1،‏ 2.‏ (‏الف)‏ تواڈے خیال چ اِک قیمتی تحفہ کیہڑا ہوندا اے؟‏ (‏ب)‏ فدیہ خدا وَلّوں سب توں قیمتی تحفہ کیوں اے؟‏

کیہہ کدی توانوں کوئی ایہو جیہا تحفہ ملیا اے جیہڑ‌ا تواڈی نظر چ بوہت ای قیمتی اے؟‏ تحفے دی اہمیت دا اندازہ اوہدی قیمت توں نئیں ہوندا سگوں ایس گل توں ہوندا اے کہ ایہنوں پا کے توانوں کِنّی خوشی ہوئی اے یاں ایہدے توں تواڈی کوئی لوڑ پوری ہوئی اے۔‏ ایہو جہے تحفے دی تُسی دِلوں قدر کردے او۔‏

² خدا نے سانوں بوہت سارے تحفے دِتے نیں۔‏ پر ایہناں چوں اِک تحفہ بوہت ای قیمتی اے جدی سانوں سب توں زیادہ لوڑ اے۔‏ ایس باب چ اَسی سکھاں گے کہ خدا نے یسوع مسیح نُوں زمین تے گھلیا تاکہ اَسی ہمیشاں دی زندگی پا سکیے۔‏ ‏(‏متی 20:‏28 نُوں پڑھو۔‏)‏ یہوواہ خدا نے یسوع مسیح نُوں زمین تے گھلن تے فدیے دا اِنتظام کرن نال ایہہ ثابت کیتا اے کہ اوہ سانوں بوہت پیار کردا اے۔‏

3.‏ انسان کیوں مردے نیں؟‏

³ فدیہ اوہ ذریعہ اے جدے نال یہوواہ خدا انساناں نُوں گناہ تے موت توں رِہائی دَوے گا۔‏ (‏اِفسیوں 1:‏7‏)‏ پر ایہہ کیوں ضروری سی کہ انساناں لئی فدیہ دِتا جائے؟‏ ایس سوال دا جواب حاصل کرن توں پہلاں ایہہ جاننا ضروری اے کہ جدوں خدا نے آدم تے حوا نُوں بنایا تے ایہدے بعد کیہہ ہویا؟‏ آدم تے حوا نے گناہ کیتا جدی وجہ توں اوہ مر گئے۔‏ اوہناں دی اولاد ہون دی وجہ توں سانوں گناہ ورثے چ ملیا اے ایس لئی اَسی وی مرنے آں۔‏—‏کتاب دے آخر چ نکتہ نمبر 9 نُوں ویکھو۔‏

4.‏ آدم کون سن تے خدا نے اوہناں نُوں کیہڑی قیمتی چیز دِتی سی؟‏

⁴ جدوں یہوواہ خدا نے پہلے انسان آدم نُوں بنایا تے خدا نے اوہناں نُوں اِک بوہت قیمتی  چیز دِتی۔‏ اوہنے آدم نُوں ہر نقص تے عیب توں پاک زندگی دِتی۔‏ آدم نے نہ تے کدی بیمار ہونا سی،‏ نہ کدی بُڈھے ہونا سی تے نہ ای کدی مرنا سی۔‏ کیونکہ یہوواہ خدا نے آدم نُوں بنایا سی ایس لئی اوہ اوہناں دا باپ سی۔‏ (‏لُوقا 3:‏38‏)‏ یہوواہ خدا ہر روز آدم نال گل کردا سی۔‏ اوہنے آدم نُوں دَسیا کہ اوہ اوہناں کولوں کیہہ توقع کردا اے۔‏ اوہنے آدم نُوں اِک ایہو جیہا کم دِتا جنہوں کر کے اوہناں نُوں خوشی ملے۔‏—‏پیدایش 1:‏28-‏30؛‏ 2:‏16،‏ 17‏۔‏

