•  یہوواہ دے گواہ ایہہ فیصلہ کیویں کردے نیں کہ اوہناں نُوں کوئی تہوار منانا چاہی دا اے یاں نئیں؟‏

•  یہوواہ دے گواہ کجھ تہوار نئیں مناندے پر کیہہ ایہدا ایہہ مطلب اے کہ اوہ اپنے گھر والیاں نال پیار نئیں کردے؟‏

•  کیہہ یہوواہ دے گواہ دُوجیاں نُوں تہوار منان توں منع کردے نیں؟‏

 یہوواہ دے گواہ ایہہ فیصلہ کرن توں پہلاں کہ اوہ کوئی تہوار منان گے یاں نئیں، بائبل چوں تحقیق کردے نیں۔ کجھ تہوار بائبل اصولاں دے بالکل خلاف نیں تے یہوواہ دے گواہ ایہناں نُوں بالکل نئیں مناندے۔ پر کجھ تہوار ایہو جہے نیں جنہاں بارے ہر گواہ آپ فیصلہ کردا اے کہ اوہ ایہناں نُوں منائے گا یاں نئیں تاکہ خدا تے انساناں دے سامنے اوہدا ضمیر ہمیشاں صاف رہوے۔—‏اعمال 24:‏16‏۔‏

 تھلے کجھ ایہو جہے سوال دِتے گئے نیں جنہاں تے غور کر کے یہوواہ دے گواہ ایہہ فیصلہ کر دے نیں کہ اوہ کوئی تہوار منان گے یاں نئیں۔‏ a

•   کیہہ ایہہ تہوار بائبل دی تلیم دے خلاف اے؟‏

   بائبل دا اصول:‏ یہوواہ نے کہیا کہ اوہناں وچوں نکل آؤ تے اوہناں توں علیٰحدہ ہو جاؤ تے ناپاک چیز نُوں ہتھ نہ لاؤ۔—‏2-‏کُرنتھیوں 6:‏15-‏17‏۔‏

   اپنے آپ نُوں ناپاک چیزاں تے اوس تلیم توں علیٰحدہ کرن لئی جیہڑی بائبل دے اصولاں دے خلاف اے، یہوواہ دے گواہ اوہناں تہواراں نُوں نئیں مناندے جنہاں چ تھلے دَسیاں گئیاں گلاں پائیاں جاندیاں نیں۔‏

   اوہ تہوار جنہاں دی بنیاد جھوٹھے دیوتاواں دی عبادت اے۔‏ یسوع نے کہیا:‏”‏ تُوں صرف یہوواہ اپنے خدا دی عبادت کر تے صرف اوہدی خدمت کر۔“‏ (‏متی 4:‏10‏)‏ ایس نصیحت تے عمل کردے ہوئیاں یہوواہ دے گواہ کرسمس، ایسٹر تے یکم مئی دا دن نئیں مناندے کیونکہ ایہناں تہواراں دا تعلق یہوواہ دی بجائے جھوٹھے دیوتاواں دی عبادت نال اے۔ ایہدے علاوہ اوہ تھلے دَسے گئے تہواراں نُوں وی نئیں مناندے۔‏

  •  کوانزا۔‏ ایہہ ناں جیس سواحلی لفظ توں لیا گیا اے، اوہدا مطلب اے ”‏پہلا پھل“‏ تے ایہہ تہوار اوس جشن وَل اشارہ کردا اے جیہڑا پہلی فصل دی واڈھی دے موقعے تے افریقہ چ منایا جاندا سی۔ ‏(‏انسائیکلوپیڈیا آف بلیک سٹڈیز)‏ بھانویں کہ کجھ لوک سوچدے نیں کہ کوانزا مذہبی تہوار نئیں اے پر انسائیکلوپیڈیا آف افریقن ریلیجن دے مطابق ایہہ اوس افریقی تہوار نال مِلدا جلدُا اے جدے چ لوک پہلے پھلاں دا نذرانہ دے کے دُوجے خداواں تے اپنے پیو دادیاں دِیاں روحواں دا شکریہ ادا کردے نیں جنہاں دی وجہ توں اوہناں نُوں زندگی ملی اے۔ کوانزا تہوار ایسے بنیاد تے منایا جاندا اے۔‏

  •  خزاں دا تہوار۔‏ ایہہ تہوار چن دی دیوی دی تعظیم کرن لئی منایا جاندا اے۔ ‏(‏ہالی‌ڈیز،‏ فیسٹیولز اینڈ سیلیبریشنز آف دی ورلڈ ڈکشنری)‏ ایس تہوار دے دوران گھر دِیاں عورتاں ایس دیوی اَگے سجدہ کردیاں نیں۔‏‏—‏ریلیجنز آف دا ورلڈ—‏اے کمپری‌ہینسو انسائیکلوپیڈیا آف بیلیفس اینڈ پریکٹسز۔‏

