اَسی ایہو جہے لوکاں نال تعلق نئیں توڑ دے جنہاں نے اِک گواہ دے طور تے بپتسمہ تے لیا سی پر ہُن اوہناں نے مُنادی کرنا، عبادتاں تے آنا تے اپنے ہم ایماناں نال ملنا جلنا چھڈ دِتا اے۔ سگوں اَسی اوہناں دی مدد کرنے آں تاکہ اوہ خدا دی خدمت کرن لئی اپنے شوق تے جوش نُوں فیر توں ودھا سکن۔‏

 اَسی کلیسیا چوں وی کسے نُوں بلا وجہ نئیں کڈھدے۔ پر جے کوئی بپتسمہ‌یافتہ گواہ بائبل دے اصولاں دے خلاف کم کردا رہندا اے تے اپنے سنگین گُناہ توں توبہ نئیں کردا، اوہنوں کلیسیا چوں کڈھ دِتا جاندا اے تے اوہدے نال اَسی ہر تعلق ختم کر دینے آں۔ بائبل چ صاف صاف کہیا گیا اے کہ بھیڑے بندے نُوں اپنے وچوں کڈھ دَوو۔‏‏—‏1-‏کُرنتھیوں 5:‏13‏۔‏

 پر اوس بندے بارے کیہہ جنہوں کلیسیا چوں کڈھ دِتا گیا اے پر اوہدے بیوی بچے حالے وی یہوواہ دے گواہ نیں؟ اوس بندے دا اپنے گھر والیاں نال مذہبی تعلق ختم ہو جاندا اے پر خونی رشتہ قائم رہندا اے۔ ایہدا اوہدی شادی دے بندھن اُتے تے بچیاں نال اوہدے میل جول اُتے کوئی فرق نئیں پیندا۔‏

 جیس بندے نُوں کلیسیا چوں کڈھیا جاندا اے اوہ عبادتاں تے آ سکدا اے۔ جے اوہ چاہوے تے کلیسیا دے بزرگاں کولوں بائبل چوں مشورہ وی لے سکدا اے۔ ایہدا مقصد ایہہ ہوندا اے کہ اوہ فیر توں یہوواہ دا گواہ بن سکے۔ جیہڑے لوک اپنے بھیڑے کماں نُوں چھڈ دیندے نیں تے ظاہر کردے نیں کہ اوہ فیر توں بائبل دے معیاراں مطابق چلنا چاہندے نیں اوہ دُبارہ توں یہوواہ دے گواہ بن سکدے نیں۔‏