5.‏ ایس گل دا کیہہ مطلب اے کہ خدا نے آدم نُوں اپنی صورت تے بنایا سی؟‏

⁵ یہوواہ خدا نے آدم نُوں اپنی صورت تے بنایا سی۔‏ (‏پیدایش 1:‏27‏)‏ ایہدا مطلب ایہہ وے کہ خدا نے اوہناں نُوں اوہ خوبیاں دِتیاں جیہڑ‌یاں اوہدے اپنے وچ نیں۔‏ خدا وانگوں آدم چ وی محبت،‏ قوت،‏ اِنصاف‌پسندی تے دانش‌مندی سی۔‏ خدا نے آدم نُوں اپنی مرضی نال فیصلہ کرن دی آزادی وی دِتی سی۔‏ آدم اِک مشین وانگوں نئیں سن جیہڑ‌ی اپنی مرضی نال کجھ نئیں کر سکدی۔‏ اوہ آپی صحی تے غلط دا فیصلہ کر سکدے سن۔‏ جے اوہناں نے خدا دی گل منی ہوندی تے اوہ ہمیشاں تک زندہ رہ سکدے سن۔‏

6.‏ (‏الف)‏ جدوں آدم نے خدا دی گل نہ منی تے اوہناں نُوں ایہدی کیہہ قیمت بھرنی پئی؟‏ (‏ب)‏ آدم دے گناہ دا ساڈے تے کیہہ اثر ہویا اے؟‏

⁶ آدم نُوں خدا دی گل نہ منن دی بڑی وڈی قیمت بھرنی پئی۔‏ یہوواہ خدا نال اوہناں دی دوستی ٹُٹ گئی،‏ اوہ گناہ‌گار بن گئے،‏ اوہناں نُوں عدن دے باغ چوں کڈھ دِتا گیا تے اخیر اوہ مر گئے۔‏ (‏پیدایش 3:‏17-‏19‏)‏ آدم تے حوا نے جان بجھ کے خدا دی نافرمانی کیتی سی ایس لئی ہُن اوہناں کول کوئی امید نئیں بچی سی۔‏ آدم دی وجہ توں گناہ دُنیا چ آیا تے گناہ دے ذریعے موت آئی تے موت سارے انساناں چ پھیل گئی کیونکہ ساریاں نے گناہ کیتا۔‏ (‏رومیوں 5:‏12‏)‏ جدوں آدم نے گناہ کیتا تے اوہناں نے صرف اپنے آپ نُوں ای نئیں سگوں سانوں وی گناہ تے موت دی غلامی چ ویچ دِتا۔‏ (‏رومیوں 7:‏14‏)‏ کیہہ ہُن ساڈے کول کوئی امید ہے؟‏ جی بالکل ہے،‏ کیونکہ خدا نے ساڈے لئی فدیے دا اِنتظام کیتا اے۔‏

7،‏ 8.‏ فدیہ کیہہ ہوندا اے؟‏

⁷ فدیہ کیہہ ہوندا اے؟‏ فدیہ اوہ قیمت ہوندی اے جیہڑ‌ی کسے بندے نُوں چھڈاؤن لئی یاں کسے  چیز نُوں واپس لین لئی دِتی جاندی اے۔‏ فدیہ اوہ قیمت وی ہوندی اے جیہڑ‌ی کسے نقصان نُوں بھرن لئی دِتی جاندی اے۔‏

⁸ آدم دے گناہ دی وجہ توں انساناں تے موت آئی۔‏ کوئی وی انسان اوس نقصان نُوں بھر نئیں سی سکدا جیہڑ‌ا آدم دی وجہ توں ہویا سی۔‏ پر یہوواہ خدا نے سانوں گناہ تے موت دی غلامی توں چھڈاؤن دا اِنتظام کیتا۔‏ آؤ،‏ ایس گل تے غور کرئیے کہ یہوواہ خدا نے فدیے دا اِنتظام کیویں کیتا تے اَسی ایس اِنتظام توں فائدہ کیویں حاصل کر سکنے آں۔‏