  •  نوروز۔‏ ایس تہوار دی بنیاد زرتشتی مذہب اے تے ایہہ دن پرانے زرتشتی کیلنڈر دے مُقدس دِناں وچوں اِک اے۔ زرتشتی لوک ایہہ تہوار دوپہر دے ویلے مناندے نیں۔ اوہ من دے نیں کہ ٹھنڈ دے موسم نے گرمیاں دے موسم نُوں لکا دِتا سی۔ ایس لئی جدوں گرمیاں واپس آندیاں نیں تے زرتشتی لوک ایہہ تہوار مناندے نیں۔—‏اقوامِ‌متحدہ دی تلیمی، سائنسی تے ثقافتی تنظیم۔‏

  •  شبِ‌یلدہ۔‏ کتاب ‏”‏صوفی‌ازم اِن دی سیکریٹ ہسٹری آف پرشیا“‏ دے مطابق ایس تہوار دا تعلق روشنی دے دیوتا، متھرِا دی عبادت نال اے تے ایہہ دسمبر دے مہینے چ اوس دن منایا جاندا اے جدوں سال دا سب توں چھوٹا دن تے سب توں لمی رات ہوندی اے۔ ایہہ وی کہیا جاندا اے کہ ایس تہوار دا تعلق رومی تے یونانی سورج دیوتاواں دی عبادت نال اے۔‏ b

  •  شکرگزاری دا دن۔‏ کوانزا دے تہوار وانگوں، ایس تہوار دی بنیاد وی فصل دی واڈھی دا جشن اے جیہڑا فرق فرق دیوتاواں دی تعظیم لئی منایا جاندا اے۔ وقت دے نال نال چرچاں نے وی ایس تہوار نُوں اپنا لیا۔‏‏—‏اے گریٹ اینڈ گاڈلی ایڈونچر—‏دی پلگرمز اینڈ دی مِتھ آف دی فرسٹ تھینکس‌گیوِنگ۔‏

   اوہ تہوار جنہاں دی بنیاد قسمت تے یقین یاں توہم‌پرستی اے۔‏ بائبل چ لکھیا اے کہ اوہ لوک جیہڑے چنگی قسمت دے دیوتا لئی میز سجاندے نیں، اوہ یہوواہ نُوں ترک کردے نیں۔ (‏یسعیاہ 65:‏11‏)‏ ایس لئی یہوواہ دے گواہ تھلے دَسے گئے تہوار نئیں مناندے۔‏

  •  اِیوان کُپالا۔‏ کتاب ‏”‏دی اے ٹُو زی آف بیلارُس“‏ چ لکھیا اے:‏ ایہہ منیا جاندا اے کہ ایس تہوار والے دن قدرت کول بوہت ساریاں جادو بھریاں طاقتاں ہوندیاں نیں تے جے کوئی بندہ دلیر تے خوش‌قسمت اے تے اوہ ایہہ طاقتاں حاصل کر سکدا اے۔ اصل چ ایس تہوار دی شروعات بُت‌پرست لوکاں توں ہوئی تے ایہنوں جون دے مہینے چ اوس دن منایا جاندا سی جدوں سال دا سب توں وڈا دن تے سب توں چھوٹی رات ہوندی سی۔ انسائیکلوپیڈیا آف کنٹیمپریری رشئین کلچر چ دَسیا گیا اے کہ جدوں کجھ بُت‌پرست لوکاں نے مسیحی مذہب اپنایا تے اوہناں نے ایس تہوار نُوں یوحنا بپتسمہ دین والے دے دن نال جوڑ دِتا تے اِنج ایہنوں وی اِک مذہبی تہوار بنا دِتا۔‏

  •  چینی نواں سال تے کوریائی نواں سال۔‏ ایس موقعے تے گھر دے جیاں، دوستاں تے رشتے‌داراں دی کوشش ہوندی اے کہ اوہ ایہو جہے کم کرن جنہاں دی وجہ توں اوہناں دا سارا سال چنگا لنگھے۔ ایہدے لئی اوہ اپنے خداواں تے روحواں دی تعظیم کردے نیں تے اِک دُوجے نُوں دُعا دیندے نیں کہ آن والا سال اوہناں لئی چنگا وقت لیائے۔ ‏(‏مُون‌کیکس اینڈ ہنگری گھوسٹس—‏فیسٹیولز آف چائنہ)‏ ایسے طرحاں کوریا دے نویں سال تے وی لوک اپنے مرے ہوئے پیو دادیاں دی عبادت کردے نیں، بدروحواں نُوں دُور کرن تے چنگی قسمت پان لئی رسماں کردے نیں نالے نویں سال لئی اپنی قسمت دا حال جانن دی کوشش کردے نیں۔‏‏—‏انسائیکلوپیڈیا آف نیو ایئرز ہالی‌ڈیز ورلڈوائڈ۔‏

