی ساڈی زندگی توں یہوواہ خدا دی وڈیائی ہونی چاہی دی اے۔‏—‏1-‏کُرنتھیوں 6:‏9،‏ 10؛‏ گلتیوں 5:‏19-‏21‏۔‏

12.‏ سانوں ساریاں نُوں توبہ کرن دی لوڑ کیوں اے؟‏

¹² بپتسمہ لین توں پہلاں توانوں کجھ ہور وی کرن دی لوڑ اے۔‏ پطرس رسول نے کہیا کہ توبہ کرو تے اپنی روِش بدلو تاکہ تواڈے گناہ مٹائے جان۔‏ (‏اعمال 3:‏19‏)‏ توبہ کرن دا مطلب کیہہ اے؟‏ ایہدا مطلب اپنے گناہواں تے دِلوں پچھتاوا محسوس کرنا اے۔‏ مثال دے طور تے جے کسے بندے دا چال‌چلن ٹھیک نئیں تے فیر اوہنوں بپتسمہ لین توں پہلاں اپنے گناہواں توں توبہ کرنی چاہی دی اے۔‏ پر اِک بندہ جنہے ہمیشاں چنگے کم کرن دی کوشش کیتی اے اوہنوں وی توبہ کرنی چاہی دی اے کیونکہ اَسی سارے گناہ کرنے آں تے سانوں خدا کولوں معافی منگن دی لوڑ اے۔‏—‏رومیوں 3:‏23؛‏ 5:‏12‏۔‏

13.‏ اپنی روِش نُوں بدلن دا کیہہ مطلب اے؟‏

¹³ کیہہ اپنے گناہواں تے پچھتاؤنا کافی اے؟‏ نئیں۔‏ پطرس رسول نے کہیا کہ سانوں اپنی روِش نُوں وی بدلنا چاہی دا اے۔‏ ایہدا مطلب اے کہ جے اَسی کوئی بھیڑا کم کرنے آں تے سانوں اوہ کم چھڈ کے صحی کم کرن والے پاسے آؤنا چاہی دا اے۔‏ ایس گل نُوں سمجھن لئی اِک مثال تے غور کرو۔‏ فرض کرو کہ تُسی اِک ایہو جہی جگہ تے جا رہے او جتھے تُسی پہلے کدی نئیں گئے۔‏ تھوڑی دیر بعد توانوں پتہ لگدا اے کہ تُسی تے غلط راہ تے نکل آئے او۔‏ ہُن تُسی کیہہ کرو گے؟‏ یقیناً تُسی رُک جاؤ گے،‏ راہ بدلو گے تے صحی رستہ پھڑو گے۔‏ ایسے طرحاں بائبل دی تلیم حاصل کرن نال شاید توانوں پتہ چلے کہ توانوں اپنیاں کجھ عادتاں نُوں بدلن دی لوڑ اے۔‏ تے فیر کیوں نہ تُسی اپنی روِش نُوں بدلن لئی تیار رہوو یعنی بھیڑیاں عادتاں نُوں چھڈو تے ہمیشاں صحی کم کرن دی کوشش کرو۔‏

14.‏ تُسی اپنی زندگی یہوواہ خدا دے ناں کیویں کرو گے؟‏

¹⁴ بپتسمہ لین توں پہلاں توانوں اِک ہور ضروری کم کرنا پوے گا۔‏ توانوں اپنی زندگی یہوواہ خدا  دے ناں کرنی پوے گی۔‏ تُسی ایہہ کِنج کرو گے؟‏ تُسی دُعا چ یہوواہ خدا نال وعدہ کرو گے کہ تُسی صرف اوہدی عبادت کرو گے تے اوہدی مرضی نُوں اپنی زندگی چ پہلی تھاں دَوو گے۔‏—‏متی 4:‏10‏۔‏

15،‏ 16.‏ کسے بندے دے دل چ اپنی زندگی یہوواہ خدا دے ناں کرن دی خواہش کیویں پیدا ہوندی اے؟‏

¹⁵ اَسی کسے نال ہمیشاں تک رہن دا وعدہ اوہدوں ای کرنے آں جدوں سانوں اوہدے نال پیار ہووے۔‏ ایس لئی جے سانوں یہوواہ خدا نال پیار اے تے تاں ای اَسی ہمیشاں اوہدی خدمت کرن دا وعدہ کراں گے۔‏ ایس گل نُوں سمجھن لئی ذرا اِک مثال تے غور کرو۔‏ فرض کرو کہ اِک منڈُا اِک کُڑی نُوں پسند کردا اے۔‏ وقت دے نال نال اوہ کُڑی نُوں چنگی طرحاں جانن لگ پیندا اے۔‏ فیر اوہنوں کُڑی نال پیار ہو جاندا اے تے اوہ اوہدے نال ویاہ کرنا چاہندا اے۔‏ بھانویں کہ ایہہ اِک بوہت وڈی ذمےداری اے پر فیر وی اوہ منڈُا خوشی خوشی ایہہ ذمےداری چکن لئی تیار ہو جاندا اے کیونکہ اوہنوں کُڑی نال پیار اے۔‏