9.‏ فدیہ کیویں دِتا جا سکدا سی؟‏

⁹ ساڈے وچوں کوئی وی انسان عیب توں پاک اوس زندگی دا فدیہ نئیں سی دے سکدا جیہڑ‌ی آدم نے گنوا دِتی سی۔‏ ایہدی وجہ ایہہ وے کہ اَسی سارے عیب‌دار آں۔‏ (‏زبور 49:‏7،‏ 8‏)‏ فدیے لئی ایہو جہی انسانی زندگی دی لوڑ سی جیہڑ‌ی ہر عیب تے نقص توں پاک ہووے۔‏ ایسے وجہ توں پاک کلام چ ایہنوں پورا فدیہ کہیا گیا اے۔‏ (‏1-‏تیمُتھیُس 2:‏6‏)‏ فدیے نُوں اوس زندگی دی قیمت دے برابر ہونا چاہی دا سی جیہڑ‌ی آدم نے گنوا دِتی سی۔‏

10.‏ یہوواہ خدا نے فدیے دا اِنتظام کیویں کیتا؟‏

¹⁰ یہوواہ خدا نے فدیے دا اِنتظام کیویں کیتا؟‏ اوہنے اپنے سب توں پیارے پُتر نُوں زمین تے گھلیا۔‏ ایہہ پُتر یسوع مسیح سن جنہاں نُوں خدا نے سب توں پہلے بنایا سی۔‏ (‏1-‏یوحنا 4:‏9،‏ 10‏)‏ یسوع مسیح اپنے باپ نُوں چھڈ کے اسمان توں زمین تے آؤن لئی تیار سن۔‏ (‏فِلپّیوں 2:‏7‏)‏ یہوواہ خدا نے یسوع مسیح دی زندگی نُوں زمین تے اِک کنواری کُڑی دے رحم چ پا دِتا۔‏ ایس طرحاں یسوع مسیح ہر عیب تے نقص توں پاک انسان دے طور تے پیدا ہوئے۔‏—‏لُوقا 1:‏35‏۔‏

11.‏ کیہہ کوئی اِک شخص سارے انساناں لئی فدیہ دے سکدا سی؟‏ وضاحت کرو۔‏

¹¹ آدم دی نافرمانی دی وجہ توں سارے انسان عیب توں پاک زندگی توں محروم ہو گئے۔‏ پر  کیہہ کوئی آدم دی ساری اولاد نُوں موت دی غلامی توں چھڈا سکدا سی؟‏ جی ہاں۔‏ ‏(‏رومیوں 5:‏19 نُوں پڑھو۔‏)‏ یسوع مسیح گناہ توں پاک سن۔‏ اوہناں نے اپنی زندگی انساناں لئی فدیے دے طور تے دے دِتی۔‏ (‏1-‏کُرنتھیوں 15:‏45‏)‏ یسوع مسیح دی بےعیب زندگی دی قربانی دے ذریعے آدم دی ساری اولاد نُوں موت دی غلامی توں چھڈایا جا سکدا سی۔‏—‏1-‏کُرنتھیوں 15:‏21،‏ 22‏۔‏

12.‏ یسوع مسیح نُوں اینی تکلیف کیوں سہنی پئی؟‏

¹² پاک کلام چ دَسیا گیا اے کہ اپنی موت توں پہلے یسوع مسیح نُوں بڑی تکلیف سہنی پئی۔‏ اوہناں نُوں کوڑے مارے گئے،‏ سُولی تے ٹنگ دِتا گیا تے دردناک موت دِتی گئی۔‏ (‏یوحنا 19:‏1،‏ 16-‏18،‏ 30‏)‏ یسوع مسیح نُوں اینی تکلیف کیوں سہنی پئی؟‏ اصل چ شیطان نے دعویٰ کیتا سی کہ کوئی وی انسان سخت ازمیش چ خدا دا وفادار نئیں رہوے گا۔‏ پر یسوع مسیح نے ثابت کیتا کہ عیب توں پاک انسان سخت ازمیش یاں تکلیف چ وی خدا دا وفادار رہ سکدا اے۔‏ ذرا سوچو کہ یسوع دی وفاداری نُوں ویکھ کے یہوواہ خدا نُوں اوہناں تے کِنّاں مان ہویا ہوئے گا!‏—‏امثال 27:‏11‏؛‏ کتاب دے آخر چ نکتہ نمبر 15 نُوں ویکھو۔‏

