یہوواہ دے گواہ قومی تقریباں چ حصہ کیوں نئیں لیندے؟
اَسی یہوواہ دے گواہ حکومتاں تے قومی نشاناں دا احترام کرنے آں۔ اَسی جاننے آں کہ لوک جھنڈے نُوں سلامی دیندے نیں، قومی ترانہ گاندے نیں تے دُوجیاں قومی تقریباں چ حصہ لیندے نیں۔
پر اَسی ایہناں چ حصہ نئیں لیندے کیونکہ اَسی مننے آں کہ ایہہ کم بائبل دی تلیم دے خلاف نیں۔ اَسی دُوجیاں دے فیصلیاں دا احترام کرنے آں۔ ایسے طرحاں جدوں دُوجے ساڈے فیصلیاں دا احترام کردے نیں تے سانوں بوہت چنگا لگدا اے۔
ایس مضمون چ ویکھو:
ایس معاملے تے بائبل دے کیہڑے اصول لاگو ہوندے نیں؟
بائبل دے ایہناں دو اصولاں دی وجہ توں اَسی قومی تقریباں چ حصہ نئیں لیندے:
عبادت دا حقدار صرف خدا اے۔ بائبل چ ایہہ حکم دِتا گیا اے: صرف یہوواہ اپنے خدا دی پرستش کرو تے صرف اوہدی عبادت کرو۔ (لُوقا 4:8) ملک نال وفاداری دی قسم تے قومی ترانے چ ایہو جہیاں گلاں شامل ہوندیاں نیں جنہاں توں ظاہر ہوندا اے کہ اِک بندہ ایہہ وعدہ کر رہیا اے کہ اوہ کسے وی چیز توں زیادہ اپنے ملک نال پیار کرے گا۔ ایس لئی یہوواہ دے گواہ ہوندے ہوئے اَسی مننے آں کہ ایہناں کماں چ حصہ لینا غلط اے۔
ایہدے نال نال اَسی ایہہ وی مننے آں کہ جھنڈے نُوں سلامی دینا بُتپرستی دے برابر اے جدے توں بائبل چ منع کیتا گیا اے۔ (1-کُرنتھیوں 10:14) کجھ عالم ایہہ تسلیم کردے نیں کہ قومی جھنڈے اصل چ مذہبی نشان ہوندے نیں۔ اِک عالم نے لکھیا: ”قومپرستی مذہب وانگوں اے جدے چ جھنڈے دی اِنج ای عبادت کیتی جاندی اے جِنج ایہہ خدا ہووے۔“ اِک لکھاری نے پہلی صدی دے مسیحیاں بارے ایہہ لکھیا: ”مسیحی رومی شہنشاہ دے اَگے قربانیاں چڑھان توں اِنکار کر دیندے سن۔ ایہہ اِنج ای سی جیویں اَج کوئی بندہ جھنڈے نُوں سلامی دین توں اِنکار کردا اے۔“
بھانویں کہ اَسی جھنڈے نُوں سلامی نئیں دیندے پر اَسی ایہنوں ساڑدے وی نئیں تے نہ ای کسے ہور طریقے نال ایہدی بےعزتی کرنے آں۔
خدا دی نظر چ سارے انسان برابر نیں۔ (اعمال 10:34، 35) بائبل چ دَسیا گیا اے کہ خدا نے اِک آدمی دے ذریعے ساریاں قوماں نُوں پیدا کیتا۔ (اعمال 17:26) ایس لئی اَسی مننے آں کہ کسے اِک قوم یاں نسل دے لوکاں نُوں دُوجیاں توں زیادہ اہمیت دینا غلط اے۔ اَسی سارے لوکاں دی عزت کرنے آں فیر بھانویں اوہناں دا تعلق کسے وی ملک یاں قوم نال ہووے۔—1-پطرس 2:17۔
جدوں قومی تقریباں چ حصہ لینا حکومت وَلّوں ضروری ہووے تے اَسی کیہہ کرنے آں؟
اَسی حکومت دے خلاف نئیں آں سگوں اَسی مننے آں کہ حکومتاں خدا دے اِنتظام دا حصہ نیں ایس لئی اوہ حالے تک قائم نیں۔ (رومیوں 13:1-7) اَسی ایہہ وی مننے آں کہ سانوں حکومتاں دے تابعدار رہنا چاہی دا اے۔—لُوقا 20:25۔
پر اَسی اوہدوں کیہہ کرنے آں جدوں حکومت سانوں کوئی ایہو جیہا کم کرن لئی کہندی اے جیہڑا خدا دے حکماں دے خلاف اے؟ جے ممکن ہوئے تے کدی کدار اَسی حکومت کولوں درخاست کرنے آں کہ اوہ اپنے حکماں چ تھوڑی نرمی کرے۔ جدوں اِنج نئیں ہوندا تے اَسی فیصلہ کرنے آں کہ اَسی انساناں دی بجائے خدا دا کہنا مناں گے۔—اعمال 5:29۔
کیہہ یہوواہ دے گواہ سیاسی معاملیاں چ کسے دی طرفداری کردے نیں؟
نئیں۔ اَسی سیاسی معاملیاں چ کسے دی طرفداری نئیں کردے۔ قومی ترانہ نہ گان یاں قومی تقریباں چ حصہ نہ لین دی وجہ ایہہ نئیں اے کہ اَسی کوئی سیاسی تبدیلی لیانا چاہنے آں سگوں ایہہ وے کہ اَسی بائبل دی تلیم تے عمل کرنا چاہنے آں۔
ایہہ وی ویکھو
اہم تلیم
کیہہ خدا سارے مذہباں نُوں پسند کردا اے؟
لوکاں دا خیال اے کہ سارے ای مذہب خدا وَل کھڑدے نیں۔
ساڈے بارے معلومات
یہوواہ دے گواہواں نُوں مِلن لئی درخاست گھلو
بائبل چوں کسے سوال تے گلبات کرو یاں فیر یہوواہ دے گواہواں بارے ہور جانو۔