   اوہ تہوار جنہاں دی بنیاد غیرفانی روح دا نظریہ اے۔‏ بائبل چ صاف صاف دَسیا گیا اے کہ انسان دا وجود بالکل ختم ہو جاندا اے۔ (‏حِزقی‌ایل 18:‏4‏)‏ ایسے لئی یہوواہ دے گواہ اوہ تہوار نئیں مناندے جنہاں چ ایس نظریے دی حمایت کیتی جاندی اے کہ مرن توں بعد انسان دی روح زندہ رہندی اے۔ ایہناں وچوں کجھ تہوار ایہہ نیں:‏

  •  مُردیاں دی عید۔‏ نیو کیتھولک انسائیکلوپیڈیا دے مطابق ایس دن تے مرے ہوئے لوکاں دی یاد منائی جاندی اے۔ 500 توں 1500 عیسوی دے دوران ایہہ منیا جاندا سی کہ مرے ہوئے لوکاں دِیاں روحواں بھوت، چڑیلاں تے مینڈکاں دی شکل چ اوہناں لوکاں نُوں نظر آندیاں نیں جنہاں نے اوہناں دی زندگی چ اوہناں نال بھیڑا سلوک کیتا سی۔‏

  •  کِنگ مِنگ فیسٹیول تے ہنگری گھوسٹ فیسٹول۔‏ ایہہ دو تہوار مرے ہوئے پیو دادیاں دی تعظیم کرن لئی منائے جاندے نیں۔ کتاب سیلیبریٹنگ لائف کسٹمز اراؤنڈ دی ورلڈ—‏فرام بے‌بی شاورز ٹو فیونرلز دے مطابق کِنگ مِنگ دے دوران کھان پین دِیاں شیواں تے پیسیاں نُوں ساڑیا جاندا اے تاکہ مُردے بُھکھے پیاسے نہ رہن تے نہ ای پیسے دی تھوڑ ہووے۔ کتاب چ ایہہ وی دَسیا گیا اے کہ ہنگری گھوسٹ دے مہینے دے دوران، خاص کر پورے چن دی رات نُوں مرے ہوئے لوکاں تے زندہ لوکاں وچ کسے وی ہور رات دی نسبت زیادہ رابطہ ہوندا اے۔ایس لئی مرے ہوئے پیو دادیاں دی تعظیم دے نال نال ایہہ وی ضروری اے کہ دُوجے مُردیاں دی ناراضگی توں وی بچیا جائے۔‏

  •  چُوسوک۔‏ دی کورین ٹریڈیشن آف ریلیجن،‏ سوسائٹی اینڈ ایتھکس دے مطابق ایس تہوار تے مرے ہوئے لوکاں دِیاں روحواں نُوں کھانا تے مے دِتی جاندی اے۔ ایہدے توں پتہ چلدا اے کہ ایہنوں منان والے ایس گل تے یقین رکھدے نیں کہ مرن توں بعد وی انسان دی روح زندہ رہندی اے۔‏

   اوہ تہوار جنہاں دا تعلق جادو ٹونے نال اے۔‏ بائبل چ لکھیا اے:‏ تواڈے وچوں جیہڑا وی فال کڈھدا، جادو ٹونا کردا، شگون کڈھدا، منتر پڑھدا، روحواں نال رابطہ کردا، قسمت دا حال دَسدا یاں مرے ہوئے لوکاں نال گل کردا اے، یہوواہ اوہدے توں سخت نفرت کردا اے۔ (‏اِستثنا 18:‏10-‏12‏)‏ یہوواہ دے گواہ ہر طرحاں دے جادو ٹونے توں دُور رہندے نیں جدے چ قسمت دا حال جاننا وی شامل اے۔ ایس لئی اوہ ہیلووین یاں تھلے دَسے گئے تہوار نئیں مناندے:‏

  •  سنہالا تے تامل نواں سال۔‏ ایس تہوار نال تعلق رکھن والیاں رسماں چ کسے خاص وقت تے کجھ ایہو جہے کم کرنا شامل اے جنہاں چ ستاریاں دے علم دے ذریعے قسمت دا حال معلوم کیتا جاندا اے۔—‏انسائیکلوپیڈیا آف سری‌لنکا۔‏

  •  سونگ‌کرن۔‏ ایشیا چ منائے جان والے ایس تہوار دا ناں سنسکرت زبان دے جیس لفظ توں لیا گیا اے، اوہدا مطلب اے تبدیل ہونا۔ ایس تہوار نُوں اوہدوں منایا جاندا اے جدوں سورج بُرج حمل (‏ایہہ ستاریاں دے اِک جُھرمٹ دا ناں اے)‏ چوں لنگھدا اے۔‏‏—‏فوڈ،‏ فیسٹس اینڈ فیتھ—‏این انسائیکلوپیڈیا آف فوڈ کلچر اِن ورلڈ ریلیجنز۔‏