13.‏ فدیہ کیویں دِتا گیا؟‏

¹³ فدیہ کیویں دِتا گیا؟‏ اصل چ یسوع مسیح نے اپنی عیب توں پاک زندگی دی قیمت فدیے دے طور تے اپنے باپ دے حضور پیش کیتی۔‏ 33 عیسوی چ 14 نیسان نُوں (‏جیہڑ‌ا یہودی کیلنڈر دا اِک مہینہ اے)‏ یہوواہ خدا نے یسوع مسیح نُوں اوہناں دے دُشمناں دے ہتھوں مرن دِتا۔‏ (‏عبرانیوں 10:‏10‏)‏ ایہدے تِن دن بعد یہوواہ خدا نے یسوع مسیح نُوں اِک انسان دے طور تے نئیں سگوں اِک روح دے طور تے زندہ کیتا۔‏ بعد وچ جدوں یسوع مسیح اسمان تے واپس گئے تے اوہناں نے اپنی عیب توں پاک زندگی دی قیمت فدیے دے طور تے یہوواہ خدا دے سامنے پیش کیتی۔‏ ایہدا مطلب ایہہ وے کہ یسوع مسیح نُوں عیب توں پاک انسان دے طور تے زمین تے ہمیشاں تک زندہ رہن دا حق سی پر اوہناں نے ایہہ حق خدا دے حوالے کر دِتا تاکہ اوہ ایہہ حق آدم دی اولاد نُوں دے سکے۔‏ (‏عبرانیوں 9:‏24‏)‏ کیونکہ ہُن یہوواہ خدا نے انساناں دا فدیہ دے دِتا اے ایس لئی اَسی گناہ تے موت دی غلامی توں رِہائی پا سکنے آں۔‏‏—‏رومیوں 3:‏23،‏ 24 نُوں پڑھو۔‏

14،‏ 15.‏ اپنے گناہواں دی معافی پاؤن لئی سانوں کیہہ کرنا چاہی دا اے؟‏

¹⁴ فدیہ خدا دی سب توں وڈی نعمت اے۔‏ ایہدے توں نہ صرف ہُن سانوں فائدہ ہو رہیا اے سگوں مستقبل وچ وی فائدہ ہوئے گا۔‏ آؤ ایہدے کجھ فائدیاں تے غور کرئیے۔‏

¹⁵ ساڈے گناہ معاف ہوندے نیں۔‏ اَسی سارے گناہ‌گار آں ایس لئی ساڈے لئی ہمیشاں صحی کم کرنا سوکھا نئیں ہوندا۔‏ کدی کدار ساڈے کولوں کوئی غلطی ہو جاندی اے یاں ساڈے مونہوں چنگیاں مندیاں گلاں نکل جاندیاں نیں۔‏ پر سانوں معافی کِنج مِل سکدی اے؟‏ سب توں پہلاں تے سانوں اپنیاں غلطیاں تے پچھتاؤنا چاہی دا اے تے فیر یہوواہ خدا کولوں دِلوں معافی منگنی چاہی دی اے‏۔‏ اِنج اَسی یقین رکھ سکنے آں کہ ساڈے گناہ معاف ہو گئے نیں۔‏—‏کُلسّیوں 1:‏13،‏ 14؛‏ 1-‏یوحنا 1:‏8،‏ 9‏۔‏

