ایہہ سچ اے کہ گھرانے دیاں لوڑاں پُوریاں کرن لئی پیسہ بوہت ضروری اے۔ (‏امثال 30:‏8‏)‏ پاک کلام وچ دسیا گیا اے کہ پیسہ اِک پناہ‌گاہ وانگوں اے۔ (‏واعظ 7:‏12‏)‏ پیسے دھیلے بارے گل کردیاں میاں بیوی وچ بحث چھڑ سکدی اے پر پیسے دی وجہ توں اپنے رشتے وچ تریڑھ نہ پین دَوو۔ (‏اِفسیوں 4:‏32‏)‏ میاں بیوی نُوں پیسے دھیلے بارے اِک دُوجے تے شک کرن دی بجائے گھر دی آمدنی تے خرچے بارے مِل کے صلاح مشورہ کرنا چاہیدا اے۔‏

پاک کلام دسدا اے:‏ جے کوئی بندہ اِک بُرج بنانا چاہندا اے تے کیہہ اوہ پہلے بیٹھ کے ایہہ حساب نئیں لائے گا کہ اوہدے کول اوہنوں بناؤن لئی پیسہ ہے یاں نئیں۔ (‏لُوقا 14:‏28‏)‏ ایہہ ضروری اے کہ تُسی مِل کے طے کرو کہ تُسی اپنا پیسہ کیویں خرچ کرو گے۔ (‏عاموس 3:‏3‏)‏ نالے ویکھو کہ توانوں کیہڑیاں چیزاں دی لوڑ اے تے تُسی اپنی حیثیت مطابق کِنّاں خرچہ کر سکدے او۔ (‏امثال 31:‏16‏)‏ جے تواڈے کول پیسہ ہے وے تے ایہدا مطلب ایہہ نئیں کہ ہُن تُسی ایہنوں پانی وانگوں روڑھ دَوو۔ اپنے سِر قرضہ نہ چڑھاؤ سگوں اپنی چادر ویکھ کے پیر پھیلاؤ۔—‏امثال 21:‏5؛‏ 22:‏7‏۔‏

تُسی کیہہ کر سکدے او؟‏

• جے مہینے دے آخر وچ تواڈے کول پیسے بچ جان تے رَل کے فیصلہ کرو کہ تُسی ایہناں دا کیہہ کرو گے۔‏

• جے پیسے گھٹ پے جان تے طے کرو کہ توانوں کیہڑے خرچے گھٹاؤنے چاہیدے نیں۔ مثال لئی باہروں کھانا منگاؤن دی بجائے گھر ای کھانا پکاؤ۔‏

پاک کلام دسدا اے:‏ صرف یہوواہ دیاں نظراں وچ ای نئیں سگوں انساناں دیاں نظراں وچ وی ایمانداری نال چلو۔ (‏2-‏کُرنتھیوں 8:‏21‏)‏ اپنے ساتھی نُوں اپنی آمدنی تے خرچے بارے صاف صاف دسو۔‏

اپنی آمدنی تے خرچے بارے وڈے فیصلے لین توں پہلاں اپنے ساتھی نال صلاح مشورہ ضرور کرو۔ (‏امثال 13:‏10‏)‏ پیسے دھیلے بارے کُھل کے گل بات کرن نال گھر وچ سُکھ چین قائم رہندا اے۔ ایہہ نہ سوچو کہ تواڈی کمائی تے صرف تواڈا ای حق اے سگوں یاد رکھو کہ ایہدے تے تواڈے خاندان دا وی پُورا پُورا حق اے۔—‏1-‏تیمُتھیُس 5:‏8‏۔‏

تُسی کیہہ کر سکدے او؟‏

• مِل کے اِک رقم طے کرو جیہڑی تُسی اِک دُوجے توں پچھے بغیر خرچ کر سکدے او۔‏

• ایس توں پہلے کہ پیسے دی وجہ توں تواڈے چ کوئی جھگڑا ہو جائے، چنگا ہوئے گا کہ تُسی خرچیاں بارے آپس وچ صلاح مشورہ کر لوَو۔‏