   اوہ تہوار جنہاں دا موسیٰ دی شریعت چ ذکر اے پر یسوع دی قربانی نال اوہ ختم ہو گئے۔‏ بائبل چ دَسیا گیا اے کہ مسیح دی موت نال شریعت ختم ہو گئی سی۔ (‏رومیوں 10:‏4‏)‏ مسیحی اَج وی شریعت چ دِتے گئے اصولاں توں فائدہ حاصل کردے نیں پر اوہ ایہدے چ لکھے تہواراں نُوں نئیں مناندے خاص کر اوہ تہوار جیہڑے مسیح دے آن وَل اشارہ کردے نیں کیونکہ اَسی مننے آں کہ مسیح آ چُکیا اے۔ بائبل چ لکھیا اے کہ ایہہ چیزاں آن والیاں چیزاں دا پرچھانواں اے پر اصلیت مسیح اے۔ (‏کُلسّیوں 2:‏17‏)‏ ایہناں تہواراں دِیاں کجھ رسماں بائبل دے مطابق نئیں نالے ایہناں دا مقصد وی پورا ہو گیا اے۔ ایہناں گلاں نُوں ذہن چ رکھدے ہوئیاں یہوواہ دے گواہ تھلے دَسے گئے تہوار نئیں مناندے:‏

  •  حنوکہ۔‏ ایہہ تہوار اوس واقعے دی یاد چ منایا جاندا اے جدوں یروشلیم چ یہودیاں دی ہیکل نُوں فیر توں مخصوص کیتا گیا۔ پر بائبل چ دَسیا گیا اے کہ یسوع مسیح وڈا کاہن بن گیا اے تے اوہ اوس خیمے چ داخل ہو گیا اے جیہڑا بوہتا عظیم تے کامل اے تے جنہوں انسانی ہتھاں نال نئیں بنایا گیا یعنی اوہ زمین دا حصہ نئیں اے۔ (‏عبرانیوں 9:‏11‏)‏ سچے مسیحی ایہہ من دے نیں کہ ایس روحانی ہیکل نے یروشلیم چ موجود ہیکل دی جگہ لے لئی اے۔‏

  •  روش ہشانہ۔‏ ایہہ یہودیاں دے نویں سال دا پہلا دن ہوندا اے۔ پرانے وقتاں چ، ایس موقعے تے خدا دے حضور قربانیاں چڑھائیاں جاندیاں سن۔ (‏گنتی 29:‏1-‏6‏)‏ پر یسوع مسیح نے اپنی جان دے کے قربانی تے چڑھاوے نُوں ختم کر دِتا نالے خدا دی نظر چ وی ایہناں چیزاں دی اہمیت ختم ہو گئی۔—‏دانی‌ایل 9:‏26، 27‏۔‏

•   کیہہ ایہہ تہوار فرق فرق مذہباں نال مل کے عبادت کرن دی ہلاشیری دیندا اے؟‏

   بائبل دا اصول:‏ ایمان والیاں تے غیر ایمان والیاں دا آپس چ کیہہ تعلق؟ تے خدا دی ہیکل دا بُتاں نال کیہہ تعلق؟—‏2-‏کُرنتھیوں 6:‏15-‏17‏۔‏

   یہوواہ دے گواہ اپنے گوانڈھیاں نال امن تے صلح نال رہندے نیں تے ایس گل دا احترام کردے نیں کہ ہر بندے نُوں اپنا مذہب چُنن دا حق اے۔ پر اوہ دُوجے مذہباں دے لوکاں نال مل کے اوہناں دے تہوار نئیں مناندے۔ ایہدیاں کجھ مثالاں ایہہ نیں:‏

   ایہو جہے تہوار جیہڑے فرق فرق مذہباں دے لوک مل کے مناندے نیں۔‏ جدوں خدا اِسرائیلیاں نُوں نویں ملک چ لے کے گیا جتھے دُوجے مذہباں دے لوک وی رہندے سن تے اوہنے اوہناں نُوں کہیا:‏ تُوں اوہناں نال یاں اوہناں دے خداواں نال کوئی عہد نہ کرِیں کیونکہ جے تُوں اوہناں دے خداواں دی عبادت کریں گا تے ایہہ تیرے لئی ضرور اِک پھندا ہوئے گا۔ (‏خروج 23:‏32، 33‏)‏ ایس لئی یہوواہ دے گواہ تھلے دَسے گئے تہوار نئیں مناندے:‏

  •  لوئے کروتھونگ۔‏ تھائی‌لینڈ چ رہن والے لوک ایس تہوار دے دوران پتے دِیاں کٹوریاں بنا کے اوہناں چ موم‌بتیاں یاں اگر بتیاں رکھدے نیں تے اوہناں نُوں پانی چ چھڈ دیندے نیں۔ اوہ سوچدے نیں کہ ایس طرحاں اوہناں دی بھیڑی قسمت اوہناں توں دُور چلی جاندی اے۔ اصل چ ایہہ تہوار بدُھا دی یاد چ منایا جاندا اے۔‏‏—‏انسائیکلوپیڈیا آف بدھ‌اِزم۔‏

