یہوواہ دے گواہ سالگرہ ایس لئی نئیں مناندے کیونکہ ایہہ خدا نُوں پسند نئیں اے۔ ایہہ سچ اے کہ بائبل چ سالگرہ منان توں واضح طور تے منع نئیں کیتا گیا پر ایہدے چ کجھ ایہو جہیاں گلاں دَسیاں گئیاں نیں جنہاں توں پتہ چلدا اے کہ سالگرہ منان بارے خدا دی سوچ کیہہ اے۔ ایہناں وچوں چار گلاں تے غور کرو۔‏

1.   سالگرہ منان دِیاں رسماں دا تعلق جادوگری نال اے۔‏ اِک لغت چ سالگرہ دی شروعات بارے دَسیا گیا اے کہ پرانے زمانے چ لوک من دے سن کہ اِک بندے دی سالگرہ تے بدروحواں اوہدے اُتے حملہ کر دِیاں نیں۔ پر جے اوہدے دوست تے رشتے‌دار اوس دن اوہنوں مِلن آن گے تے اوہنوں دُعاواں دین گے تے اوہ بدروحواں دے حملے توں بچ جائے گا۔ سالگرہ دے بارے اِک کتاب چ دَسیا گیا اے کہ پرانے زمانے چ لوک بچے دی پیدائش دی تریخ لکھ لیندے سن تاکہ نجومی اوہدا زائچہ یاں کُنڈلی تیار کر سکن۔ کتاب چ ایہہ وی دَسیا گیا اے کہ کجھ لوکاں دا مننا اے کہ سالگرہ دی موم‌بتیاں چ اِک خاص قسم دا جادو ہوندا اے جدے ذریعے خواہشاں پوریاں ہوندیاں نیں۔‏

    بائبل چ جادو ٹونے، شگون یاں فال کڈھن تے بدروحواں نال تعلق رکھن والے کماں توں صاف صاف منع کیتا گیا اے۔ (‏اِستثنا 18:‏14؛‏ گلتیوں 5:‏19-‏21‏)‏ پرانے شہر بابل نُوں خدا نے ایسے وجہ توں سزا دِتی سی کیونکہ اوتھوں دے لوک ایہو جہے ای کم کردے سن۔ (‏یسعیاہ 47:‏11-‏15‏)‏ یہوواہ دے گواہ ہر رواج دے خلاف نئیں پر جے کسے گل بارے بائبل چ واضح ہدیت دِتی گئی اے تے اَسی اوہنوں نظرانداز نئیں کردے۔‏

2.   یسوع مسیح دے پیروکار سالگرہ نئیں مناندے سن۔ دی ورلڈ بک انسائیکلوپیڈیا چ دَسیا گیا اے کہ ”‏پہلی صدی دے مسیحی من دے سن کہ سالگرہ منان دی رسم بُت‌پرست قوماں نے شروع کیتی اے۔“‏ بائبل توں پتہ چلدا اے کہ رسولاں تے پہلی صدی دے کجھ مسیحیاں نے یسوع کولوں تلیم پائی سی۔ تے اوس تلیم دے مطابق اوہناں نے اِک مثال قائم کیتی جدے تے باقی مسیحیاں نُوں وی عمل کرنا چاہی دا اے۔—‏2-‏تھسلُنیکیوں 3:‏6‏۔‏

3.   بائبل چ کسے سالگرہ دا نئیں سگوں مسیح دی موت دی یادگیری منان دا حکم دِتا گیا اے۔‏ (‏لُوقا 22:‏17-‏20‏)‏ ایہہ حیرانی دی گل نئیں کیونکہ بائبل چ لکھیا اے کہ مرن دا دن پیدا ہون دے دن نالوں بہتر اے۔ (‏واعظ 7:‏1‏)‏ یسوع مسیح نے زمین تے اپنی زندگی دے دوران خدا دی مرضی نُوں پورا کیتا تے اوہ اپنی موت تک اوہدا وفادار رہیا۔ ایسے لئی اوہدی موت دا دن اوہدی پیدائش دے دن نالوں بہتر اے۔—‏عبرانیوں 1:‏4‏۔‏

4.   بائبل چ کِتے وی ایہہ ذکر نئیں مِلدا کہ خدا دے کسے بندے نے سالگرہ منائی ہووے۔‏ بائبل چ سالگرہ منان دے صرف دو موقعیاں دا ذکر مِلدا اے تے جنہاں نے سالگرہ منائی سی اوہ دونویں ای خدا دی عبادت نئیں کردے سن۔ ایس گل توں پتہ چلدا اے کہ سالگرہ صرف بُت‌پرست لوک مناندے سن۔—‏پیدایش 40:‏20-‏22؛‏ مرقس 6:‏21-‏29‏۔‏

 ہر چنگے ماں پیو وانگوں یہوواہ دے گواہ وی اپنے بچیاں لئی پیار وکھاندے نیں۔ پر اوہ سال دے صرف اِک دن تے ای نئیں سگوں پورا سال فرق فرق موقعیاں تے اپنے بچیاں نُوں تحفے دیندے تے اوہناں نال مِل کے پارٹی کردے نیں۔ اوہ خدا دی مثال اُتے عمل کرن دی پوری کوشش کردے نیں جیہڑا اپنے بچیاں نُوں چنگیاں چیزاں دیندا اے۔ (‏متی 7:‏11‏)‏ یہوواہ دے گواہواں دے بچے سالگرہ نہ منان دی وجہ توں دُکھی نئیں ہوندے۔ ویکھو کہ ایس بارے یہوواہ دے گواہواں دے کجھ بچیاں نے کیہہ کہیا،‏

•   ”‏جیہڑا تحفہ اچانک ملےِ اوہدا مزہ ای کجھ ہور ہوندا اے۔“‏—‏ٹیمی، عمر 12 سال۔‏

•   ”‏بھانویں کہ مینوں اپنی سالگرہ تے تحفے نئیں مِلدے پر میرے ماں پیو مینوں کئی ہور موقعیاں تے تحفے دیندے رہندے نیں۔ مینوں ایہو جہے سرپرائز بڑے چنگے لگدے نیں۔“‏—‏گریگری، عمر 11 سال۔‏

•   ”‏تُسی کیک کٹن تے گانا گان نُوں پارٹی کہندے او؟ میرے گھر آؤ تے توانوں پتہ لگے گا کہ اصل پارٹی کہندے کنہوں نیں۔“‏—‏ایرک، عمر 6 سال۔‏