16.‏ اَسی کیہہ کر سکنے آں تاکہ ساڈا ضمیر صاف رہوے؟‏

¹⁶ ساڈا ضمیر صاف رہندا اے۔‏ جدوں ساڈا ضمیر سانوں احساس دواؤندا اے کہ ساڈے کولوں کوئی غلطی ہو گئی اے تے اَسی بوہت پچھتاؤنے آں۔‏ ہو سکدا اے کہ اَسی بوہت مایوس ہو جائیے تے سمجھئے کہ اَسی کسے کم دے نئیں۔‏ پر سانوں ہمت نئیں ہارنی چاہی دی۔‏ جے اَسی یہوواہ خدا کولوں معافی منگاں گے تے سانوں یقین اے کہ اوہ ساڈی سُنے گا تے سانوں معاف وی کرے گا۔‏ (‏عبرانیوں 9:‏13،‏ 14‏)‏ یہوواہ خدا چاہندا اے کہ اَسی اوہنوں اپنے مسئلیاں تے کمزوریاں بارے دَسیئے۔‏ (‏عبرانیوں 4:‏14-‏16‏)‏ اِنج خدا دِیاں نظراں چ ساڈا ضمیر صاف رہوے گا۔‏

17.‏ یسوع مسیح دی قربانی دی وجہ توں سانوں کیہڑیاں برکتاں مِل سکدیاں نیں؟‏

¹⁷ سانوں ہمیشاں دی زندگی دی امید مِلدی اے۔‏ پاک کلام چ لکھیا اے کہ گناہ دی مزدوری موت اے پر خدا دی نعمت ہمیشاں دی زندگی اے جیہڑ‌ی سانوں اپنے مالک یسوع مسیح دے ذریعے مِلدی اے۔‏ (‏رومیوں 6:‏23‏)‏ کیونکہ یسوع مسیح نے ساڈے لئی اپنی جان قربان کیتی ایس لئی اَسی ایہہ امید رکھ سکنے آں کہ اَسی ہمیشاں تک زندہ رہواں گے تے کدی بیمار نئیں ہونواں گے۔‏ (‏مکاشفہ 21:‏3،‏ 4‏)‏ پر ایہہ برکتاں پاؤن لئی سانوں کیہہ کرنا چاہی دا اے؟‏

18.‏ سانوں ایہہ یقین کیوں اے کہ یہوواہ خدا سانوں پیار کردا اے؟‏

¹⁸ ذرا سوچو کہ جدوں کوئی توانوں خوب‌صورت تحفہ دیندا اے تے توانوں کِنّی خوشی ہوندی اے۔‏ فدیہ وی اِک بوہت قیمتی تحفہ اے جدے لئی سانوں یہوواہ خدا دا بڑا شکرگزار ہونا چاہی دا اے۔‏ یوحنا 3:‏16 چ لکھیا اے کہ خدا نُوں دُنیا نال اینی محبت اے کہ اوہنے اپنا اِکلوتا پُتر دے دِتا۔‏ واقعی خدا نُوں ساڈے نال اینی محبت اے کہ اوہنے ساڈے لئی اپنے پیارے پُتر یسوع نُوں قربان کر دِتا۔‏ یسوع مسیح وی سانوں ایناں پیار کردے نیں کہ اوہ ساڈے لئی اپنی جان قربان کرن نُوں تیار ہو گئے۔‏ (‏یوحنا 15:‏13‏)‏ یہوواہ خدا نے فدیے دا اِنتظام کر کے ایہہ ثابت کر دِتا اے کہ اوہ تے اوہدا پُتر سانوں بوہت پیار کردے نیں۔‏—‏گلتیوں 2:‏20‏۔‏

19،‏ 20.‏ (‏الف)‏ تُسی خدا دے دوست کیویں بن سکدے او؟‏ (‏ب)‏ تُسی کیویں ظاہر کر سکدے او کہ تُسی فدیے دے اِنتظام دی قدر کردے او؟‏