  •  قومی توبہ دا دن۔‏ پاپوا نیو گنی دے اِک اخبار ‏”‏دی نیشنل“‏ دے مطابق اِک سرکاری افسر نے کہیا کہ ایس تہوار نُوں منان والے لوک مسیحی عقیدیاں نُوں من دے نیں۔ اوہنے ایہہ وی کہیا کہ ایس دن نُوں منان نال پوری قوم نُوں مسیحی اصولاں تے عمل کرن دی ہلاشیری مِلدی اے۔‏

  •  ویساکھ۔‏ ایہہ بدھ‌مت نُوں منن والے لوکاں دا سب توں خاص تے وڈا تہوار اے۔ ایس موقعے تے لوک بدھا دی پیدائش، اوہدی روشن خیالی تے اوہدی موت یاں اوہنوں نروانا مِلن دی خوشی مناندے نیں۔—‏ہالی‌ڈیز،‏ فیسٹیولز اینڈ سیلیبریشنز آف دی ورلڈ ڈکشنری۔‏

   اوہ تہوار جنہاں دی بنیاد اوہ مذہبی رویتاں نیں جیہڑیاں بائبل دے خلاف نیں۔‏ یسوع نے مذہبی رہنماواں نُوں کہیا:‏ ”‏تُسی اپنیاں رویتاں دی خاطر خدا دے کلام نُوں ردّ کر دِتا اے۔“‏ اوہنے ایہہ وی کہیا کہ اوہناں دی عبادت فضول اے کیونکہ اوہ ”‏انساناں دِیاں رویتاں دی تلیم دیندے نیں۔“‏ (‏متی 15:‏6،‏ 9‏)‏ یہوواہ دے گواہ یسوع دی ایس گل دے مطابق بوہت سارے تہوار نئیں مناندے۔‏

  •  ایپی‌فینی ‏(‏تِن بادشاہواں دا دن تے تمکت)‏۔‏ ایس تہوار تے لوک اوس واقعے نُوں یاد کردے نیں جدوں نجومی یسوع نُوں ویکھن آئے یاں فیر جدوں یسوع دا بپتسمہ ہویا۔ ایس تہوار دی بنیاد بُت‌پرست لوکاں دے اوہ تہوار نیں جنہاں چ اوہ بہار دے موسم چ دریا تے ندی دے خداواں دی وڈیائی کردے سن۔ ‏(‏دی کرسمس انسائیکلوپیڈیا)‏ تمکت ناں دے تہوار دِیاں جڑاں وی انسانی رویتاں نیں۔‏‏—‏انسائیکلوپیڈیا آف سوسائٹی اینڈ کلچر اِن دی اینشئنٹ ورلڈ۔‏

  •  کنواری مریم دے اسمان تے جان دی عید۔‏ ایس تہوار دے مطابق لوک من دے نیں کہ یسوع دی ماں مریم زندہ اسمان تے چلی گئی سی۔ ریلیجن اینڈ سوسائٹی—‏انسائیکلوپیڈیا آف فنڈامینٹل‌اِزم دے مطابق پہلی صدی دے مسیحی ایس عقیدے نُوں نئیں من دے سن تے بائبل چ وی ایہدا کوئی ذکر نئیں مِلدا۔‏

  •  مریم دے گُناہ توں پاک ہون دی عید۔‏ ایس تہوار دے مطابق لوک من دے نیں کہ جدوں مریم حاملہ ہوئی تے اوہ گُناہ توں پاک ہو گئی۔ پر بائبل چ ایہو جہی کوئی تلیم نئیں دِتی گئی سگوں چرچ نے آپ ای ایہہ عقیدہ بنالیا۔‏‏—‏نیو کیتھولک انسائیکلوپیڈیا۔‏

  •  چالی دِناں دا روزہ۔‏ نیو کیتھولک انسائکلوپیڈیا دے مطابق ایہہ تہوار اوس واقعے وَل اشارہ کردا اے جدوں یسوع نے 40 دن تک کجھ وی کھادا پیتا نئیں سی۔ ایہہ تہوار چوتھی صدی چ شروع ہویا جدوں بائبل نُوں مکمل ہوئے 200 توں وی زیادہ سال ہو گئے سن۔ ایس تہوار دے پہلے دن تے راکھ دا بدھ منایا جاندا اے جدے چ پادری لوکاں دے متھے تے راکھ دے نال صلیب دا نشان بناندا اے تے اوہناں نُوں یاد دَواندا اے کہ اوہناں نُوں اپنے گُناہواں توں توبہ کرنی چاہی دی اے۔ گیارھویں صدی چ کیتھولک چرچ نے ایس تہوار نُوں منانا شروع کیتا۔‏

