ساڈی ہر عبادت‌گاہ وچ پاک خدا یہوواہ دی عبادت کیتی جاندی اے۔‏ ایس لئی ایہنوں صاف ستھرا،‏ سوہنا تے چنگی حالت وچ رکھنا ساڈے لئی بڑے مان دی گل اے۔‏ نالے ایہہ ساڈی عبادت دا اِک ضروری حصہ اے۔‏ ایس کم وچ ہر کوئی ہتھ ونڈا سکدا اے۔‏

اَسی عبادت توں بعد صفائی دے کم وچ حصہ لینے آں۔‏ ہر عبادت توں بعد بھین بھرا خوشی خوشی عبادت‌گاہ دی صفائی کردے نیں۔‏ ایہدے علاوہ ہفتے وچ اِک واری ایہدی چنگی طرحاں صفائی کیتی جاندی اے۔‏ صفائی دے کم دی نگرانی کرن والا بزرگ یاں خادم اِک فہرست توں ویکھدا اے کہ کیہڑے کیہڑے کم کرن دی لوڑ اے۔‏ بھین بھرا لوڑ مطابق جھاڑو ٹاکی لاؤندے،‏ جھاڑ پوچ کردے،‏ کُرسیاں سدھیاں کردے،‏ لیٹریناں،‏ کھڑکیاں تے شیشے صاف کردے نیں۔‏ اوہ کوُڑا سُٹ دے تے عبادت‌گاہ دے آلے دوالے صفائی کرن وچ وی مدد کردے نیں۔‏ سال وچ اِک واری پُوری عبادت‌گاہ دی مکمل طور تے صفائی وی کیتی جاندی اے۔‏ جے اَسی صفائی دے کم وچ اپنے بچیاں نُوں وی شامل کرنے آں تے اَسی اوہناں نُوں سکھاؤنے آں کہ سانوں اپنی عبادت‌گاہ دی دلوں قدر کرنی چاہیدی اے۔‏—‏واعظ 5:‏1‏۔‏

اَسی عبادت‌گاہ دی مرمت دے کم وچ ہتھ ونڈاؤنے آں۔‏ ہر سال عبادت‌گاہ دی چنگی طرحاں جانچ پڑتال کیتی جاندی اے۔‏ ایہدے وچ ویکھیا جاندا اے کہ کتھے کتھے مرمت دی لوڑ اے تاکہ عبادت‌گاہ چنگی حالت وچ رہوے۔‏ ایس طرحاں اَسی فالتو خرچیاں توں وی بچنے آں۔‏ (‏2-‏تواریخ 24:‏13؛‏ 34:‏10‏)‏ بےشک خدا دی شان مطابق عبادت کرن لئی ضروری اے کہ ساڈی عبادت‌گاہ صاف ستھری تے چنگی حالت وچ ہووے۔‏ عبادت‌گاہ دی سانبھ سنبھال وچ حصہ لے کے اَسی ظاہر کرنے آں کہ ساڈے دلاں وچ یہوواہ خدا تے اوہدے گھر لئی بڑی قدر اے۔‏ (‏زبور 122:‏1‏)‏ نالے ایس گل دا دُوجے لوکاں تے وی چنگا اثر پیندا اے۔‏—‏2-‏کُرنتھیوں 6:‏3‏۔‏

• عبادت‌گاہ نُوں صاف ستھرا رکھنا کیوں ضروری اے؟‏

• عبادت‌گاہ دی سانبھ سنبھال لئی کیہڑے انتظام کیتے جاندے نیں؟‏