پیارے بھینو تے بھراوو!‏

خدا تے لوکاں نال پیار دی وجہ توں ساڈا دل کردا اے کہ اَسی ’‏جائیے تے ساریاں قوماں دے لوکاں نُوں شاگرد بنائیے تے اوہناں نُوں بپتسمہ دَئیے۔‘‏ (‏متی 28:‏19، 20؛‏ مرقس 12:‏28-‏31‏)‏ پیار چ بڑی طاقت اے۔ ایہہ اوہناں لوکاں دے دلاں تے گُوڑھا اثر پا سکدا اے جیہڑے ہمیشاں دی زندگی دی راہ تے چلن لئی تیار نیں۔—‏اعمال 13:‏48‏۔‏

پہلے اَسی ایس گل تے بڑا زور دینے ساں کہ اَسی گل بات لئی دِتے گئے مشوریاں نُوں یاد کریئے تے لوکاں نُوں کتاباں تے رسالے دَئیے۔ پر ہُن سانوں لوکاں نال گل بات کرن دی مہارت نُوں نکھارن دی لوڑ اے۔ سانوں لوکاں نال اوہناں موضوعاں بارے گل کرنی چاہی دی اے جنہاں چ اوہ دلچسپی رکھدے نیں۔ اِنج کرن لئی ضروری اے کہ اَسی موضوع بدلن لئی تیار رہیے تے ایہہ سوچئے کہ اوہ کیہڑیاں گلاں بارے سوچدے نیں تے کیہڑیاں گلاں بارے جاننا چاہندے نیں۔ ایس طرحاں اَسی اوہناں لئی محبت وکھا رہے ہوواں گے۔ ایس سلسلے چ ایہہ کتاب ساڈی مدد کیویں کر سکدی اے؟‏

ایس کتاب چ 12 سبق نیں جنہاں چ ایہو جہیاں خوبیاں بارے دَسیا گیا اے جیہڑیاں اَسی اپنے اندر پیدا کر کے لوکاں لئی پیار وکھا سکنے آں تے اوہناں نُوں شاگرد بنا سکنے آں۔ ہر سبق چ بائبل دے اِک واقعے بارے گل کیتی گئی اے جدے چ یسوع یاں پہلی صدی دے کسے مسیحی نے مُنادی کردے ویلے کسے خاص خوبی نُوں ظاہر کیتا سی۔ ساڈا مقصد اوس گل بات نُوں رٹنا نئیں اے جیہڑی یسوع یاں کسے ہور مسیحی نے کیتی سگوں ایہہ سکھنا اے کہ اَج اَسی لوکاں لئی محبت کیویں وکھا سکنے آں۔ ایہہ سچ اے کہ مُنادی کردے ویلے سانوں ایہناں ساریاں خوبیاں دی لوڑ اے۔ پر اَسی ایہہ ویکھاں گے کہ گل بات شروع کردے ویلے، واپسی ملاقات کردے ویلے یاں بائبل کورس کراندے ویلے سانوں خاص طور تے کیہڑیاں خوبیاں ظاہر کرن دی لوڑ اے۔‏

ہر سبق نُوں پڑھدے ویلے ایس گل تے سوچ وچار کرو کہ تُسی اپنے علاقے دے لوکاں نال گل کردے ہوئیاں ایس خوبی نُوں کیویں ظاہر کرو گے۔ اپنے دل چ یہوواہ تے لوکاں لئی محبت نُوں ہور ودھاؤ۔ کسے مہارت نالوں زیادہ محبت تواڈی مدد کرے گی کہ تُسی شاگرد بنان چ کامیاب ہو سکو۔‏

ساڈے لئی ایہہ بڑے مان دی گل اے کہ اَسی تواڈے نال موڈھے نال موڈھا جوڑ کے خدمت کر رہے آں۔ (‏صفنیاہ 3:‏9‏)‏ ساڈی دُعا اے کہ جدوں تُسی لوکاں لئی محبت ظاہر کردے او تے اوہناں نُوں شاگرد بناندے او تے یہوواہ تواڈیاں کوششاں چ برکت پائے!‏