  •  مِسکل۔‏ انسائیکلوپیڈیا آف سوسائٹی اینڈ کلچر اِن دی مڈی‌ایول ورلڈ چ لکھیا اے کہ ایہہ ایتھوپیا دا اِک تہوار اے جنہوں اوس واقعے دی یاد چ منایا جاندا اے جدوں یسوع دی صلیب نُوں لبھیا گیا سی جدے تے اوہنوں ماریا گیا سی۔ ایس موقعے تے لوک لکڑیاں بال کے اوہناں دے آلے دوالے نچ دے نیں۔ پر یہوواہ دے گواہ اپنی عبادت چ صلیب نُوں استمال نئیں کردے۔‏

•   کیہہ ایس تہوار دے دوران کسے انسان، تنظیم یاں قومی نشان دی وڈیائی کیتی جاندی اے؟‏

   بائبل دا اصول:‏ یہوواہ فرماندا اے کہ اوہ بندہ لعنتی اے جیہڑا انساناں تے بھروسا کردا اے تے جیہڑا انسانی طاقت دا سہارا لیندا اے تے جدا دل یہوواہ توں دُور ہو گیا اے۔—‏یرمیاہ 17:‏5‏۔‏

   بھانویں کہ یہوواہ دے گواہ دُوجے انساناں لئی پیار ظاہر کردے نیں، ایتھوں تک کہ اوہناں لئی دُعا وی کردے نیں پر اوہ ایہو جہے تہواراں چ حصہ نئیں لیندے جنہاں بارے تھلے دَسیا گیا اے:‏

   اوہ تہوار جنہاں دے دوران کسے حکمران یاں کسے مشہور بندے دی وڈیائی کیتی جاندی اے۔‏ بائبل چ دَسیا گیا اے کہ تُسی انسان تے بھروسا کرنا چھڈ دَوو جیہڑا اپنیاں ناساں نال ساہ لیندا اے کیونکہ انسان ہے ای کیہہ جیہڑا اوہدے وَل دھیان دِتا جائے؟ (‏یسعیاہ 2:‏22‏)‏ ایس لئی یہوواہ دے گواہ حکمراناں یاں مشہور لوکاں دی سالگرہ وغیرہ نئیں مناندے۔‏

   قومی جھنڈے نُوں سلامی دینا۔‏ یہوواہ دے گواہ جھنڈے نُوں سلامی نئیں دیندے۔ پر کیوں؟ کیونکہ بائبل چ لکھیا اے:‏ ”‏بُتاں توں بچ کے رہوو۔“‏ (‏1-‏یوحنا 5:‏21‏)‏ اَج کل کجھ لوک سمجھدے نیں کہ جھنڈے نُوں سلامی دینا بُت‌پرستی کرنا نئیں اے پر تریخ دان کارلٹن ہائیز نے لکھیا:‏ قوم‌پرستی دی سب توں وڈی علامت اے جھنڈے نُوں سلامی دینا یاں اوہدے اَگے جھکناُ۔‏

   اوہ تہوار جیہڑے مُقدساں دی تعظیم کرن لئی منائے جاندے نیں۔‏ پطرس رسول نے اوہدوں کیہہ کیتا جدوں اِک بندہ سجدہ کرن لئی اوہدے اَگے جھکیاُ؟ بائبل چ لکھیا اے کہ پطرس نے اوہنوں چُکیا تے کہیا کہ اُٹھ، مَیں وی تیرے وانگوں اِک انسان ای آں۔ (‏اعمال 10:‏25، 26‏)‏ ایہدے توں پتہ چلدا اے کہ پطرس یاں کسے ہور رسول نے کدی وی کسے خاص قسم دی تعظیم نُوں قبول نئیں کیتا سی۔ ایس لئی یہوواہ دے گواہ ایہو جہے تہواراں چ حصہ نئیں لیندے جنہاں چ مُقدساں دی تعظیم کیتی جاندی اے۔ ایہناں وچوں کجھ تہوار ایہہ نیں:‏

  •  سارے مُقدساں دا دن۔‏ ایہہ تہوار سارے مُقدساں دی تعظیم چ منایا جاندا اے۔ پر کسے نُوں نئیں پتہ کہ ایس تہوار دی شروعات کیویں ہوئی۔‏‏—‏نیو کیتھولک انسائیکلوپیڈیا۔‏

  •  گواڈالپے دی کنواری مریم دا تہوار۔‏ ایہہ تہوار اوس مُقدس عورت دی تعظیم چ منایا جاندا اے جدے بارے لوکاں دا خیال اے کہ اوہ میکسیکو دی حفاظت کردی اے۔ کجھ لوک من دے نیں کہ ایہہ عورت یسوع دی ماں، مریم اے۔ کہیا جاندا اے کہ 1531 چ اوہ اِک کسان نُوں نظر آئی۔‏‏—‏دی گرین‌وُڈ انسائیکلوپیڈیا آف لاٹینو لٹریچر۔‏