¹⁶ ایسے طرحاں یہوواہ خدا بارے سکھن نال تُسی اوہنوں پیار کرن لگ پیندے او تے اوہدی خدمت کرنا چاہندے او۔‏ تواڈا دل کردا اے کہ تُسی دُعا چ خدا نال وعدہ کرو کہ تُسی ہمیشاں اوہدی خدمت کرو گے۔‏ پاک کلام چ لکھیا اے کہ جیہڑ‌ا وی یسوع مسیح دا پیروکار بننا چاہندا اے اوہ اپنے لئی جینا چھڈ دَوے۔‏ (‏مرقس 8:‏34‏)‏ ایہدا کیہہ مطلب اے؟‏ ایہدا مطلب اے کہ یہوواہ خدا دی گل مننا تواڈی زندگی چ سب توں زیادہ ضروری ہونا چاہی دا اے۔‏ یہوواہ خدا دی مرضی تواڈی اپنی مرضی یاں سوچ نالوں بوہتی اہم ہونی چاہی دی اے۔‏‏—‏1-‏پطرس 4:‏2 نُوں پڑھو۔‏

17.‏ کجھ لوک اپنی زندگی یہوواہ خدا دے ناں کیوں نئیں کرنا چاہندے؟‏

¹⁷ کجھ لوک اپنی زندگی یہوواہ خدا دے ناں کرن توں ایس لئی ڈردے نیں کیونکہ اوہناں نُوں لگدا اے کہ اوہ خدا دی خدمت کرن دا وعدہ پورا نئیں کر پاؤن گے۔‏ اصل چ اوہ یہوواہ خدا نُوں دُکھی نئیں کرنا چاہندے۔‏ یاں فیر اوہ ایہہ سوچدے نیں کہ جے اوہ یہوواہ خدا دی مرضی مطابق زندگی  گزارن دا وعدہ ای نئیں کرن گے تے فیر اوہناں نُوں اوہدے سامنے اپنے کماں لئی جواب وی نئیں دینا پوے گا۔‏

18.‏ تُسی یہوواہ خدا نُوں دُکھی کرن دے ڈر توں کیویں بچ سکدے او؟‏

¹⁸ یہوواہ خدا نال پیار دی وجہ توں تُسی اوہنوں دُکھی کرن دا ڈر اپنے دل چ نئیں آؤن دَوو گے۔‏ ایہو ای پیار توانوں ہلاشیری دَوے گا کہ تُسی خدا نال کیتا ہویا وعدہ نبھاؤن دی پوری کوشش کرو۔‏ (‏واعظ 5:‏4؛‏ کُلسّیوں 1:‏10‏)‏ تُسی ایہہ نئیں سوچو گے کہ خدا دی مرضی مطابق زندگی گزارنا بوہت اوکھا اے۔‏ یوحنا رسول نے لکھیا کہ خدا نُوں پیار کرن دا مطلب ایہہ وے کہ اَسی اوہدے حکماں تے عمل کریئے تے اوہدے حکم ساڈے لئی بوجھ نئیں۔‏—‏1-‏یوحنا 5:‏3‏۔‏

19.‏ توانوں اپنی زندگی یہوواہ دے ناں کرن توں ڈرنا کیوں نئیں چاہی دا؟‏

¹⁹ اپنی زندگی یہوواہ خدا دے ناں کرن لئی ضروری نئیں کہ تُسی ہر عیب توں پاک ہووو۔‏ یہوواہ خدا کدی وی توانوں کوئی ایہو جیہا کم کرن لئی نئیں کہوے گا جیہڑ‌ا تواڈے وَسوں باہر ہووے۔‏ (‏زبور 103:‏14‏)‏ اوہ ہمیشاں تواڈی مدد کرے گا تاکہ تُسی اوہ کم کر سکو جیہڑ‌ے اوہنوں پسند نیں۔‏ (‏یسعیاہ 41:‏10‏)‏ ایس لئی پورے دل نال یہوواہ خدا تے بھروسا رکھو تے اوہ تواڈی رہنمائی کرے گا۔‏—‏امثال 3:‏5،‏ 6‏۔‏

20.‏ اپنی زندگی یہوواہ خدا دے ناں کرن توں بعد اگلا قدم کیہڑا اے؟‏

²⁰ تواڈے خیال چ کیہہ تُسی اپنی زندگی یہوواہ خدا دے ناں کرن لئی تیار او؟‏ اپنی زندگی یہوواہ خدا نُوں دین توں بعد تُسی اگلا قدم چُک سکدے او یعنی بپتسمہ لے سکدے او۔‏

