دُنیابھر چ ہون والے ساڈے کم دے خرچے اوہناں عطیات دے ذریعے پورے ہوندے نیں جیہڑے یہوواہ دے گواہ خوشی نال دیندے نیں۔‏ a ساڈیاں عبادتاں تے چندہ نئیں لیا جاندا۔ (‏متی 10:‏7، 8‏)‏ ایہدی بجائے ساڈیاں عبادت‌گاہواں چ عطیات دے ڈبے رکھے ہوندے نیں جنہاں چ لوک اپنی مرضی نال عطیات پا سکدے نیں۔ (‏2-‏کُرنتھیوں 9:‏7‏)‏ عطیات دین دے دُوجے طریقیاں بارے ساڈی ویب‌سائٹ تے اِک لسٹ دِتی گئی اے۔ تُسی اوس لسٹ وچوں کوئی وی طریقہ استمال کر کے دُنیابھر چ ہون والے ساڈے کم لئی یاں فیر مقامی کلیسیا دے خرچے لئی عطیات دے سکدے او۔‏

 اَسی لوکاں کولوں دہ‌یکی (‏مال دا دسواں حصہ)‏ نئیں لیندے تے نہ ای ساڈیاں عبادتاں تے ایس گل دا اعلان نئیں کیتا جاندا اے کہ کیس بندے نے کِنّے عطیات دِتے نیں۔—‏متی 6:‏2-‏4‏۔‏

ساڈی تنظیم دے خرچے ایس لئی پورے ہو جاندے نیں کیونکہ ساڈے کلیسیا دے پیشوا بغیر کسے تنخواہ دے خدمت کردے نیں۔ نالے مُنادی کرن والے دُوجے بھین بھرا وی ایہہ خدمت پیسے لئے بغیر کردے نیں۔ ایہدے علاوہ ساڈیاں عبادت‌گاہواں وی ساڈیاں اپنیاں ہوندیاں نیں۔‏

 اَسی عطیات نُوں کیویں استمال کرنے آں؟ اَسی عطیات نُوں مشنریاں تے سفری نگہباناں دے اوہناں خرچیاں نُوں پورا کرن لئی استمال کرنے آں جیہڑے اوہناں دے فرق فرق علاقیاں چ خدمت کرن دے دوران ہوندے نیں۔ ایہدے علاوہ قدرتی آفتاں توں متاثر ہون والے بھین بھراواں دی مدد کرن لئی استمال کرنے آں۔ ایہہ عطیات بائبل تے دُوجیاں کتاباں تے رسالے چھاپن لئی تے اوہناں نُوں پوری دُنیا چ پونچان لئی وی استمال ہوندے نیں۔ عطیات دے ذریعے اَسی اپنیاں عبادت‌گاہواں وی بنانے آں۔‏

 ہر کلیسیا چ جمع ہون والے عطیات دے حساب کتاب دی رپورٹ کلیسیا چ باقاعدگی نال دِتی جاندی اے تاکہ سب نُوں پتہ ہووے کہ عطیات کیویں استمال ہو رہے نیں۔—‏2-‏کُرنتھیوں 8:‏20، 21‏۔‏