  •  ناں رکھن دا دن۔‏ کتاب سیلیبریٹنگ لائف کسٹمز اراؤنڈ دی ورلڈ—‏فرام بے‌بی شاورز ٹو فیونرلز دے مطابق ایہہ تہوار اوس دن منایا جاندا اے جدوں اِک بچے دا بپتسمہ ہوندا اے یاں فیر جدوں اوہ بعد چ چرچ وچ اپنے ایمان دا اِقرار کردا اے۔ اوس ویلے اوہدا ناں کسے مُقدس بندے دے ناں تے رکھیا جاندا اے۔ اوس دن لوک مذہبی کماں چ ودھ چڑھ کے حصہ لیندے نیں۔‏

   اوہ تہوار جیہڑے سیاسی یاں معاشرتی تحریکاں دی یاد چ منائے جاندے نیں۔‏ پاک کلام چ لکھیا اے کہ یہوواہ تے بھروسا رکھنا انساناں تے بھروسا رکھن نالوں بہتر اے۔ (‏زبور 118:‏8، 9‏)‏ یہوواہ دے گواہ ایس گل تے یقین رکھدے نیں کہ کوئی انسان نئیں سگوں صرف خدا ای ایس دُنیا دے مسئلیاں نُوں حل کر سکدا اے۔ ایس لئی اوہ نوجواناں دا دن‏، غلامی ختم کرن دا دن یاں عورتاں دا دن ورگے دِناں نُوں نئیں مناندے۔ ایہدی بجائے اوہناں دی امید خدا دی بادشاہی تے وے جیہڑی تعصب تے نااِنصافی ورگے مسئلیاں نُوں ختم کرے گی۔—‏ رومیوں 2:‏11؛‏ 8:‏21‏۔‏

•   کیہہ ایہہ تہوار کسے اِک قوم یاں نسل دے لوکاں نُوں دُوجیاں توں بہتر قرار دیندا اے؟‏

   بائبل دا اصول:‏ خدا کسے دی طرف‌داری نئیں کردا سگوں اوہ ہر قوم چوں اوہناں لوکاں نُوں قبول کردا اے جیہڑے اوہدا خوف رکھدے تے چنگے کم کردے نیں۔—‏اعمال 10:‏34، 35‏۔‏

   بھانویں کہ یہوواہ دے گواہ وی اوس ملک نُوں پسند کردے نیں جتھے اوہ جمے پلے نیں پر اوہ ایہو جہے تہواراں توں دُور رہندے نیں جنہاں چ کسے قوم یاں نسل دے لوکاں نُوں دُوجیاں نالوں بہتر سمجھیا جاندا اے۔ ایہناں وچوں کجھ تہواراں بارے تھلے دَسیا گیا اے:‏

   اوہ تہوار جیہڑے فوجیاں نُوں عزت دین لئی منائے جاندے نیں۔‏ جنگاں دی حمایت کرن دی بجائے، یسوع نے اپنے پیروکاراں نُوں کہیا:‏ ”‏اپنے دُشمناں نال پیار کردے رہوو تے جیہڑے توانوں ستاندے نیں، اوہناں لئی دُعا کردے رہوو۔“‏ (‏متی 5:‏44‏)‏ ایس لئی یہوواہ دے گواہ ایہو جہے تہوار نئیں مناندے جنہاں چ فوجیاں دی تعظیم کیتی جاندی اے۔ ایہدیاں کجھ مثالاں ایہہ نیں:‏

  •  انزاک ڈے۔‏ لفظ ‏”‏انزاک“‏ آسٹریلیا تے نیوزی‌لینڈ دِیاں فوجاں لئی استمال ہوندا اے۔ ایہہ دن اوہناں فوجیاں دی یاد چ منایا جاندا اے جیہڑے جنگ دے دوران مارے گئے۔‏‏—‏ہسٹوریکل ڈکشنری آف آسٹریلیا۔‏

  •  پرانے فوجیاں دا دن۔‏ ایہہ دن اوہناں فوجیاں نُوں عزت دین لئی منایا جاندا اے جنہاں نے اپنے ملک لئی جنگاں چ حصہ لیا۔‏‏—‏اِنسائیکلوپیڈیا بریٹینیکا۔‏

   اوہ تہوار جنہاں دا تعلق کسے قوم دی تریخ یاں آزادی نال اے۔‏ یسوع نے اپنے پیروکاراں بارے کہیا:‏ ”‏اوہ دُنیا دے نئیں جیویں مَیں دُنیا دا نئیں۔“‏ (‏یوحنا 17:‏16‏)‏ یہوواہ دے گواہواں نُوں کسے قوم دی تریخ بارے جاننا چنگا لگدا اے پر اوہ ایہو جہے تہواراں توں دُور رہندے نیں جنہاں بارے تھلے دَسیا گیا اے:‏

  •  آسٹریلیا ڈے۔‏ ورلڈ مارک انسائیکلوپیڈیا آف کلچرز اینڈ ڈیلی لائف دے مطابق ایہہ تہوار آسٹریلیا چ اوس دن دی یاد چ منایا جاندا اے جدوں 1788 چ انگریز فوج نے اوتھے اپنے جھنڈے لہرا کے اعلان کیتا کہ ہُن توں آسٹریلیا اِک نوِیں ریاست اے۔‏