¹⁹ تُسی سکھ لیا اے کہ خدا توانوں بوہت پیار کردا اے۔‏ تے فیر کیہہ تُسی اوہدے دوست بننا چاہوو گے؟‏ ضرور بننا چاہوو گے۔‏ پر ایہدے لئی توانوں کیہہ کرن دی لوڑ اے؟‏ یوحنا 17:‏3 چ دَسیا گیا اے کہ اَسی خدا نُوں چنگی طرحاں جان سکنے آں۔‏ جیویں جیویں تُسی خدا بارے سکھدے جاؤ گے تواڈے دل چ اوہدے لئی پیار ودھدا جائے گا،‏ تواڈے اندر اوہنوں خوش کرن دی خواہش پیدا ہوئے گی تے تُسی اوہدے دوست بن جاؤ گے۔‏ ایس لئی پاک کلام دی تلیم حاصل کردے رہوو تے یہوواہ خدا بارے سکھدے رہوو۔‏—‏1-‏یوحنا 5:‏3‏۔‏

²⁰ فدیے دے اِنتظام دی قدر کرو۔‏ پاک کلام چ لکھیا اے کہ جیہڑ‌ا بیٹے تے ایمان ظاہر کردا اے اوہنوں ہمیشاں دی زندگی ملے گی۔‏ (‏یوحنا 3:‏36‏)‏ ایمان ظاہر کرن دا مطلب کیہہ اے؟‏ ایہدا مطلب یسوع مسیح دی تلیم تے عمل کرنا اے۔‏ (‏یوحنا 13:‏15‏)‏ صرف ایہہ کہنا ای کافی نئیں کہ اَسی یسوع تے ایمان رکھنے آں سگوں سانوں اپنے کماں توں وی ثابت کرنا چاہی دا اے کہ اَسی فدیے دے اِنتظام دی قدر کرنے آں۔‏ یعقوب 2:‏26 چ دَسیا گیا اے کہ ایمان بغیر کماں دے مُردہ اے۔‏

21،‏ 22.‏ (‏الف)‏ سانوں ہر سال یسوع مسیح دی موت دی یادگیری دی عبادت تے کیوں جانا چاہی دا اے؟‏ (‏ب)‏ باب نمبر 6 تے 7 چ کیہڑے موضوع تے گل کیتی جائے گی؟‏

 ²¹ یسوع مسیح دی موت دی یادگیری دی عبادت تے جاؤ۔‏ یسوع مسیح نے اپنی موت توں کجھ دیر پہلاں اپنے شاگرداں نُوں کہیا سی کہ اوہ اوہناں دی موت دی یادگیری منایا کرن۔‏ ایس لئی اَسی ہر سال اوہناں دی موت دی یاد چ اِک خاص عبادت دا بندوبست کرنے آں۔‏ پاک کلام چ ایہنوں مالک دی یادگیری تقریب دا کھانا کہیا گیا اے۔‏ (‏1-‏کُرنتھیوں 11:‏20؛‏ متی 26:‏26-‏28‏)‏ یسوع مسیح چاہندے نیں کہ اَسی ایہہ گل یاد رکھئے کہ اوہناں نے ساڈے لئی اپنی زندگی فدیے دے طور تے دے دِتی۔‏ ایس لئی اوہناں آکھیا سی کہ اوہناں دی موت دی یاد منائی جائے۔‏ ‏(‏لُوقا 22:‏19 نُوں پڑھو۔‏)‏ جدوں تُسی ایس خاص عبادت تے جاندے او تے تُسی ظاہر کردے او کہ تُسی فدیے دے اِنتظام دی قدر کردے او نالے یہوواہ خدا تے یسوع مسیح دی محبت لئی بڑے شکرگزار او۔‏—‏کتاب دے آخر چ نکتہ نمبر 16 نُوں ویکھو۔‏

²² فدیہ ساڈے لئی سب توں قیمتی تحفہ اے۔‏ (‏2-‏کُرنتھیوں 9:‏14،‏ 15‏)‏ ایس تحفے توں اوہناں لکھاں لوکاں نُوں وی فائدہ ہوئے گا جیہڑ‌ے مر گئے نیں۔‏ باب نمبر 6 تے 7 چ ایس موضوع تے گل کیتی جائے گی۔‏