21،‏ 22.‏ تُسی دُوجیاں دے سامنے اپنے ایمان دا اِقرار کیویں کر سکدے او؟‏

²¹ اپنی کلیسیا دے بزرگاں دی جماعت دے منتظم نُوں دَسو کہ تُسی اپنی زندگی یہوواہ خدا دے ناں کر دِتی اے تے ہُن تُسی بپتسمہ لینا چاہندے او۔‏ فیر اوہ منتظم کجھ بزرگاں نُوں کہوے گا کہ اوہ تواڈے نال بائبل دی بنیادی تلیم بارے گل‌بات کرن تے ویکھن کہ کیہہ تُسی ایہنوں سمجھدے او یاں نئیں۔‏ جے  اوہناں نُوں لگے گا کہ تُسی بپتسمہ لین لئی تیار او تے فیر اوہ توانوں دَسن گے کہ تُسی یہوواہ دے گواہواں دی اگلی کنونشن تے بپتسمہ لے سکدے او۔‏ کنونشن تے اِک تقریر چ دَسیا جائے گا کہ بپتسمہ لین دا کیہہ مطلب اے تے بپتسمہ کیوں لینا چاہی دا اے۔‏ فیر تقریر دین والا،‏ بپتسمہ لین والیاں کولوں دو سوال پچھے گا۔‏ ایہناں سوالاں دے جواب دے کے تُسی دُوجیاں دے سامنے اپنے ایمان دا اِقرار کرو گے۔‏—‏رومیوں 10:‏10‏۔‏

 ²² فیر توانوں بپتسمہ دِتا جائے گا یعنی توانوں پانی چ ڈبکی دِتی جائے گی۔‏ ایس طرحاں ساریاں نُوں پتہ چلے گا کہ تُسی اپنی زندگی یہوواہ خدا دے ناں کر دِتی اے تے ہُن تُسی یہوواہ دے گواہ بن گئے او۔‏

23‏.‏ باپ،‏ بیٹے تے پاک روح دے ناں توں بپتسمہ لین دا کیہہ مطلب اے؟‏

²³ یسوع مسیح نے کہیا سی کہ جیہڑ‌ا وی اوہناں دا شاگرد بننا چاہوے گا اوہنوں باپ تے بیٹے تے پاک روح دے ناں توں بپتسمہ لینا پوے گا۔‏ ‏(‏متی 28:‏19 نُوں پڑھو۔‏)‏ باپ،‏ بیٹے تے پاک روح دے ناں توں بپتسمہ لین دا کیہہ مطلب اے؟‏ ایہدا مطلب اے کہ بپتسمہ لین والا بندہ یہوواہ خدا دے مرتبے تے حکمرانی نُوں من دا اے،‏ اوہ سمجھدا اے کہ یہوواہ خدا دے مقصد نُوں پورا کرن لئی یسوع مسیح کیہہ کجھ کر رہے نیں نالے اوہ جان دا اے کہ یہوواہ خدا اپنی مرضی پوری کرن لئی اپنی پاک روح نُوں کیویں استمال کردا اے۔‏—‏زبور 83:‏18؛‏ متی 28:‏18؛‏ گلتیوں 5:‏22،‏ 23؛‏ 2-‏پطرس 1:‏21‏۔‏

24،‏ 25‏.‏ ‏(‏الف)‏ بپتسمہ کیس گل دی نشانی اے؟‏ (‏ب)‏ اگلے باب چ کیہڑے سوال دا جواب دِتا جائے گا؟‏

²⁴ بپتسمہ اِک بوہت اہم گل دی نشانی اے۔‏ جدوں تُسی پانی چ ڈبکی لیندے او تے تُسی اپنے پرانے چال‌چلن دے لحاظ نال اِک طرحاں مر جاندے او یعنی تُسی اوہنوں چھڈ دیندے او۔‏ پر جدوں تُسی پانی توں باہر آؤندے او تے تُسی اِک نوِیں زندگی دے لحاظ نال زندہ ہو جاندے او یعنی خدا دی مرضی دے مطابق زندگی دی شروعات کردے او۔‏ ایس توں ظاہر ہوندا اے کہ تُسی ہُن توں یہوواہ خدا دی خدمت کرو گے۔‏ یاد رکھو کہ تُسی اپنی زندگی کسے انسان یاں تنظیم دے ناں نئیں کیتی سگوں یہوواہ خدا دے ناں کیتی اے۔‏

²⁵ اپنی زندگی یہوواہ خدا نُوں دے کے تُسی اوہدے ہور نیڑے ہو جاؤ گے۔‏ (‏یعقوب 4:‏8‏)‏ پر ایہدا مطلب ایہہ نئیں کہ بپتسمہ لین نال نجات پکی ہو جاندی اے۔‏ پولس رسول نے لکھیا کہ احترام تے خوف نال نجات پاؤن دی کوشش کرو۔‏ (‏فِلپّیوں 2:‏12‏)‏ اصل چ بپتسمہ لے کے تُسی نجات وَل ودھنا شروع کردے او۔‏ پر تُسی یہوواہ خدا دے نیڑے رہن لئی کیہہ کر سکدے او؟‏ ایہدا جواب کتاب دے اگلے تے آخری باب چ دِتا جائے گا۔‏