  •  گائے فاؤکس ڈے۔‏ ایہہ دن اوس واقعے دی یاد چ منایا جاندا اے جدوں 1605 چ گائے فاؤکس تے اوہدے کیتھولک ساتھیاں نے بادشاہ جیمز اوّل تے اوہدی حکومت دے لوکاں نُوں قتل کرن دی کوشش کیتی پر اوہ ناکام ہو گئے۔‏‏—‏اے ڈکشنری آف اِنگلش فوک‌لور۔‏

  •  یومِ‌آزادی۔‏ بوہت سارے مُلکاں چ، ہر سال اوس دن تے جشن منایا جاندا اے جدوں اوہ ملک آزاد ہویا سی۔‏‏—‏میریم-‏ویبسٹرز اَن‌ایبرجڈ ڈکشنری۔‏

•   کیہہ ایس تہوار تے جنسی بدکاری تے نا مناسب کم کیتے جاندے نیں؟‏

   بائبل دا اصول:‏ کیونکہ تُسی دُنیا دے لوکاں دی مرضی مطابق ٹُرن چ پہلاں جناں وقت گزاریا، اوہ کافی اے۔ اوس ویلے تُسی بے شرم ہو کے غلط کم کردے سو، اپنیاں غلط خواہشاں نُوں قابو چ نئیں رکھدے سو، حدوں ودھ شراب پیندے سو، نا مناسب دعوتاں تے شراب دِیاں محفلاں چ شریک ہوندے سو نالے بُت‌پرستی کردے سو۔—‏1-‏پطرس 4:‏3‏۔‏

   ایس اصول دے مطابق، یہوواہ دے گواہ ایہو جہے تہواراں چ حصہ نئیں لیندے جنہاں چ حدوں ودھ شراب پیتی جاندی اے تے لوک آپے توں باہر ہو جاندے نیں۔ یہوواہ دے گواہواں نُوں اپنے دوستاں نال وقت گزارنا پسند اے تے کدی کدار کجھ گواہ وی حد چ رہ کے شراب پین دا فیصلہ کردے نیں۔ اوہ بائبل دے ایس اصول تے عمل کرن دی پوری کوشش کردے نیں کہ بھانویں تُسی کھاؤ یاں پیو یاں کجھ وی کرو، سب کجھ خدا دی وڈیائی لئی کرو۔—‏1-‏کُرنتھیوں 10:‏31‏۔‏

 ایسے لئی یہوواہ دے گواہ کارنیوال یاں ایہو جہے ہور تہواراں چ حصہ نئیں لیندے جنہاں چ اوہ کم کیتے جاندے نیں جنہاں بارے بائبل چ منع کیتا گیا اے۔ ایہدے چ یہودی تہوار پُوریم وی شامل اے جیہڑا اوس ویلے دی یاد چ منایا جاندا سی جدوں 5ویں صدی قبل‌ازمسیح چ یہودی قتل ہون توں بچ گئے۔ کتاب ‏”‏ایسنشئل جُوڈاِزم“‏ چ دَسیا گیا اے کہ ہُن ایس تہوار نُوں مردی گراس کہیا جاندا اے تے ایس موقعے تے لوک بے ڈھنگے کپڑے پاندے نیں، حدوں ودھ شراب پیندے نیں، لڑائی جھگڑے کردے نیں تے بوہت زیادہ رولا پاندے نیں۔‏

 جی نئیں۔ بائبل سکھاندی اے کہ سانوں گھر دے سارے جیاں نُوں پیار کرنا تے اوہناں دی عزت کرنی چاہی دی اے فیر بھانویں اوہناں دا مذہب ساڈے توں فرق ای کیوں نہ ہووے۔ (‏1-‏پطرس 3:‏1، 2،‏ 7‏)‏ ظاہری جہی گل اے کہ جدوں گھر دا اِک جی کجھ تہوار منانا چھڈ دیندا اے تے شاید اوہدے گھر والے یاں رشتے‌دار مایوس تے دُکھی محسوس کرن۔ ایس لئی بوہت سارے یہوواہ دے گواہ اپنے گھر والیاں نُوں اپنی محبت دا احساس دَوان دی پوری کوشش کردے نیں۔ اوہ بڑے احترام نال اوہناں نُوں اپنے فیصلے دی وجہ دَسدے نیں نالے اوہ دُوجے موقعیاں تے اوہناں نال وقت وی گزاردے نیں۔‏

 جی نئیں۔ یہوواہ دے گواہ ایہہ من دے نیں کہ ہر بندے نُوں اپنے لئی آپ فیصلہ کرنا چاہی دا اے۔ (‏یشوع 24:‏15‏)‏ اوہ ہر طرحاں دے لوکاں دی عزت کردے نیں فیر بھانویں اوہناں دا مذہب کوئی وی ہووے۔—‏ 1-‏پطرس 2:‏17‏۔‏