تعارف
کتاب ”پاک کلام چوں رہنمائی“ دے ذریعے تُسی اوہناں ایتاں تے مثالاں نُوں اسانی نال لبھ سکدے او جیہڑیاں کسے مشکل نُوں حل کرن چ تواڈے کم آ سکدیاں نیں۔ ایس کتاب دے ذریعے تُسی دُوجیاں لئی ایہو جہیاں ایتاں وی لبھ سکدے او جنہاں نال تُسی اوہناں دا حوصلہ ودھا سکدے او تے چنگے فیصلے کرن چ اوہناں دی مدد کر سکدے او۔ تُسی بس کتاب چوں اوس موضوع نُوں لبھنا اے جدے بارے تُسی معلومات لینا چاہندے او۔ ہر موضوع چ کجھ سوال دِتے گئے نیں تے بائبل چوں کجھ واقعے وی دَسے گئے نیں۔ (ایس بکس نُوں ویکھو: ” کتاب نُوں استمال کرن دا طریقہ۔“) ایس کتاب دی مدد نال تُسی پاک کلام دِیاں ایہو جہیاں ایتاں لبھ سکو گے جنہاں توں توانوں چنگے مشورے، ہدیتاں تے تسلی ملے گی۔ ایہدے علاوہ تُسی ایہو جہے اصول لبھ سکو گے جنہاں توں دُوجیاں نُوں فائدہ ہوئے، اوہ مشکلاں نال نبڑ سکن تے تسلی حاصل کر سکن۔
ایس کتاب چ کسے موضوع بارے بائبل دِیاں ساریاں ایتاں نئیں دِتیاں گئیاں۔ پر ایہدے ذریعے اوس موضوع بارے تحقیق شروع کرن چ توانوں بڑی مدد ملے گی۔ (اَمثال 2:1-6) جے تُسی کسے ایت بارے ہور جاننا چاہندے او تے اُردو زبان چ کتاب ”یہوواہ کے گواہوں کے لئے مطالعے کے حوالے“ چ حصہ ”آیتوں کی وضاحت“ نُوں ویکھو۔ اوہدے چ اوہناں رسالیاں تے کتاباں بارے دَسیا گیا اے جنہاں چ اوس ایت بارے معلومات دِتی گئی اے۔ ایس طرحاں تحقیق کردے ویلے ویکھو کہ تنظیم نے ایت بارے حال چ ای کیہڑی وضاحت دِتی اے۔
دُعا اے کہ تُسی کتاب ”پاک کلام چوں رہنمائی“ دی مدد نال پاک کلام چوں حکمت، علم تے رہنمائی حاصل کر سکو۔ جِنّاں زیادہ تُسی ایس کتاب نُوں استمال کرو گے، اوناں ای ایس گل تے تواڈا بھروسا ودھے گا کہ خدا دا کلام زندہ تے فائدےمند اے۔—عبرانیوں 4:12۔
